पद्मरागादिरत्नोत्पत्तिःपुरा कैलासशिखरे गह्वरेऽद्रिसुतेश्वरौ । (१।१)

चिरमास्तां क्रीडमानौ जिगूषू तौ परस्परम् ॥ (१।२)

तदा रेतः सूतरूपप्रवाहोऽभूत्तयोर्महान् । (२।१)

तत्प्रवाहप्रभावेन वेधिता दृषदोऽभवन् ॥ (२।२)

पद्मरागादिमणयो लोहा हेमादयस्तथा । (३।१)

गन्धकाद्याश्च पाषाणा दिव्या ओषधयो लताः ॥ (३।२)

नानावर्णा बहुविधा नानासिद्धिप्रदायकाः । (४।१)

पूर्वोक्तानां समस्तानां वज्रं श्रेष्ठतमं महत् ॥ (४।२)

तज्जातिलक्षणं देवि संस्कारं भजनं फलम् । (५।१)

क्रमाद्वक्ष्यामि ते देवि सावधानं शृणु प्रिये ॥ (५।२)

वज्रलक्षणं वज्रभेदांश्चद्विजन्मानश्च राजन्या ऊरव्या वृषलाः क्रमात् । (६।१)

शुभ्रशोणहरिद्राभाः काला नानाविधास्तथा ॥ (६।२)

स्त्रीपुंनपुंसकाश्चैव ज्ञातव्यास्ते क्रमात्प्रिये । (७।१)

शुक्लाः फलकसम्पूर्णा ज्योतिष्मन्तो महत्तराः ॥ (७।२)

पुमांसस्ते तु विज्ञेया रेखाबीजविवर्जिताः । (८।१)

बलाढ्याः सत्वसहिता लोहक्रमणहेतवः ॥ (८।२)

रसबन्धकराः क्षिप्रं सर्वेषां सिद्धिदायकाः । (९।१)

रसायनकराः स्थूला ह्यष्टसिद्धिप्रदायकाः ॥ (९।२)

षट्कोणबीजरेखाभिरुज्ज्वलास्ताः स्त्रियः स्मृताः । (१०।१)

देहज्योतिःप्रजनना भोगकान्तिसुखप्रदाः ॥ (१०।२)

दीर्घास्त्र्यस्राश्च तनवो निबोद्धव्या नपुंसकाः । (११।१)

क्षीणसत्वाः स्वल्पवीर्याः क्रामकाः सुरनायिके ॥ (११।२)

क्लीबा नपुंसके स्त्रीणां स्त्रियः सर्वहिता नराः । (१२।१)

जात्यानुरूपाश्चोत्साहं यथा सत्वं तथा गुणम् ॥ (१२।२)

यथा कान्तिस्तथा शीलं कुर्वन्त्येवं द्विजातयः । (१३।१)

वलीपलितरोगघ्नाः क्षत्रिया मृत्युहारिणः ॥ (१३।२)

देहस्थैर्यकरा वैश्या लोहानां वेधकारिणः । (१४।१)

वयःस्तंभकराः शूद्रा नानामयविनाशनाः ॥ (१४।२)

वज्रसंस्कारःवज्रसंस्कारमधुना कथयामि शृणु प्रिये । (१५।१)

श्यामा शमी मेघनादा वर्षाभूधूर्तकोद्रवाः ॥ (१५।२)

मेषशृङ्ग्याखुकर्णी च कुलुत्थं चाम्लवेतसः । (१६।१)

मदनागस्त्यनिर्गुण्डी चैतेषां स्वरसैर्युते ॥ (१६।२)

डोलायन्त्रे पाचयेच्च व्याघ्रीकन्दगतं दिनम् । (१७।१)

उद्धृत्य माहिषशकृल्लिप्तं कारीषवह्निना ॥ (१७।२)

दहेद्रात्रौ चतुर्यामं रात्र्यन्ते परिषेचयेत् । (१८।१)

हयमूत्रस्नुहीक्षीरकुलत्थकरसैस्तथा ॥ (१८।२)

पाचयेद्दाहयेदेवं सेचयेत्सप्तवारकम् । (१९।१)

एवं द्विजातिजातीयाः शोधिताः स्युश्च सिद्धिदाः ॥ (१९।२)

वज्ररसायनम्रसायनार्हं वक्ष्यामि वज्रभस्म सुरेश्वरि । (२०।१)

वैक्रान्तताप्यगन्धाश्मशिलामाक्षिकतालकम् ॥ (२०।२)

कान्तास्यटङ्कणक्षारकुलीरास्थीनि पेषयेत् । (२१।१)

स्तन्येन गोलके क्षिप्त्वा मूषायां निक्षिपेत् ततः ॥ (२१।२)

धमेद्दृढतरं पूर्वं पश्चाद्गजपुटे पचेत् । (२२।१)

तदेव वज्रमादाय तस्मिन्षोडशमात्रके ॥ (२२।२)

एकांशं पारदं तस्मिन् पक्वबीजेन जारितम् । (२३।१)

स्तन्येन मर्दयेत्तौ द्वौ पुनर् गजपुटे पचेत् ॥ (२३।२)

एवं तत्षोडशपुटाद्बीजजीर्णरसान्वितम् । (२४।१)

दृढं कुर्वीत तद्वज्रं भवेद्भस्म रसायनम् ॥ (२४।२)

शृणु रुद्राणि वक्ष्यामि दिव्यं वज्ररसायनम् । (२५।१)

पूर्वोक्तवत्प्रकुर्वीत देहशुद्ध्यादिकं विधिम् ॥ (२५।२)

शुभर्क्षे सुमुहूर्ते च चन्द्रताराबलान्विते । (२६।१)

शिवाग्निगुरुगोविप्रभिषजः पूजयेत्पुरा ॥ (२६।२)

ततः सेवेत तद्भस्म यवमात्रं वरानने । (२७।१)

कान्ताभ्रसत्त्वं सौवर्णभस्म गुञ्जैकमात्रकम् ॥ (२७।२)

त्रिफलामधुसर्पिर्भिः प्रातः शुद्धवपुर् लिहेत् । (२८।१)

एवं षोडशमासान्तम् एकद्वित्रिचतुष्टयम् ॥ (२८।२)

प्रतिमासं वर्धयित्वा यावद्यावकषोडशम् । (२९।१)

कान्तादिभस्मत्रितयं गुञ्जावृद्धिक्रमे तथा ॥ (२९।२)

द्विनिष्कं त्रिफलाचूर्णं सर्पिर्मधु यथासुखम् । (३०।१)

पूर्वोक्तवद्विधिं त्याज्यं प्रकुर्यान्मम वल्लभे ॥ (३०।२)

सेवितं पलमात्रं तु वज्रभस्म दिनं क्रमात् । (३१।१)

वलीपलितरोगघ्नं शतायुष्यं ददाति च ॥ (३१।२)

द्विपलं च सहस्रायुर् अयुतं त्रिपलं तथा । (३२।१)

चतुष्पलं लक्षमायुर् दशलक्षं च पञ्चमम् ॥ (३२।२)

कोट्यायुष्यं षट्पलं च सुरेन्द्रायुश्च सप्तमम् । (३३।१)

ब्रह्मायुष्यं चाष्टपलं विष्णुत्वं नवमं पलम् ॥ (३३।२)

रुद्रत्वं दशमं देवि ईश्वरत्वं ततः परम् । (३४।१)

सदाशिवत्वं द्वादश्यां वज्रभस्म ददात्यलम् ॥ (३४।२)

सर्वज्ञत्वं सर्वगत्वं स्वेच्छाविहरणं तथा । (३५।१)

वज्रौदनम्वज्रौदनं प्रवक्ष्यामि रसायनहितं परम् ॥ (३५।२)

पूर्ववच्छोधिते वज्रे मृदुकर्म समारभेत् । (३६।१)

मातृवाहकमध्यस्थं तित्तिरीमांसवेष्टितम् ॥ (३६।२)

तीक्ष्णकान्ताननरसैः पुनस् तत् परिवेष्टयेत् । (३७।१)

कुलत्थत्रिफलानीरकोद्रवेषु पृथक्पृथक् ॥ (३७।२)

त्रिदिनं पाचयेद् एवं तद्वज्रं वेष्टयेद्दलैः । (३८।१)

त्रिवर्षारूढताम्बुल्यास् तथा कार्पासकस्य वा ॥ (३८।२)

चेष्टितं जानुमध्यस्थं वज्रं यामद्वयान्मृदु । (३९।१)

वज्रौदनम् इदं प्रोक्तं वज्रद्रुतिर् अथोच्यते ॥ (३९।२)

वज्रद्रुतिःत्रिक्षारं चणकाम्लं च रामठं चाम्लवेतसम् । (४०।१)

ज्वालामुखी चेक्षुरकं स्थलकुम्भीरसेन च ॥ (४०।२)

पिष्ट्वा स्नुह्यर्कयोः क्षीरैस् तद्गोले मृदु हीरकम् । (४१।१)

निक्षिपेत्तच्च जम्बीरे दोलायन्त्रे त्र्यहं पचेत् ॥ (४१।२)

एवं कृते हीरकस्य द्रुतिर् भवति सूतवत् । (४२।१)

अन्यद्रुत्यतिदेशःपद्मरागादिरत्नानां द्रुतिर् एवं कृते भवेत् ॥ (४२।२)

अभ्रकादिमपाषाणा द्रवन्त्येवं कृते ध्रुवम् । (४३।१)

द्रवन्ति रसरत्नानि मौक्तिकं चाम्लवेतसम् ॥ (४३।२)

सप्ताहं भावयेद् घर्मे क्षिपेज्जम्बीरके ततः । (४४।१)

धान्यराशौ त्रिसप्ताहं पुटपाके द्रवत्यलम् ॥ (४४।२)

वज्रभस्मगुणाःवज्रभस्म यथा तद्वद् द्रुतिमार्दवयोरपि । (४५।१)

भवेद् भस्म वरारोहे जरादारिद्र्यमृत्युजित् ॥ (४५।२)

रसायने भवेत्सौख्यं भस्म द्रुतिमृदूद्भवम् । (४६।१)

रसायने तु स्त्रीपुंसौ क्रामणे तु नपुंसकः ॥ (४६।२)

षड्रसं हिमवीर्यं च सर्वामयविनाशनम् । (४७।१)

सर्वदोषप्रशमनं सर्वसौख्यं रसायनम् ॥ (४७।२)

विद्युत्प्रभां देहदार्ढ्यं स्वच्छं स्निग्धं च लेखनम् । (४८।१)

सौन्दर्यं बलमायुष्यं ग्रहालक्ष्मीविनाशनम् ॥ (४८।२)

शुद्धिर्मृदुद्रुतीभस्म वैक्रान्तस्य तु वज्रवत् । (४९।१)

स्वर्णं तद्भेदाःअथ वक्ष्ये श्रेष्ठतमं शृणु हेमरसायनम् ॥ (४९।२)

हेमोत्पत्तिः पुरा प्रोक्ता तथापि त्रिविधा भवेत् । (५०।१)

रसवेधाद् भवेच्चैकम् इतरत्क्षेत्रसम्भवम् ॥ (५०।२)

लोहसङ्करजं चान्यच्छ्रेष्ठमध्यकनीयसः । (५१।१)

क्रमेण पीतरक्ते च पीतरक्तं च वर्णतः ॥ (५१।२)

निकर्षछेददाहेषु कुङ्कुमश्वेतशोणितम् । (५२।१)

स्वर्णशुद्धिःदिव्यम् एवंविधं स्वर्णं पट्टकं कणशः कृतम् ॥ (५२।२)

हलिनीकञ्चुकीकन्दस्नुह्यर्काग्निकरञ्जकम् । (५३।१)

धूर्तगुञ्जेङ्गुदीचीरमूलतालाश्वगन्धिकाः ॥ (५३।२)

पिष्ट्वेन्द्रवारुणी चैषा मूलानि मथितेन वै । (५४।१)

लेपयेत्स्वर्णपट्टानि तापयेज्जातवेदसि ॥ (५४।२)

मूत्रे मथिते तैले कुलुत्थाम्भसि काञ्जिके । (५५।१)

जम्बीरार्कपयोमध्ये प्रत्येकं सप्तधा क्षिपेत् ॥ (५५।२)

लेपयेत्तापयेत्सिञ्च्याद्भूयो भूयोऽपि सप्तधा । (५६।१)

वल्मीकमृद्धूमसारम् इष्टकापटुगैरिकम् ॥ (५६।२)

पिष्ट्वा जम्बीरनीरेण लिप्त्वा पत्रं पुटीकृतम् । (५७।१)

चतुर्वर्णाभ्रकं ताप्यं दरदं तालकं शिलाम् ॥ (५७।२)

कान्तकङ्कुष्ठरसकविमलासूतभूलताः । (५८।१)

पिष्ट्वाम्लेन वटीः कुर्यान्निष्कमात्राः सुरेश्वरि ॥ (५८।२)

पलादूनं न कर्तव्यम् अधिकं च चतुष्पलात् । (५९।१)

पुटितं हेम शुल्बं च द्रावयेच्च समीकृतम् ॥ (५९।२)

तन्मध्ये तद्द्रवीभूते चैकैकां वटिकां क्षिपेत् । (६०।१)

स्वर्णाद् दशगुणा वाह्या वटिकाः शोषिताः क्रमात् ॥ (६०।२)

यावच्छेषं भवेत् स्वर्णं तावद् एवं धमेच्छनैः । (६१।१)

शुद्धं तज्जायते दिव्यं जरामरणरोगहृत् ॥ (६१।२)

स्वर्णभस्मचिञ्चापत्रनिभं स्वर्णं पत्रं शुद्धं च पारदम् । (६२।१)

एकान्तं मर्दयेद् अम्लैस् तत्पिष्टिम् अपि लेपयेत् ॥ (६२।२)

समगन्धकताप्याभ्यां पिष्टिं मूषागतां धमेत् । (६३।१)

षोडशांशं सूतभस्म हेमचूर्णे विनिक्षिपेत् ॥ (६३।२)

अम्लेन मर्दयेद् गाढं पचेत् तद्भूधरे पुटे । (६४।१)

एवं षोडशपर्यन्तं रसं प्रतिपुटं क्षिपेत् ॥ (६४।२)

निरुत्थं हेमभस्मेदं जायते सर्वसिद्धिदम् । (६५।१)

हेमरसायनम्विरेकवमनाद्यैश्च शुद्धदेहः शुभे दिने ॥ (६५।२)

अर्चयेदीशविप्राग्निगुरुवैद्यपुरःसरान् । (६६।१)

सेवेत शुद्धहृदयो दिव्यं हेमरसायनम् ॥ (६६।२)

कान्ताभ्रयोः सत्त्वभस्म चैकगुञ्जाप्रमाणकम् । (६७।१)

माषोन्मितं हेमभस्म वरामध्वाज्ययुग्लिहेत् ॥ (६७।२)

पूर्वोक्तवद् वज्रमासषोडशिकावधि । (६८।१)

पूर्वोक्तवद् विधिं त्याज्यं प्रकुर्वीत रसायनी ॥ (६८।२)

शृणु चित्रां गिरिसुते सेवां हेमरसायने । (६९।१)

पलमात्रोपयोगेन सर्वरोगविवर्जितः ॥ (६९।२)

ततो द्विपलयोगेन वलीपलितवर्जितः । (७०।१)

वाक्सिद्धिर्दिव्यदृष्टिश्च त्रिपलेन भवेत्प्रिये ॥ (७०।२)

चतुःपलोपयोगेन विषव्याघ्राहिभीर्न हि । (७१।१)

तथा पञ्चपलेनैव दिव्यात्मज्ञानिता भवेत् ॥ (७१।२)

देवि षट्पलयोगेन सिद्धसाध्यपदं भवेत् । (७२।१)

तथा सप्तपलेनापि विद्याधरपदं भवेत् ॥ (७२।२)

तथाष्टपलयोगेन स्वेच्छाविहरणे पटुः । (७३।१)

पलेन नवमेनापि चाष्टैश्वर्यगुणान्वितः ॥ (७३।२)

तथा दशपलेनापि महेन्द्रत्वम् अवाप्नुयात् । (७४।१)

एकादशपलैर् देवि ब्रह्मत्वं नात्र संशयः ॥ (७४।२)

द्वादशभिः पलैः कान्ते विष्णुत्वं समुपैति च । (७५।१)

त्रयोदशपलेनापि रौद्रं पदम् अवाप्नुयात् ॥ (७५।२)

तथा चतुर्दशपलैर् ऐश्वरं लभते पदम् । (७६।१)

पलैः पञ्चदशैर् एति सदाशिवपदं परम् ॥ (७६।२)

तथा स्यात् षोडशपलैः सच्चिदानन्दविग्रहः । (७७।१)

सर्वज्ञः सर्वकर्ता च हर्ता गोप्ता स सर्वगः ॥ (७७।२)

हेमद्रुतिःहेमद्रुतिं प्रवक्ष्यामि शृणु संप्रति पार्वति । (७८।१)

फलपांशुर् देवदाल्याः शक्रगोपोऽश्वलालिका ॥ (७८।२)

टङ्कणं जालिनीनीरैर् भावयेद्बहुधा प्रिये । (७९।१)

द्रावयेत्काञ्चनं तत्र वपेत्सूतसमा द्रुतिः ॥ (७९।२)

इमां द्रुतिं काञ्चनवद् भस्म सेवां च कल्पयेत् । (८०।१)

स्वादु तिक्तं कषायं च शीतम् उष्णं रसायनम् ॥ (८०।२)

हृद्यं कान्तिप्रदं शुद्धं चक्षुष्यं गुरु लेखनम् । (८१।१)

धृतिस्मृत्यायुरारोग्यनयवाक्सिद्धिदायकम् ॥ (८१।२)

क्षयोन्मादादिरोगाणां नाशनं दोषशान्तिकृत् । (८२।१)

स्निग्धं रुच्यं दीप्तिं वीर्यकृद्बलवर्धनम् ॥ (८२।२)

कान्तम् तद्भेदा लक्षणञ्चअथ कान्ते प्रवक्ष्यामि कान्तं कान्तरसायनम् । (८३।१)

दिव्या औषधयः सन्तु सर्वसिद्धिप्रदायिकाः ॥ (८३।२)

तेभ्यः कान्तं श्रेष्ठतमं वलीरुक्पलितापहम् । (८४।१)

कल्पान्ते ताण्डवं शंभुः शर्वाणीसहितः स्वयम् ॥ (८४।२)

उच्चण्डं व्यतनोत्तत्र संजाताः स्वेदबिन्दवः । (८५।१)

तत्र तत्र गतास्तेऽपि ह्ययस्कान्तत्वमाययुः ॥ (८५।२)

जाङ्गले बहवो जाता देशे साधारणे क्वचित् । (८६।१)

जलप्रायेऽस्ति वा नास्ति जात्या पञ्चविधाः स्मृताः ॥ (८६।२)

भ्रामकं चुम्बकं देवि कर्षकं द्रावकं तथा । (८७।१)

रोमकं च तथैकद्वित्रिचतुः सर्वतोमुखाः ॥ (८७।२)

तेषां पञ्चविधानां तु पीतं कृष्णं च शोणितम् । (८८।१)

मिश्रं पृथक्पृथक्तेषां क्रमात्स्युरधिदेवताः ॥ (८८।२)

ब्रह्मविष्ण्वीशभूतात्ममातृकाः परिकीर्तिताः । (८९।१)

पीतवर्णं स्पर्शवेधि कृष्णं श्रेष्ठं रसायने ॥ (८९।२)

रसबन्धकरं रक्तं मिश्रं सर्वरुजापहम् । (९०।१)

रोमकं ग्रहभीतिघ्नं द्रावकं चोत्तमोत्तमम् ॥ (९०।२)

उत्तमं मध्यमं नीचं कर्षकं चुम्बकं क्रमात् । (९१।१)

भ्रामकं लक्षणं वच्मि लोहं तु भ्रामयेत्ततः ॥ (९१।२)

तस्माद्भ्रामकमित्युक्तं चुम्बकं लोहचुम्बकम् । (९२।१)

कर्षकं कर्षयेल्लोहं द्रावकं द्रावयेद्यतः ॥ (९२।२)

स्फुटनाद्रोमजननं तद्रोमकमुदाहृतम् । (९३।१)

अत्युत्तमं बहुमुखं चतुःपञ्चास्यमुत्तमम् ॥ (९३।२)

मध्यमं स्याद्द्वित्रिमुखं नीचमेकमुखं भवेत् । (९४।१)

भ्रामकं चुम्बकं सर्वरोगाणां नाशने हितम् ॥ (९४।२)

कर्षकं द्रावकं श्रेष्ठं रसयोगे रसायने । (९५।१)

रसद्विपाङ्कुशमिदं कान्तं पञ्चविधं प्रिये ॥ (९५।२)

समीरणातपस्पृष्टं न ग्राह्यं तत्कदाचन । (९६।१)

हस्तद्वयं समुत्खाय कान्तं ग्राह्यं वरानने ॥ (९६।२)

कान्तसत्त्वपातनमादौ सम्पूज्य दुर्गां च गणेशं भैरवं प्रिये । (९७।१)

तीव्राग्निना दहेत्कान्तं सेचयेत्त्रिफलाम्बुना ॥ (९७।२)

तत्कान्तं चूर्णयेत्सूक्ष्मं काचसामुद्रटङ्कणैः । (९८।१)

लाक्षागुग्गुलुगुञ्जाभिर् ऊर्णाज्यमधुसिक्थकैः ॥ (९८।२)

शशास्थिक्षुद्रमीनैश्च भल्लाततिलकल्ककैः । (९९।१)

सर्जक्षारयवक्षाररालैश् चिरगुलैस् तथा ॥ (९९।२)

न्यङ्कुसैरिभदन्तीनां विषाणैश्च समांशकैः । (१००।१)

एतत्समांशं तत्कान्तमजाक्षीरेण मर्दयेत् ॥ (१००।२)

मेलयेत् पञ्चमाहिष्यैर् दध्याद्यैर् गोमयान्तकैः । (१०१।१)

श्लक्ष्णं पिष्ट्वा वटीः कुर्यात् कर्षमात्राः सुरेश्वरि ॥ (१०१।२)

कोष्ठीयन्त्रे वङ्कनाले खदिराङ्गारकैर् दृढम् । (१०२।१)

पञ्च पञ्च वटीस्तत्र निक्षिपेच्च शनैः शनैः ॥ (१०२।२)

त्रियाममथनादेव कान्तात्सत्वं पतेच्छुचि । (१०३।१)

तत्सर्वं कणशः कृत्वा काचाद्यैरौषधैः समैः ॥ (१०३।२)

मूषागतं धमेत्तीव्रमेवं धाम्यं त्रिधा प्रिये । (१०४।१)

एवं कृतं तु तत्कान्तसत्वं सत्त्वतमं भवेत् ॥ (१०४।२)

कान्तस्वरूपम्कान्तलोहस्य पात्रस्थजले तैलस्य बिन्दवः । (१०५।१)

न सर्पन्ति चणास्त्वेताः कृष्णाः स्युर् नात्र संशयः ॥ (१०५।२)

घृष्टहिङ्गोर्न गन्धः स्यात् क्षीरोर्मिः शिखराकृतिः । (१०६।१)

न कदाचिद् भुवि पतेच्छिवा मुञ्चति तिक्तताम् ॥ (१०६।२)

तल्लोहक्षिप्तम् उष्णाम्बु शीतलं भवति क्षणात् । (१०७।१)

लोहशुद्धिःऊनं पञ्चपलान्नैव नोर्ध्वं पञ्चदशात् पलात् ॥ (१०७।२)

त्रिफला षोडशपला तच्चतुर्गुणमम्बु च । (१०८।१)

क्वाथयेत् पादशेषं तु तस्मिन्पत्राणि ढालयेत् ॥ (१०८।२)

शशरक्तप्रलिप्तानि शोषयेदातपे पुनः । (१०९।१)

तापितानि पुनस्तक्रतैलसौवीरसर्पींषि ॥ (१०९।२)

क्षौद्रार्कक्षीरजम्बीरकुलत्थकरसेष्वपि । (११०।१)

लेपनं शोषणं दाहं सेचनं च क्रमात्प्रिये ॥ (११०।२)

प्रत्येकं सप्तधा कुर्याद् गिरिदोषं त्यजेदयः । (१११।१)

लोहसंस्कारमन्त्राःआदौ मन्त्रस्ततः कर्म कर्तव्यो मन्त्र उच्यते ॥ (१११।२)

उद्भवोद्भवशब्दः स्याच्चतुर्थ्यन्तो ऽमृतात् परः । (११२।१)

स्वाहान्तः प्रणवश्चादौ मन्त्रोऽयं मर्दने स्थितः ॥ (११२।२)

ॐ अमृतोद्भवोद्भवाय स्वाहा । (११३।१)

रक्षायै लोहनरयोरयमेकोद्भवो मनुः । (११३।२)

विना स्वाहापदं स्थाने फडन्तं यः समुच्चरेत् ॥ (११३।३)

ॐ अमृतोद्भवाय फट् प्रणवोर्ध्वं नमश्चण्डवज्रपाणय इत्यपि । (११४।१)

ततः परं महायक्षसेनाधिपतये नमः ॥ (११४।२)

द्विरुक्तं सुरुशब्दस्य महाविद्याबलाय च । (११५।१)

ततः स्वाहेति मन्त्रोऽयं बलिकर्मणि कीर्तितः ॥ (११५।२)

ॐ नमश्चण्डवज्रपाणये महायक्षसेनाधिपतये नमः सुरु सुरु महाविद्याबलाय स्वाहा । (११६।१)

लोहभस्मएतानि लोहपत्राणि सूक्ष्मं संचूर्णयेत्ततः । (११६।२)

अयःपात्रे कान्तचूर्णं निक्षिप्य त्रिफलारसैः ॥ (११६।३)

सेचयेत्तदयोदर्व्या चालयन्पाचयेदिति । (११७।१)

पिण्डीभूतं तदादाय मृत्तिकापटले शुभे ॥ (११७।२)

संपुटे निक्षिपेत्सम्यक् षोडशाङ्गुलगर्तके । (११८।१)

निधायारण्यकारीषमध्यगं कारिषं दहेत् ॥ (११८।२)

अहोरात्रं प्रकुर्वीत वातातपविवर्जितम् । (११९।१)

पुनः प्रातः समादाय वराक्वाथेन मर्दयेत् ॥ (११९।२)

स्थालीसंपुटयोरेवं कुर्यात्पाकपुटैः क्रमात् । (१२०।१)

एवं विदध्यात्सप्ताहं तस्मिन्क्षेप्यं च हिङ्गुलम् ॥ (१२०।२)

लोहस्य षोडशांशं च नारीस्तन्येन मर्दयेत् । (१२१।१)

स्थाल्यां पाकं संपुटे च पुटं कुर्वीत षोडश ॥ (१२१।२)

निरुत्थं तद्भवेद्भस्म देवि योज्यं रसायने । (१२२।१)

लोहभस्मनोऽमृतीकरणम्यावत्स्यात्त्रिफला तस्माद् भवेद्वारि चतुर्गुणम् ॥ (१२२।२)

अष्टावशेषं क्वाथयेत् क्वाथस्य सदृशं घृतम् । (१२३।१)

घृततुल्यं कान्तभस्म ताम्रपात्रे पचेत्प्रिये ॥ (१२३।२)

लोहदर्व्या प्रचलयन् यावच्छुष्यति तद्रसः । (१२४।१)

तावन्मृद्वग्निना पाच्यं लोहतुल्यां सितां क्षिपेत् ॥ (१२४।२)

अमृतीकरणमित्युक्तं सर्वयोगवहं परम् । (१२५।१)

लोहपाकभेदाःलोहपाकं प्रवक्ष्यामि तद्भवेत्त्रिविधं प्रिये ॥ (१२५।२)

मृदुमध्यखराः प्रोक्ता जम्बीरसदृशो मृदुः । (१२६।१)

मध्यमः पिण्डसदृशो वालुकासदृशः खरः ॥ (१२६।२)

कान्तलोहरसायनसेवाक्रमःअथ सेवां प्रवक्ष्यामि कान्तलोहस्य भस्मनः । (१२७।१)

सुमुहूर्ते शुभदिने पूजितेशादिदेवतः ॥ (१२७।२)

सेवेत सिद्धिदं दिव्यं कान्तभस्म रसायनम् । (१२८।१)

शुद्धदेहो विरेकाद्यैरभ्रभस्म पुरा प्रिये ॥ (१२८।२)

मासमेकं तु सेवेत तस्माच्छुद्धवपुर्भवेत् । (१२९।१)

माषमात्रं कान्तभस्म गुञ्जामात्राभ्रभस्म च ॥ (१२९।२)

द्विनिष्कं त्रिफलाचूर्णं मधुसर्पिःसमन्वितम् । (१३०।१)

लिहेत् प्रातर् विशुद्धात्मा स्नानदानादिकर्मभिः ॥ (१३०।२)

अनुपेयं ततो लोहाद् गव्यं षष्टिगुणं पयः । (१३१।१)

धारोष्णं तदभावे तु कृत्वा क्षीरं समाम्बुकम् ॥ (१३१।२)

यावत्क्षीणजलं क्वाथ्यं क्षीरं चानुपिबेत्प्रिये । (१३२।१)

तदसात्म्ये वराक्वाथं गुडूच्या वा कषायकम् ॥ (१३२।२)

इत्येकमासं सेवेत क्रमाद्द्वित्रिचतुष्टयम् । (१३३।१)

प्रतिमासं माषगुञ्जावृद्धिः कान्ताभ्रभस्मनोः ॥ (१३३।२)

एवं षोडशमासान्तं वृद्धिः षोडशमात्रकाः । (१३४।१)

पूर्वोक्तवद्विधिं त्याज्यं कुर्यात्सिद्धिमवाप्नुयात् ॥ (१३४।२)

अस्य वत्सरयोगेन क्षुद्रामयविनाशनम् । (१३५।१)

एतद्द्विवर्षयोगेन महारोगप्रणाशनम् ॥ (१३५।२)

त्रिवर्षात्पलितं हन्ति चतुर्वर्षाद्वलिं हरेत् । (१३६।१)

पञ्चमादपमृत्युघ्नं षष्ठे स्यादायुषः शतम् ॥ (१३६।२)

सप्ताब्दे सूर्यवद्दीप्तिं दशमे सिद्धिमेलनम् । (१३७।१)

वैद्याधरं समाप्नोति वर्षे चैकादशे प्रिये ॥ (१३७।२)

त्रयोदशाब्दे देवत्वम् इन्द्रत्वं च चतुर्दशे । (१३८।१)

तथा पञ्चदशाब्दे च सर्वलोकप्रियो भवेत् ॥ (१३८।२)

षोडशाब्देऽष्टसिद्धिः स्यात्सत्यं सत्यं महेश्वरि । (१३९।१)

कान्तद्रुतिक्रमःसुवर्णद्रुतिवत्कान्तद्रुतिः स्यात्पूर्ववत्प्रिये ॥ (१३९।२)

कान्तद्रुतिर्भवेद्भस्म कान्तलोहस्य भस्मवत् । (१४०।१)

लोहभेदास्तद्गुणाश्चकिट्टं मुण्डं तथा तीक्ष्णं कान्तं पूर्वोत्तरोत्तरम् ॥ (१४०।२)

गुणाढ्याः स्युर् दशशतसहस्रं लक्षकं क्रमात् । (१४१।१)

शताधिको भवेत् कान्तस्त्वौषधानां रसायनम् ॥ (१४१।२)

त्रिदोषशमनं दिव्यं सर्वरोगापहारकम् । (१४२।१)

कान्तिं रुच्यं च चक्षुष्यं हृद्यम् आयुष्यदं शुचि ॥ (१४२।२)

स्थैर्यं दार्ढ्यं च धातूनां बलवच्च रसायनम् । (१४३।१)

अभ्रकोत्पत्तिः तद्भेदा लक्षणञ्चअथाभ्रकं प्रवक्ष्यामि तदुत्पत्त्यादिकं क्रमात् ॥ (१४३।२)

पुरादिशक्तिर् भवती श्वेतद्वीपे मनोरमे । (१४४।१)

इन्द्राणीकमलावाणीगायत्रीप्रमुखैः सह ॥ (१४४।२)

अरुन्धतीमुखैर् दिव्यमुनिदारैश्च संयुता । (१४५।१)

संचिक्रीडे महामाया चित्सदानन्दरूपिणी ॥ (१४५।२)

आनन्दाश्रुकणाः क्षौमे न्यपतन्बहवो दृशोः । (१४६।१)

तदा ऋतुमती जाता ततः स्वादु सरित्पतेः ॥ (१४६।२)

तीरे त्यक्त्वा च तद्वस्त्रं स्नात्वा कैलासमाययौ । (१४७।१)

वात्यावशेन तद्वस्त्रं क्षीराब्धौ न्यपतत्तदा ॥ (१४७।२)

देवासुरैर् मथ्यमानात् तस्मात् क्षीराम्बुधेस्तदा । (१४८।१)

समभूत् तद्रजोवस्त्रं चतुर्धाभ्रकसंज्ञकम् ॥ (१४८।२)

कृष्णाभ्रकं साञ्जनाभं पीतं देव्यङ्गलेपनात् । (१४९।१)

रक्तं तस्य रजोरूपं क्षौमं श्वेतम् अभूदिति ॥ (१४९।२)

चतुर्विधं तदालोक्य रसबन्धनकारणम् । (१५०।१)

रसायनं रोगहरं सर्वसिद्धिप्रदायकम् ॥ (१५०।२)

इत्यूचिरे सुराः सर्वे साक्षादमृतसंमितम् । (१५१।१)

श्वेतं रजतकार्येषु त्रयमन्यत्सुवर्णके ॥ (१५१।२)

सर्वं रसायने योज्यं रक्तपीतसितासितम् । (१५२।१)

श्वेताच्छतगुणं रक्तं रक्तात्पीतं सहस्रकम् ॥ (१५२।२)

पीताल्लक्षगुणं कृष्णं ज्ञेयं लोहे रसायने । (१५३।१)

प्रत्येकं तानि जायन्ते चतुर्धा जातितः क्रमात् ॥ (१५३।२)

पिनाकं दर्दुरं नागं वज्रं चेति चतुर्विधम् । (१५४।१)

वज्रं समाहरेन्मुख्यं त्रीण्यन्यानि विवर्जयेत् ॥ (१५४।२)

पिनाकमग्निनिक्षिप्तं मुञ्चते दलसंचयम् । (१५५।१)

तत्सेवितं मलं बद्ध्वा मारयेद्रोगकारणम् ॥ (१५५।२)

दर्दुरं वह्निनिक्षिप्तं कुरुते भेकनिःस्वनम् । (१५६।१)

तदुत्पादयते रोगमश्मर्याख्यम् असाध्यकम् ॥ (१५६।२)

नागमग्नौ विनिक्षिप्तं फूत्कारं वितनोति यत् । (१५७।१)

तत्सेवया महाकुष्ठं मण्डलाख्यं भवेद्ध्रुवम् ॥ (१५७।२)

ग्राह्यलक्षणमेतत्त्रितयसेवाभिर्जायते रोगसंचयः । (१५८।१)

वह्निस्थितं तु वज्राभ्रं विकारान्नाचरेत्क्वचित् ॥ (१५८।२)

तस्माद्वज्राभ्रकं सेव्यं वलीपलितमृत्युजित् । (१५९।१)

राजहस्तात्परं ग्राह्यं खनित्रेन तदाकरात् ॥ (१५९।२)

वज्राभ्र:: परीक्षा:: बद् क़ुअलित्य्भारयुक्तं पृथुदलं स्निग्धं मोच्यदलं सुखम् । (१६०।१)

काचचन्द्रककिट्टाभं न योज्यं तत्कदाचन ॥ (१६०।२)

धान्याभ्रकम्पूर्वोक्तलक्षणयुतं वज्राभ्रं धमयेद् दृढम् । (१६१।१)

अर्कक्षीरारनाले च गोमूत्रे त्रिफलारसे ॥ (१६१।२)

मेघनादरसे चेत्थं निक्षिपेत्तेषु तत्त्रिधा । (१६२।१)

सम्यग्दलं मोचयित्वा मेघनादाम्लयोर् द्रवैः ॥ (१६२।२)

भावयेद् आतपे तीव्रे श्लक्ष्णं पिष्ट्वाथ वस्त्रके । (१६३।१)

निक्षिप्य धान्यसहितं बद्ध्वा तत्काञ्जिके पुनः ॥ (१६३।२)

कराभ्यां घट्टयेद् गाढं सूक्ष्मं तत्काञ्जिके स्रवेत् । (१६४।१)

तत् कुर्याद् आतपे शुष्कम् एतद् धान्याभ्रकं स्मृतम् ॥ (१६४।२)

अभ्रकसत्वपातनम्कान्तवत्सत्वपतनमभ्रकस्य भवेत्प्रिये । (१६५।१)

हेम रूप्यं माक्षिकं च वैक्रान्तं मधु टङ्कणम् ॥ (१६५।२)

गुञ्जा गुडं घृतं भल्लम् एकैकं दशनिष्ककम् । (१६६।१)

पिष्ट्वार्कपयसा कार्या वटिकाः कर्षमात्रकाः ॥ (१६६।२)

शतनिष्के ऽभ्रसत्वे ऽस्मिन् विद्रुते वटिकाः क्षिपेत् । (१६७।१)

एकैकघटिकामात्रं वट्यः क्षेप्याः शनैः शनैः ॥ (१६७।२)

यावत् तत् सत्त्वशेषं स्यात् तावद् धाम्यम् अतन्द्रितैः । (१६८।१)

इदम् अभ्रकसत्त्वं तु देवयोग्यं रसायनम् ॥ (१६८।२)

अभ्रकसत्वभस्मचूर्णीकृत्याभ्रसत्त्वं तन्मेघनादः पुनर्नवा । (१६९।१)

सूरणोऽर्कदलं मुस्ता जम्बीरस्तालमूलिका ॥ (१६९।२)

त्रिफला वज्रवल्ली च शाङ्गेरी मरिचं तथा । (१७०।१)

अम्लवर्गो वटजटा कार्पासमुनिशिग्रुकम् ॥ (१७०।२)

एकवीरा कोकिलाक्षी सर्पाक्षी तुलसी वचा । (१७१।१)

पेटारी वाकुची कन्या चैकैकस्य रसैः पृथक् ॥ (१७१।२)

मर्दनं घर्मपाकं च स्थालीपाकं पुटं क्रमात् । (१७२।१)

एकैकाहं प्रकुर्वीत ततो दरदमाक्षिके ॥ (१७२।२)

सत्वषोडशभागेन योज्यं पेष्यं वरारसैः । (१७३।१)

पुटषोडशपर्यन्तं कुर्यादेवं हि भैरवि ॥ (१७३।२)

पूर्वोक्तवत् स्याद् अमृतीकरणं कान्तसत्ववत् । (१७४।१)

निरुत्थं भस्म भवति चायुरारोग्यदायकम् ॥ (१७४।२)

अभ्रकसत्वसेवाक्रमःअथ सेवां प्रवक्ष्यामि घनसत्वरसायने । (१७५।१)

वमनादिविशुद्धात्मा पूजितस्वेष्टदेवतः ॥ (१७५।२)

गुञ्जामात्राभ्रसत्वं च द्विनिष्कं त्रिफलारजः । (१७६।१)

मध्वाज्याभ्यां लिहेत्प्रातरेकमासं भजेदिति ॥ (१७६।२)

एवं षोडशमासान्तं मासवृद्धिक्रमेण वै । (१७७।१)

गुञ्जावृद्धिर्भवेद्देवि सेवेतेत्थं रसायनम् ॥ (१७७।२)

पूर्वोक्तवद्विधिं त्याज्यं प्रकुर्वीत सुरेश्वरि । (१७८।१)

वर्षेण देहशुद्धिः स्याद्द्विवर्षादामयाच्च्युतः ॥ (१७८।२)

त्रिवत्सरान्महारोगनाशनं भवति ध्रुवम् । (१७९।१)

चतुर्वर्षान् महाकान्तिबलवीर्यप्रवर्धनम् ॥ (१७९।२)

पञ्चवर्षाद्देहदार्ढ्यं षष्ठे वाक्सिद्धिमेति हि । (१८०।१)

सप्तमे दिव्यदृष्टिः स्यादष्टमे विषनाशनम् ॥ (१८०।२)

नवाब्दे सिद्धतामेति ततो विद्याधरो भवेत् । (१८१।१)

एकादशाब्दे त्विन्द्रत्वं द्वादशे ब्रह्मता भवेत् ॥ (१८१।२)

त्रयोदशाब्दे विष्णुत्वं रुद्रत्वं च चतुर्दशे । (१८२।१)

ईशत्वं पञ्चदशके षोडशाब्दे सदाशिवः ॥ (१८२।२)

अणिमादियुतः स्वैरी सर्वज्ञः सर्वकृद्भवेत् । (१८३।१)

अभ्रकद्रुतिःअथाभ्रकद्रुतिं वक्ष्ये कञ्चुकीकन्द एव च ॥ (१८३।२)

कपितिन्दौ केशतैले प्रत्येकं तु त्रिधा वपेत् । (१८४।१)

मूषायां द्रावयित्वा तदभ्रसत्वद्रुतिर्भवेत् ॥ (१८४।२)

भस्मीकुर्यात्प्रयत्नेन द्रुतिमभ्रकसत्ववत् । (१८५।१)

अभ्रकगुणाःषड्रसः सर्वरोगघ्नस्त्रिदोषशमनः परः ॥ (१८५।२)

वीर्यायुष्यबलप्रज्ञाकान्तिरूपविवर्धनः । (१८६।१)

वपुर्दार्ढ्यस्थैर्ययुक्तो वलीपलितमृत्युहा ॥ (१८६।२)

रुच्यो वृष्यो लघुः शीतो मेध्यः स्निग्धो रसायनम् । (१८७।१)

अभ्रकं दीपनं ग्राहि श्रेष्ठं पारदबन्धनम् ॥ (१८७।२)

पक्षजित्सूतराजस्य भस्मीभूताभ्रसत्वकः । (१८८।१)

अभ्रस्य पत्रं रोगघ्नं तच्च सत्वं दृढंकरम् ॥ (१८८।२)

चेतसत्वं मृदु हरेद्द्रुतिस्तांश्च दरिद्रताम् ॥ (१८९।१)