विशेषजारणाक्रमःश्रीभैरवी । (१।१)

सामान्यजारणा प्रोक्ता त्वया पूर्वं सदाशिव । (१।२)

विशेषजारणं ब्रूहि यथा जानाम्यहं प्रभो ॥ (१।३)

श्रीभैरवः । (२।१)

शृणु देवि वक्ष्यामि भूचराख्यं तु जारणम् । (२।२)

भूचरी जारणाकृष्णं पीतं तथा रक्तं शुल्बे तीक्ष्णे च मेलयेत् ॥ (२।३)

शुल्बं शुद्धं यदा जीर्णं द्वाविंशतिगुणं मते । (३।१)

गन्धनागं ततोऽर्धं तु क्रमेणैव तु मेलयेत् ॥ (३।२)

हेम्ना तु सह दातव्यं सूतकैकेन षोडश । (४।१)

गन्धनागं यदा जीर्णं तदा बद्धो भवेद् रसः ॥ (४।२)

हेम्नि जीर्णे ततोऽर्धेन मृतलोहेन रञ्जयेत् । (५।१)

गन्धकेन हतं शुल्बं माक्षिकं दरदायसम् ॥ (५।२)

पुटेन मारयेच्छुद्धं हेम दद्यात्तु षड्गुणम् । (६।१)

सूतके हेमबीजं च यदा जीर्णं चतुर्गुणम् ॥ (६।२)

बद्धरागं विजानीयाद्धेमाभो जायते रसः । (७।१)

सारणायन्त्रमध्यस्थं तेनैव सह सारयेत् ॥ (७।२)

त्रिभागं सारितं कृत्वा पुनस्तत्रैव जारयेत् । (८।१)

जारितः सारितश्चैव पुनर्जारितसारितः ॥ (८।२)

सप्तशृङ्खलिकायोगात् कोटिवेधी भवेद्रसः । (९।१)

भूचरी जारणा प्रोक्ता खेचरीं जारणां शृणु ॥ (९।२)

खेचरी जारणाहीनरागानि रत्नानि रसोच्छिष्टानि कारयेत् । (१०।१)

कटुतुंबस्य बीजानि तस्यार्धेन तु दापयेत् ॥ (१०।२)

महाजारसमायुक्तं कल्कं कुर्याद् विचक्षणः । (११।१)

वज्रमूषामुखे चैव तन्मध्ये स्थापयेद् रसम् ॥ (११।२)

कतकं कनकं चैवम् एकीकृत्य विमर्दयेत् । (१२।१)

पद्मरागप्रलेपं तु रसे ग्रासं तु दापयेत् ॥ (१२।२)

भक्षितव्यं प्रयत्नेन नत्वा च गुरुदेवयोः । (१३।१)

सर्वसिद्धान् नमस्कृत्य देवताश्च विशेषतः ॥ (१३।२)

मूर्च्छाङ्गदाहश्च ततो जायते नात्र संशयः । (१४।१)

आत्मानमुत्थितं पश्येद् दिव्यदेहो महाबलः ॥ (१४।२)

शङ्खकाहलनिर्घोषैः सिद्धविद्याधरैः सह । (१५।१)

इच्छया विचरेल्लोकान् कामरूपी विमानगः ॥ (१५।२)

देवा वै यत्र लीयन्ते सिद्धस्तत्रैव लीयते । (१६।१)

अन्यो जारणाप्रकारःपुनरन्यं प्रवक्ष्यामि जारणायोगम् उत्तमम् ॥ (१६।२)

सुघृष्टं पातितं सूतं सर्वदोषोज्झितं ततः । (१७।१)

शाकपल्लवसारेण विष्णुक्रान्तारसेन च ॥ (१७।२)

पालाशपुष्पतोयेन भावितं गन्धकं समम् । (१८।१)

समं कृष्णाभ्रसत्वं च रसकं चाष्टकं गुणम् ॥ (१८।२)

तीक्ष्णशुल्बोरगं चैव कूर्मयन्त्रेण जारयेत् । (१९।१)

काञ्चनं जारयेत् पश्चाद् बिडयोगेन पार्वति ॥ (१९।२)

ततः सिद्धं विजानीयाद् द्वैधं शुल्वस्य दापयेत् । (२०।१)

कर्मसंख्याप्रमाणेन नागो भवति काञ्चनम् ॥ (२०।२)

अतः परं प्रवक्ष्यामि जारणाक्रमम् उत्तमम् । (२१।१)

बीजचूर्णानि तैलेन भावयित्वा पुनः पुनः ॥ (२१।२)

षोडशांशेन तं ग्रासमङ्गुल्या मर्दयेच्छनैः । (२२।१)

आर्द्रकादि ततो योगाद् दातव्यं षोडशांशतः ॥ (२२।२)

भूर्जे दत्त्वा ततो देयं डोलायन्त्रे विनिक्षिपेत् । (२३।१)

अहोरात्रेण तद्बीजं सूतको ग्रसति प्रिये ॥ (२३।२)

समुद्धृत्य रसं देवि खल्वे संमर्दयेत् ततः । (२४।१)

ततो यन्त्रे विनिक्षिप्य दिवारात्रं दृढाग्निना ॥ (२४।२)

तप्तं समुद्धृतं यन्त्रात् तप्तखल्वे विमर्दयेत् । (२५।१)

मर्दयित्वार्द्रके पिण्डे क्षिप्त्वाथ त्रिपुटं दहेत् ॥ (२५।२)

ततो गर्भे पतत्याशु जरते तत्सुखेन तु । (२६।१)

डोलायन्त्रे ततो दद्याद् आर्द्रपिण्डेन संयुतम् ॥ (२६।२)

तृतीयदिवसे सूतो जरते ग्रसते ततः । (२७।१)

समजीर्णं ततो यावत् डोलायन्त्रे विचक्षणः ॥ (२७।२)

पश्चात्कच्छपयन्त्रेण समजीर्णं तु पार्वति । (२८।१)

ताम्रांशद्वादशांशेन कच्छपेन तु जारयेत् ॥ (२८।२)

प्राग्वद् आर्द्रकयोगं च गर्भद्रावणम् एव च । (२९।१)

पश्चात् तं देवि निक्षिप्य पुटं दद्याद् विचक्षणः ॥ (२९।२)

अष्टांशेन ततो ग्रासं गर्भद्रावं च पूर्ववत् । (३०।१)

कन्दोदरे सूरणस्य तं विनिक्षिप्य सूतकम् ॥ (३०।२)

पुटयेद्वार्तिकस्तावत् यावत् कन्दो न दह्यते । (३१।१)

पादांशेन तु मूषायां ग्रासः सूते विधीयते ॥ (३१।२)

पूर्ववच्च बिडं दद्याद्गर्भद्रावणमेव च । (३२।१)

एवं चतुर्गुणे जीर्णे सूतको बलवान् भवेत् ॥ (३२।२)

ततः शलाकया ग्रासमग्निस्थो ग्रसते रसः । (३३।१)

ततो रत्नानि जार्याणि वक्ष्यमाणक्रमेण तु ॥ (३३।२)

अभ्रकं भ्रामकं चैव शङ्खनाभिं तथैव च । (३४।१)

रसानुपरसान्दत्त्वा महाजारसमन्वितम् ॥ (३४।२)

वज्रकन्दलतां ब्राह्मीमेषशृङ्ग्यमृतायसम् । (३५।१)

कटुतुम्बस्य बीजानि मृतलोहानि पाचयेत् ॥ (३५।२)

सर्वाणि समभागानि शिखिशोणितमर्दितम् । (३६।१)

तावत्तं मर्दयेत्प्राज्ञो यावत्कर्म दृढं भवेत् ॥ (३६।२)

मूषा मल्लाकृतिश्चैव कर्तव्याच्छादनैः सह । (३७।१)

तन्मध्ये स्थापयेत्सूतमधोवातेन धामयेत् ॥ (३७।२)

आदौ तावत्प्रकर्तव्यं वज्रमौषधलेपितम् । (३८।१)

गृह्यते नात्र सन्देहो यथा तीव्रहुताशने ॥ (३८।२)

कुलिशादि भवेद् दग्धं करीषा तेन मर्दयेत् । (३९।१)

यावदेकादशगुणं कुलिशं जारयेद्बुधः ॥ (३९।२)

संदग्धा शङ्खनाभिश्च मातुलुङ्गरसप्लुता । (४०।१)

मुक्ताफलं ततो देयं वज्रजीर्णे तु सूतके ॥ (४०।२)

अनेन क्रमयोगेन ह्येकादशगुणं भवेत् । (४१।१)

केवलं शिखिपित्तं च नीलीनिर्यासमिश्रितम् ॥ (४१।२)

नीलोत्पलानि लिप्तानि निक्षिप्तानि तु सूतके । (४२।१)

रसः पिबेन्महारागान् हीनरागान् परित्यजेत् ॥ (४२।२)

रत्नानि शिखिपित्तं च महारत्नसमन्वितम् । (४३।१)

सद्रत्नं लेपयेत् तेन प्रक्षिपेद् रसमध्यतः ॥ (४३।२)

रजनी चैव कङ्कुष्ठं ब्रह्मनिर्यासभावितम् । (४४।१)

जारणं पुष्परागस्य तेनैव सह दापयेत् ॥ (४४।२)

बहुरत्नेषु जीर्णेषु भृङ्गराजेषु सुव्रते । (४५।१)

रसेन्द्रो दृश्यतां देवि नीलपीतारुणच्छविः ॥ (४५।२)

धूमवेधीरसःशुद्धानि हेमपत्राणि शतांशेनानुलेपयेत् । (४६।१)

पुटेन मारयेदेतदिन्द्रगोपनिभं भवेत् ॥ (४६।२)

संस्पर्शाद् वेधयेत् सर्वम् इदं हेम मृतं प्रिये । (४७।१)

त्रिभागं सूतकेन्द्रस्य तेनेव सह कारयेत् ॥ (४७।२)

मूषामध्ये स्थिते तस्मिन् पुनस्तेनैव जारयेत् । (४८।१)

धूमवेधी भवेद्देवि पुनः पुनः प्रसारितः ॥ (४८।२)

अनेन क्रमयोगेन यदि जीर्णा त्रिशृङ्खला । (४९।१)

वेधयेन्नात्र सन्देहो गिरिपाषाणभूतलम् ॥ (४९।२)

पार्श्वे ज्योतिः प्रदृश्येत ऊर्ध्वं दृश्येत तेन वै । (५०।१)

भूचरं तं विजानीयाद् रसेन्द्रं नात्र संशयः ॥ (५०।२)

तेनाश्रान्तगतिर् देवि योजनानां शतं व्रजेत् । (५१।१)

दिव्यतेजा महाकायो दिव्यदृष्टिर् महाबलः ॥ (५१।२)

सर्वरोगविनिर्मुक्तो जीवेच्चन्द्रार्कतारकम् । (५२।१)

तस्य मूत्रपुरीषं तु सर्वलोहानि विध्यति ॥ (५२।२)

अन्ये वेधप्रकाराःसमजीर्णेन वज्रेण हेम्ना च सहितेन च । (५३।१)

अग्निस्थो जारयेल्लोहान् बन्धम् आयाति सूतकः ॥ (५३।२)

सारयेत्तेन बीजेन सहस्रमपि वेधयेत् । (५४।१)

सारितं जारयेत्पश्चात् लेप्यं क्षेप्यं सहस्रतः ॥ (५४।२)

सारयेत्तेन बीजेन लक्षवेधम् अवाप्नुयात् । (५५।१)

अनेन क्रमयोगेन कोटिवेधी भवेद्रसः ॥ (५५।२)

केवलं तु यदा वज्रं समजीर्णं तु कारयेत् । (५६।१)

बद्धः सूतस्तदा ज्ञेयो निष्कम्पो निरुपद्रवः ॥ (५६।२)

अग्निस्थो जायते सूतः शलाकां ग्रसते क्षणात् । (५७।१)

हठाग्निना धाम्यमानो ग्रसते सर्वमादरात् ॥ (५७।२)

ग्रसते जरते सूतम् आयुर्द्रव्यप्रदायकः । (५८।१)

मूषास्थं धमयेत् सूतं हठाग्नौ नैव कम्पयेत् ॥ (५८।२)

जारयेत् सर्वरत्नानि बद्धः खेचरतां नयेत् । (५९।१)

अष्टलोहे ऽष्टगुणिते जीर्णे स्याद्रसबन्धनम् ॥ (५९।२)

लोहानि सर्वांस्त्रिगुणं त्रिगुणं कनकं तथा । (६०।१)

धूमावलोके वेधी स्यात् भवेन्निर्वाणदोऽम्बरः ॥ (६०।२)

आदावष्टगुणं जार्यं व्योमसत्त्वं महारसे । (६१।१)

समं हेमदशांशेन वज्ररत्नानि जारयेत् ॥ (६१।२)

समं च जारयेद् वज्रं तदासौ खेचरो रसः । (६२।१)

क्रमे प्रदक्षिणावर्तः कोटिवेधी च जायते ॥ (६२।२)

जीर्णद्रव्यमानभेदाद्वेधे विशेषःसमे तु पन्नगे जीर्णे दशवेधी भवेद्रसः । (६३।१)

द्विगुणे शतवेधी स्यात् सहस्रं त्रिगुणे भवेत् ॥ (६३।२)

चतुर्गुणेऽयुतं देवि क्रमेणानेन वर्धयेत् । (६४।१)

उत्तरोत्तरवृद्ध्या तु जारयेत् तत्र पन्नगम् ॥ (६४।२)

कुटिलं पन्नगं जार्यं नवसंख्याक्रमेण तु । (६५।१)

दत्त्वा क्रमेण देवेशि कोटिवेधी भवेद्रसः ॥ (६५।२)

गन्धकादिमपाषाणे षड्गुणे जीर्णतां गते । (६६।१)

रोगहर्ता रसः स्यात्तु समुखे तवदा भवेत् ॥ (६६।२)

तस्मिन् शतगुणे जीर्णे रुग्जरामृत्युहा भवेत् । (६७।१)

अभ्रकादिमपाषाणसत्त्वान्यात्मसमं ग्रसन् ॥ (६७।२)

रुग्जरा मरणं जित्वा शतवेधी रसो भवेत् । (६८।१)

शतायुर्द्विगुणे जीर्णे सूतः साहस्रवेधकः ॥ (६८।२)

चतुर्गुणे सहस्रायुः पारदो ऽयुतवेधकः । (६९।१)

रसश्चाष्टगुणे जीर्णे लक्षायुर् लक्षवेधकः ॥ (६९।२)

ब्रह्मायुः षोडशगुणे कोटिवेधी भवेद् रसः । (७०।१)

द्वात्रिंशद्गुणिते जीर्णे खेचरत्वादिसिद्धिदः ॥ (७०।२)

विष्णोर् आयुर्बलं दत्ते पारदः स्पर्शवेधकः । (७१।१)

चतुःषष्टिगुणे जीर्णे शिवायुः शब्दवेधकः ॥ (७१।२)

षड्गुणाभ्रकजारणेन सर्वदोषनाशःरसस्य सर्वदोषास्तु षड्गुणेनाभ्रकेण तु । (७२।१)

जीर्णेन नाशम् आयान्ति नात्र कार्या विचारणा ॥ (७२।२)

तदा ग्रसति लोहानि त्यजेच्च गतिम् आत्मनः । (७३।१)

पञ्चावस्थाधूमश्चिटिचिटिश्चैव मण्डूकप्लुतिरेव च ॥ (७३।२)

सकम्पश्च विकम्पश्च पञ्चावस्था रसस्य तु । (७४।१)

समजीर्णो भवेद्बालो यौवनस्थश्चतुर्गुणः ॥ (७४।२)

वृद्धः षड्गुणजीर्णस्तु सर्वकर्मकरः शुभः । (७५।१)

जारणे क्रमःगन्धकं जारयेदादौ सर्वसत्त्वान्यतः परम् ॥ (७५।२)

ततः सर्वाणि लोहानि द्वन्द्वानि विविधानि च । (७६।१)

पक्वबीजानि रत्नानि द्रुतिसत्त्वे च जारयेत् ॥ (७६।२)

चतुःषष्ट्यंशके पूर्वं द्वात्रिंशांशे तृतीयकः । (७७।१)

तृतीयः षोडशांशे तु चतुर्थश्चाष्टमेन च ॥ (७७।२)

पञ्चमोऽथ चतुर्थांशे षष्ठो द्व्यंशे प्रकीर्तितः । (७८।१)

शतांशे सप्तमो ज्ञेयो ग्रासमानं रसस्य तु ॥ (७८।२)

ग्रासमानभेदेन स्वरूपभेदःचतुःषष्ट्यंशके ग्रासे दण्डधारी भवेद् रसः । (७९।१)

जलूकाभो द्वितीये तु ग्रासयोगे सुरेश्वरि ॥ (७९।२)

ग्रासे रसात् तृतीये च काकविष्ठासमो भवेत् । (८०।१)

चतुर्थो गोलकाकारः पञ्चमे दहनप्रभः ॥ (८०।२)

षष्ठे सूर्यप्रभः सूतस्तेजःपुञ्जश्च सप्तमे । (८१।१)

रसराजस्य देवेशि क्रमाज्जीर्णस्य लक्षणम् ॥ (८१।२)

समांशं द्विगुणं ग्रासं ततः सूते चतुर्गुणम् । (८२।१)

तथा चाष्टगुणं देवि जारयेच्च कलागुणम् ॥ (८२।२)

द्वात्रिंशद्गुणितं देवि चतुःषष्टिगुणं क्रमात् । (८३।१)

संस्कारैर् जायमाना गुणाःतीव्रत्वं जनयेत् स्वेदाद् अमलत्वं च मर्दनात् ॥ (८३।२)

मूर्छनाद् दोषराहित्यम् उत्थानात् पूतिनाशनम् । (८४।१)

रसायनं पातनेन रोधादाप्यायनं भवेत् ॥ (८४।२)

अचापल्यं नियमनाद् दीपनात्समुखो ज्वलेत् । (८५।१)

वासनाद् योगसांगत्यं चारणाद्बलचारिता ॥ (८५।२)

जारणाद्बन्धनं सम्यगेकत्वं द्रावणद्वयात् । (८६।१)

रक्तत्वं रञ्जनात् तस्य व्यापित्वं सारणात्रयात् ॥ (८६।२)

क्रामित्वं क्रामणाद् देहलोहेष्वपि च वेधनात् ॥ (८७।१)