धर्मार्थकामेभ्यो नमः ॥ (१।१)

शास्त्रे प्रकृतत्वात् ॥ (२।१)

तत्समयावबोधकेभ्यश्चाचार्येभ्यः ॥ (३।१)

तत्संबन्धात् ॥ (४।१)

चोम्पोसितिओन् ओड़् कामसूत्रप्रजापतिर् हि प्रजाः सृष्ट्वा तासां स्थितिनिबन्धनं त्रिवर्गस्य साधनम् अध्यायानां शतसहस्रेणाग्रे प्रोवाच ॥ (५।१)

तस्यैकदेशिकं मनुः स्वायंभुवो धर्माधिकारिकं पृथक् चकार ॥ (६।१)

बृहस्पतिर् अर्थाधिकारिकम् ॥ (७।१)

महादेवानुचरश्च नन्दी सहस्रेणाध्यायानां पृथक् कामसूत्रं प्रोवाच ॥ (८।१)

तद् एव तु पञ्चभिर् अध्यायशतैर् औद्दालकिः श्वेतकेतुः संचिक्षेप ॥ (९।१)

तद् एव तु पुनर् अध्यर्धेनाध्यायशतेन साधारणसाम्प्रयोगिककन्यासंप्रयुक्तकभार्याधिकारिकपारदारिकवैशिकौपनिषदिकः सप्तभिर् अधिकरणैर् बाभ्रव्यः पाञ्चालः संचिक्षेप ॥ (१०।१)

तस्य षष्ठं वैशिकम् अधिकरणं पाटलिपुत्रिकाणां गणिकानां नियोगाद् दत्तकः पृथक् चकार ॥ (११।१)

तत्प्रसङ्गाच्चारायणः साधारणम् अधिकरणं पृथक् प्रोवाच । (१२।१)

सुवर्णनाभः साम्प्रयोगिकम् । (१२।२)

घोटकमुखः कन्यासम्प्रयुक्तकम् । (१२।३)

गोनर्दीयो भार्याधिकारिकम् । (१२।४)

गोणिकापुत्रः पारदारिकम् । (१२।५)

कुचुमार औपनिषदिकम् इति । (१२।६)

एवं बहुभिर् आचार्यैस्तच्छास्त्रं खण्डशः प्रणीतम् उत्सन्नकल्पम् अभूत् । (१२।७)

तत्र दत्तकादिभिः प्रणीतानां शास्त्रावयवानाम् एकदेशत्वात् महद् इति च बाभ्रवीयस्य दुरध्येयत्वात् संक्षिप्य सर्वम् अर्थम् अल्पेन ग्रन्थेन कामसूत्रम् इदं प्रणीतम् ॥ (१२।८)

तब्ले ओड़् चोन्तेन्त्स्तस्यायं प्रकरणाधिकरणसमुद्देशः । (१३।१)

शास्त्रसंग्रहः । (१३।२)

त्रिवर्गप्रतिपत्तिः । (१३।३)

विद्यासमुद्देशः । (१३।४)

नागरिकवृत्तम् । (१३।५)

नायकसहायदूतीकर्मविमर्शः । (१३।६)

इति साधारणं प्रथमम् अधिकरणम् । (१३।७)

अध्यायाः पञ्च । (१३।८)

प्रकरणानि पञ्च । (१३।९)

प्रमाणकालभावेभ्यो रतावस्थापनम् । (१३।१०)

प्रीतिविशेषाः । (१३।११)

आलिङ्गनविचाराः । (१३।१२)

चुम्बनविकल्पाः । (१३।१३)

नखरदनजातयः । (१३।१४)

दशनच्छेद्यविधयः । (१३।१५)

देश्या उपचाराः । (१३।१६)

संवेशनप्रकाराः । (१३।१७)

चित्ररतानि । (१३।१८)

प्रहणनयोगाः । (१३।१९)

तद्युक्ताश्च शीत्कृतोपक्रमाः । (१३।२०)

पुरुषायितम् । (१३।२१)

पुरुषोपसृप्तानि । (१३।२२)

औपरिष्टकम् । (१३।२३)

रतारम्भावसानिकम् । (१३।२४)

रतविशेषाः । (१३।२५)

प्रणयकलहः । (१३।२६)

इति साम्प्रयोगिकं द्वितीयम् अधिकरणम् । (१३।२७)

अध्याया दश । (१३।२८)

प्रकरणानि सप्तदश । (१३।२९)

वरणविधानम् । (१३।३०)

संबन्धनिर्णयः । (१३।३१)

कन्याविश्रम्भणम् । (१३।३२)

बालाया उपक्रमाः । (१३।३३)

इङ्गिताकारसूचनम् । (१३।३४)

एकपुरुषाभियोगः । (१३।३५)

प्रयोज्यस्योपावर्तनम् । (१३।३६)

अभियोगतश्च कन्यायाः प्रतिपत्तिः । (१३।३७)

विवाहयोगः । (१३।३८)

इति कन्यासम्प्रयुक्तकं तृतीयम् अधिकरणम् । (१३।३९)

अध्यायाः पञ्च । (१३।४०)

प्रकरणानि नव । (१३।४१)

एकचारिणीवृत्तम् । (१३।४२)

प्रवासचर्या । (१३।४३)

सपत्नीषु ज्येष्ठावृत्तम् । (१३।४४)

कनिष्ठावृत्तम् । (१३।४५)

पुनर्भूवृत्तम् । (१३।४६)

दुर्भगावृत्तम् । (१३।४७)

आन्तःपुरिकम् । (१३।४८)

पुरुषस्य बह्वीषु प्रतिपत्तिः । (१३।४९)

इति भार्याधिकारिकं चतुर्थम् अधिकरणम् । (१३।५०)

अध्यायौ द्वौ । (१३।५१)

प्रकरणान्यष्टौ । (१३।५२)

स्त्रीपुरुषशीलावस्थापनम् । (१३।५३)

व्यावर्तनकारणानि । (१३।५४)

स्त्रीषु सिद्धाः पुरुषाः । (१३।५५)

अयत्नसाध्या योषितः । (१३।५६)

परिचयकारणानि । (१३।५७)

अभियोगाः । (१३।५८)

भावपरीक्षा । (१३।५९)

दूतीकर्माणि । (१३।६०)

ईश्वरकामितम् । (१३।६१)

आन्तःपुरिकं दाररक्षितकम् । (१३।६२)

इति पारदारिकं पञ्चमम् अधिकरणम् । (१३।६३)

अध्यायाः षट् । (१३।६४)

प्रकरणानि दश । (१३।६५)

गम्यचिन्ता । (१३।६६)

गमनकारणानि । (१३।६७)

उपावर्तनविधिः । (१३।६८)

कान्तानुवर्तनम् । (१३।६९)

अर्थागमोपायाः । (१३।७०)

विरक्तलिङ्गानि । (१३।७१)

विरक्तप्रतिपत्तिः । (१३।७२)

निष्कासनप्रकाराः । (१३।७३)

विशीर्णप्रतिसंधानम् । (१३।७४)

लाभविशेषः । (१३।७५)

अर्थानर्थानुबन्धसंशयविचारः । (१३।७६)

वेश्याविशेषाश्च । (१३।७७)

इति वैशिकं षष्ठम् अधिकरणम् । (१३।७८)

अध्यायाः षट् । (१३।७९)

प्रकरणानि द्वादश । (१३।८०)

सुभगंकरणम् । (१३।८१)

वशीकरणम् । (१३।८२)

वृष्याश्च योगाः । (१३।८३)

नष्टरागप्रत्यानयनम् । (१३।८४)

वृद्धिविधयः । (१३।८५)

चित्राश्च योगाः । (१३।८६)

इत्यौपनिषदिकं सप्तमम् अधिकरणम् । (१३।८७)

अध्यायौ द्वौ । (१३।८८)

प्रकरणानि षट् । (१३।८९)

एवं षट्त्रिंशद् अध्यायाः । (१३।९०)

चतुःषष्टिः प्रकरणानि । (१३।९१)

अधिकरणानि सप्त । (१३।९२)

सपादं श्लोकसहस्रम् । (१३।९३)

इति शास्त्रस्य संग्रहः ॥ (१३।९४)

संक्षेपम् इमम् उक्त्वास्य विस्तरो ऽतः प्रवक्ष्यते । (१४।१)

इष्टं हि विदुषां लोके समासव्यासभाषणम् ॥ (१४।२)