उत्तरौष्ठम् अन्तर्मुखं नयनम् इति मुक्त्वा चुम्बनवद् दशनरदनस्थानानि ॥ (१।१)

समाः स्निग्धच्छाया रागग्राहिणो युक्तप्रमाणा निश्छिद्रास्तीक्ष्णाग्रा इति दशनगुणाः ॥ (२।१)

कुण्ठा राज्युद्गताः परुषाः विषमाः श्लक्ष्णाः पृथवो विरला इति च दोषाः ॥ (३।१)

गूढकम् उच्छूनकं बिन्दुर् बिन्दुमाला प्रवालमणिर् मणिमाला खण्डाभ्रकं वराहचर्वितकम् इति दशनच्छेदनविकल्पाः ॥ (४।१)

नातिलोहितेन रागमात्रेण विभावनीयं गूढकम् ॥ (५।१)

तद् एव पीडनाद् उच्छूनकम् ॥ (६।१)

तद् उभयं बिन्दुर् अधरमध्य इति ॥ (७।१)

उच्छूनकं प्रवालमणिश्च कपोले ॥ (८।१)

कर्णपूरचुम्बनं नखदशनच्छेद्यम् इति सव्यकपोलमण्डनानि ॥ (९।१)

दन्तौष्ठसंयोगाभ्यासनिष्पादनात् प्रवालमणिसिद्धिः ॥ (१०।१)

सर्वस्येयं मणिमालायाश्च ॥ (११।१)

अल्पदेशायाश्च त्वचो दशनद्वयसंदंशजा बिन्दुसिद्धिः ॥ (१२।१)

सर्वैर् बिन्दुमालायाश्च ॥ (१३।१)

तस्मान् मालाद्वयम् अपि गलकक्षवङ्क्षणप्रदेशेषु ॥ (१४।१)

ललाटे चोर्वोर् बिन्दुमाला ॥ (१५।१)

मण्डलम् इव विषमकूटकयुक्तं खण्डाभ्रकं स्तनपृष्ठ एव ॥ (१६।१)

संहताः प्रदीर्घा बह्व्यो दशनपदराजयस् ताम्रान्तराला वराहचर्वितकम् । (१७।१)

स्तनपृष्ठ एव ॥ (१७।२)

तदुभयम् अपि च चण्डवेगयोः । (१८।१)

इति दशनच्छेद्यानि ॥ (१८।२)

विशेषके कर्णपूरे पुष्पापीडे ताम्बूलपलाशे तमालपत्त्रे चेति प्रयोज्यागामिषु नखदशनच्छेद्यादीन्याभियोगिकानि ॥ (१९।१)

देशसात्म्याच्च योषित उपचरेत् ॥ (२०।१)

मध्यदेश्या आर्यप्रायाः शुच्युपचराश् चुम्बननखदन्तपदद्वेषिण्यः ॥ (२१।१)

बाह्लीकदेश्या आवन्तिकाश्च ॥ (२२।१)

चित्ररतेषु त्व् आसाम् अभिनिवेशः ॥ (२३।१)

परिष्वङ्गचुम्बननखदन्तचूषणप्रधानाः क्षतवर्जिताः प्रहणनसाध्या मालव्य आभीर्यश्च ॥ (२४।१)

सिन्धुषष्ठानां च नदीनाम् अन्तरालीया औपरिष्टकसात्म्याः ॥ (२५।१)

चण्डवेगा मन्दशीत्कृता आपरान्तिका लाठ्यश्च ॥ (२६।१)

दृढप्रहणनयोगिन्यः खरवेगा एव अपद्रव्यप्रधानाः स्त्रीराज्ये कोसलायां च ॥ (२७।१)

प्रकृत्या मृद्व्यो रतिप्रिया अशुचिरुचयो निराचाराश्चान्ध्र्यः ॥ (२८।१)

सकलचतुःषष्टिप्रयोगरागिण्यो ऽश्लीलपरुषवाक्यप्रियाः शयने च सरभसोपक्रमा महाराष्ट्रिकाः ॥ (२९।१)

तथाविधा एव रहसि प्रकाशन्ते नागरिकाः ॥ (३०।१)

मृद्यमानाश्चाभियोगान् मन्दं मन्दं प्रसिञ्चन्ते द्रविड्यः ॥ (३१।१)

मध्यमवेगाः सर्वंसहाः स्वाङ्गप्रछादिन्यः पराङ्गहासिन्यः कुत्सिताश्लीलपरुषपरिहारिण्यो वानवासिकाः ॥ (३२।१)

मृदुभाषिण्यो ऽनुरागवत्यो मृद्व्यङ्ग्यश्च गौड्यः ॥ (३३।१)

देशसात्म्यात् प्रकृतिसात्म्यं बलीय इति सुवर्णनाभः । (३४।१)

न तत्र देश्या उपचाराः ॥ (३४।२)

कालयोगाच्च देशाद् देशान्तरम् उपचारवेषलीलाश् चानुगच्छन्ति । (३५।१)

तच्च विद्यात् ॥ (३५।२)

उपगूहनादिषु च रागवर्धनं पूर्वं पूर्वं विचित्रम् उत्तरम् उत्तरं च ॥ (३६।१)

वार्यमाणश्च पुरुषो यत् कुर्यात् तद् अनु क्षतम् । (३७।१)

अमृष्यमाणा द्विगुणं तद् एव प्रतियोजयेत् ॥ (३७।२)

बिन्दोः प्रतिक्रिया माला मालायाश्चाभ्रखण्डकम् । (३८।१)

इति क्रोधादिवाविष्टा कलहान् प्रतियोजयेत् ॥ (३८।२)

सकचग्रहम् उन्नम्य मुखं तस्य ततः पिबेत् । (३९।१)

निलीयेत दशेच्चैव तत्र तत्र मदेरिता ॥ (३९।२)

उन्नम्य कण्ठे कान्तस्य संश्रिता वक्षसः स्थलीम् । (४०।१)

मणिमालां प्रयुञ्जीत यच्चान्यद् अपि लक्षितम् ॥ (४०।२)

दिवापि जनसंबाधे नायकेन प्रदर्शितम् । (४१।१)

उद्दिश्य स्वकृतं चिह्नं हसेद् अन्यैर् अलक्षिता ॥ (४१।२)

विकूणयन्तीव मुखं कुत्सयन्तीव नायकम् । (४२।१)

स्वगात्रस्थानि चिह्नानि सासूयेव प्रदर्शयेत् ॥ (४२।२)

परस्परानुकूल्येन तद् एवं लज्जमानयोः । (४३।१)

संवत्सरशतेनापि प्रीतिर् न परिहीयते ॥ (४३।२)