रागवृद्धौ संघर्षात्मकं नखविलेखनम् ॥ (१।१)

तस्य प्रथमसमागमे प्रवासप्रत्यागमने प्रवासगमने क्रुद्धप्रसन्नायां मत्तायां च प्रयोगः । (२।१)

न नित्यम् अचण्डवेगयोः ॥ (२।२)

तथा दशनछेद्यस्य सात्म्यवशाद् वा ॥ (३।१)

तदाच्छुरितकम् अर्धचन्द्रो मण्डलं रेखा व्याघ्रनखं मयूरपदकं शशप्लुतकम् उत्पलपत्रकम् इति रूपतो ऽष्टविकल्पम् ॥ (४।१)

कक्षौ स्तनौ गलः पृष्ठं जघनम् ऊरू च स्थानानि ॥ (५।१)

प्रवृत्तरतिचक्राणां न स्थानम् अस्थानं वा विद्यत इति सुवर्णनाभः ॥ (६।१)

तत्र सव्यहस्तानि प्रत्यग्रशिखराणि द्वित्रिशिखराणि चण्डवेगयोर् नखानि स्युः ॥ (७।१)

अनुगतराजि समम् उज्ज्वलम् अमलिनम् अविपाटितं विवर्धिष्णु मृदुस्निग्धदर्शनम् इति नखगुणाः ॥ (८।१)

दीर्घाणि हस्तशोभीन्यालोके च योषितां चित्तग्राहीणि गौडानां नखानि स्युः ॥ (९।१)

ह्रस्वानि कर्मसहिष्णूनि विकल्पयोजनासु च स्वेच्छापातीनि दाक्षिणात्यानाम् ॥ (१०।१)

मध्यमान्युभयभाञ्जि महाराष्ट्रकाणाम् इति ॥ (११।१)

तैः सुनियमितैर् हनुदेशे स्तनयोर् अधरे वा लघुकरणम् अनुद्गतलेखं स्पर्शमात्रजननाद् रोमाञ्चकरम् अन्ते संनिपातवर्धमानशब्दम् आच्छुरितकम् ॥ (१२।१)

प्रयोज्यायां च तस्याङ्गसंवाहने शिरसः कण्डूयने पिटकभेदने व्याकुलीकरणे भीषणेन प्रयोगः ॥ (१३।१)

ग्रीवायां स्तनपृष्ठे च वक्रो नखपदनिवेशो ऽर्धचन्द्रकः ॥ (१४।१)

तावेव द्वौ परस्पराभिमुखौ मण्डलम् ॥ (१५।१)

नाभिमूलककुन्दरवङ्क्षणेषु तस्य प्रयोगः ॥ (१६।१)

सर्वस्थानेषु नातिदीर्घा लेखा ॥ (१७।१)

सैव वक्रा व्याघ्रनखकम् आ स्तनमुखम् ॥ (१८।१)

पञ्चभिर् अभिमुखैर् लेखा चूचुकाभिमुखी मयूरपदकम् ॥ (१९।१)

तत्संप्रयोगश्लाघायाः स्तनचूचुके संनिकृष्टानि पञ्चनखपदानि शशप्लुतकम् ॥ (२०।१)

स्तनपृष्ठे मेखलापथे चोत्पलपत्त्राकृतीत्युत्पलपत्रकम् ॥ (२१।१)

ऊर्वोः स्तनपृष्ठे च प्रवासं गच्छतः स्मारणीयकं संहताश्चतस्रस्तिस्रो वा लेखाः । (२२।१)

इति नखकर्माणि ॥ (२२।२)

आकृतिविकारयुक्तानि चान्यान्यपि कुर्वीत ॥ (२३।१)

विकल्पानाम् अनन्तत्वाद् आनन्त्याच्च कौशलविधेर् अभ्यासस्य च सर्वगामित्वाद् रागात्मकत्वाच्छेद्यस्य प्रकारान् को ऽभिसमीक्षितुम् अर्हतीत्याचार्याः ॥ (२४।१)

भवति हि रागे अपि चित्रापेक्षा । (२५।१)

वैचित्र्याच्च परस्परं रागो जनयितव्यः । (२५।२)

वैचक्षण्ययुक्ताश्च गणिकास्तत्कामिनश्च परस्परं प्रार्थनीया भवन्ति । (२५।३)

धनुर्वेदादिष्वपि हि शस्त्रकर्मशास्त्रेषु वैचित्र्यम् एवापेक्ष्यते किं पुनर् इहेति वात्स्यायनः ॥ (२५।४)

न तु परपरिगृहीतास्व् एवं कुर्यात् । (२६।१)

प्रच्छन्नेषु प्रदेशेषु तासाम् अनुस्मरणार्थं रागवर्धनाच्च विशेषान् दर्शयेत् ॥ (२६।२)

नखक्षतानि पश्यन्त्या गूढस्थानेषु योषितः । (२७।१)

चिरोत्सृष्टाप्यभिनवा प्रीतिर् भवति पेशला ॥ (२७।२)

चिरोत्सृष्टेषु रागेषु प्रीतिर् गच्छेत् पराभवम् । (२८।१)

रागायतनसंस्मारि यदि न स्यान् नखक्षतम् ॥ (२८।२)

पश्यतो युवतिं दूरान् नखोच्छिष्टपयोधराम् । (२९।१)

बहुमानः परस्यापि रागयोगश्च जायते ॥ (२९।२)

पुरुषश्च प्रदेशेषु नखचिह्नैर् विचिह्नितः । (३०।१)

चित्तं स्थिरम् अपि प्रायश्चलयत्येव योषितः ॥ (३०।२)

नान्यत् पटुतरं किंचिद् अस्ति रागविवर्धनम् । (३१।१)

नखदन्तसमुत्थानां कर्मणां गतयो यथा ॥ (३१।२)