सवर्णायाम् अनन्यपूर्वायां शास्त्रतो ऽधिगतायां धर्मो ऽर्थः पुत्राः संबन्धः पक्षवृद्धिर् अनुपस्कृता रतिश्च ॥ (१।१)

तस्मात् कन्याम् अभिजनोपेतां मातापितृमतीं त्रिवर्षात् प्रभृति न्यूनवयसं श्लाघ्याचारे धनवति पक्षवति कुले संबन्धिप्रिये संबन्धिभिर् आकुले प्रसूतां प्रभूतमातृपितृपक्षां रूपशीललक्षणसम्पन्नाम् अन्यूनाधिकाविनष्टदन्तनखकर्णकेशाक्षिस्तनीम् अरोगिप्रकृतिशरीरां तथाविध एव श्रुतवाञ् शीलयेत् ॥ (२।१)

यां गृहीत्वा कृतिनम् आत्मानं मन्येत न च समानैर् निन्द्येत तस्यां प्रवृत्तिर् इति घोटकमुखः ॥ (३।१)

तस्या वरणे मातापितरौ संबन्धिनश्च प्रयतेरन् । (४।१)

मित्राणि च गृहीतवाक्यान्युभयसम्बद्धानि ॥ (४।२)

तान्यन्येषां वरयितॄणां दोषान् प्रत्यक्षानागमिकांश्च श्रावयेयुः । (५।१)

कौलान् पौरुषेयान् अभिप्रायसंवर्धकांश्च नायकगुणान् । (५।२)

विशेषतश्च कन्यामातुर् अनुकूलांस्तदात्वायतियुक्तान् दर्शयेयुः ॥ (५।३)

दैवचिन्तकरूपश्च शकुननिमित्तग्रहलग्नबललक्षणदर्शनेन नायकस्य भविष्यन्तम् अर्थसंयोगं कल्याणम् अनुवर्णयेत् ॥ (६।१)

अपरे पुनर् अस्यान्यतो विशिष्टेन कन्यालाभेन कन्यामातरम् उन्मादयेयुः ॥ (७।१)

दैवनिमित्तशकुनोपश्रुतीनाम् आनुलोम्येन कन्यां वरयेद् दद्याच्च ॥ (८।१)

न यदृच्छया केवलमानुषायेति घोटकमुखः ॥ (९।१)

सुप्तां रुदतीं निष्क्रान्तां वरणे परिवर्जयेत् । (१०।१)

अप्रशस्तनामधेयां च गुप्तां दत्तां घोनां पृषताम् ऋषभां विनतां विकटां विमुण्डां शुचिदूषितां सांकरिकीं राकां फलीनीं मित्रां स्वनुजाम् वर्षकरीं च वर्जयेत् ॥ (१०।२)

नक्षत्राख्यां नदीनाम्नीं वृक्षनाम्नीं च गर्हिताम् । (११।१)

लकाररेफोपान्तां च वरणे परिवर्जयेत् ॥ (११।२)

यस्यां मनश्चक्षुषोर् निबन्धस्तस्याम् ऋद्धिः । (१२।१)

नेतराम् आद्रियेत । (१२।२)

इत्येके ॥ (१२।३)

तस्मात् प्रदानसमये कन्याम् उदारवेषां स्थापयेयुः । (१३।१)

अपराह्णिकं च नित्यं प्रसाधितायाः सखीभिः सह क्रीडा । (१३।२)

यज्ञविवाहादिषु जनसंद्रावेषु प्रायत्निकं दर्शनम् । (१३।३)

तथोत्सवेषु च । (१३।४)

पण्यसधर्मत्वात् ॥ (१३।५)

वरणार्थम् उपगतांश्च भद्रदर्शनान् प्रदक्षिणवाचश्च तत्संबन्धिसंगतान् पुरुषान् मङ्गलैः प्रतिगृह्णीयुः । (१४।१)

कन्यां चैषाम् अलंकृताम् अन्यापदेशेन दर्शयेयुः । (१४।२)

दैवं परीक्षणं चावधिं स्थापयेयुः । (१४।३)

आ प्रदाननिश्चयात् ॥ (१४।४)

स्नानादिषु नियुज्यमाना वरयितारः सर्वं भविष्यतीत्युक्त्वा न तदहरेवाभ्युपगच्छेयुः ॥ (१५।१)

देशप्रवृत्तिसात्म्याद् वा ब्राह्मप्राजापत्यार्षदैवानाम् अन्यतमेन विवाहेन शास्त्रतः परिणयेत् । (१६।१)

इति वरणविधानम् ॥ (१६।२)

भवन्ति चात्र श्लोकाः । (१७।१)

समस्याद्याः सहक्रीडा विवाहाः संगतानि च । (१७।२)

समानैर् एव कार्याणि नोत्तमैर् नापि वाधमैः ॥ (१७।३)

कन्यां गृहीत्वा वर्तेत प्रेष्यवद् यत्र नायकः । (१८।१)

तं विद्याद् उच्चसंबन्धं परित्यक्तं मनस्विभिः ॥ (१८।२)

स्वामिवद् विचरेद् यत्र बान्धवैः स्वैः पुरस्कृतः । (१९।१)

अश्लाघ्यो हीनसंबन्धः सो ऽपि सद्भिर् विनिन्द्यते ॥ (१९।२)

परस्परसुखास्वादा क्रीडा यत्र प्रयुज्यते । (२०।१)

विशेषयन्ती चान्योन्यं संबन्धः स विधीयते ॥ (२०।२)

कृत्वापि चोच्चसंबन्धं पश्चाज्ज्ञातिषु संनमेत् । (२१।१)

न त्व् एव हीनसंबन्धं कुर्यात् सद्भिर् विनिन्दितम् ॥ (२१।२)