ड़ोरेप्लय्नागरकः सह मित्रजनेन परिचारकैश्च कृतपुष्पोपहारे संचारितसुरभिधूपे रत्यावासे प्रसाधिते वासगृहे कृतस्नानप्रसाधनां युक्त्या पीतां स्त्रियं सान्त्वनैः पुनः पानेन चोपक्रमेत् । (१।१)

दक्षिणतश्चास्या उपवेशनम् । (१।२)

केशहस्ते वस्त्रान्ते नीव्याम् इत्यवलम्बनम् । (१।३)

रत्यर्थं सव्येन बाहुनानुद्धतः परिष्वङ्गः । (१।४)

पूर्वप्रकरणसम्बद्धैः परिहासानुरागैर् वचोभिर् अनुवृत्तिः । (१।५)

गूढाश्लीलानां च वस्तूनां समस्यया परिभाषणम् । (१।६)

सनृत्तम् अनृत्तं वा गीतं वादित्रम् । (१।७)

कलासु संकथाः । (१।८)

पुनः पानेनोपच्छन्दनम् । (१।९)

जातानुरागायां कुसुमानुलेपनताम्बूलदानेन च शेषजनविसृष्टिः । (१।१०)

विजने च यथोक्तैर् आलिङ्गनादिभिर् एनाम् उद्धर्षयेत् । (१।११)

ततो नीवीविश्लेषणादि यथोक्तम् उपक्रमेत । (१।१२)

इत्ययं रतारम्भः ॥ (१।१३)

रतावसानिकं रागम् अतिवाह्यासंस्तुतयोर् इव सव्रीडयोः परस्परम् अपश्यतोः पृथक् पृथग् आचारभूमिगमनम् । (२।१)

प्रतिनिवृत्त्य चाव्रीडायमानयोर् उचितदेशोपविष्टयोस्ताम्बूलग्रहणम् अच्छीकृतं चन्दनम् अन्यद् वानुलेपनं तस्या गात्रे स्वयम् एव निवेशयेत् । (२।२)

सव्येन बाहुना चैनां परिरभ्य चषकहस्तः सान्त्वयन् पाययेत् । (२।३)

जलानुपानं वा खण्डखाद्यकम् अन्यद् वा प्रकृतिसात्म्ययुक्तम् उभावप्युपयुञ्जीयाताम् । (२।४)

अच्छरसकयूषम् अम्लयवागूं भृष्टमांसोपदंशानि पानकानि चूतफलानि शुष्कमांसं मातुलुङ्गचुक्रकाणि सशर्कराणि च यथादेशसात्म्यं च । (२।५)

तत्र मधुरम् इदं मृदु विशदम् इति च विदश्य विदश्य तत् तद् उपाहरेत् । (२।६)

हर्म्यतलस्थितयोर् वा चन्द्रिकासेवनार्थम् आसनम् । (२।७)

तदङ्कसंलीनायाश्चन्द्रमसं पश्यन्त्या नक्षत्रपङ्क्तिव्यक्तीकरणम् । (२।८)

अरुन्धतीध्रुवसप्तर्षिमालादर्शनं च । (२।९)

इति रतावसानिकम् ॥ (२।१०)

अवसाने अपि च प्रीतिर् उपचारैर् उपस्कृता । (३।१)

सविस्रम्भकथायोगै रतिं जनयते पराम् ॥ (३।२)

परस्परप्रीतिकरैर् आत्मभावानुवर्तनैः । (४।१)

क्षणात् क्रोधपरावृत्तैः क्षणात् प्रीतिविलोकितैः ॥ (४।२)

हल्लीसकक्रीडनकैर् गायनैर् लाटरासकैः । (५।१)

रागलोलार्द्रनयनैश् चन्द्रमण्डलवीक्षणैः ॥ (५।२)

आद्ये संदर्शने जाते पूर्वं ये स्युर् मनोरथाः । (६।१)

पुनर्वियोगे दुःखं च तस्य सर्वस्य कीर्तनैः ॥ (६।२)

कीर्तनान्ते च रागेण परिष्वङ्गैः सचुम्बनैः । (७।१)

तैस्तैश्च भावैः संयुक्तो यूनो रागो विवर्धते ॥ (७।२)

रागवद् आहार्यरागं कृत्रिमरागं व्यवहितरागं पोटारतं खलरतम् अयन्त्रितरतम् इति रतविशेषाः ॥ (८।१)

संदर्शनात् प्रभृत्युभयोर् अपि प्रवृद्धरागयोः प्रयत्नकृते समागमे प्रवासप्रत्यागमने वा कलहवियोगयोगे तद्रागवत् ॥ (९।१)

तत्रात्माभिप्रायाद् यावदर्थं च प्रवृत्तिः ॥ (१०।१)

मध्यस्थरागयोर् आरब्धं यद् अनुरज्यते तद् आहार्यरागम् ॥ (११।१)

तत्र चातुःषष्टिकैर् योगैः सात्म्यानुविद्धैः संधुक्ष्य संधुक्ष्य रागं प्रवर्तेत । (१२।१)

तत्कार्यहेतोर् अन्यत्र सक्तयोर् वा कृत्रिमरागम् ॥ (१२।२)

तत्र समुच्चयेन योगाञ् शास्त्रतः पश्येत् ॥ (१३।१)

पुरुषस्तु हृदयप्रियाम् अन्यां मनसि निधाय व्यवहरेत् । (१४।१)

संप्रयोगात् प्रभृति रतिं यावत् । (१४।२)

अतस्तद्व्यवहितरागम् ॥ (१४।३)

न्यूनायां कुम्भदास्यां परिचारिकायां वा यावदर्थं संप्रयोगस्तत्पोटारतम् ॥ (१५।१)

तत्रोपचारान् नाद्रियेत ॥ (१६।१)

तथा वेश्याया ग्रामीणेन सह यावदर्थं खलरतम् ॥ (१७।१)

ग्रामव्रजप्रत्यन्तयोषिद्भिश् च नागरकस्य ॥ (१८।१)

उत्पन्नविस्रम्भयोश्च परस्परानुकूल्याद् अयन्त्रितरतम् । (१९।१)

इति रतानि ॥ (१९।२)

क़ुअर्रेल्वर्धमानप्रणया तु नायिका सपत्नीनाम् अग्रहणं तदाश्रयम् आलापं वा गोत्रस्खलितं वा न मर्षयेत् । (२०।१)

नायकव्यलीकं च ॥ (२०।२)

तत्र सुभृशः कलहो रुदितम् आयासः शिरोरुहाणाम् अवक्षोदनं प्रहणनम् आसनाच्छयनाद् वा मह्यां पतनं माल्यभूषणावमोक्षो भूमौ शय्या च ॥ (२१।१)

तत्र युक्तरूपेण साम्ना पादपतनेन वा प्रसन्नमनास्ताम् अनुनयन्न् उपक्रम्य शयनम् आरोहयेत् ॥ (२२।१)

तस्य च वचनम् उत्तरेण योजयन्ती विवृद्धक्रोधा सकचग्रहम् अस्यास्यम् उन्नमय्य पादेन बाहौ शिरसि वक्षसि पृष्ठे वा सकृद् द्विस्त्रिर् अवहन्यात् । (२३।१)

द्वारदेशं गच्छेत् । (२३।२)

तत्रोपविश्याश्रुकरणम् इति । (२३।३)

अतिक्रुद्धापि तु न द्वारदेशाद् भूयो गच्छेत् । (२३।४)

दोषवत्त्वात् । (२३।५)

इति दत्तकः । (२३।६)

तत्र युक्तितो ऽनुनीयमाना प्रसादम् आकाङ्क्षेत् । (२३।७)

प्रसन्नापि तु सकषायैर् एव वाक्यैर् एनं तुदतीव प्रसन्नरतिकाङ्क्षिणी नायकेन परिरभ्येत ॥ (२३।८)

स्वभवनस्था तु निमित्तात् कलहिता तथाविधचेष्टैव नायकम् अभिगच्छेत् । (२४।१)

तत्र पीठमर्दविटविदूषकैर् नायकप्रयुक्तैर् उपशमितरोषा तैर् एवानुनीता तैः सहैव तद्भवनम् अधिगच्छेत् । (२४।२)

तत्र च वसेत् । (२४।३)

इति प्रणयकलहः ॥ (२४।४)

भवन्ति चात्र श्लोकाः । (२५।१)

एवम् एतां चतुःषष्टिं बाभ्रव्येण प्रकीर्तिताम् । (२५।२)

प्रयुञ्जानो वरस्त्रीषु सिद्धिं गच्छति नायकः ॥ (२५।३)

ब्रुवन्न् अप्यन्यशास्त्राणि चतुःषष्टिविवर्जितः । (२६।१)

विद्वत्संसदि नात्यर्थं कथासु परिपूज्यते ॥ (२६।२)

वर्जितो ऽप्यन्यविज्ञानैर् एतया यस्त्वलंकृतः । (२७।१)

स गोष्ठ्यां नरनारीणां कथास्वग्रं विगाहते ॥ (२७।२)

विद्वद्भिः पूजिताम् एनां खलैर् अपि सुपूजिताम् । (२८।१)

पूजितां गणिकासंघैर् नन्दिनीं को न पूजयेत् ॥ (२८।२)

नन्दिनी सुभगा सिद्धा सुभगंकरणीति च । (२९।१)

नारीप्रियेति चाचार्यैः शास्त्रेष्व् एषा निरुच्यते ॥ (२९।२)

कन्याभिः परयोषिद्भिर् गणिकाभिश्च भावतः । (३०।१)

वीक्ष्यते बहुमानेन चतुःषष्टिविचक्षणः ॥ (३०।२)