युक्तिः योग उपायलक्षणः ॥ (१।०)

युक्त्या मात्राकालक्रियाभूमिदेहदोषस्वभावया स्नेहं सर्पिरादिकम् अवचारयेत् उपयुञ्जीत ॥ (२।०)

केन सह इत्याह भक्ष्याद्यन्नेन ॥ (३।०)

आदिशब्देन भोज्यलेह्यपेयस्य त्रिविधस्याप्यन्नस्य ग्रहणम् ॥ (४।०)

तथा बस्तिभिर्नस्येनाभ्यञ्जनेन गण्डूषेण च स्नेहमवचारयेत् ॥ (५।०)

मूर्धादीनां तर्पणशब्देन प्रत्येकं सम्बन्धः ॥ (६।०)

तेन मूर्धतर्पणेन शिरोबस्त्याख्येन ॥ (७।०)

तथा कर्णतर्पणेन कर्णपूरणाख्येन ॥ (८।०)

तथा अक्षितर्पणेन तर्पणपुटपाकविध्युक्तेन ॥ (९।०)

भक्ष्यं शशाङ्ककिरणादि तेन भक्ष्येण सह ॥ (१०।०)

आदिग्रहणाद् ओदनादयो मुन्युक्ता गृह्यन्ते ॥ (११।०)

तथा च मुनिः । (१२।१)

ओदनश्च विलेपी च रसो मांसं पयो दधि । (१२।२)

यवागूः सूपशाके च यूषः काम्बलिकः खलः ॥ (१२।३)

सक्तवस्तिलपिष्टं च मद्यं लेहास्तथैव च । (१३।१)

भक्ष्यमभ्यञ्जनं बस्तिस्तथैवोत्तरबस्तयः ॥ (१३।२)

इति ॥ (१४।०)

बस्तिभिरिति बहुवचननिर्देशो बस्तित्रयग्रहणार्थः ॥ (१५।०)

तेन निरूहोऽन्वासनं वस्तिरुत्तर इति ॥ (१६।०)