एवं संस्कृतकोष्ठस्य नरस्य यस्य यद्रसायनं यौगिकम् उपलभ्यते सात्म्यज्ञो भिषक् सर्वमालोच्य तस्य तद्रसायनम् उपाहरेत् ॥ (१।०)

हरणात् सर्वरोगाणां यासाव् उक्ता हरीतकी । (२।१)

पथ्यत्वात् सर्वधातूनां पथ्या शिवतया शिवा ॥ (२।२)

यस्माद् विजयते व्याधीन् समग्रान् विजया ततः । (३।१)

अभयं सर्वरोगेभ्यो भवत्यायुश् च शाश्वतम् ॥ (३।२)

यतः शीलयताम् एनां तेनेयमभया स्मृता । (४।१)

नवा वृत्ता घना स्निग्धा गुर्वी मज्जति चाप्सु या ॥ (४।२)

बालस्य सा प्रयोक्तव्या नवनीतसमन्विता । (५।१)

वाते ससर्पिर्लवणा पित्ते सगुडशर्करा ॥ (५।२)

कफे सपिप्पलीक्षौद्रा सर्वदा सा प्रशस्यते ॥ (६।०)

इति वृद्धवाग्भटात् ॥ (७।०)