अतिमन्दाग्न्यादयो न स्नेह्याः ॥ (१।०)

अतिशब्दो यावद् दुर्बलेषु प्रत्येकं योज्यः ॥ (२।०)

तेनातिदुर्बला न स्नेह्या इत्य् अर्थः ॥ (३।०)

अत एवाल्पबलाः स्नेह्याः न त्व् अतिदुर्बलाः इति न पूर्वापराविरोधः ॥ (४।०)

अतितीक्ष्णाग्नेः स्नेहनाद् अत्यग्निवृद्धिः ॥ (५।०)

अतिस्थूलस्य चाग्निमेदसोर् वृद्धिः ॥ (६।०)

अतिदुर्बलस्य च जरणाशक्तेः स्नेहस्य व्यापत् ॥ (७।०)

ऊरुस्तम्भादिभिर् यावन्मद्यैश् च पीडिता न स्नेह्याः ॥ (८।०)

अपप्रसूता स्रुतगर्भा न स्नेह्येति लिङ्गवचनविपरिणामः ॥ (९।०)

प्रयुक्ते च नस्यादिकर्मणि सर्व एव न स्नेह्याः ॥ (१०।०)