यतो वीर्यस्यैव करणसामर्थ्यं तेन कारणेन गुर्वादिष्व् एवाष्टासु वीर्याख्या अन्वर्थेति अनुगतार्थेति भण्यते ॥ (१।०)

एवकारो ऽवधारणार्थः ॥ (२।०)

गुर्वादिष्वेव वीर्यसंज्ञा न तु रसविपाकप्रभावेषु मन्दसान्द्रादिषु वा ॥ (३।०)

किम्भूतेषु गुर्वादिषु समग्रेत्यादि ॥ (४।०)

समग्राश् च ते गुणाश्च तेषु साराः चिरकालावस्थितयो गुर्वादय एव ॥ (५।०)

तथा च जाठराग्निसंयोगेनापि न मधुरादिरसवत् स्वभावमेते जहति ॥ (६।०)

सर्तेः सुस्थिर इति घञ् सारशब्दः ॥ (७।०)

तथा अन्येभ्यो मन्दसान्द्रादिभ्यो गुणेभ्यो रसादिभ्यो वा गुर्वादयः शक्त्युत्कर्षविवर्तिनः ॥ (८।०)

शक्तेः सामर्थ्यस्य उत्कर्षः आधिक्यम् विशेषेण वर्तो विवर्तः विशेषेण भवनं शक्त्युत्कर्षस्य विवर्तः स विद्यते येषां त एवम् ॥ (९।०)

किंच गुर्वादीनां गुणानां व्यवहाराय व्यवहारार्थम् मुख्यत्वात् अन्येभ्यो गुणेभ्यो गुर्वादयः प्रधानभूता इत्यर्थः ॥ (१०।०)

तथा च गुर्वादयो गुणा द्रव्ये पृथिव्यादौ रसाश्रये ॥ (११।०)

इत्युक्तम् न मधुरादयो गुणा इति ॥ (१२।०)

तस्मात् गुर्वादीनां गुणानां व्यवहारमुख्यत्वं रसादिभ्यः ॥ (१३।०)

तथा बह्वग्रग्रहणात् बहुग्रहणाद् अग्रग्रहणाच् च बहवो द्रव्यरसादयो गुर्वादिभिर्गृहीता भवन्ति ॥ (१४।०)

तथा चायुर्वेदशास्त्रेषु रसादिभ्यो गुर्वादीनाम् अग्रे ग्रहणं दृष्टम् ॥ (१५।०)

यथा वातादिदोषगुणनिरूपणायां गुर्वादीनामेव पूर्वग्रहणम् न रसादीनाम् ॥ (१६।०)

तथा च तत्र रूक्षो लघुः इत्याचार्योऽपठद् वाय्वादिलक्षणे ॥ (१७।०)

एवं गुर्वादीनाम् एवाग्रग्रहणात् गुर्वादिष्वेव वीर्याख्या ऽन्वर्था अनुगतार्थेति भण्यते ॥ (१८।०)