द्वयोर् द्रव्ययोर् रसादीनां रसवीर्यविपाकानां साम्ये सति यदेकं द्रव्यमन्यत्कर्म कुरुते अन्यत्पुनरन्यद्विशिष्टं कर्म तत् प्रभावजं प्रभावाज् जातम् इति ज्ञेयम् ॥ (१।०)

अयमस्य द्रव्यस्य प्रभाव इति विशिष्टकर्मकरणान्निश्चीयत इत्यर्थः ॥ (२।०)

ननु प्रभावः क उच्यते इति चेत् ब्रूमः ॥ (३।०)

रसवीर्यविपाकादिगुणातिशायी द्रव्यस्य स्वभावो यः स प्रभावः ॥ (४।०)

उक्तं च । (५।१)

रसवीर्यविपाकादिगुणातिशयवान् अलम् । (५।२)

द्रव्यस्वभावो निर्दिष्टो यः प्रभावः स कीर्तितः ॥ (५।३)

इति ॥ (६।१)