यो यः पूर्वो यथापूर्वम् यो य उत्तरो यथोत्तरम् ॥ (१।०)

यथासादृश्ये इत्य् अव्ययीभावः ॥ (२।०)

उत्तरम् अपेक्ष्य पूर्वः पूर्वं चापेक्ष्योत्तरः ॥ (३।०)

तेन चतुर्णां स्नेहानां यथानिर्दिष्टानां सर्पिरादीनां त्रय एव स्नेहा वसामज्जसर्पिःसंज्ञका यथापूर्वत्वेन सम्बध्यन्ते न तु तैलाख्यः स्नेहः तस्य पूर्वत्वाभावात् ॥ (४।०)

न ह्य् अन्यो ऽस्मात् कश्चिद् उत्तरो ऽस्ति यदपेक्ष्यैषः पूर्वत्वम् आत्मन आसादयेत् ॥ (५।०)

तस्मान् नास्ति पूर्वत्वसम्बन्धस् तैलस्य ॥ (६।०)

तथा चतुर्णां स्नेहानां त्रय एव स्नेहा मज्जवसातैलाख्या यथोत्तरत्वेनाभिसंबध्यन्ते न सर्पिःसंज्ञकः स्नेहः उत्तरत्वाभावात् ॥ (७।०)

न ह्य् अन्यः कश्चिद् अस्य पूर्वो विद्यते यद् अपेक्षयैवोत्तरत्वम् आत्मन आसादयतीत्य् उक्तम् ॥ (८।०)

तद् एवं यथापूर्वम् ॥ (९।०)

पित्तघ्नत्वं वसामज्जसर्पिषां सामान्येनोक्तम् ॥ (१०।०)

विशेषेण च वसा पित्तघ्नी मज्जा पित्तघ्नतरः सर्पिः पित्तघ्नतमम् इत्य् अर्थः ॥ (११।०)

इतरघ्ना इत्यादि ॥ (१२।०)

इतरौ वातकफौ पित्तापेक्षया तौ घ्नन्ति पराकुर्वन्तीतीतरघ्नाः ॥ (१३।०)

यथोत्तरं त्रयः स्नेहा मज्जवसातैलाख्या वातश्लेष्मघ्नाः ॥ (१४।०)

तेन मज्जा वातश्लेष्मघ्नो वसा वातश्लेष्मघ्नतरा तैलं वातश्लेष्मघ्नतमम् इत्य् अवगन्तव्यम् ॥ (१५।०)

अन्ये त्व् एवं व्याचक्षते श्लेष्मणि स्नेहनिषेधाद् इतरघ्ना इति सामान्योक्ताव् अपि वातघ्ना इति गम्यते ॥ (१६।०)

अथवा द्रव्यान्तरसंस्कृतसर्पिराद्यपेक्षया कफस्यापीतरशब्देन ग्रहणम् इति ॥ (१७।०)