शाङ्खायनारण्यकŚāṅkhāyanāraṇyaka
ŚāĀr, 13, 1
Select a line for its word-by-word analysis.
अथातो वैराग्यसंस्कृते शरीरे ब्रह्मयज्ञनिष्ठो भवेत् ॥ (१।०)
athāto vairāgyasaṃskṛte śarīre brahmayajñaniṣṭho bhavet ||
तद् उ ह वात्मा द्रष्टव्यः श्रोतव्यो मन्तव्यो निदिध्यासितव्य इति ॥ (३।०)
tad u ha vātmā draṣṭavyaḥ śrotavyo mantavyo nididhyāsitavya iti ||
तम् एतं वेदानुवचनेन विविदिषन्ति ब्रह्मचर्येण तपसा श्रद्धया यज्ञेनानाशकेन चेति माण्डूकेयः ॥ (४।०)
tam etaṃ vedānuvacanena vividiṣanti brahmacaryeṇa tapasā śraddhayā yajñenānāśakena ceti māṇḍūkeyaḥ ||
तस्माद् एवंविच्छान्तो दान्त उपरतस् तितिक्षुः श्रद्धावित्तो भूत्वात्मन्य् एवात्मानं पश्येद् इति माण्डव्यः ॥ (५।०)
tasmād evaṃvicchānto dānta uparatas titikṣuḥ śraddhāvitto bhūtvātmany evātmānaṃ paśyed iti māṇḍavyaḥ ||
यो ऽयं विज्ञानमयः पुरुषः प्राणेषु स एष नेति नेत्य् आत्मा न गृह्य इदं ब्रह्मेदं क्षत्रम् इमे देवा इमे वेदा इमे लोका इमानि सर्वाणि भूतानीदं सर्वं यद् अयम् आत्मा ॥ (६।०)
yo 'yaṃ vijñānamayaḥ puruṣaḥ prāṇeṣu sa eṣa neti nety ātmā na gṛhya idaṃ brahmedaṃ kṣatram ime devā ime vedā ime lokā imāni sarvāṇi bhūtānīdaṃ sarvaṃ yad ayam ātmā ||
स एष तत् त्वम् असीत्य् आत्मावगम्यो ऽहं ब्रह्मास्मीति ॥ (७।०)
sa eṣa tat tvam asīty ātmāvagamyo 'haṃ brahmāsmīti ||
तद् एतद् ब्रह्मापूर्वम् अपरम् अनपरम् अनन्तरम् अबाह्यम् अयम् आत्मा ब्रह्म सर्वानुभूर् इत्य् अनुशासनम् इति याज्ञवल्क्यः ॥ (८।०)
tad etad brahmāpūrvam aparam anaparam anantaram abāhyam ayam ātmā brahma sarvānubhūr ity anuśāsanam iti yājñavalkyaḥ ||
तद् एतन् नापुत्राय नानन्तेवासिने वा ब्रूयाद् इति ॥ (९।०)
tad etan nāputrāya nānantevāsine vā brūyād iti ||
य इमाम् अद्भिः परिगृहीतां वसुमतीं धनस्य पूर्णां दद्याद् इदम् एव ततो भूय इदम् एव ततो भूय इत्य् अनुशासनम् ॥ (१०।०)
ya imām adbhiḥ parigṛhītāṃ vasumatīṃ dhanasya pūrṇāṃ dadyād idam eva tato bhūya idam eva tato bhūya ity anuśāsanam ||
ताम् एताम् उपनिषदं वेदशिरो न यथा कथंचन वदेत् ॥ (११।०)
tām etām upaniṣadaṃ vedaśiro na yathā kathaṃcana vadet ||
Data courtesy of The Digital Corpus of Sanskrit.