तं पञ्च शतान्यप्सरसां प्रतियन्ति शतं फलहस्ताः शतम् आञ्जनहस्ताः शतं माल्यहस्ताः शतं वासोहस्ताः शतं चूर्णहस्ताः ॥ (१।०)

तं ब्रह्मालङ्कारेणालंकुर्वन्ति ॥ (२।०)

स ब्रह्मालङ्कारेणालंकृतो ब्रह्म विद्वान् ब्रह्माभिप्रैति ॥ (३।०)

स आगच्छत्यारं ह्रदम् ॥ (४।०)

तं मनसात्येति ॥ (५।०)

तम् इत्वा संप्रतिविदो मज्जन्ति ॥ (६।०)

स आगच्छति मुहूर्तान् यष्टिहान् ॥ (७।०)

ते ऽस्माद् अपद्रवन्ति ॥ (८।०)

स आगच्छति विजरां नदीम् ॥ (९।०)

तां मनसैवात्येति ॥ (१०।०)

तत् सुकृतदुष्कृते धुनुवाते ॥ (११।०)

तस्य प्रिया ज्ञातयः सुकृतम् उपयन्ति अप्रिया दुष्कृतम् ॥ (१२।०)

तद् यथा रथेन धावयन् रथचक्रे पर्यवेक्षेत ॥ (१३।०)

एवम् अहोरात्रे पर्यवेक्षेत ॥ (१४।०)

एवं सुकृतदुष्कृते सर्वाणि च द्वन्द्वानि ॥ (१५।०)

स एष विसुकृतो दुष्कृतो ब्रह्म विद्वान् ब्रह्मैवाभिप्रैति ॥ (१६।०)