गुअर्दिन्ग् अगैन्स्त् प्रिन्चेस्रक्षितो राजा राज्यं रक्षत्यासन्नेभ्यः परेभ्यश्च पूर्वं दारेभ्यः पुत्रेभ्यश्च ॥ (१।१)

दाररक्षणं निशान्तप्रणिधौ वक्ष्यामः ॥ (२।१)

पुत्ररक्षणं तु ॥ (३।१)

जन्मप्रभृति राजपुत्रान् रक्षेत् ॥ (४।१)

कर्कटकसधर्माणो हि जनकभक्षा राजपुत्राः ॥ (५।१)

तेषाम् अजातस्नेहे पितर्युपांशुदण्डः श्रेयान् इति भारद्वाजः ॥ (६।१)

नृशंसम् अदुष्टवधः क्षत्रबीजविनाशश्च इति विशालाक्षः ॥ (७।१)

तस्माद् एकस्थानावरोधः श्रेयान् इति ॥ (८।१)

अहिभयम् एतद् इति पाराशराः ॥ (९।१)

कुमारो हि विक्रमभयान् मां पितावरुणद्धि इति ज्ञात्वा तम् एवाङ्के कुर्यात् ॥ (१०।१)

तस्माद् अन्तपालदुर्गे वासः श्रेयान् इति ॥ (११।१)

औरभ्रं भयम् एतद् इति पिशुनः ॥ (१२।१)

प्रत्यापत्तेर् हि तद् एव कारणं ज्ञात्वान्तपालसखः स्यात् ॥ (१३।१)

तस्मात् स्वविषयाद् अपकृष्टे सामन्तदुर्गे वासः श्रेयान् इति ॥ (१४।१)

वत्सस्थानम् एतद् इति कौणपदन्तः ॥ (१५।१)

वत्सेनेव हि धेनुं पितरम् अस्य सामन्तो दुह्यात् ॥ (१६।१)

तस्मान् मातृबन्धुषु वासः श्रेयान् इति ॥ (१७।१)

ध्वजस्थानम् एतद् इति वातव्याधिः ॥ (१८।१)

तेन हि ध्वजेनादितिकौशिकवद् अस्य मातृबान्धवा भिक्षेरन् ॥ (१९।१)

तस्माद् ग्राम्यसुखेष्वेनम् अवसृजेत् ॥ (२०।१)

सुखोपरुद्धा हि पुत्राः पितरं नाभिद्रुह्यन्ति इति ॥ (२१।१)

जीवन्मरणम् एतद् इति कौटिल्यः ॥ (२२।१)

काष्ठम् इव घुणजग्धं राजकुलम् अविनीतपुत्रम् अभियुक्तमात्रं भज्येत ॥ (२३।१)

तस्माद् ऋतुमत्यां महिष्याम् ऋत्विजश्चरुम् ऐन्द्राबार्हस्पत्यं निर्वपेयुः ॥ (२४।१)

आपन्नसत्त्वायाः कौमारभृत्यो गर्भभर्मणि प्रसवे च वियतेत ॥ (२५।१)

प्रजातायाः पुत्रसंस्कारं पुरोहितः कुर्यात् ॥ (२६।१)

समर्थं तद्विदो विनयेयुः ॥ (२७।१)

सत्त्रिणाम् एकश्चैनं मृगयाद्यूतमद्यस्त्रीभिः प्रलोभयेत् पितरि विक्रम्य राज्यं गृहाण इति ॥ (२८।१)

तम् अन्यः सत्त्री प्रतिषेधयेत् इत्याम्भीयाः ॥ (२९।१)

महादोषम् अबुद्धबोधनम् इति कौटिल्यः ॥ (३०।१)

नवं हि द्रव्यं येन येनार्थजातेनोपदिह्यते तत् तद् आचूषति ॥ (३१।१)

एवम् अयं नवबुद्धिर् यद् यद् उच्यते तत् तत्शास्त्रोपदेशम् इवाभिजानाति ॥ (३२।१)

तस्माद् धर्म्यम् अर्थ्यं चास्योपदिशेन् नाधर्म्यम् अनर्थ्यं च ॥ (३३।१)

सत्त्रिणस्त्वेनं तव स्मः इति वदन्तः पालयेयुः ॥ (३४।१)

यौवनोत्सेकात् परस्त्रीषु मनः कुर्वाणम् आर्याव्यञ्जनाभिः स्त्रीभिर् अमेध्याभिः शून्यागारेषु रात्राव् उद्वेजयेयुः ॥ (३५।१)

मद्यकामं योगपानेनोद्वेजयेयुः ॥ (३६।१)

द्यूतकामं कापटिकैर् उद्वेजयेयुः ॥ (३७।१)

मृगयाकामं प्रतिरोधकव्यञ्जनैस्त्रासयेयुः ॥ (३८।१)

पितरि विक्रमबुद्धिं तथा इत्यनुप्रविश्य भेदयेयुः अप्रार्थनीयो राजा विपन्ने घातः सम्पन्ने नरकपातः संक्रोशः प्रजाभिर् एकलोष्टवधश्च इति ॥ (३९।१)

विरागं वेदयेयुः ॥ (४०।१)

प्रियम् एकपुत्रं बध्नीयात् ॥ (४१।१)

बहुपुत्रः प्रत्यन्तम् अन्यविषयं वा प्रेषयेद् यत्र गर्भः पण्यं डिम्बो वा न भवेत् ॥ (४२।१)

आत्मसम्पन्नं सैनापत्ये यौवराज्ये वा स्थापयेत् ॥ (४३।१)

बुद्धिमानाहार्यबुद्धिर् दुर्बुद्धिर् इति पुत्रविशेषाः ॥ (४४।१)

शिष्यमाणो धर्मार्थाव् उपलभते चानुतिष्ठति च बुद्धिमान् ॥ (४५।१)

उपलभमानो नानुतिष्ठत्याहार्यबुद्धिः ॥ (४६।१)

अपायनित्यो धर्मार्थद्वेषी चेति दुर्बुद्धिः ॥ (४७।१)

स यद्येकपुत्रः पुत्रोत्पत्तावस्य प्रयतेत ॥ (४८।१)

पुत्रिकापुत्रान् उत्पादयेद् वा ॥ (४९।१)

वृद्धस्तु व्याधितो वा राजा मातृबन्धुकुल्यगुणवत्सामन्तानाम् अन्यतमेन क्षेत्रे बीजम् उत्पादयेत् ॥ (५०।१)

न चैकपुत्रम् अविनीतं राज्ये स्थापयेत् ॥ (५१।१)

बहूनाम् एकसंरोधः पिता पुत्रहितो भवेत् । (५२।१)

अन्यत्रापद ऐश्वर्यं ज्येष्ठभागि तु पूज्यते ॥ (५२।२)

कुलस्य वा भवेद् राज्यं कुलसंघो हि दुर्जयः । (५३।१)

अराजव्यसनाबाधः शश्वद् आवसति क्षितिम् ॥ (५३।२)