सेत्त्लेमेन्त् ओड़् थे चोउन्त्र्य्सिदेभूतपूर्वम् अभूतपूर्वं वा जनपदं परदेशापवाहनेन स्वदेशाभिष्यन्दवमनेन वा निवेशयेत् ॥ (१।१)

शूद्रकर्षकप्रायं कुलशतावरं पञ्चकुलशतपरं ग्रामं क्रोशद्विक्रोशसीमानम् अन्योन्यारक्षं निवेशयेत् ॥ (२।१)

नदीशैलवनभृष्टिदरीसेतुबन्धशमीशाल्मलीक्षीरवृक्षान् अन्तेषु सीम्नां स्थापयेत् ॥ (३।१)

अष्टशतग्राम्या मध्ये स्थानीयम् चतुःशतग्राम्या द्रोणमुखम् द्विशतग्राम्याः कार्वटिकम् दशग्रामीसंग्रहेण संग्रहं स्थापयेत् ॥ (४।१)

अन्तेष्वन्तपालदुर्गाणि जनपदद्वाराण्यन्तपालाधिष्ठितानि स्थापयेत् ॥ (५।१)

तेषाम् अन्तराणि वागुरिकशबरपुलिन्दचण्डालारण्यचरा रक्षेयुः ॥ (६।१)

ऋत्विगाचार्यपुरोहितश्रोत्रियेभ्यो ब्रह्मदेयान्य् अदण्डकराण्य् अभिरूपदायादकानि प्रयच्छेत् अध्यक्षसंख्यायकादिभ्यो गोपस्थानिकानीकस्थचिकित्सकाश्वदमकजङ्घाकारिकेभ्यश्च विक्रयाधानवर्जानि ॥ (७।१)

करदेभ्यः कृतक्षेत्राण्यैकपुरुषिकाणि प्रयच्छेत् ॥ (८।१)

अकृतानि कर्तृभ्यो नादेयानि ॥ (९।१)

अकृषताम् आच्छिद्यान्येभ्यः प्रयच्छेत् ॥ (१०।१)

ग्रामभृतकवैदेहका वा कृषेयुः ॥ (११।१)

अकृषन्तो वावहीनं दद्युः ॥ (१२।१)

धान्यपशुहिरण्यैश्चैतान् अनुगृह्णीयात् ॥ (१३।१)

तान्यनु सुखेन दद्युः ॥ (१४।१)

अनुग्रहपरिहारौ चैतेभ्यः कोशवृद्धिकरौ दद्यात् कोशोपघातकौ वर्जयेत् ॥ (१५।१)

अल्पकोशो हि राजा पौरजानपदान् एव ग्रसते ॥ (१६।१)

निवेशसमकालं यथागतकं वा परिहारं दद्यात् ॥ (१७।१)

निवृत्तपरिहारान् पितेवानुगृह्णीयात् ॥ (१८।१)

आकरकर्मान्तद्रव्यहस्तिवनव्रजवणिक्पथप्रचारान् वारिस्थलपथपण्यपत्तनानि च निवेशयेत् ॥ (१९।१)

सहोदकम् आहार्योदकं वा सेतुं बन्धयेत् ॥ (२०।१)

अन्येषां वा बध्नतां भूमिमार्गवृक्षोपकरणानुग्रहं कुर्यात् पुण्यस्थानारामाणां च ॥ (२१।१)

सम्भूय सेतुबन्धाद् अपक्रामतः कर्मकरबलीवर्दाः कर्म कुर्युः ॥ (२२।१)

व्ययकर्मणि च भागी स्यात् न चांशं लभेत ॥ (२३।१)

मत्स्यप्लवहरितपण्यानां सेतुषु राजा स्वाम्यं गच्छेत् ॥ (२४।१)

दासाहितकबन्धून् अशृण्वतो राजा विनयं ग्राहयेत् ॥ (२५।१)

बालवृद्धव्यसन्यनाथांश्च राजा बिभृयात् स्त्रियम् अप्रजातां प्रजातायाश्च पुत्रान् ॥ (२६।१)

बालद्रव्यं ग्रामवृद्धा वर्धयेयुर् आ व्यवहारप्रापणात् देवद्रव्यं च ॥ (२७।१)

अपत्यदारं मातापितरौ भ्रातॄन् अप्राप्तव्यवहारान् भगिनीः कन्या विधवाश्चाबिभ्रतः शक्तिमतो द्वादशपणो दण्डः अन्यत्र पतितेभ्यः अन्यत्र मातुः ॥ (२८।१)

पुत्रदारम् अप्रतिविधाय प्रव्रजतः पूर्वः साहसदण्डः स्त्रियं च प्रव्राजयतः ॥ (२९।१)

लुप्तव्यायामः प्रव्रजेद् आपृच्छ्य धर्मस्थान् ॥ (३०।१)

अन्यथा नियम्येत ॥ (३१।१)

वानप्रस्थाद् अन्यः प्रव्रजितभावः सजाताद् अन्यः संघः सामुत्थायिकाद् अन्यः समयानुबन्धो वा नास्य जनपदम् उपनिविशेत ॥ (३२।१)

न च तत्रारामा विहारार्था वा शालाः स्युः ॥ (३३।१)

नटनर्तकगायनवादकवाग्जीवनकुशीलवा न कर्मविघ्नं कुर्युः ॥ (३४।१)

निराश्रयत्वाद् ग्रामाणां क्षेत्राभिरतत्वाच्च पुरुषाणां कोशविष्टिद्रव्यधान्यरसवृद्धिर् भवति ॥ (३५।१)

परचक्राटवीग्रस्तं व्याधिदुर्भिक्षपीडितम् । (३६।१)

देशं परिहरेद् राजा व्ययक्रीडाश्च वारयेत् ॥ (३६।२)

दण्डविष्टिकराबाधै रक्षेद् उपहतां कृषिम् । (३७।१)

स्तेनव्यालविषग्राहैर् व्याधिभिश्च पशुव्रजान् ॥ (३७।२)

वल्लभैः कार्मिकैः स्तेनैर् अन्तपालैश्च पीडितम् । (३८।१)

शोधयेत् पशुसंघैश्च क्षीयमाणं वणिक्पथम् ॥ (३८।२)

एवं द्रव्यद्विपवनं सेतुबन्धम् अथाकरान् । (३९।१)

रक्षेत् पूर्वकृतान् राजा नवांश्चाभिप्रवर्तयेत् ॥ (३९।२)