ओन् एदिच्त्स्शासने शासनम् इत्याचक्षते ॥ (१।१)

शासनप्रधाना हि राजानः तन्मूलत्वात् संधिविग्रहयोः ॥ (२।१)

तस्माद् अमात्यसम्पदोपेतः सर्वसमयविद् आशुग्रन्थश्चार्वक्षरो लेखनवाचनसमर्थो लेखकः स्यात् ॥ (३।१)

सो ऽव्यग्रमना राज्ञः संदेशं श्रुत्वा निश्चितार्थं लेखं विदध्यात् देशैश्वर्यवंशनामधेयोपचारम् ईश्वरस्य देशनामधेयोपचारम् अनीश्वरस्य ॥ (४।१)

जातिं कुलं स्थानवयःश्रुतानि कर्मर्द्धिशीलान्यथ देशकालौ । (५।१)

यौनानुबन्धं च समीक्ष्य कार्ये लेखं विदध्यात् पुरुषानुरूपम् ॥ (५।२)

अर्थक्रमः सम्बन्धः परिपूर्णता माधुर्यम् औदार्यं स्पष्टत्वम् इति लेखसम्पत् ॥ (६।१)

तत्र यथावद् अनुपूर्वक्रिया प्रधानस्यार्थस्य पूर्वम् अभिनिवेश इत्यर्थक्रमः ॥ (७।१)

प्रस्तुतस्यार्थस्यानुपरोधाद् उत्तरस्य विधानम् आ समाप्तेर् इति सम्बन्धः ॥ (८।१)

अर्थपदाक्षराणाम् अन्यूनातिरिक्तता हेतूदाहरणदृष्टान्तैर् अर्थोपवर्णनाश्रान्तपदतेति परिपूर्णता ॥ (९।१)

सुखोपनीतचारुअर्थशब्दाभिधानं माधुर्यम् ॥ (१०।१)

अग्राम्यशब्दाभिधानम् औदार्यम् ॥ (११।१)

प्रतीतशब्दप्रयोगः स्पष्टत्वम् इति ॥ (१२।१)

अकारादयो वर्णास्त्रिषष्टिः ॥ (१३।१)

वर्णसंघातः पदम् ॥ (१४।१)

तच्चतुर्विधं नामाख्यातोपसर्गनिपाताश्चेति ॥ (१५।१)

तत्र नाम सत्त्वाभिधायि ॥ (१६।१)

अविशिष्टलिङ्गम् आख्यातं क्रियावाचि ॥ (१७।१)

क्रियाविशेषकाः प्रादय उपसर्गाः ॥ (१८।१)

अव्ययाश्चादयो निपाताः ॥ (१९।१)

पदसमूहो वाक्यम् अर्थपरिसमाप्तौ ॥ (२०।१)

एकपदावरस् त्रिपदपरः परपदार्थानुपरोधेन वर्गः कार्यः ॥ (२१।१)

लेखपरिसंहरणार्थ इतिशब्दो वाचिकम् अस्येति च ॥ (२२।१)

निन्दा प्रशंसा पृच्छा च तथाख्यानम् अथार्थना । (२३।१)

प्रत्याख्यानम् उपालम्भः प्रतिषेधो ऽथ चोदना ॥ (२३।२)

सान्त्वम् अभ्युपपत्तिश्च भर्त्सनानुनयौ तथा । (२४।१)

एतेष्वर्थाः प्रवर्तन्ते त्रयोदशसु लेखजाः ॥ (२४।२)

तत्राभिजनशरीरकर्मणां दोषवचनं निन्दा ॥ (२५।१)

गुणवचनम् एतेषाम् एव प्रशंसा ॥ (२६।१)

कथम् एतद् इति पृच्छा ॥ (२७।१)

एवम् इत्याख्यानम् ॥ (२८।१)

देहि इत्यर्थना ॥ (२९।१)

न प्रयच्छामि इति प्रत्याख्यानम् ॥ (३०।१)

अननुरूपं भवतः इत्युपालम्भः ॥ (३१।१)

मा कार्षीः इति प्रतिषेधः ॥ (३२।१)

इदं क्रियताम् इति चोदना ॥ (३३।१)

यो ऽहं स भवान् यन् मम द्रव्यं तद् भवतः इत्युपग्रहः सान्त्वम् ॥ (३४।१)

व्यसनसाहाय्यम् अभ्युपपत्तिः ॥ (३५।१)

सदोषम् आयतिप्रदर्शनम् अभिभर्त्सनम् ॥ (३६।१)

अनुनयस्त्रिविधो ऽर्थकृतावतिक्रमे पुरुषादिव्यसने चेति ॥ (३७।१)

प्रज्ञापनाज्ञापरिदानलेखास्तथा परीहारनिसृष्टिलेखौ । (३८।१)

प्रावृत्तिकश्च प्रतिलेख एव सर्वत्रगश्चेति हि शासनानि ॥ (३८।२)

अनेन विज्ञापितम् एवम् आह तद् दीयतां चेद् यदि तत्त्वम् अस्ति । (३९।१)

राज्ञः समीपे वरकारम् आह प्रज्ञापनैषा विविधोपदिष्टा ॥ (३९।२)

भर्तुर् आज्ञा भवेद् यत्र निग्रहानुग्रहौ प्रति । (४०।१)

विशेषेण तु भृत्येषु तदाज्ञालेखलक्षणम् ॥ (४०।२)

यथार्हगुणसंयुक्ता पूजा यत्रोपलक्ष्यते । (४१।१)

अप्याधौ परिदाने वा भवतस्ताव् उपग्रहौ ॥ (४१।२)

जातेर् विशेषेषु परेषु चैव ग्रामेषु देशेषु च तेषु तेषु । (४२।१)

अनुग्रहो यो नृपतेर् निदेशात् तज्ज्ञः परीहार इति व्यवस्येत् ॥ (४२।२)

निसृष्टिस्थापना कार्यकरणे वचने तथा । (४३।१)

एष वाचिकलेखः स्याद् भवेन् नैसृष्टिको ऽपि वा ॥ (४३।२)

विविधां दैवसंयुक्तां तत्त्वजां चैव मानुषीम् । (४४।१)

द्विविधां तां व्यवस्यन्ति प्रवृत्तिं शासनं प्रति ॥ (४४।२)

दृष्ट्वा लेखं यथातत्त्वं ततः प्रत्यनुभाष्य च । (४५।१)

प्रतिलेखो भवेत् कार्यो यथा राजवचस्तथा ॥ (४५।२)

यत्रेश्वरांश्चाधिकृतांश्च राजा रक्षोपकारौ पथिकार्थम् आह । (४६।१)

सर्वत्रगो नाम भवेत् स मार्गे देशे च सर्वत्र च वेदितव्यः ॥ (४६।२)

उपायाः सामोपप्रदानभेददण्डाः ॥ (४७।१)

तत्र साम पञ्चविधं गुणसंकीर्तनम् सम्बन्धोपाख्यानम् परस्परोपकारसंदर्शनम् आयतिप्रदर्शनम् आत्मोपनिधानम् इति ॥ (४८।१)

तत्राभिजनशरीरकर्मप्रकृतिश्रुतद्रव्यादीनां गुणग्रहणं प्रशंसा स्तुतिर् गुणसंकीर्तनम् ॥ (४९।१)

ज्ञातियौनमौखस्रौवकुलहृदयमित्रसंकीर्तनं सम्बन्धोपाख्यानम् ॥ (५०।१)

स्वपक्षपरपक्षयोर् अन्योन्योपकारसंकीर्तनं परस्परोपकारसंदर्शनम् ॥ (५१।१)

अस्मिन् एवं कृत इदम् आवयोर् भवति इत्याशाजननम् आयतिप्रदर्शनम् ॥ (५२।१)

यो ऽहं स भवान् यन् मम द्रव्यं तद् भवता स्वकृत्येषु प्रयोज्यताम् इत्यात्मोपनिधानम् । (५३।१)

इति ॥ (५३।२)

उपप्रदानम् अर्थोपकारः ॥ (५४।१)

शङ्काजननं निर्भर्त्सनं च भेदः ॥ (५५।१)

वधः परिक्लेशो ऽर्थहरणं दण्डः । (५६।१)

इति ॥ (५६।२)

अकान्तिर् व्याघातः पुनरुक्तम् अपशब्दः सम्प्लव इति लेखदोषः ॥ (५७।१)

तत्र कालपत्त्रकम् अचारुविषम् अविरागाक्षरत्वम् अकान्तिः ॥ (५८।१)

पूर्वेण पश्चिमस्यानुपपत्तिर् व्याघातः ॥ (५९।१)

उक्तस्याविशेषेण द्वितीयम् उच्चारणं पुनरुक्तम् ॥ (६०।१)

लिङ्गवचनकालकारकाणाम् अन्यथाप्रयोगो ऽपशब्दः ॥ (६१।१)

अवर्गे वर्गकरणं चावर्गक्रिया गुणविपर्यासः सम्प्लवः । (६२।१)

इति ॥ (६२।२)

सर्वशास्त्राण्यनुक्रम्य प्रयोगम् उपलभ्य च । (६३।१)

कौटिल्येन नरेन्द्रार्थे शासनस्य विधिः कृतः ॥ (६३।२)