चोन्त्रोल्लेर् ओड़् स्पिरितुअल् लिक़ुओर्स्सुराध्यक्षः सुराकिण्वव्यवहारान् दुर्गे जनपदे स्कन्धावारे वा तज्जातसुराकिण्वव्यवहारिभिः कारयेद् एकमुखम् अनेकमुखं वा विक्रयक्रयवशेन वा ॥ (१।१)

षट्शतम् अत्ययम् अन्यत्र कर्तृक्रेतृविक्रेतॄणां स्थापयेत् ॥ (२।१)

ग्रामाद् अनिर्णयणम् असंपातं च सुरायाः प्रमादभयात् कर्मसु निर्दिष्टानाम् मर्यादातिक्रमभयाद् आर्याणाम् उत्साहभयाच्च तीक्ष्णानाम् ॥ (३।१)

लक्षितम् अल्पं वा चतुर्भागम् अर्धकुडुबं कुडुबम् अर्धप्रस्थं प्रस्थं वेति ज्ञातशौचा निर्हरेयुः ॥ (४।१)

पानागारेषु वा पिबेयुर् असंचारिणः ॥ (५।१)

निक्षेपोपनिधिप्रयोगापहृतानाम् अनिष्टोपगतानां च द्रव्याणां ज्ञानार्थम् अस्वामिकं कुप्यं हिरण्यं चोपलभ्य निक्षेप्तारम् अन्यत्र व्यपदेशेन ग्राहयेद् अतिव्ययकर्तारम् अनायतिव्ययं च ॥ (६।१)

न चानर्घेण कालिकां वा सुरां दद्याद् अन्यत्र दुष्टसुरायाः ॥ (७।१)

ताम् अन्यत्र विक्रापयेत् ॥ (८।१)

दासकर्मकरेभ्यो वा वेतनं दद्यात् ॥ (९।१)

वाहनप्रतिपानं सूकरपोषणं वा दद्यात् ॥ (१०।१)

पानागाराण्यनेककक्ष्याणि विभक्तशयनासनवन्ति पानोद्देशानि गन्धमाल्योदकवन्ति ऋतुसुखानि कारयेत् ॥ (११।१)

तत्रस्थाः प्रकृत्यौत्पत्तिकौ व्ययौ गूढा विद्युः आगन्तूंश्च ॥ (१२।१)

क्रेतॄणां मत्तसुप्तानाम् अलङ्काराच्छादनहिरण्यानि च विद्युः ॥ (१३।१)

तन्नाशे वणिजस्तच्च तावच्च दण्डं दद्युः ॥ (१४।१)

वणिजस्तु संवृतेषु कक्ष्याविभागेषु स्वदासीभिः पेशलरूपाभिर् आगन्तूनां वास्तव्यानां चार्यरूपाणां मत्तसुप्तानां भावं विद्युः ॥ (१५।१)

मेदकप्रसन्नासवारिष्टमैरेयमधूनाम् ॥ (१६।१)

उदकद्रोणं तण्डुलानाम् अर्धाढकं त्रयः प्रस्थाः किण्वस्येति मेदकयोगः ॥ (१७।१)

द्वादशाढकं पिष्टस्य पञ्च प्रस्थाः किण्वस्य क्रमुकत्वक्फलयुक्तो वा जातिसम्भारः प्रसन्नायोगः ॥ (१८।१)

कपित्थतुला फाणितं पञ्चतौलिकं प्रस्थो मधुन इत्यासवयोगः ॥ (१९।१)

पादाधिको ज्येष्ठः पादहीनः कनिष्ठः ॥ (२०।१)

चिकित्सकप्रमाणाः प्रत्येकशो विकाराणाम् अरिष्टाः ॥ (२१।१)

मेषशृङ्गीत्वक्क्वाथाभिषुतो गुडप्रतीवापः पिप्पलीमरिचसम्भारस्त्रिफलायुक्तो वा मैरेयः ॥ (२२।१)

गुडयुक्तानां वा सर्वेषां त्रिफलासम्भारः ॥ (२३।१)

मृद्वीकारसो मधु ॥ (२४।१)

तस्य स्वदेशो व्याख्यानं कापिशायनं हारहूरकम् इति ॥ (२५।१)

माषकलनीद्रोणमामं सिद्धं वा त्रिभागाधिकतण्डुलं मोरटादीनां कार्षिकभागयुक्तं किण्वबन्धः ॥ (२६।१)

पाठालोध्रतेजोवत्येलावालुकमधुकमधुरसाप्रियङ्गुदारुहरिद्रामरिचपिप्पलीनां च पञ्चकार्षिकः सम्भारयोगो मेदकस्य प्रसन्नायाश्च ॥ (२७।१)

मधुकनिर्यूहयुक्ता कटशर्करा वर्णप्रसादनी च ॥ (२८।१)

चोचचित्रकविलङ्गगजपिप्पलीनां च कार्षिकः क्रमुकमधुकमुस्तालोध्राणां द्विकार्षिकश्चासवसम्भारः ॥ (२९।१)

दशभागश्चैषां बीजबन्धः ॥ (३०।१)

प्रसन्नायोगः श्वेतसुरायाः ॥ (३१।१)

सहकारसुरा रसोत्तरा बीजोत्तरा वा महासुरा संभारिकी वा ॥ (३२।१)

तासां मोरटापलाशपत्तूरमेषशृङ्गीकरञ्जक्षीरवृक्षकषायभावितं दग्धकटशर्कराचूर्णं लोध्रचित्रकविलङ्गपाठामुस्ताकलिङ्गयवदारुहरिद्रेन्दीवरशतपुष्पापामार्गसप्तपर्णनिम्बास्फोतकल्कार्धयुक्तम् अन्तर्नखो मुष्टिः कुम्भीं राजपेयां प्रसादयति ॥ (३३।१)

फाणितः पञ्चपलिकश्चात्र रसवृद्धिर् देयः ॥ (३४।१)

कुटुम्बिनः कृत्येषु श्वेतसुराम् औषधार्थं वारिष्टम् अन्यद् वा कर्तुं लभेरन् ॥ (३५।१)

उत्सवसमाजयात्रासु चतुरहः सौरिको देयः ॥ (३६।१)

तेष्वननुज्ञातानां प्रहवनान्तं दैवसिकम् अत्ययं गृह्णीयात् ॥ (३७।१)

सुराकिण्वविचयं स्त्रियो बालाश्च कुर्युः ॥ (३८।१)

अराजपण्याः पञ्चकं शतं शुल्कं दद्युः सुरकामेदकारिष्टमधुफलाम्लाम्लशीधूनां च ॥ (३९।१)

अह्नश्च विक्रयं ज्ञात्वा व्याजीं मानहिरण्ययोः । (४०।१)

तथा वैधरणं कुर्याद् उचितं चानुवर्तयेत् ॥ (४०।२)