इम्पोर्तन्चे ओड़् दण्डकृषिपाशुपाल्ये वणिज्या च वार्ता धान्यपशुहिरण्यकुप्यविष्टिप्रदानाद् औपकारिकी ॥ (१।१)

तया स्वपक्षं परपक्षं च वशीकरोति कोशदण्डाभ्याम् ॥ (२।१)

आन्वीक्षिकी त्रयी वार्त्तानां योगक्षेमसाधनो दण्डः तस्य नीतिर् दण्डनीतिः अलब्धलाभार्था लब्धपरिरक्षणी रक्षितविवर्धनी वृद्धस्य तीर्थे प्रतिपादनी च ॥ (३।१)

तस्याम् आयत्ता लोकयात्रा ॥ (४।१)

तस्माल्लोकयात्रार्थी नित्यम् उद्यतदण्डः स्यात् ॥ (५।१)

न ह्येवंविधं वशोपनयनम् अस्ति भूतानां यथा दण्डः । (६।१)

इत्याचार्याः ॥ (६।२)

नेति कौटिल्यः ॥ (७।१)

तीक्ष्णदण्डो हि भूतानाम् उद्वेजनीयो भवति ॥ (८।१)

मृदुदण्डः परिभूयते ॥ (९।१)

यथार्हदण्डः पूज्यते ॥ (१०।१)

सुविज्ञातप्रणीतो हि दण्डः प्रजा धर्मार्थकामैर् योजयति ॥ (११।१)

दुष्प्रणीतः कामक्रोधाभ्याम् अवज्ञानाद् वा वानप्रस्थपरिव्राजकान् अपि कोपयति किमङ्ग पुनर् गृहस्थान् ॥ (१२।१)

अप्रणीतस्तु मात्स्यन्यायम् उद्भावयति ॥ (१३।१)

बलीयान् अबलं हि ग्रसते दण्डधराभावे ॥ (१४।१)

स तेन गुप्तः प्रभवति इति ॥ (१५।१)

चतुर्वर्णाश्रमो लोको राज्ञा दण्डेन पालितः । (१६।१)

स्वधर्मकर्माभिरतो वर्तते स्वेषु वर्त्मसु ॥ (१६।२)