अप्पोइन्त्मेन्त् ओड़् चोउन्सेल्लोर्स् अन्द् छप्लैन्जानपदो ऽभिजातः स्ववग्रहः कृतशिल्पश्चक्षुष्मान् प्राज्ञो धारयिष्णुर् दक्षो वाग्मी प्रगल्भः प्रतिपत्तिमान् उत्साहप्रभावयुक्तः क्लेशसहः शुचिर् मैत्रो दृढभक्तिः शीलबलारोग्यसत्त्वयुक्तः स्तम्भचापलहीनः सम्प्रियो वैराणाम् अकर्तेत्यमात्यसम्पत् ॥ (१।१)

अतः पादार्धगुणहीनौ मध्यमावरौ ॥ (२।१)

तेषां जनपदभिजनम् अवग्रहं चाप्ततः परीक्षेत समानविद्येभ्यः शिल्पं शास्त्रचक्षुष्मत्तां च कर्मारम्भेषु प्रज्ञां धारयिष्णुतां दाक्ष्यं च कथायोगेषु वाग्मित्वं प्रागल्भ्यं प्रतिभानवत्त्वं च संवासिभ्यः शीलबलारोग्यसत्त्वयोगम् अस्तम्भम् अचापलं च प्रत्यक्षतः सम्प्रियत्वम् अवैरत्वं च ॥ (३।१)

प्रत्यक्षपरोक्षानुमेया हि राजवृत्तिः ॥ (४।१)

स्वयं दृष्टं प्रत्यक्षम् ॥ (५।१)

परोपदिष्टं परोक्षम् ॥ (६।१)

कर्मसु कृतेनाकृतावेक्षणम् अनुमेयम् ॥ (७।१)

यौगपद्यात् तु कर्मणाम् अनेकत्वाद् अनेकस्थत्वाच्च देशकालात्ययो मा भूद् इति परोक्षम् अमात्यैः कारयेदित्यमात्यकर्म ॥ (८।१)

पुरोहितम् उदितोदितकुलशीलं साङ्गे वेदे दैवे निमित्ते दण्डनीत्यां चाभिविनीतम् आपदां दैवमानुषीणाम् अथर्वभिर् उपायैश्च प्रतिकर्तारं कुर्वीत ॥ (९।१)

तम् आचार्यं शिष्यः पितरं पुत्रो भृत्यः स्वामिनम् इव चानुवर्तेत ॥ (१०।१)

ब्राह्मणेनैधितं क्षत्रं मन्त्रिमन्त्राभिमन्त्रितम् । (११।१)

जयत्यजितम् अत्यन्तं शास्त्रानुगमशस्त्रितम् ॥ (११।२)