थे चोन्दुच्त् ओड़् अ प्रिन्चे इन् दिस्ड़वोउर्विनीतो राजपुत्रः कृच्छ्रवृत्तिर् असदृशे कर्मणि नियुक्तः पितरम् अनुवर्तेत अन्यत्र प्राणबाधकप्रकृतिकोपकपातकेभ्यः ॥ (१।१)

पुण्ये कर्मणि नियुक्तः पुरुषम् अधिष्ठातारं याचेत् ॥ (२।१)

पुरुषाधिष्ठितश्च सविशेषम् आदेशम् अनुतिष्ठेत् ॥ (३।१)

अभिरूपं च कर्मफलम् औपायनिकं च लाभं पितुर् उपनाययेत् ॥ (४।१)

तथाप्यतुष्यन्तम् अन्यस्मिन् पुत्रे दारेषु वा स्निह्यन्तम् अरण्यायापृच्छेत ॥ (५।१)

बन्धवधभयाद् वा यः सामन्तो न्यायवृत्तिर् धार्मिकः सत्यवागविसंवादकः प्रतिग्रहीता मानयिता चाभिपन्नानां तम् आश्रयेत ॥ (६।१)

तत्रस्थः कोशदण्डसम्पन्नः प्रवीरपुरुषकन्यासम्बन्धम् अटवीसम्बन्धं कृत्यपक्षोपग्रहं च कुर्यात् ॥ (७।१)

एकचरः सुवर्णपाकमणिरागहेमरूप्यपण्याकरकर्मान्तान् आजीवेत् ॥ (८।१)

पाषण्डसंघद्रव्यम् अश्रोत्रियोपभोग्यं वा देवद्रव्यम् आढ्यविधवाद्रव्यं वा गूढम् अनुप्रविश्य सार्थयानपात्राणि च मदनरसयोगेनातिसंधायापहरेत् ॥ (९।१)

पारग्रामिकं वा योगम् आतिष्ठेत् ॥ (१०।१)

मातुः परिजनोपग्रहेण वा चेष्टेत ॥ (११।१)

कारुशिल्पिकुशीलवचिकित्सकवाग्जीवनपाषण्डच्छद्मभिर् वा नष्टरूपस्तद्व्यञ्जनसखश्छिद्रेषु प्रविश्य राज्ञः शस्त्ररसाभ्यां प्रहृत्य ब्रूयात् अहम् असौ कुमारः सहभोग्यम् इदं राज्यम् एको नार्हति भोक्तुम् ये कामयन्ते मां भर्तुं तान् अहं द्विगुणेन भक्तवेतनेनोपस्थास्यामि इति । (१२।१)

इत्यपरुद्धवृत्तम् । (१२।२)

अपरुद्धं तु मुख्यपुत्रापसर्पाः प्रतिपाद्यानयेयुः माता वा प्रतिगृहीता ॥ (१२।३)

त्यक्तं गूढपुरुषाः शस्त्ररसाभ्यां हन्युः ॥ (१३।१)

अत्यक्तं तुल्यशीलाभिः स्त्रीभिः पानेन मृगयया वा प्रसञ्जयित्वा रात्राव् उपगृह्यानयेयुः ॥ (१४।१)

उपस्थितं च राज्येन मदूर्ध्वम् इति सान्त्वयेत् । (१५।१)

एकस्थम् अथ संरुन्ध्यात् पुत्रवांस्तु प्रवासयेत् ॥ (१५।२)