YSBhā zu YS, 2, 12.1
Select a line for its word-by-word analysis.
तत्र पुण्यापुण्यकर्माशयः कामलोभमोहक्रोधप्रभवः ॥ (१।१)
tatra puṇyāpuṇyakarmāśayaḥ kāmalobhamohakrodhaprabhavaḥ ||
स दृष्टजन्मवेदनीयश्चादृष्टजन्मवेदनीयश्च ॥ (२।१)
sa dṛṣṭajanmavedanīyaścādṛṣṭajanmavedanīyaśca ||
तत्र तीव्रसंवेगेन मन्त्रतपःसमाधिभिर् निर्वर्तित ईश्वरदेवतामहर्षिमहानुभावानाम् आराधनाद् वा यः परिनिष्पन्नः स सद्यः परिपच्यते पुण्यकर्माशय इति ॥ (३।१)
tatra tīvrasaṃvegena mantratapaḥsamādhibhir nirvartita īśvaradevatāmaharṣimahānubhāvānām ārādhanād vā yaḥ pariniṣpannaḥ sa sadyaḥ paripacyate puṇyakarmāśaya iti ||
यथा तीव्रक्लेशेन भीतव्याधितकृपणेषु विश्वासोपगतेषु वा महानुभावेषु वा तपस्विषु कृतः पुनः पुनर् अपकारः स चापि पापकर्माशयः सद्य एव परिपच्यते यथा नन्दीश्वरः कुमारो मनुष्यपरिणामं हित्वा देवत्वेन परिणतः तथा नहुषो ऽपि देवानाम् इन्द्रः स्वकं परिणामं हित्वा तिर्यक्त्वेन परिणत इति ॥ (४।१)
yathā tīvrakleśena bhītavyādhitakṛpaṇeṣu viśvāsopagateṣu vā mahānubhāveṣu vā tapasviṣu kṛtaḥ punaḥ punar apakāraḥ sa cāpi pāpakarmāśayaḥ sadya eva paripacyate yathā nandīśvaraḥ kumāro manuṣyapariṇāmaṃ hitvā devatvena pariṇataḥ tathā nahuṣo 'pi devānām indraḥ svakaṃ pariṇāmaṃ hitvā tiryaktvena pariṇata iti ||
तत्र नारकाणां नास्ति दृष्टजन्मवेदनीयः कर्माशयः ॥ (५।१)
tatra nārakāṇāṃ nāsti dṛṣṭajanmavedanīyaḥ karmāśayaḥ ||
क्षीणक्लेशानाम् अपि नास्त्यदृष्टजन्मवेदनीयः कर्माशय इति ॥ (६।१)
kṣīṇakleśānām api nāstyadṛṣṭajanmavedanīyaḥ karmāśaya iti ||
Data courtesy of The Digital Corpus of Sanskrit.