विपर्ययज्ञानवासनेत्य् अर्थः ॥ (१।१)

विपर्ययज्ञानवासनावासिता च न कार्यनिष्ठां पुरुषख्यातिं बुद्धिः प्राप्नोति साधिकारा पुनर् आवर्तते ॥ (२।१)

सा तु पुरुषख्यातिपर्यवसाना कार्यनिष्ठां प्राप्नोति चरिताधिकारा निवृत्तादर्शना बन्धकारणाभावान् न पुनर् आवर्तते ॥ (३।१)

अत्र कश्चित् षण्डकोपाख्यानेनोद्घाटयति ॥ (४।१)

मुग्धया भार्ययाभिधीयते षण्डकः ॥ (५।१)

आर्यपुत्र अपत्यवती मे भगिनी किमर्थं नाहम् इति ॥ (६।१)

स ताम् आह ॥ (७।१)

मृतस् ते ऽहम् अपत्यम् उत्पादयिष्यामीति ॥ (८।१)

तथेदं विद्यमानं ज्ञानं चित्तनिवृत्तिं न करोति विनष्टं करिष्यतीति का प्रत्याशा ॥ (९।१)

तत्राचार्यदेशीयो वक्ति ॥ (१०।१)

ननु बुद्धिनिवृत्तिर् एव मोक्षः अदर्शनकारणाभावाद् बुद्धिनिवृत्तिः ॥ (११।१)

तच् चादर्शनं बन्धकारणं दर्शनान् निवर्तते ॥ (१२।१)

तत्र चित्तनिवृत्तिर् एव मोक्षः ॥ (१३।१)

किमर्थम् अस्थान एवास्य मतिविभ्रमः ॥ (१४।१)

हेयं दुःखम् उक्तम् ॥ (१५।१)

हेयकारणं च संयोगाख्यं सनिमित्तम् उक्तम् ॥ (१६।१)

अतः परं हानं वक्तव्यम् ॥ (१७।१)