दृशिमात्र इति दृक्शक्तिर् एव विशेषणापरामृष्टेत्य् अर्थः ॥ (१।१)

स पुरुषो बुद्धेः प्रतिसंवेदी ॥ (२।१)

स बुद्धेर् न सरूपो नात्यन्तं विरूप इति ॥ (३।१)

न तावत् सरूपः ॥ (४।१)

कस्मात् ॥ (५।१)

ज्ञाताज्ञातविषयत्वात् परिणामिनी हि बुद्धिः तस्याश्च विषयो गवादिर् घटादिर् वा ज्ञातश्चाज्ञातश्चेति परिणामित्वं दर्शयति ॥ (६।१)

सदाज्ञातविषयत्वं तु पुरुषस्यापरिणामित्वं परिदीपयति ॥ (७।१)

कस्मात् ॥ (८।१)

न हि बुद्धिश्च नाम पुरुषविषयश्च स्याद् गृहीतागृहीता चेति सिद्धं पुरुषस्य सदाज्ञातविषयत्वं ततश्चापरिणामित्वम् इति ॥ (९।१)

किं च परार्था बुद्धिः संहत्यकारित्वात् स्वार्थः पुरुष इति ॥ (१०।१)

तथा सर्वार्थाध्यवसायकत्वात् त्रिगुणा बुद्धिस् त्रिगुणत्वाद् अचेतनेति ॥ (११।१)

गुणानां तूपद्रष्टा पुरुष इति ॥ (१२।१)

अतो न सरूपः ॥ (१३।१)

अस्तु तर्हि विरूप इति ॥ (१४।१)

नात्यन्तं विरूपः ॥ (१५।१)

कस्मात् ॥ (१६।१)

शुद्धो ऽप्यसौ प्रत्ययानुपश्यः ॥ (१७।१)

यतः प्रत्ययं बौद्धम् अनुपश्यति ॥ (१८।१)

तम् अनुपश्यन्न् अतदात्मापि तदात्मक इव प्रत्यवभासते ॥ (१९।१)

तथा चोक्तम् । (२०।१)

अपरिणामिनी हि भोक्तृशक्तिर् अप्रतिसंक्रमा च परिणामिन्यर्थे प्रतिसंक्रान्तेव तद्वृत्तिम् अनुपतति तस्याश्च प्राप्तचैतन्योपग्रहरूपाया बुद्धिवृत्तेर् अनुकारमात्रतया बुद्धिवृत्त्यविशिष्टा हि ज्ञानवृत्तिर् इत्य् आख्यायते ॥ (२०।२)