Devatā देवता

Indra

Ṛṣi ऋषि

Gṛtsamada Bhārgava Śaunaka

Chandas छन्दस्

Jagatī, Triṣṭubh

1. Ṛk 1

   वि॒श्व॒जिते॑ धन॒जिते॑ स्व॒र्जिते॑ सत्रा॒जिते॑ नृ॒जित॑ उर्वरा॒जिते॑ ।
   अ॒श्व॒जिते॑ गो॒जिते॑ अ॒ब्जिते॑ भ॒रेंद्रा॑य॒ सोमं॑ यज॒ताय॑ हर्य॒तं ॥

   विश्वजिते धनजिते स्वर्जिते सत्राजिते नृजित उर्वराजिते |
   अश्वजिते गोजिते अब्जिते भरेन्द्राय सोमं यजताय हर्यतम् ||

   viśvajíte dhanajíte svarjíte satrājíte nṛjíta urvarājíte ǀ
   aśvajíte gojíte abjíte bharéndrāya sómam yajatā́ya haryatám ǁ

   viśvajite dhanajite svarjite satrājite nṛjita urvarājite |
   aśvajite gojite abjite bharendrāya somaṃ yajatāya haryatam ||

   वि॒श्व॒ऽजिते॑ । ध॒न॒ऽजिते॑ । स्वः॒ऽजिते॑ । स॒त्रा॒ऽजिते॑ । नृ॒ऽजिते॑ । उ॒र्व॒रा॒ऽजिते॑ ।
   अ॒श्व॒ऽजिते॑ । गो॒ऽजिते॑ । अ॒प्ऽजिते॑ । भ॒र॒ । इन्द्रा॑य । सोम॑म् । य॒ज॒ताय॑ । ह॒र्य॒तम् ॥

   विश्वऽजिते । धनऽजिते । स्वःऽजिते । सत्राऽजिते । नृऽजिते । उर्वराऽजिते ।
   अश्वऽजिते । गोऽजिते । अप्ऽजिते । भर । इन्द्राय । सोमम् । यजताय । हर्यतम् ॥

   viśva-jíte ǀ dhana-jíte ǀ svaḥ-jíte ǀ satrā-jíte ǀ nṛ-jíte ǀ urvarā-jíte ǀ
   aśva-jíte ǀ go-jíte ǀ ap-jíte ǀ bhara ǀ índrāya ǀ sómam ǀ yajatā́ya ǀ haryatám ǁ

   viśva-jite ǀ dhana-jite ǀ svaḥ-jite ǀ satrā-jite ǀ nṛ-jite ǀ urvarā-jite ǀ
   aśva-jite ǀ go-jite ǀ ap-jite ǀ bhara ǀ indrāya ǀ somam ǀ yajatāya ǀ haryatam ǁ

   2.21.1 Aṣṭaka 2.6.27.1Anuvāka 2.2.96Interpretations

2. Ṛk 2

   अ॒भि॒भुवे॑ऽभिभं॒गाय॑ वन्व॒तेऽषा॑ळ्हाय॒ सह॑मानाय वे॒धसे॑ ।
   तु॒वि॒ग्रये॒ वह्न॑ये दु॒ष्टरी॑तवे सत्रा॒साहे॒ नम॒ इंद्रा॑य वोचत ॥

   अभिभुवे ऽभिभङ्गाय वन्वते ऽषाऌहाय सहमानाय वेधसे |
   तुविग्रये वह्नये दुष्टरीतवे सत्रासाहे नम इन्द्राय वोचत ||

   abhibhúve’bhibhaṅgā́ya vanvaté’ṣāḷhāya sáhamānāya vedháse ǀ
   tuvigráye váhnaye duṣṭárītave satrāsā́he náma índrāya vocata ǁ

   abhibhuve 'bhibhaṅgāya vanvate 'ṣāḷhāya sahamānāya vedhase |
   tuvigraye vahnaye duṣṭarītave satrāsāhe nama indrāya vocata ||

   अ॒भि॒ऽभुवे॑ । अ॒भि॒ऽभ॒ङ्गाय॑ । व॒न्व॒ते । अषा॑ळ्हाय । सह॑मानाय । वे॒धसे॑ ।
   तु॒वि॒ऽग्रये॑ । वह्न॑ये । दु॒स्तरी॑तवे । स॒त्रा॒ऽसहे॑ । नमः॑ । इन्द्रा॑य । वो॒च॒त॒ ॥

   अभिऽभुवे । अभिऽभङ्गाय । वन्वते । अषाळ्हाय । सहमानाय । वेधसे ।
   तुविऽग्रये । वह्नये । दुस्तरीतवे । सत्राऽसहे । नमः । इन्द्राय । वोचत ॥

   abhi-bhúve ǀ abhi-bhaṅgā́ya ǀ vanvaté ǀ áṣāḷhāya ǀ sáhamānāya ǀ vedháse ǀ
   tuvi-gráye ǀ váhnaye ǀ dustárītave ǀ satrā-sáhe ǀ námaḥ ǀ índrāya ǀ vocata ǁ

   abhi-bhuve ǀ abhi-bhaṅgāya ǀ vanvate ǀ aṣāḷhāya ǀ sahamānāya ǀ vedhase ǀ
   tuvi-graye ǀ vahnaye ǀ dustarītave ǀ satrā-sahe ǀ namaḥ ǀ indrāya ǀ vocata ǁ

   2.21.2 Aṣṭaka 2.6.27.2Anuvāka 2.2.97Interpretations

3. Ṛk 3

   स॒त्रा॒सा॒हो ज॑नभ॒क्षो ज॑नंस॒हश्च्यव॑नो यु॒ध्मो अनु॒ जोष॑मुक्षि॒तः ।
   वृ॒तं॒च॒यः सहु॑रिर्वि॒क्ष्वा॑रि॒त इंद्र॑स्य वोचं॒ प्र कृ॒तानि॑ वी॒र्या॑ ॥

   सत्रासाहो जनभक्षो जनंसहश् च्यवनो युध्मो अनु जोषम् उक्षितः |
   वृतञ्चयः सहुरिर् विक्ष्व् आरित इन्द्रस्य वोचम् प्र कृतानि वीर्या ||

   satrāsāhó janabhakṣó janaṃsaháścyávano yudhmó ánu jóṣamukṣitáḥ ǀ
   vṛtaṃcayáḥ sáhurirvikṣvā́ritá índrasya vocam prá kṛtā́ni vīryā́ ǁ

   satrāsāho janabhakṣo janaṃsahaś cyavano yudhmo anu joṣam ukṣitaḥ |
   vṛtañcayaḥ sahurir vikṣv ārita indrasya vocam pra kṛtāni vīryā ||

   स॒त्रा॒ऽस॒हः । ज॒न॒ऽभ॒क्षः । ज॒न॒म्ऽस॒हः । च्यव॑नः । यु॒ध्मः । अनु॑ । जोष॑म् । उ॒क्षि॒तः ।
   वृ॒त॒म्ऽच॒यः । सहु॑रिः । वि॒क्षु । आ॒रि॒तः । इन्द्र॑स्य । वो॒च॒म् । प्र । कृ॒तानि॑ । वी॒र्या॑ ॥

   सत्राऽसहः । जनऽभक्षः । जनम्ऽसहः । च्यवनः । युध्मः । अनु । जोषम् । उक्षितः ।
   वृतम्ऽचयः । सहुरिः । विक्षु । आरितः । इन्द्रस्य । वोचम् । प्र । कृतानि । वीर्या ॥

   satrā-saháḥ ǀ jana-bhakṣáḥ ǀ janam-saháḥ ǀ cyávanaḥ ǀ yudhmáḥ ǀ ánu ǀ jóṣam ǀ ukṣitáḥ ǀ
   vṛtam-cayáḥ ǀ sáhuriḥ ǀ vikṣú ǀ āritáḥ ǀ índrasya ǀ vocam ǀ prá ǀ kṛtā́ni ǀ vīryā́ ǁ

   satrā-sahaḥ ǀ jana-bhakṣaḥ ǀ janam-sahaḥ ǀ cyavanaḥ ǀ yudhmaḥ ǀ anu ǀ joṣam ǀ ukṣitaḥ ǀ
   vṛtam-cayaḥ ǀ sahuriḥ ǀ vikṣu ǀ āritaḥ ǀ indrasya ǀ vocam ǀ pra ǀ kṛtāni ǀ vīryā ǁ

   2.21.3 Aṣṭaka 2.6.27.3Anuvāka 2.2.98Interpretations

4. Ṛk 4

   अ॒ना॒नु॒दो वृ॑ष॒भो दोध॑तो व॒धो गं॑भी॒र ऋ॒ष्वो अस॑मष्टकाव्यः ।
   र॒ध्र॒चो॒दः श्नथ॑नो वीळि॒तस्पृ॒थुरिंद्रः॑ सुय॒ज्ञ उ॒षसः॒ स्व॑र्जनत् ॥

   अनानुदो वृषभो दोधतो वधो गम्भीर ऋष्वो असमष्टकाव्यः |
   रध्रचोदः श्नथनो वीऌइतस् पृथुर् इन्द्रः सुयज्ञ उषसः स्वर् जनत् ||

   anānudó vṛṣabhó dódhato vadhó gambhīrá ṛṣvó ásamaṣṭakāvyaḥ ǀ
   radhracodáḥ śnáthano vīḷitáspṛthúríndraḥ suyajñá uṣásaḥ svárjanat ǁ

   anānudo vṛṣabho dodhato vadho gambhīra ṛṣvo asamaṣṭakāvyaḥ |
   radhracodaḥ śnathano vīḷitas pṛthur indraḥ suyajña uṣasaḥ svar janat ||

   अ॒न॒नु॒ऽदः । वृ॒ष॒भः । दोध॑तः । व॒धः । ग॒म्भी॒रः । ऋ॒ष्वः । अस॑मष्टऽकाव्यः ।
   र॒ध्र॒ऽचो॒दः । श्नथ॑नः । वी॒ळि॒तः । पृ॒थुः । इन्द्रः॑ । सु॒ऽय॒ज्ञः । उ॒षसः॑ । स्वः॑ । ज॒न॒त् ॥

   अननुऽदः । वृषभः । दोधतः । वधः । गम्भीरः । ऋष्वः । असमष्टऽकाव्यः ।
   रध्रऽचोदः । श्नथनः । वीळितः । पृथुः । इन्द्रः । सुऽयज्ञः । उषसः । स्वः । जनत् ॥

   ananu-dáḥ ǀ vṛṣabháḥ ǀ dódhataḥ ǀ vadháḥ ǀ gambhīráḥ ǀ ṛṣváḥ ǀ ásamaṣṭa-kāvyaḥ ǀ
   radhra-codáḥ ǀ śnáthanaḥ ǀ vīḷitáḥ ǀ pṛthúḥ ǀ índraḥ ǀ su-yajñáḥ ǀ uṣásaḥ ǀ sváḥ ǀ janat ǁ

   ananu-daḥ ǀ vṛṣabhaḥ ǀ dodhataḥ ǀ vadhaḥ ǀ gambhīraḥ ǀ ṛṣvaḥ ǀ asamaṣṭa-kāvyaḥ ǀ
   radhra-codaḥ ǀ śnathanaḥ ǀ vīḷitaḥ ǀ pṛthuḥ ǀ indraḥ ǀ su-yajñaḥ ǀ uṣasaḥ ǀ svaḥ ǀ janat ǁ

   2.21.4 Aṣṭaka 2.6.27.4Anuvāka 2.2.99Interpretations

5. Ṛk 5

   य॒ज्ञेन॑ गा॒तुम॒प्तुरो॑ विविद्रिरे॒ धियो॑ हिन्वा॒ना उ॒शिजो॑ मनी॒षिणः॑ ।
   अ॒भि॒स्वरा॑ नि॒षदा॒ गा अ॑व॒स्यव॒ इंद्रे॑ हिन्वा॒ना द्रवि॑णान्याशत ॥

   यज्ञेन गातुम् अप्तुरो विविद्रिरे धियो हिन्वाना उशिजो मनीषिणः |
   अभिस्वरा निषदा गा अवस्यव इन्द्रे हिन्वाना द्रविणान्य् आशत ||

   yajñéna gātúmaptúro vividrire dhíyo hinvānā́ uśíjo manīṣíṇaḥ ǀ
   abhisvárā niṣádā gā́ avasyáva índre hinvānā́ dráviṇānyāśata ǁ

   yajñena gātum apturo vividrire dhiyo hinvānā uśijo manīṣiṇaḥ |
   abhisvarā niṣadā gā avasyava indre hinvānā draviṇāny āśata ||

   य॒ज्ञेन॑ । गा॒तुम् । अ॒प्ऽतुरः॑ । वि॒वि॒द्रि॒रे॒ । धियः॑ । हि॒न्वा॒नाः । उ॒शिजः॑ । म॒नी॒षिणः॑ ।
   अ॒भि॒ऽस्वरा॑ । नि॒ऽसदा॑ । गाः । अ॒व॒स्यवः॑ । इन्द्रे॑ । हि॒न्वा॒नाः । द्रवि॑णानि । आ॒श॒त॒ ॥

   यज्ञेन । गातुम् । अप्ऽतुरः । विविद्रिरे । धियः । हिन्वानाः । उशिजः । मनीषिणः ।
   अभिऽस्वरा । निऽसदा । गाः । अवस्यवः । इन्द्रे । हिन्वानाः । द्रविणानि । आशत ॥

   yajñéna ǀ gātúm ǀ ap-túraḥ ǀ vividrire ǀ dhíyaḥ ǀ hinvānā́ḥ ǀ uśíjaḥ ǀ manīṣíṇaḥ ǀ
   abhi-svárā ǀ ni-sádā ǀ gā́ḥ ǀ avasyávaḥ ǀ índre ǀ hinvānā́ḥ ǀ dráviṇāni ǀ āśata ǁ

   yajñena ǀ gātum ǀ ap-turaḥ ǀ vividrire ǀ dhiyaḥ ǀ hinvānāḥ ǀ uśijaḥ ǀ manīṣiṇaḥ ǀ
   abhi-svarā ǀ ni-sadā ǀ gāḥ ǀ avasyavaḥ ǀ indre ǀ hinvānāḥ ǀ draviṇāni ǀ āśata ǁ

   2.21.5 Aṣṭaka 2.6.27.5Anuvāka 2.2.100Interpretations

6. Ṛk 6

   इंद्र॒ श्रेष्ठा॑नि॒ द्रवि॑णानि धेहि॒ चित्तिं॒ दक्ष॑स्य सुभग॒त्वम॒स्मे ।
   पोषं॑ रयी॒णामरि॑ष्टिं त॒नूनां॑ स्वा॒द्मानं॑ वा॒चः सु॑दिन॒त्वमह्नां॑ ॥

   इन्द्र श्रेष्ठानि द्रविणानि धेहि चित्तिं दक्षस्य सुभगत्वम् अस्मे |
   पोषं रयीणाम् अरिष्टिं तनूनां स्वाद्मानं वाचः सुदिनत्वम् अह्नाम् ||

   índra śréṣṭhāni dráviṇāni dhehi cíttim dákṣasya subhagatvámasmé ǀ
   póṣam rayīṇā́máriṣṭim tanū́nām svādmā́nam vācáḥ sudinatvámáhnām ǁ

   indra śreṣṭhāni draviṇāni dhehi cittiṃ dakṣasya subhagatvam asme |
   poṣaṃ rayīṇām ariṣṭiṃ tanūnāṃ svādmānaṃ vācaḥ sudinatvam ahnām ||

   इन्द्र॑ । श्रेष्ठा॑नि । द्रवि॑णानि । धे॒हि॒ । चित्ति॑म् । दक्ष॑स्य । सु॒ऽभ॒ग॒त्वम् । अ॒स्मे इति॑ ।
   पोष॑म् । र॒यी॒णाम् । अरि॑ष्टिम् । त॒नूना॑म् । स्वा॒द्मान॑म् । वा॒चः । सु॒दि॒न॒ऽत्वम् । अह्ना॑म् ॥

   इन्द्र । श्रेष्ठानि । द्रविणानि । धेहि । चित्तिम् । दक्षस्य । सुऽभगत्वम् । अस्मे इति ।
   पोषम् । रयीणाम् । अरिष्टिम् । तनूनाम् । स्वाद्मानम् । वाचः । सुदिनऽत्वम् । अह्नाम् ॥

   índra ǀ śréṣṭhāni ǀ dráviṇāni ǀ dhehi ǀ cíttim ǀ dákṣasya ǀ su-bhagatvám ǀ asmé íti ǀ
   póṣam ǀ rayīṇā́m ǀ áriṣṭim ǀ tanū́nām ǀ svādmā́nam ǀ vācáḥ ǀ sudina-tvám ǀ áhnām ǁ

   indra ǀ śreṣṭhāni ǀ draviṇāni ǀ dhehi ǀ cittim ǀ dakṣasya ǀ su-bhagatvam ǀ asme iti ǀ
   poṣam ǀ rayīṇām ǀ ariṣṭim ǀ tanūnām ǀ svādmānam ǀ vācaḥ ǀ sudina-tvam ǀ ahnām ǁ

   2.21.6 Aṣṭaka 2.6.27.6Anuvāka 2.2.101Interpretations

Text, recitation and interpretations from the Ṛgveda database of theveda.org.in.