Devatā देवता

Indra

Ṛṣi ऋषि

Gṛtsamada Bhārgava Śaunaka

Chandas छन्दस्

Jagatī, Triṣṭubh

1. Ṛk 1

   तद॑स्मै॒ नव्य॑मंगिर॒स्वद॑र्चत॒ शुष्मा॒ यद॑स्य प्र॒त्नथो॒दीर॑ते ।
   विश्वा॒ यद्गो॒त्रा सह॑सा॒ परी॑वृता॒ मदे॒ सोम॑स्य दृंहि॒तान्यैर॑यत् ॥

   तद् अस्मै नव्यम् अङ्गिरस्वद् अर्चत शुष्मा यद् अस्य प्रत्नथोदीरते |
   विश्वा यद् गोत्रा सहसा परीवृता मदे सोमस्य दृंहितान्य् ऐरयत् ||

   tádasmai návyamaṅgirasvádarcata śúṣmā yádasya pratnáthodī́rate ǀ
   víśvā yádgotrā́ sáhasā párīvṛtā máde sómasya dṛṃhitā́nyáirayat ǁ

   tad asmai navyam aṅgirasvad arcata śuṣmā yad asya pratnathodīrate |
   viśvā yad gotrā sahasā parīvṛtā made somasya dṛṃhitāny airayat ||

   तत् । अ॒स्मै॒ । नव्य॑म् । अ॒ङ्गि॒र॒स्वत् । अ॒र्च॒त॒ । शुष्माः॑ । यत् । अ॒स्य॒ । प्र॒त्नऽथा॑ । उ॒त्ऽईर॑ते ।
   विश्वा॑ । यत् । गो॒त्रा । सह॑सा । परि॑ऽवृता । मदे॑ । सोम॑स्य । दृं॒हि॒तानि॑ । ऐर॑यत् ॥

   तत् । अस्मै । नव्यम् । अङ्गिरस्वत् । अर्चत । शुष्माः । यत् । अस्य । प्रत्नऽथा । उत्ऽईरते ।
   विश्वा । यत् । गोत्रा । सहसा । परिऽवृता । मदे । सोमस्य । दृंहितानि । ऐरयत् ॥

   tát ǀ asmai ǀ návyam ǀ aṅgirasvát ǀ arcata ǀ śúṣmāḥ ǀ yát ǀ asya ǀ pratná-thā ǀ ut-ī́rate ǀ
   víśvā ǀ yát ǀ gotrā́ ǀ sáhasā ǀ pári-vṛtā ǀ máde ǀ sómasya ǀ dṛṃhitā́ni ǀ áirayat ǁ

   tat ǀ asmai ǀ navyam ǀ aṅgirasvat ǀ arcata ǀ śuṣmāḥ ǀ yat ǀ asya ǀ pratna-thā ǀ ut-īrate ǀ
   viśvā ǀ yat ǀ gotrā ǀ sahasā ǀ pari-vṛtā ǀ made ǀ somasya ǀ dṛṃhitāni ǀ airayat ǁ

   2.17.1 Aṣṭaka 2.6.19.1Anuvāka 2.2.60Interpretations

2. Ṛk 2

   स भू॑तु॒ यो ह॑ प्रथ॒माय॒ धाय॑स॒ ओजो॒ मिमा॑नो महि॒मान॒माति॑रत् ।
   शूरो॒ यो यु॒त्सु त॒न्वं॑ परि॒व्यत॑ शी॒र्षणि॒ द्यां म॑हि॒ना प्रत्य॑मुंचत ॥

   स भूतु यो ह प्रथमाय धायस ओजो मिमानो महिमानम् आतिरत् |
   शूरो यो युत्सु तन्वम् परिव्यत शीर्षणि द्याम् महिना प्रत्य् अमुञ्चत ||

   sá bhūtu yó ha prathamā́ya dhā́yasa ójo mímāno mahimā́namā́tirat ǀ
   śū́ro yó yutsú tanvám parivyáta śīrṣáṇi dyā́m mahinā́ prátyamuñcata ǁ

   sa bhūtu yo ha prathamāya dhāyasa ojo mimāno mahimānam ātirat |
   śūro yo yutsu tanvam parivyata śīrṣaṇi dyām mahinā praty amuñcata ||

   सः । भू॒तु॒ । यः । ह॒ । प्र॒थ॒माय॑ । धाय॑से । ओजः॑ । मिमा॑नः । म॒हि॒मान॑म् । आ । अति॑रत् ।
   शूरः॑ । यः । यु॒त्ऽसु । त॒न्व॑म् । प॒रि॒ऽव्यत॑ । शी॒र्षणि॑ । द्याम् । म॒हि॒ना । प्रति॑ । अ॒मु॒ञ्च॒त॒ ॥

   सः । भूतु । यः । ह । प्रथमाय । धायसे । ओजः । मिमानः । महिमानम् । आ । अतिरत् ।
   शूरः । यः । युत्ऽसु । तन्वम् । परिऽव्यत । शीर्षणि । द्याम् । महिना । प्रति । अमुञ्चत ॥

   sáḥ ǀ bhūtu ǀ yáḥ ǀ ha ǀ prathamā́ya ǀ dhā́yase ǀ ójaḥ ǀ mímānaḥ ǀ mahimā́nam ǀ ā́ ǀ átirat ǀ
   śū́raḥ ǀ yáḥ ǀ yut-sú ǀ tanvám ǀ pari-vyáta ǀ śīrṣáṇi ǀ dyā́m ǀ mahinā́ ǀ práti ǀ amuñcata ǁ

   saḥ ǀ bhūtu ǀ yaḥ ǀ ha ǀ prathamāya ǀ dhāyase ǀ ojaḥ ǀ mimānaḥ ǀ mahimānam ǀ ā ǀ atirat ǀ
   śūraḥ ǀ yaḥ ǀ yut-su ǀ tanvam ǀ pari-vyata ǀ śīrṣaṇi ǀ dyām ǀ mahinā ǀ prati ǀ amuñcata ǁ

   2.17.2 Aṣṭaka 2.6.19.2Anuvāka 2.2.61Interpretations

3. Ṛk 3

   अधा॑कृणोः प्रथ॒मं वी॒र्यं॑ म॒हद्यद॒स्याग्रे॒ ब्रह्म॑णा॒ शुष्म॒मैर॑यः ।
   र॒थे॒ष्ठेन॒ हर्य॑श्वेन॒ विच्यु॑ताः॒ प्र जी॒रयः॑ सिस्रते स॒ध्र्य१॒॑क्पृथ॑क् ॥

   अधाकृणोः प्रथमं वीर्यम् महद् यद् अस्याग्रे ब्रह्मणा शुष्मम् ऐरयः |
   रथेष्ठेन हर्यश्वेन विच्युताः प्र जीरयः सिस्रते सध्र्यक् पृथक् ||

   ádhākṛṇoḥ prathamám vīryám mahádyádasyā́gre bráhmaṇā śúṣmamáirayaḥ ǀ
   ratheṣṭhéna háryaśvena vícyutāḥ prá jīráyaḥ sisrate sadhryákpṛ́thak ǁ

   adhākṛṇoḥ prathamaṃ vīryam mahad yad asyāgre brahmaṇā śuṣmam airayaḥ |
   ratheṣṭhena haryaśvena vicyutāḥ pra jīrayaḥ sisrate sadhryak pṛthak ||

   अध॑ । अ॒कृ॒णोः॒ । प्र॒थ॒मम् । वी॒र्य॑म् । म॒हत् । यत् । अ॒स्य॒ । अग्रे॑ । ब्रह्म॑णा । शुष्म॑म् । ऐर॑यः ।
   र॒थे॒ऽस्थेन॑ । हरि॑ऽअश्वेन । विऽच्यु॑ताः । प्र । जी॒रयः॑ । सि॒स्र॒ते॒ । स॒ध्र्य॑क् । पृथ॑क् ॥

   अध । अकृणोः । प्रथमम् । वीर्यम् । महत् । यत् । अस्य । अग्रे । ब्रह्मणा । शुष्मम् । ऐरयः ।
   रथेऽस्थेन । हरिऽअश्वेन । विऽच्युताः । प्र । जीरयः । सिस्रते । सध्र्यक् । पृथक् ॥

   ádha ǀ akṛṇoḥ ǀ prathamám ǀ vīryám ǀ mahát ǀ yát ǀ asya ǀ ágre ǀ bráhmaṇā ǀ śúṣmam ǀ áirayaḥ ǀ
   rathe-sthéna ǀ hári-aśvena ǀ ví-cyutāḥ ǀ prá ǀ jīráyaḥ ǀ sisrate ǀ sadhryák ǀ pṛ́thak ǁ

   adha ǀ akṛṇoḥ ǀ prathamam ǀ vīryam ǀ mahat ǀ yat ǀ asya ǀ agre ǀ brahmaṇā ǀ śuṣmam ǀ airayaḥ ǀ
   rathe-sthena ǀ hari-aśvena ǀ vi-cyutāḥ ǀ pra ǀ jīrayaḥ ǀ sisrate ǀ sadhryak ǀ pṛthak ǁ

   2.17.3 Aṣṭaka 2.6.19.3Anuvāka 2.2.62Interpretations

4. Ṛk 4

   अधा॒ यो विश्वा॒ भुव॑ना॒भि म॒ज्मने॑शान॒कृत्प्रव॑या अ॒भ्यव॑र्धत ।
   आद्रोद॑सी॒ ज्योति॑षा॒ वह्नि॒रात॑नो॒त्सीव्यं॒तमां॑सि॒ दुधि॑ता॒ सम॑व्ययत् ॥

   अधा यो विश्वा भुवनाभि मज्मनेशानकृत् प्रवया अभ्य् अवर्धत |
   आद् रोदसी ज्योतिषा वह्निर् आतनोत् सीव्यन् तमांसि दुधिता सम् अव्ययत् ||

   ádhā yó víśvā bhúvanābhí majmáneśānakṛ́tprávayā abhyávardhata ǀ
   ā́dródasī jyótiṣā váhnirā́tanotsī́vyantámāṃsi dúdhitā sámavyayat ǁ

   adhā yo viśvā bhuvanābhi majmaneśānakṛt pravayā abhy avardhata |
   ād rodasī jyotiṣā vahnir ātanot sīvyan tamāṃsi dudhitā sam avyayat ||

   अध॑ । यः । विश्वा॑ । भुव॑ना । अ॒भि । म॒ज्मना॑ । ई॒शा॒न॒ऽकृत् । प्रऽव॑याः । अ॒भि । अव॑र्धत ।
   आत् । रोद॑सी॒ इति॑ । ज्योति॑षा । वह्निः॑ । आ । अ॒त॒नो॒त् । सीव्य॑न् । तमां॑सि । दुधि॑ता । सम् । अ॒व्य॒य॒त् ॥

   अध । यः । विश्वा । भुवना । अभि । मज्मना । ईशानऽकृत् । प्रऽवयाः । अभि । अवर्धत ।
   आत् । रोदसी इति । ज्योतिषा । वह्निः । आ । अतनोत् । सीव्यन् । तमांसि । दुधिता । सम् । अव्ययत् ॥

   ádha ǀ yáḥ ǀ víśvā ǀ bhúvanā ǀ abhí ǀ majmánā ǀ īśāna-kṛ́t ǀ prá-vayāḥ ǀ abhí ǀ ávardhata ǀ
   ā́t ǀ ródasī íti ǀ jyótiṣā ǀ váhniḥ ǀ ā́ ǀ atanot ǀ sī́vyan ǀ támāṃsi ǀ dúdhitā ǀ sám ǀ avyayat ǁ

   adha ǀ yaḥ ǀ viśvā ǀ bhuvanā ǀ abhi ǀ majmanā ǀ īśāna-kṛt ǀ pra-vayāḥ ǀ abhi ǀ avardhata ǀ
   āt ǀ rodasī iti ǀ jyotiṣā ǀ vahniḥ ǀ ā ǀ atanot ǀ sīvyan ǀ tamāṃsi ǀ dudhitā ǀ sam ǀ avyayat ǁ

   2.17.4 Aṣṭaka 2.6.19.4Anuvāka 2.2.63Interpretations

5. Ṛk 5

   स प्रा॒चीना॒न्पर्व॑तान्दृंह॒दोज॑साधरा॒चीन॑मकृणोद॒पामपः॑ ।
   अधा॑रयत्पृथि॒वीं वि॒श्वधा॑यस॒मस्त॑भ्नान्मा॒यया॒ द्याम॑व॒स्रसः॑ ॥

   स प्राचीनान् पर्वतान् दृंहद् ओजसाधराचीनम् अकृणोद् अपाम् अपः |
   अधारयत् पृथिवीं विश्वधायसम् अस्तभ्नान् मायया द्याम् अवस्रसः ||

   sá prācī́nānpárvatāndṛṃhadójasādharācī́namakṛṇodapā́mápaḥ ǀ
   ádhārayatpṛthivī́m viśvádhāyasamástabhnānmāyáyā dyā́mavasrásaḥ ǁ

   sa prācīnān parvatān dṛṃhad ojasādharācīnam akṛṇod apām apaḥ |
   adhārayat pṛthivīṃ viśvadhāyasam astabhnān māyayā dyām avasrasaḥ ||

   सः । प्रा॒चीना॑न् । पर्व॑तान् । दृं॒ह॒त् । ओज॑सा । अ॒ध॒रा॒चीन॑म् । अ॒कृ॒णो॒त् । अ॒पाम् । अपः॑ ।
   अधा॑रयत् । पृ॒थि॒वीम् । वि॒श्वऽधा॑यसम् । अस्त॑भ्नात् । मा॒यया॑ । द्याम् । अ॒व॒ऽस्रसः॑ ॥

   सः । प्राचीनान् । पर्वतान् । दृंहत् । ओजसा । अधराचीनम् । अकृणोत् । अपाम् । अपः ।
   अधारयत् । पृथिवीम् । विश्वऽधायसम् । अस्तभ्नात् । मायया । द्याम् । अवऽस्रसः ॥

   sáḥ ǀ prācī́nān ǀ párvatān ǀ dṛṃhat ǀ ójasā ǀ adharācī́nam ǀ akṛṇot ǀ apā́m ǀ ápaḥ ǀ
   ádhārayat ǀ pṛthivī́m ǀ viśvá-dhāyasam ǀ ástabhnāt ǀ māyáyā ǀ dyā́m ǀ ava-srásaḥ ǁ

   saḥ ǀ prācīnān ǀ parvatān ǀ dṛṃhat ǀ ojasā ǀ adharācīnam ǀ akṛṇot ǀ apām ǀ apaḥ ǀ
   adhārayat ǀ pṛthivīm ǀ viśva-dhāyasam ǀ astabhnāt ǀ māyayā ǀ dyām ǀ ava-srasaḥ ǁ

   2.17.5 Aṣṭaka 2.6.19.5Anuvāka 2.2.64Interpretations

6. Ṛk 6

   सास्मा॒ अरं॑ बा॒हुभ्यां॒ यं पि॒ताकृ॑णो॒द्विश्व॑स्मा॒दा ज॒नुषो॒ वेद॑स॒स्परि॑ ।
   येना॑ पृथि॒व्यां नि क्रिविं॑ श॒यध्यै॒ वज्रे॑ण ह॒त्व्यवृ॑णक्तुवि॒ष्वणिः॑ ॥

   सास्मा अरम् बाहुभ्यां यम् पिताकृणोद् विश्वस्माद् आ जनुषो वेदसस् परि |
   येना पृथिव्यां नि क्रिविं शयध्यै वज्रेण हत्व्य् अवृणक् तुविष्वणिः ||

   sā́smā áram bāhúbhyām yám pitā́kṛṇodvíśvasmādā́ janúṣo védasaspári ǀ
   yénā pṛthivyā́m ní krívim śayádhyai vájreṇa hatvyávṛṇaktuviṣváṇiḥ ǁ

   sāsmā aram bāhubhyāṃ yam pitākṛṇod viśvasmād ā januṣo vedasas pari |
   yenā pṛthivyāṃ ni kriviṃ śayadhyai vajreṇa hatvy avṛṇak tuviṣvaṇiḥ ||

   सः । अ॒स्मै॒ । अर॑म् । बा॒हुऽभ्या॑म् । यम् । पि॒ता । अकृ॑णोत् । विश्व॑स्मात् । आ । ज॒नुषः॑ । वेद॑सः । परि॑ ।
   येन॑ । पृ॒थि॒व्याम् । नि । क्रिवि॑म् । श॒यध्यै॑ । वज्रे॑ण । ह॒त्वी । अवृ॑णक् । तु॒वि॒ऽस्वनिः॑ ॥

   सः । अस्मै । अरम् । बाहुऽभ्याम् । यम् । पिता । अकृणोत् । विश्वस्मात् । आ । जनुषः । वेदसः । परि ।
   येन । पृथिव्याम् । नि । क्रिविम् । शयध्यै । वज्रेण । हत्वी । अवृणक् । तुविऽस्वनिः ॥

   sáḥ ǀ asmai ǀ áram ǀ bāhú-bhyām ǀ yám ǀ pitā́ ǀ ákṛṇot ǀ víśvasmāt ǀ ā́ ǀ janúṣaḥ ǀ védasaḥ ǀ pári ǀ
   yéna ǀ pṛthivyā́m ǀ ní ǀ krívim ǀ śayádhyai ǀ vájreṇa ǀ hatvī́ ǀ ávṛṇak ǀ tuvi-svániḥ ǁ

   saḥ ǀ asmai ǀ aram ǀ bāhu-bhyām ǀ yam ǀ pitā ǀ akṛṇot ǀ viśvasmāt ǀ ā ǀ januṣaḥ ǀ vedasaḥ ǀ pari ǀ
   yena ǀ pṛthivyām ǀ ni ǀ krivim ǀ śayadhyai ǀ vajreṇa ǀ hatvī ǀ avṛṇak ǀ tuvi-svaniḥ ǁ

   2.17.6 Aṣṭaka 2.6.20.1Anuvāka 2.2.65Interpretations

7. Ṛk 7

   अ॒मा॒जूरि॑व पि॒त्रोः सचा॑ स॒ती स॑मा॒नादा सद॑स॒स्त्वामि॑ये॒ भगं॑ ।
   कृ॒धि प्र॑के॒तमुप॑ मा॒स्या भ॑र द॒द्धि भा॒गं त॒न्वो॒३॒॑ येन॑ मा॒महः॑ ॥

   अमाजूर् इव पित्रोः सचा सती समानाद् आ सदसस् त्वाम् इये भगम् |
   कृधि प्रकेतम् उप मास्य् आ भर दद्धि भागं तन्वो येन मामहः ||

   amājū́riva pitróḥ sácā satī́ samānā́dā́ sádasastvā́miye bhágam ǀ
   kṛdhí praketámúpa māsyā́ bhara daddhí bhāgám tanvó yéna māmáhaḥ ǁ

   amājūr iva pitroḥ sacā satī samānād ā sadasas tvām iye bhagam |
   kṛdhi praketam upa māsy ā bhara daddhi bhāgaṃ tanvo yena māmahaḥ ||

   अ॒मा॒जूःऽइ॑व । पि॒त्रोः । सचा॑ । स॒ती । स॒मा॒नात् । आ । सद॑सः । त्वाम् । इ॒ये॒ । भग॑म् ।
   कृ॒धि । प्र॒ऽके॒तम् । उप॑ । मा॒सि॒ । आ । भ॒र॒ । द॒द्धि । भा॒गम् । त॒न्वः॑ । येन॑ । म॒महः॑ ॥

   अमाजूःऽइव । पित्रोः । सचा । सती । समानात् । आ । सदसः । त्वाम् । इये । भगम् ।
   कृधि । प्रऽकेतम् । उप । मासि । आ । भर । दद्धि । भागम् । तन्वः । येन । ममहः ॥

   amājū́ḥ-iva ǀ pitróḥ ǀ sácā ǀ satī́ ǀ samānā́t ǀ ā́ ǀ sádasaḥ ǀ tvā́m ǀ iye ǀ bhágam ǀ
   kṛdhí ǀ pra-ketám ǀ úpa ǀ māsi ǀ ā́ ǀ bhara ǀ daddhí ǀ bhāgám ǀ tanváḥ ǀ yéna ǀ mamáhaḥ ǁ

   amājūḥ-iva ǀ pitroḥ ǀ sacā ǀ satī ǀ samānāt ǀ ā ǀ sadasaḥ ǀ tvām ǀ iye ǀ bhagam ǀ
   kṛdhi ǀ pra-ketam ǀ upa ǀ māsi ǀ ā ǀ bhara ǀ daddhi ǀ bhāgam ǀ tanvaḥ ǀ yena ǀ mamahaḥ ǁ

   2.17.7 Aṣṭaka 2.6.20.2Anuvāka 2.2.66Interpretations

8. Ṛk 8

   भो॒जं त्वामिं॑द्र व॒यं हु॑वेम द॒दिष्ट्वमिं॒द्रापां॑सि॒ वाजा॑न् ।
   अ॒वि॒ड्ढीं॑द्र चि॒त्रया॑ न ऊ॒ती कृ॒धि वृ॑षन्निंद्र॒ वस्य॑सो नः ॥

   भोजं त्वाम् इन्द्र वयं हुवेम ददिष् ट्वम् इन्द्रापांसि वाजान् |
   अविड्ढीन्द्र चित्रया न ऊती कृधि वृषन्न् इन्द्र वस्यसो नः ||

   bhojám tvā́mindra vayám huvema dadíṣṭvámindrā́pāṃsi vā́jān ǀ
   aviḍḍhī́ndra citráyā na ūtī́ kṛdhí vṛṣannindra vásyaso naḥ ǁ

   bhojaṃ tvām indra vayaṃ huvema dadiṣ ṭvam indrāpāṃsi vājān |
   aviḍḍhīndra citrayā na ūtī kṛdhi vṛṣann indra vasyaso naḥ ||

   भो॒जम् । त्वाम् । इ॒न्द्र॒ । व॒यम् । हु॒वे॒म॒ । द॒दिः । त्वम् । इ॒न्द्र॒ । अपां॑सि । वाजा॑न् ।
   अ॒वि॒ड्ढि । इ॒न्द्र॒ । चि॒त्रया॑ । नः॒ । ऊ॒ती । कृ॒धि । वृ॒ष॒न् । इ॒न्द्र॒ । वस्य॑सः । नः॒ ॥

   भोजम् । त्वाम् । इन्द्र । वयम् । हुवेम । ददिः । त्वम् । इन्द्र । अपांसि । वाजान् ।
   अविड्ढि । इन्द्र । चित्रया । नः । ऊती । कृधि । वृषन् । इन्द्र । वस्यसः । नः ॥

   bhojám ǀ tvā́m ǀ indra ǀ vayám ǀ huvema ǀ dadíḥ ǀ tvám ǀ indra ǀ ápāṃsi ǀ vā́jān ǀ
   aviḍḍhí ǀ indra ǀ citráyā ǀ naḥ ǀ ūtī́ ǀ kṛdhí ǀ vṛṣan ǀ indra ǀ vásyasaḥ ǀ naḥ ǁ

   bhojam ǀ tvām ǀ indra ǀ vayam ǀ huvema ǀ dadiḥ ǀ tvam ǀ indra ǀ apāṃsi ǀ vājān ǀ
   aviḍḍhi ǀ indra ǀ citrayā ǀ naḥ ǀ ūtī ǀ kṛdhi ǀ vṛṣan ǀ indra ǀ vasyasaḥ ǀ naḥ ǁ

   2.17.8 Aṣṭaka 2.6.20.3Anuvāka 2.2.67Interpretations

9. Ṛk 9

   नू॒नं सा ते॒ प्रति॒ वरं॑ जरि॒त्रे दु॑ही॒यदिं॑द्र॒ दक्षि॑णा म॒घोनी॑ ।
   शिक्षा॑ स्तो॒तृभ्यो॒ माति॑ ध॒ग्भगो॑ नो बृ॒हद्व॑देम वि॒दथे॑ सु॒वीराः॑ ॥

   नूनं सा ते प्रति वरं जरित्रे दुहीयद् इन्द्र दक्षिणा मघोनी |
   शिक्षा स्तोतृभ्यो माति धग् भगो नो बृहद् वदेम विदथे सुवीराः ||

   nūnám sā́ te práti váram jaritré duhīyádindra dákṣiṇā maghónī ǀ
   śíkṣā stotṛ́bhyo mā́ti dhagbhágo no bṛhádvadema vidáthe suvī́rāḥ ǁ

   nūnaṃ sā te prati varaṃ jaritre duhīyad indra dakṣiṇā maghonī |
   śikṣā stotṛbhyo māti dhag bhago no bṛhad vadema vidathe suvīrāḥ ||

   नू॒नम् । सा । ते॒ । प्रति॑ । वर॑म् । ज॒रि॒त्रे । दु॒ही॒यत् । इ॒न्द्र॒ । दक्षि॑णा । म॒घोनी॑ ।
   शिक्ष॑ । स्तो॒तृऽभ्यः॑ । मा । अति॑ । ध॒क् । भगः॑ । नः॒ । बृ॒हत् । व॒दे॒म॒ । वि॒दथे॑ । सु॒ऽवीराः॑ ॥

   नूनम् । सा । ते । प्रति । वरम् । जरित्रे । दुहीयत् । इन्द्र । दक्षिणा । मघोनी ।
   शिक्ष । स्तोतृऽभ्यः । मा । अति । धक् । भगः । नः । बृहत् । वदेम । विदथे । सुऽवीराः ॥

   nūnám ǀ sā́ ǀ te ǀ práti ǀ váram ǀ jaritré ǀ duhīyát ǀ indra ǀ dákṣiṇā ǀ maghónī ǀ
   śíkṣa ǀ stotṛ́-bhyaḥ ǀ mā́ ǀ áti ǀ dhak ǀ bhágaḥ ǀ naḥ ǀ bṛhát ǀ vadema ǀ vidáthe ǀ su-vī́rāḥ ǁ

   nūnam ǀ sā ǀ te ǀ prati ǀ varam ǀ jaritre ǀ duhīyat ǀ indra ǀ dakṣiṇā ǀ maghonī ǀ
   śikṣa ǀ stotṛ-bhyaḥ ǀ mā ǀ ati ǀ dhak ǀ bhagaḥ ǀ naḥ ǀ bṛhat ǀ vadema ǀ vidathe ǀ su-vīrāḥ ǁ

   2.17.9 Aṣṭaka 2.6.20.4Anuvāka 2.2.68Interpretations

Text, recitation and interpretations from the Ṛgveda database of theveda.org.in.