Devatā देवता

Kapiñjala Ivendraḥ

Ṛṣi ऋषि

Gṛtsamada Bhārgava Śaunaka

Chandas छन्दस्

Triṣṭubh

1. Ṛk 1

   कनि॑क्रदज्ज॒नुषं॑ प्रब्रुवा॒ण इय॑र्ति॒ वाच॑मरि॒तेव॒ नावं॑ ।
   सु॒मं॒गल॑श्च शकुने॒ भवा॑सि॒ मा त्वा॒ का चि॑दभि॒भा विश्व्या॑ विदत् ॥

   कनिक्रदज् जनुषम् प्रब्रुवाण इयर्ति वाचम् अरितेव नावम् |
   सुमङ्गलश् च शकुने भवासि मा त्वा का चिद् अभिभा विश्व्या विदत् ||

   kánikradajjanúṣam prabruvāṇá íyarti vā́camaritéva nā́vam ǀ
   sumaṅgálaśca śakune bhávāsi mā́ tvā kā́ cidabhibhā́ víśvyā vidat ǁ

   kanikradaj januṣam prabruvāṇa iyarti vācam ariteva nāvam |
   sumaṅgalaś ca śakune bhavāsi mā tvā kā cid abhibhā viśvyā vidat ||

   कनि॑क्रदत् । ज॒नुष॑म् । प्र॒ऽब्रु॒वा॒णः । इय॑र्ति । वाच॑म् । अ॒रि॒ताऽइ॑व । नाव॑म् ।
   सु॒ऽम॒ङ्गलः॑ । च॒ । श॒कु॒ने॒ । भवा॑सि । मा । त्वा॒ । का । चि॒त् । अ॒भि॒ऽभा । विश्व्या॑ । वि॒द॒त् ॥

   कनिक्रदत् । जनुषम् । प्रऽब्रुवाणः । इयर्ति । वाचम् । अरिताऽइव । नावम् ।
   सुऽमङ्गलः । च । शकुने । भवासि । मा । त्वा । का । चित् । अभिऽभा । विश्व्या । विदत् ॥

   kánikradat ǀ janúṣam ǀ pra-bruvāṇáḥ ǀ íyarti ǀ vā́cam ǀ aritā́-iva ǀ nā́vam ǀ
   su-maṅgálaḥ ǀ ca ǀ śakune ǀ bhávāsi ǀ mā́ ǀ tvā ǀ kā́ ǀ cit ǀ abhi-bhā́ ǀ víśvyā ǀ vidat ǁ

   kanikradat ǀ januṣam ǀ pra-bruvāṇaḥ ǀ iyarti ǀ vācam ǀ aritā-iva ǀ nāvam ǀ
   su-maṅgalaḥ ǀ ca ǀ śakune ǀ bhavāsi ǀ mā ǀ tvā ǀ kā ǀ cit ǀ abhi-bhā ǀ viśvyā ǀ vidat ǁ

   2.42.1 Aṣṭaka 2.8.11.1Anuvāka 2.4.104Interpretations

2. Ṛk 2

   मा त्वा॑ श्ये॒न उद्व॑धी॒न्मा सु॑प॒र्णो मा त्वा॑ विद॒दिषु॑मान्वी॒रो अस्ता॑ ।
   पित्र्या॒मनु॑ प्र॒दिशं॒ कनि॑क्रदत्सुमं॒गलो॑ भद्रवा॒दी व॑दे॒ह ॥

   मा त्वा श्येन उद् वधीन् मा सुपर्णो मा त्वा विदद् इषुमान् वीरो अस्ता |
   पित्र्याम् अनु प्रदिशं कनिक्रदत् सुमङ्गलो भद्रवादी वदेह ||

   mā́ tvā śyená údvadhīnmā́ suparṇó mā́ tvā vidadíṣumānvīró ástā ǀ
   pítryāmánu pradíśam kánikradatsumaṅgálo bhadravādī́ vadehá ǁ

   mā tvā śyena ud vadhīn mā suparṇo mā tvā vidad iṣumān vīro astā |
   pitryām anu pradiśaṃ kanikradat sumaṅgalo bhadravādī vadeha ||

   मा । त्वा॒ । श्ये॒नः । उत् । व॒धी॒त् । मा । सु॒ऽप॒र्णः । मा । त्वा॒ । वि॒द॒त् । इषु॑ऽमान् । वी॒रः । अस्ता॑ ।
   पित्र्या॑म् । अनु॑ । प्र॒ऽदिश॑म् । कनि॑क्रदत् । सु॒ऽम॒ङ्गलः॑ । भ॒द्र॒ऽवा॒दी । व॒द॒ । इ॒ह ॥

   मा । त्वा । श्येनः । उत् । वधीत् । मा । सुऽपर्णः । मा । त्वा । विदत् । इषुऽमान् । वीरः । अस्ता ।
   पित्र्याम् । अनु । प्रऽदिशम् । कनिक्रदत् । सुऽमङ्गलः । भद्रऽवादी । वद । इह ॥

   mā́ ǀ tvā ǀ śyenáḥ ǀ út ǀ vadhīt ǀ mā́ ǀ su-parṇáḥ ǀ mā́ ǀ tvā ǀ vidat ǀ íṣu-mān ǀ vīráḥ ǀ ástā ǀ
   pítryām ǀ ánu ǀ pra-díśam ǀ kánikradat ǀ su-maṅgálaḥ ǀ bhadra-vādī́ ǀ vada ǀ ihá ǁ

   mā ǀ tvā ǀ śyenaḥ ǀ ut ǀ vadhīt ǀ mā ǀ su-parṇaḥ ǀ mā ǀ tvā ǀ vidat ǀ iṣu-mān ǀ vīraḥ ǀ astā ǀ
   pitryām ǀ anu ǀ pra-diśam ǀ kanikradat ǀ su-maṅgalaḥ ǀ bhadra-vādī ǀ vada ǀ iha ǁ

   2.42.2 Aṣṭaka 2.8.11.2Anuvāka 2.4.105Interpretations

3. Ṛk 3

   अव॑ क्रंद दक्षिण॒तो गृ॒हाणां॑ सुमं॒गलो॑ भद्रवा॒दी श॑कुंते ।
   मा नः॑ स्ते॒न ई॑शत॒ माघशं॑सो बृ॒हद्व॑देम वि॒दथे॑ सु॒वीराः॑ ॥

   अव क्रन्द दक्षिणतो गृहाणां सुमङ्गलो भद्रवादी शकुन्ते |
   मा न स्तेन ईशत माघशंसो बृहद् वदेम विदथे सुवीराः ||

   áva kranda dakṣiṇató gṛhā́ṇām sumaṅgálo bhadravādī́ śakunte ǀ
   mā́ naḥ stená īśata mā́gháśaṃso bṛhádvadema vidáthe suvī́rāḥ ǁ

   ava kranda dakṣiṇato gṛhāṇāṃ sumaṅgalo bhadravādī śakunte |
   mā na stena īśata māghaśaṃso bṛhad vadema vidathe suvīrāḥ ||

   अव॑ । क्र॒न्द॒ । द॒क्षि॒ण॒तः । गृ॒हाणा॑म् । सु॒ऽम॒ङ्गलः॑ । भ॒द्र॒ऽवा॒दी । श॒कु॒न्ते॒ ।
   मा । नः॒ । स्ते॒नः । ई॒श॒त॒ । मा । अ॒घऽशं॑सः । बृ॒हत् । व॒दे॒म॒ । वि॒दथे॑ । सु॒ऽवीराः॑ ॥

   अव । क्रन्द । दक्षिणतः । गृहाणाम् । सुऽमङ्गलः । भद्रऽवादी । शकुन्ते ।
   मा । नः । स्तेनः । ईशत । मा । अघऽशंसः । बृहत् । वदेम । विदथे । सुऽवीराः ॥

   áva ǀ kranda ǀ dakṣiṇatáḥ ǀ gṛhā́ṇām ǀ su-maṅgálaḥ ǀ bhadra-vādī́ ǀ śakunte ǀ
   mā́ ǀ naḥ ǀ stenáḥ ǀ īśata ǀ mā́ ǀ aghá-śaṃsaḥ ǀ bṛhát ǀ vadema ǀ vidáthe ǀ su-vī́rāḥ ǁ

   ava ǀ kranda ǀ dakṣiṇataḥ ǀ gṛhāṇām ǀ su-maṅgalaḥ ǀ bhadra-vādī ǀ śakunte ǀ
   mā ǀ naḥ ǀ stenaḥ ǀ īśata ǀ mā ǀ agha-śaṃsaḥ ǀ bṛhat ǀ vadema ǀ vidathe ǀ su-vīrāḥ ǁ

   2.42.3 Aṣṭaka 2.8.11.3Anuvāka 2.4.106Interpretations

Text, recitation and interpretations from the Ṛgveda database of theveda.org.in.