श्रीमन्महागणाधिपतये नमः । (१।१)

भवभयरक्षणदक्षं नत्वा मुग्धावबोधिनीं तनुते । (१।२)

रसहृदयसुप्रयुक्तां टीकामृजुभावगामाप्तः ॥ (१।३)

गुणवारिधिकुरलकुले हरिहरमिश्रः प्रतीतमहिमाख्यः । (२।१)

तत्पुत्रो भुवि महितो महेश इति नामविख्यातः ॥ (२।२)

तदन्वये भारतीभावसंयुतस् तदात्मजः प्रस्तुतवाग्भिरीश्वरः । (३।१)

चतुर्भुजो भावितभावमानसः स्वलोकजातस्य कुलानुभावतः ॥ (३।२)

ज्येष्ठोऽभूद् भुवि पारिजातकतरुः खण्डेलवालान्वये तत्पुत्रः किल नाथबल्लवसुदः प्राणैर् यशोऽर्थान्वितः । (४।१)

तत्पुत्रेण च सावरेण पतिना बन्धस्य धर्मार्थिना गीर्वाणाशु रुगोञ्चजेन सततं तेनात्र यत्नः कृतः ॥ (४।२)

इह शास्त्रारम्भे आचार्यश्रीमद्गोविन्दपादाः शिष्टसमयपरिपालनार्थे शास्त्रस्य देशयतो गुरुपादस्य भगवतो वस्तुनिर्देशरूपं मङ्गलम् आचरन्ति जयतीत्यादि ॥ (५।०)

मङ्गललक्षणं यथा आशीर् नमस्क्रिया वस्तुनिर्देशो मङ्गल इति ॥ (६।०)

वस्तुनिर्देशः पञ्चधा यथास्ति भाति प्रियं रूपं नाम चेत्यंशपञ्चकम् ॥ (७।०)

आद्यं त्रयं ब्रह्मरूपं शक्तिरूपं ततो द्वयम् इति ॥ (८।०)

स हरो जयति सर्वोत्कर्षेण वर्तते ॥ (९।०)

अखिलं जगत् पश्यत इति वस्तुनिर्देशाब्जयद्द्रष्टा ॥ (१०।०)

तथा च श्रुतिः अपाणिपादो जवनो ग्रहीता ॥ (११।०)

पश्यत्यचक्षुः स शृणोत्यकर्णः । (१२।१)

स वेत्ति वेद्यं न च तस्य वेत्ता तमाहुर् अग्र्यं पुरुषं पुराणम् इति ॥ (१२।२)

यस्य हृदयस्यैव रसरूपिणी करुणा घृणा जाता प्रादुर्भूता ॥ (१३।०)

किंभूत्वा गलित्वा द्रवित्वा गलितस्य स्थानाच्च्युतिर् इति युक्तम् ॥ (१४।०)

एषा हृदयस्थैव ॥ (१५।०)

एवाव्ययम् अन्यस्थाननिषेधवाचि ॥ (१६।०)

रसरूपिणीति रसः पारदस्तत्स्वरूपं यस्याः सा ॥ (१७।०)

तथा च वाक्यम् । (१८।१)

रसो जलं रसो हर्षो रसः शृङ्गारपूर्वकः । (१८।२)

स्वाद्वादिषु च निर्यासे पारदेऽपि रसो विषे । (१८।३)

इत्यनेकार्थः ॥ (१८।४)

सामान्यतस्तद्रूपं द्रवत्वं विशेषतो रसरूपं सर्वोपकारित्वम् ॥ (१९।०)

तथा च वाक्यं रसरत्नाकरे । (२०।१)

आजन्मपापकृतनिर्दहनैकवह्निर् दारिद्र्यदुःखगजवारणसिंहरूपः इति ॥ (२०।२)

किंभूतस्य हरस्य दैन्यगदाकुलं जगत् संसारं पश्यतः दैन्ययं च गदाश्च तैर् आकुलं व्याप्तं दैन्यं दीनभावो दारिद्र्यं गदा व्याधय इति ॥ (२१।०)

अखिलमिति सर्वव्यापिपदम् ॥ (२२।०)

यथा मञ्जर्या । (२३।१)

यस्य रोगस्य यो योगस्तेनैव सह दापयेत् । (२३।२)

रसेन्द्रो हरो रोगान्नरकुञ्जरवाजिनाम् ॥ (२३।३)

इति ॥ (२४।०)

अन्यन्मतं च । (२५।१)

रसभस्म विना तत्र कथ्यते संहिताक्रमः । (२५।२)

अनुक्तमपि विज्ञेयं तत्र तत्राङ्गशान्तये ॥ (२५।३)

इति ॥ (२६।०)