समुखचारणान्तर्भूतं वासनामुखचारणं दर्शयन्नाह तैलेत्यादि ॥ (१।०)

रसराजः पारदो हाटकतारादि स्वर्णरूप्यादि धातुद्रव्यं कृत्रिमाकृत्रिमात्मकनवसंख्याकं पूर्वमुक्तं चरति भक्षति ॥ (२।०)

केन गोलकमुखेन ॥ (३।०)

गोलकश्च मुखविशेषः तेन विडस्य गोलकेनेत्यर्थः ॥ (४।०)

क्व सति तैलादिकतप्तरसे सति ॥ (५।०)

तैलम् आदिः येषां ते तैलादिकास् तैलवसामूत्रशुक्रपुष्पाः एतैस्तप्तो यो रस उष्णत्वं नीतो यो ऽसौ पारदस्तस्मिन् सत्येवं घनमभ्रकं चरति रसेन्द्रः ॥ (६।०)

पुनर्हेमादिभिर्नवकैर्ग्रासीकृतैः पिण्डत्वमेति निबिडत्वं प्राप्नोति ॥ (७।०)

तैलानि यथा । (८।१)

कङ्गुणीतुम्बिनीघोषाकरञ्जश्रीफलोद्भवम् । (८।२)

कटुवातारिसिद्धार्थसोमराजीविभीतजम् ॥ (८।३)

अतसीजं महाकालीनिम्बजं तिलजं तथा । (९।१)

अपामार्गो देवदाली दन्तीतुम्बरुविग्रहाः ॥ (९।२)

अङ्कोलोन्मत्तभल्लातफलेभ्यस् तैलसम्भवः । (१०।१)

इति ॥ (१०।२)

वसा यथा । (११।१)

अजोष्ट्रखरमेषाणां महिषस्य वसा तथा । (११।२)

इति ॥ (११।३)

मूत्रपुष्पशुक्राणि यथा । (१२।१)

मूत्राणि हस्तिकरभमहिषीखरवाजिनाम् । (१२।२)

स्त्रियः पुंसस् तथा मूत्रं पुष्पं वीर्यं च योजयेत् । (१२।३)

इति ॥ (१२।४)