माक्षिकसत्वोत्कर्षमाह नेत्यादि ॥ (१।०)

माक्षिकसत्वेन विना स्वर्णमाक्षिकसारम् अन्तरेण हेम कनकं वा तारं रूप्यं न द्रवति ॥ (२।०)

कैः कृत्वा विडैः कृत्वा शङ्खचूर्णार्कक्षारादिकृतपिण्डैः कृत्वा ग्रन्थान्तरे च । (३।१)

लवणक्षारोपरसैर् एभिर् अम्लैर्बिडो मतः । (३।२)

समे गर्भे तु संस्थाप्यो ह्यनेनैव द्रवीभवेत् । (३।३)

इति ॥ (३।४)

न केवलं बिडैः किंतु क्षारैरपि न क्षारैः स्वर्जिकायवक्षारटङ्कणाद्यैः ॥ (४।०)

न केवलं क्षारैः किंतु स्नेहैरपि न स्नेहानि यथा । (५।१)

कङ्गुणिकं विनादोषाकरञ्जश्रीफलोद्भवम् । (५।२)

कटुवातारिसिद्धार्थसोमराजीविभीतजम् । (५।३)

अतसीजं महाकालनिम्बजं तिलजं तथा । (५।४)

अपामार्गदेवदालीदन्तीतुम्बरविग्रहा । (५।५)

अङ्कोलोन्मत्तभल्लातफलेभ्यस्तैलसंभवः । (५।६)

इति ॥ (५।७)

तैलैरपि न द्रवति । (६।१)

पुनर्माक्षिकसत्वेन गर्भे द्रुतिर्जायते ॥ (६।२)

किंविशेषेण माक्षिकसत्वेन रक्तेन रक्तवर्गेण ॥ (७।०)

त्रिदिनं दिनत्रयं निहितेन रक्तवर्गान्तःस्थापितेन ॥ (८।०)

रक्तवर्गो यथा । (९।१)

दाडिमं किंशुकं चैव बन्धूकं च कुसुम्भकम् । (९।२)

समाञ्जिष्ठो हरिद्राद्यो लाक्षारससमन्वितः । (९।३)

रक्तचन्दनसंयुक्तो रक्तवर्गः प्रकीर्तितः । (९।४)

इति ॥ (९।५)