सूतो नागवङ्गपरिमुक्तो भवति नागवङ्गाभ्यां दोषाभ्यां विरहितः पारदो भवतीत्यर्थः किंविशिष्टः सन् समुत्थितः सन् ॥ (१।०)

पातनयन्त्रे स्थालीद्वयसम्पुटे सम्यग्विधानेनोत्थितः सन् ॥ (२।०)

कस्मात् काञ्जिकं सौवीरं पूर्ववर्णितं तत्क्वाथसंयोगाद् इत्यर्थः ॥ (३।०)

हि निश्चितम् ॥ (४।०)

अमुना विरेचनेन उक्तशोधनेन सूतः सुविशुद्धो भवेत् विशेषशुद्धो भवेद् इत्युत्थापनम् ॥ (५।०)

अनेन विधिना हिङ्गुलस्थस्य सूतस्यापि उत्थापनं भवति ॥ (६।०)

स्वेदनादिकयोगेन स्वरूपापादनं पुनः ॥ (७।०)

तदुत्थापनमित्युक्तं मूर्छाव्यापत्तिनाशनम् इति ॥ (८।०)

उत् ऊर्ध्वं स्थापनम् उत्थापनम् ॥ (९।०)

अत्र यन्त्रं तु । (१०।१)

अष्टाङ्गुलपरीणाहमानाहेन दशाङ्गुलम् । (१०।२)

चतुरङ्गुलकोत्सेधं तोयाधारो ऽङ्गुलादधः ॥ (१०।३)

अधोभाण्डे मुखं च तस्य भाण्डस्योपरिवर्तिनः । (११।१)

षोडशाङ्गुलविस्तीर्णपृष्ठस्यास्ये प्रवेशयेत् ॥ (११।२)

पार्श्वयोर् महिषीक्षीरचूर्णमण्डूरफाणितैः ॥ (१२।०)

विलिप्य शोषयेत् संधिं जलाधारे जलं क्षिपेत् । (१३।१)

चुल्ल्याम् आरोपयेदेतत् पातनायन्त्रम् ईरितम् ॥ (१३।२)

इति ॥ (१४।०)