अथातः पुष्पितकमिन्द्रियं व्याख्यास्यामः ॥ (१।०)

इति ह स्माह भगवानात्रेयः ॥ (२।०)

पुष्पितपुष्पं यथा पूर्वरूपं फलस्येह भविष्यतः । (३।१)

तथा लिङ्गम् अरिष्टाख्यं पूर्वरूपं मरिष्यतः ॥ (३।२)

अप्येवं तु भवेत् पुष्पं फलेनाननुबन्धि यत् । (४।१)

फलं चापि भवेत् किंचिद् यस्य पुष्पं न पूर्वजम् ॥ (४।२)

न त्वरिष्टस्य जातस्य नाशोऽस्ति मरणादृते । (५।१)

मरणं चापि तन्नास्ति यन्नारिष्टपुरःसरम् ॥ (५।२)

मिथ्यादृष्टम् अरिष्टाभम् अनरिष्टम् अजानता । (६।१)

अरिष्टं वाप्यसंबुद्धम् एतत् प्रज्ञापराधजम् ॥ (६।२)

ज्ञानसम्बोधनार्थं तु लिङ्गैर्मरणपूर्वजैः । (७।१)

पुष्पितान् उपदेक्ष्यामो नरान् बहुविधैर् बहून् ॥ (७।२)

नानापुष्पोपमो गन्धो यस्य भाति दिवानिशम् । (८।१)

पुष्पितस्य वनस्येव नानाद्रुमलतावतः ॥ (८।२)

तमाहुः पुष्पितं धीरा नरं मरणलक्षणैः । (९।१)

स ना संवत्सराद्देहं जहातीति विनिश्चयः ॥ (९।२)

एवम् एकैकशः पुष्पैर्यस्य गन्धः समो भवेत् । (१०।१)

इष्टैर्वा यदि वानिष्टैः स च पुष्पित उच्यते ॥ (१०।२)

समासेनाशुभान् गन्धानेकत्वेनाथवा पुनः । (११।१)

आजिघ्रेद्यस्य गात्रेषु तं विद्यात्पुष्पितं भिषक् ॥ (११।२)

आप्लुतानाप्लुते काये यस्य गन्धाः शुभाशुभाः । (१२।१)

व्यत्यासेनानिमित्ताः स्युः स च पुष्पित उच्यते ॥ (१२।२)

तद्यथा चन्दनं कुष्ठं तगरागुरुणी मधु । (१३।१)

माल्यं मूत्रपुरीषे च मृतानि कुणपानि च ॥ (१३।२)

ये चान्ये विविधात्मानो गन्धा विविधयोनयः । (१४।१)

तेऽप्यनेनानुमानेन विज्ञेया विकृतिं गताः ॥ (१४।२)

इदं चाप्यतिदेशार्थं लक्षणं गन्धसंश्रयम् । (१५।१)

वक्ष्यामो यद् अभिज्ञाय भिषङ्मरणमादिशेत् ॥ (१५।२)

वियोनिर् विदुरो गन्धो यस्य गात्रेषु जायते । (१६।१)

इष्टो वा यदि वानिष्टो न स जीवति तां समाम् ॥ (१६।२)

एतावद्गन्धविज्ञानं रसज्ञानमतः परम् । (१७।०)

आतुराणां शरीरेषु वक्ष्यते विधिपूर्वकम् ॥ (१७।१)

यो रसः प्रकृतिस्थानां नराणां देहसंभवः । (१८।१)

स एषां चरमे काले विकारं भजते द्वयम् ॥ (१८।२)

कश्चिद् एवास्यवैरस्यम् अत्यर्थम् उपपद्यते । (१९।१)

स्वादुत्वम् अपरश्चापि विपुलं भजते रसः ॥ (१९।२)

तम् अनेनानुमानेन विद्याद् विकृतिमागतम् । (२०।१)

मनुष्यो हि मनुष्यस्य कथं रसमवाप्नुयात् ॥ (२०।२)

मक्षिकाश्चैव यूकाश्च दंशाश्च मशकैः सह । (२१।१)

विरसाद् अपसर्पन्ति जन्तोः कायान्मुमूर्षतः ॥ (२१।२)

अत्यर्थरसिकं कायं कालपक्वस्य मक्षिकाः । (२२।१)

अपि स्नातानुलिप्तस्य भृशमायान्ति सर्वशः ॥ (२२।२)

तत्र श्लोकः । (२३।१)

सामान्येन मयोक्तानि लिङ्गानि रसगन्धयोः । (२३।२)

पुष्पितस्य नरस्यैतत् मरणमादिशेत् ॥ (२३।३)