सिद्धिं चानुत्तमां लोके प्राप्नोति विधिना पठन् । (३६।१)

विस्तारयति लेशोक्तं संक्षिपत्यतिविस्तरम् ॥ (३६।२)

संस्कर्ता कुरुते तन्त्रं पुराणं च पुनर्नवम् । (३७।१)

अतस्तन्त्रोत्तममिदं चरकेणातिबुद्धिना ॥ (३७।२)

संस्कृतं तत्त्वसम्पूर्णं त्रिभागेनोपलक्ष्यते । (३८।१)

तच्छङ्करं भूतपतिं संप्रसाद्य समापयत् ॥ (३८।२)

अखण्डार्थं दृढबलो जातः पञ्चनदे पुरे । (३९।१)

कृत्वा बहुभ्यस्तन्त्रेभ्यो विशेषोञ्छशिलोच्चयम् ॥ (३९।२)

सप्तदशौषधाध्यायसिद्धिकल्पैरपूरयत् । (४०।१)

इदमन्यूनशब्दार्थं तन्त्रदोषविवर्जितम् ॥ (४०।२)

तन्त्रयुक्तिस्षड्विंशता विचित्राभिर्भूषितं तन्त्रयुक्तिभिः । (४१।१)

तत्राधिकरणं योगो हेत्वर्थो ऽर्थः पदस्य च ॥ (४१।२)

प्रदेशोद्देशनिर्देशवाक्यशेषाः प्रयोजनम् । (४२।१)

उपदेशापदेशातिदेशार्थापत्तिनिर्णयाः ॥ (४२।२)

प्रसङ्गैकान्तनैकान्ताः सापवर्गो विपर्ययः । (४३।१)

पूर्वपक्षविधानानुमतव्याख्यानसंशयाः ॥ (४३।२)

अतीतानागतावेक्षास्वसंज्ञोह्यसमुच्चयाः । (४४।१)

निदर्शनं निर्वचनं संनियोगो विकल्पनम् ॥ (४४।२)

प्रत्युत्सारस् तथोद्धारः संभवस्तन्त्रयुक्तयः । (४५।१)

तन्त्रे समासव्यासोक्ते भवन्त्येता हि कृत्स्नशः ॥ (४५।२)

एकदेशेन दृश्यन्ते समासाभिहिते तथा । (४६।१)

यथाम्बुजवनस्यार्कः प्रदीपो वेश्मनो यथा ॥ (४६।२)

प्रबोधनप्रकाशार्थस्तथा तन्त्रस्य युक्तयः । (४७।१)

एकस्मिन्नपि यस्येह शास्त्रे लब्धास्पदा मतिः ॥ (४७।२)

स शास्त्रमन्यदप्याशु युक्तिज्ञत्वात् प्रबुध्यते । (४८।१)

अधीयानो ऽपि शास्त्राणि तन्त्रयुक्त्या विना भिषक् । (४८।२)

नाधिगच्छति शास्त्रार्थानर्थान् भाग्यक्षये यथा ॥ (४८।३)

दुर्गृहीतं क्षिणोत्येव शास्त्रं शस्त्रमिवाबुधम् । (४९।१)

सुगृहीतं तदेव ज्ञं शास्त्रं शस्त्रं च रक्षति ॥ (४९।२)

तस्मादेताः प्रवक्ष्यन्ते विस्तरेणोत्तरे पुनः । (५०।१)

तत्त्वज्ञानार्थमस्यैव तन्त्रस्य गुणदोषतः ॥ (५०।२)

इदमखिलमधीत्य सम्यगर्थान् विमृशति यो ऽविमनाः प्रयोगनित्यः । (५१।१)

स मनुजसुखजीवितप्रदाता भवति धृतिस्मृतिबुद्धिधर्मवृद्धः ॥ (५१।२)

यस्य द्वादशसाहस्री हृदि तिष्ठति संहिता । (५२।१)

सो ऽर्थज्ञः स विचारज्ञश्चिकित्साकुशलश्च सः ॥ (५२।२)

रोगांस्तेषां चिकित्सां च स किमर्थं न बुध्यते । (५३।१)

चिकित्सा वह्निवेशस्य सुस्थातुरहितं प्रति ॥ (५३।२)

यदिहास्ति तदन्यत्र यन्नेहास्ति न तत्क्वचित् । (५४।१)

अग्निवेशकृते तन्त्रे चरकप्रतिसंस्कृते ॥ (५४।२)

सिद्धिस्थाने ऽष्टमे प्राप्ते तस्मिन् दृढबलेन तु । (५५।१)

सिद्धिस्थानं स्वसिद्ध्यर्थं समासेन समापितम् ॥ (५५।२)

इत्यग्निवेशकृते तन्त्रे चरकप्रतिसंस्कृते ऽप्राप्ते दृढबलसम्पूरिते सिद्धिस्थाने उत्तरबस्तिसिद्धिर्नाम द्वादशो ऽध्यायः ॥ (५६।१)