तावत् पूर्वं तत्संख्याह यथा स्वर्णेति ॥ (१।०)

स्वर्णादितीक्ष्णान्ताः सप्त धातवो विज्ञेयाः ॥ (२।०)

विशेषेण सप्त धातवो बोद्धव्याः ॥ (३।०)

यतस्तन्त्रान्तरे अष्ट धातव इति मन्यन्ते तत्राष्टधा लोहसंज्ञा ॥ (४।०)

तथाहि । (५।१)

स्वर्णं तारं ताम्रनागं रङ्गं कान्तं च तीक्ष्णकम् । (५।२)

मुण्डान्तमष्टधा लोहं कांस्यारं घोषकं त्रिधा । (५।३)

उपलोहं समाख्यातम् इत्यादि ॥ (५।४)

ततस्तान् शोधयेदध इति बुधस्तद्विशेषज्ञः ॥ (६।०)

तान् स्वर्णादीन् अत्र स्वर्णं प्रसिद्धम् तारं रौप्यम् आरं पीतलोहं तच्च ताम्रघोषभेदाभ्यां संजातमित्येके भाषन्ते ॥ (७।०)

अत्रैव घोषभेदो लोके जसद इति वाच्यः ॥ (८।०)

शिवमते तु देवजातत्वेन षडेव ग्राह्याः । (९।१)

तथाहि । (९।२)

शिवस्य तेजः प्रथितो रसेन्द्रो देवीभवं गन्धमथाभ्रकं च । (९।३)

शुल्वं तु सूर्यस्य सहस्ररश्मेश्चन्द्रस्य रौप्यं परमेश्वरस्य ॥ (९।४)

हेमं तु विष्णोः प्रभवं वदन्ति नागं च नागस्य तु वासुकेश्च । (१०।१)

लोहं यमस्यैव तु कालमूर्तेर्वङ्गं च शुक्रस्य पुराविदो बुधाः ॥ (१०।२)

इति ॥ (११।०)

तस्माद् आरसंज्ञस्त्वौपाधिकः ॥ (१२।०)