लाक्षेति ॥ (१।०)

लाक्षा प्रसिद्धा ॥ (२।०)

शिग्रुः शोभाञ्जनत्वक् मूलं वा ॥ (३।०)

गुञ्जाफलानि ऊर्णा मेषरोमाणि गुडसैन्धवे प्रसिद्धे ॥ (४।०)

यवतिक्ता सर्पाक्षी ॥ (५।०)

यथालाभमिति व्यस्तं समस्तं वा ग्राह्यम् ॥ (६।०)

सर्वे धातव इति धातुग्रहणेन उपधातव उपरसाश्च ग्राह्याः ॥ (७।०)

यतः । (८।१)

यन्त्रोपरि स्वभागेऽस्ति रसे तत्सर्वभाजने । (८।२)

कर्तव्यं तद्गुणाधिक्याद् रसज्ञैर् इति निश्चितम् ॥ (८।३)

इति ॥ (९।०)

गाढवह्निना मूषाध्माता इति ॥ (१०।०)

तेन पातालयन्त्रेण वा यथायोग्यं सत्त्वनिर्गमं कारयेद् इत्यर्थः ॥ (११।०)

तथाहि । (१२।१)

सर्वतुल्यं च धान्याम्लं भूनागं मृत्तिका पुनः । (१२।२)

तथा पाषाणचूर्णानि कठिनोपरसाश्च ये ॥ (१२।३)

मेलयेन्माहिषैः पञ्चदुग्धादिशकृदन्तकैः । (१३।१)

दृढं मर्द्य वटीं कुर्यात् कर्षमात्रं च शोषयेत् ॥ (१३।२)

कोटीयन्त्रैर् धमेद्वह्नावङ्गारे खादिरोद्भवैः । (१४।१)

त्रिवारं ध्मापयेदेवं सत्वं पतति निर्मलम् ॥ (१४।२)

असाध्यान्मोचयेत् सत्त्वम् अभ्रकादेस्तु का कथा ॥ (१५।०)

कोटीयन्त्रं प्रसिद्धमेतत् ॥ (१६।०)

पातालयन्त्रनलिकायन्त्रयोः स्वरूपं लिख्यते एतेषां सत्त्वनिर्गमः सम्प्रदायतो यथा गुरुसंकाशं दृष्ट्वा वा कार्यो न दोषः ॥ (१७।०)