अर्कक्षीरेणेति ॥ (१।०)

आरं पीतलोहं तच्च ताम्रसंभवं वदन्त्येके तेन गन्धककल्केन समेनारसमानेन शुद्धान्यम्लद्रवैर्मुहुरिति पूर्वम् आरपत्राणि अम्लद्रवैर्जम्बीरप्रभृतिकैः मुहुरिति वेलात्रयं विशुद्धानि कृत्वा पश्चाद्गन्धककल्केन लेपयेदित्यभिप्रायः ॥ (२।०)

गजपुटं पूर्वं दर्शितमेव एवमित्यमुना प्रकारेण पुटद्वयं कार्यम् ॥ (३।०)

आरवदित्यादि ॥ (४।०)

कांस्यं प्रसिद्धम् ॥ (५।०)

आरवदित्यनेन शोधनमारणे चास्य तद्वदेवेति बोद्धव्यम् ॥ (६।०)

एवमिति ग्रहणेन घोषमपि आरवदिति ज्ञेयम् ॥ (७।०)

विशुद्धौ मारणे च ॥ (८।०)

तथा हि । (९।१)

कांस्यारघोषपत्राणि तेन कल्केन लेपयेत् । (९।२)

रुद्ध्वा गजपुटे पक्त्वा शुद्धिमायान्ति निश्चितम् । (९।३)

ताम्रवच्च मृतिं तेषां कृत्वा सर्वत्र योजयेत् । (९।४)

इति ॥ (९।५)

घोषं कांस्यभेदः जसद इति लोके ॥ (१०।०)