इदानीं संसिद्धरसानाम् अध्यायं प्रकटयन्नाह तत्रादौ ज्वराङ्कुशनामरसं व्याचष्टे खण्डितमिति ॥ (१।०)

हरिणस्येदं हारिणं शृङ्गं विषाणं तच्च खण्डितं शकलीकृतं संक्षुण्णमित्यर्थः ॥ (२।०)

ज्वालामुख्या रसैरिति ज्वालामुखी जयन्ती तस्याः पत्राणां स्वरसः ॥ (३।०)

सा ज्वालामुखी चतुर्धा भवति ॥ (४।०)

तथाहि । (५।१)

शुक्ला पीता तथा रक्ता कृष्णा ज्वालामुखी भवेत् । (५।२)

इति ॥ (५।३)

लोके खसिनीशब्दवाच्या ॥ (६।०)

केचित् तु ज्वालामुखीत्यनेन भल्लातकम् इति व्याख्यानयन्ति तन्न सर्वसंमतम् ॥ (७।०)

समम् इत्यत्र समशब्दो मिलितार्थे वर्तत इति केचित् ॥ (८।०)

न तु सममत्र साम्यं यतः सम्प्रदायेष्वपि ज्वालामुख्या रसैः कृत्वा मृगशृङ्गं बहुशो भावयित्वा जारयेदित्यभिप्रायः ॥ (९।०)

यदुक्तम् । (१०।१)

असकृद्भावितं शृङ्गं हारिणं कुट्टितं रसैः । (१०।२)

ज्वालामुख्याः पचेद्भाण्डगतं तद्भस्म चूर्णयेत् । (१०।३)

इत्यादि ॥ (१०।४)

अष्टांशं त्रिकटुं दद्यादिति शृङ्गभागान्मिलितकटुत्रयस्य सर्वज्वरापह इत्यनेनान्वयः ॥ (११।०)

तेन सन्निपातजनितमपि नाशयेदित्यर्थः ॥ (१२।०)