सम्प्रति नीलाञ्जनशोधनविधिम् आह नीलाञ्जनमिति ॥ (१।०)

नीलाञ्जनं प्रसिद्धम् ॥ (२।०)

अस्य भेदः सौवीराञ्जनं श्वेतकृष्णवर्णभेदात् ॥ (३।०)

एतस्मादपि सीसकोत्पत्तिर्जायते ॥ (४।०)

जम्बीरद्रवभावितमिति जम्बीरफलरसेन भावितं शेषं सुगमम् ॥ (५।०)

एवमित्यादि ॥ (६।०)

एवं नीलाञ्जनशोधनप्रकारेणैवगैरिकादयो विशोध्याः ॥ (७।०)

गैरिकं प्रसिद्धम् ॥ (८।०)

गैरिकं स्वर्णगैरिकं च ॥ (९।०)

कासीसमिति ॥ (१०।०)

तच्च द्विविधम् ॥ (११।०)

कासीसं पुष्पकासीसं च ॥ (१२।०)

कासीसं भस्मवदल्पमृत् पुष्पकासीसं तद्भेदः किंचित् पीतः टङ्कणं सौभाग्यक्षारः वराटिका कपर्दिका शेषं प्रसिद्धम् ॥ (१३।०)

तौरी स्फटिका फिट्कारी शब्दवाच्यो मृद्भेदः ॥ (१४।०)

कङ्कुष्ठं सुवर्णक्षीरी अस्य भेदः चोक इति प्रसिद्धः ॥ (१५।०)

स च रक्तक्षीरसेहुण्ड इति प्रतीतेः ॥ (१६।०)

निश्चितमित्यनेनान्यत् शोधनमपि नापेक्षयेत् ॥ (१७।०)

यतस्तन्त्रान्तरेष्वपि नानाप्रकारेण शोधनमस्ति तस्मादनेनैवात्र शोधनमेतेषां प्रतिपादितम् ॥ (१८।०)