तमसस्तावद् अष्टधा भेदः । (१।१)

प्रलयो ऽज्ञानाद्विभज्यते । (१।२)

सोऽष्टासु प्रकृतिषु लीयते प्रधानबुद्ध्यहंकारपञ्चतन्मात्राष्टासु । (१।३)

तत्र लीनम् आत्मानं मन्यते मुक्तो ऽहम् इति तमोभेद एषः । (१।४)

अष्टविधस्य मोहस्य भेदो ऽष्टविध एवेत्यर्थः । (१।५)

यत्राष्टगुणम् ऐश्वर्यं तत्र सङ्गाद् इन्द्रादयो देवा न मोक्षं प्राप्नुवन्ति । (१।६)

पुनश्च तत्क्षये संसरन्त्येषो ऽष्टविधो मोह इति । (१।७)

दशविधो महामोहः । (१।८)

शब्दस्पर्शरूपरसगन्धा देवानाम् एते पञ्च विषयाः सुखलक्षणा मानुषाणाम् अप्येत एव शब्दादयः पञ्च विषयाः । (१।९)

एवम् एतेषु दशसु महामोह इति । (१।१०)

तामिस्रो ऽष्टादशधा । (१।११)

अष्टविधम् ऐश्वर्यं दृष्टानुश्रविका विषया दशैतेषाम् अष्टादशानाम् । (१।१२)

संपदम् अनुनन्दन्ति विपदं नानुमोदन्त्येषो ऽष्टादशविधो विकल्पस्तामिस्रः । (१।१३)

तथा तामिस्रम् अष्टगुणं ऐश्वर्यं दृष्टानुश्रविका दश विषयास्तथान्धतामिस्रो ऽप्यष्टादशभेद एव । (१।१४)

किंतु विषयसंपत्तौ संभोगकाले य एव म्रियते ऽष्टगुणैश्वर्याद् वा भ्रश्यते ततस् तस्य महद् दुःखम् उत्पद्यते । (१।१५)

सो ऽन्धतामिस्र इति । (१।१६)

एवं विपर्ययभेदास्तमःप्रभृतयः पञ्च प्रत्येकं भिद्यमाना द्विषष्टिभेदाः संवृत्ता इति । (१।१७)

अशक्तिभेदाः कथ्यन्ते ॥ (१।१८)