इत्येष परिसमाप्तौ निर्देशे च । (१।१)

प्रकृतिकृतौ प्रकृतिकरणे प्रकृतिक्रियायाम् । (१।२)

य आरम्भो महदादिविशेषभूतपर्यन्तः प्रकृतेर्महान् महतो ऽहंकारस् तस्मात् तन्मात्राण्येकादशेन्द्रियाणि तन्मात्रेभ्यः पञ्च महाभूतानीत्येषः । (१।३)

प्रतिपुरुषविमोक्षार्थम् । (१।४)

पुरुषं पुरुषं प्रति । (१।५)

देवमनुष्यतिर्यग्भावं गतानां विमोक्षार्थम् आरम्भः । (१।६)

कथम् । (१।७)

स्वार्थ इव परार्थ आरम्भः । (१।८)

यथा कश्चित् स्वार्थं त्यक्त्वा मित्रकार्याणि करोत्येवं प्रधानम् । (१।९)

पुरुषो ऽत्र प्रधानस्य न किंचित् प्रत्युपकारं करोति । (१।१०)

स्वार्थ इव न च स्वार्थः परार्थ एव । (१।११)

अर्थः शब्दादिविषयोपलब्धिर् गुणपुरुषान्तरोपलब्धिश्च । (१।१२)

त्रिषु लोकेषु शब्दादिविषयैः पुरुषा योजयितव्या अन्ते मोक्षेणेति प्रधानस्य प्रवृत्तिः । (१।१३)

तथा चोक्तं कुम्भवत् प्रधानं पुरुषार्थं कृत्वा निवर्तत इति । (१।१४)

अत्रोच्यते । (१।१५)

अचेतनं प्रधानं चेतनः पुरुष इति । (१।१६)

मया त्रिषु लोकेषु शब्दादिभिर् विषयैः पुरुषो योज्यो ऽन्ते मोक्षः कर्तव्य इति । (१।१७)

कथं चेतनवत् प्रवृत्तिः । (१।१८)

सत्यं किंत्वचेतानानाम् अपि प्रवृत्तिर् दृष्टा निवृत्तिश्च । (१।१९)

यस्माद् इत्याह ॥ (१।२०)