Devatā देवता

1: Divaḥ, Pṛthivī; 2-10: Dadhikrā

Ṛṣi ऋषि

Vāmadeva Gautama

Chandas छन्दस्

Triṣṭubh

1. Ṛk 1

   उ॒तो हि वां॑ दा॒त्रा संति॒ पूर्वा॒ या पू॒रुभ्य॑स्त्र॒सद॑स्युर्नितो॒शे ।
   क्षे॒त्रा॒सां द॑दथुरुर्वरा॒सां घ॒नं दस्यु॑भ्यो अ॒भिभू॑तिमु॒ग्रं ॥

   उतो हि वां दात्रा सन्ति पूर्वा या पूरुभ्यस् त्रसदस्युर् नितोशे |
   क्षेत्रासां ददथुर् उर्वरासां घनं दस्युभ्यो अभिभूतिम् उग्रम् ||

   utó hí vām dātrā́ sánti pū́rvā yā́ pūrúbhyastrasádasyurnitośé ǀ
   kṣetrāsā́m dadathururvarāsā́m ghanám dásyubhyo abhíbhūtimugrám ǁ

   uto hi vāṃ dātrā santi pūrvā yā pūrubhyas trasadasyur nitośe |
   kṣetrāsāṃ dadathur urvarāsāṃ ghanaṃ dasyubhyo abhibhūtim ugram ||

   उ॒तो इति॑ । हि । वा॒म् । दा॒त्रा । सन्ति॑ । पूर्वा॑ । या । पू॒रुऽभ्यः॑ । त्र॒सद॑स्युः । नि॒ऽतो॒शे ।
   क्षे॒त्र॒ऽसाम् । द॒द॒थुः॒ । उ॒र्व॒रा॒ऽसाम् । घ॒नम् । दस्यु॑ऽभ्यः । अ॒भिऽभू॑तिम् । उ॒ग्रम् ॥

   उतो इति । हि । वाम् । दात्रा । सन्ति । पूर्वा । या । पूरुऽभ्यः । त्रसदस्युः । निऽतोशे ।
   क्षेत्रऽसाम् । ददथुः । उर्वराऽसाम् । घनम् । दस्युऽभ्यः । अभिऽभूतिम् । उग्रम् ॥

   utó íti ǀ hí ǀ vām ǀ dātrā́ ǀ sánti ǀ pū́rvā ǀ yā́ ǀ pūrú-bhyaḥ ǀ trasádasyuḥ ǀ ni-tośé ǀ
   kṣetra-sā́m ǀ dadathuḥ ǀ urvarā-sā́m ǀ ghanám ǀ dásyu-bhyaḥ ǀ abhí-bhūtim ǀ ugrám ǁ

   uto iti ǀ hi ǀ vām ǀ dātrā ǀ santi ǀ pūrvā ǀ yā ǀ pūru-bhyaḥ ǀ trasadasyuḥ ǀ ni-tośe ǀ
   kṣetra-sām ǀ dadathuḥ ǀ urvarā-sām ǀ ghanam ǀ dasyu-bhyaḥ ǀ abhi-bhūtim ǀ ugram ǁ

   4.38.1 Aṣṭaka 3.7.11.1Anuvāka 4.4.49Interpretations

2. Ṛk 2

   उ॒त वा॒जिनं॑ पुरुनि॒ष्षिध्वा॑नं दधि॒क्रामु॑ ददथुर्वि॒श्वकृ॑ष्टिं ।
   ऋ॒जि॒प्यं श्ये॒नं प्रु॑षि॒तप्सु॑मा॒शुं च॒र्कृत्य॑म॒र्यो नृ॒पतिं॒ न शूरं॑ ॥

   उत वाजिनम् पुरुनिष्षिध्वानं दधिक्राम् उ ददथुर् विश्वकृष्टिम् |
   ऋजिप्यं श्येनम् प्रुषितप्सुम् आशुं चर्कृत्यम् अर्यो नृपतिं न शूरम् ||

   utá vājínam puruniṣṣídhvānam dadhikrā́mu dadathurviśvákṛṣṭim ǀ
   ṛjipyám śyenám pruṣitápsumāśúm carkṛ́tyamaryó nṛpátim ná śū́ram ǁ

   uta vājinam puruniṣṣidhvānaṃ dadhikrām u dadathur viśvakṛṣṭim |
   ṛjipyaṃ śyenam pruṣitapsum āśuṃ carkṛtyam aryo nṛpatiṃ na śūram ||

   उ॒त । वा॒जिन॑म् । पु॒रु॒निः॒ऽसिध्वा॑नम् । द॒धि॒ऽक्राम् । ऊं॒ इति॑ । द॒द॒थुः॒ । वि॒श्वऽकृ॑ष्टिम् ।
   ऋ॒जि॒प्यम् । श्ये॒नम् । प्रु॒षि॒तऽप्सु॑म् । आ॒शुम् । च॒र्कृत्य॑म् । अ॒र्यः । नृ॒ऽपति॑म् । न । शूर॑म् ॥

   उत । वाजिनम् । पुरुनिःऽसिध्वानम् । दधिऽक्राम् । ऊं इति । ददथुः । विश्वऽकृष्टिम् ।
   ऋजिप्यम् । श्येनम् । प्रुषितऽप्सुम् । आशुम् । चर्कृत्यम् । अर्यः । नृऽपतिम् । न । शूरम् ॥

   utá ǀ vājínam ǀ puruniḥ-sídhvānam ǀ dadhi-krā́m ǀ ūṃ íti ǀ dadathuḥ ǀ viśvá-kṛṣṭim ǀ
   ṛjipyám ǀ śyenám ǀ pruṣitá-psum ǀ āśúm ǀ carkṛ́tyam ǀ aryáḥ ǀ nṛ-pátim ǀ ná ǀ śū́ram ǁ

   uta ǀ vājinam ǀ puruniḥ-sidhvānam ǀ dadhi-krām ǀ ūṃ iti ǀ dadathuḥ ǀ viśva-kṛṣṭim ǀ
   ṛjipyam ǀ śyenam ǀ pruṣita-psum ǀ āśum ǀ carkṛtyam ǀ aryaḥ ǀ nṛ-patim ǀ na ǀ śūram ǁ

   4.38.2 Aṣṭaka 3.7.11.2Anuvāka 4.4.50Interpretations

3. Ṛk 3

   यं सी॒मनु॑ प्र॒वते॑व॒ द्रवं॑तं॒ विश्वः॑ पू॒रुर्मद॑ति॒ हर्ष॑माणः ।
   प॒ड्भिर्गृध्यं॑तं मेध॒युं न शूरं॑ रथ॒तुरं॒ वात॑मिव॒ ध्रजं॑तं ॥

   यं सीम् अनु प्रवतेव द्रवन्तं विश्वः पूरुर् मदति हर्षमाणः |
   पड्भिर् गृध्यन्तम् मेधयुं न शूरं रथतुरं वातम् इव ध्रजन्तम् ||

   yám sīmánu praváteva drávantam víśvaḥ pūrúrmádati hárṣamāṇaḥ ǀ
   paḍbhírgṛ́dhyantam medhayúm ná śū́ram rathatúram vā́tamiva dhrájantam ǁ

   yaṃ sīm anu pravateva dravantaṃ viśvaḥ pūrur madati harṣamāṇaḥ |
   paḍbhir gṛdhyantam medhayuṃ na śūraṃ rathaturaṃ vātam iva dhrajantam ||

   यम् । सी॒म् । अनु॑ । प्र॒वता॑ऽइव । द्रव॑न्तम् । विश्वः॑ । पू॒रुः । मद॑ति । हर्ष॑माणः ।
   प॒ट्ऽभिः । गृध्य॑न्तम् । मे॒ध॒ऽयुम् । न । शूर॑म् । र॒थ॒ऽतुर॑म् । वात॑म्ऽइव । ध्रज॑न्तम् ॥

   यम् । सीम् । अनु । प्रवताऽइव । द्रवन्तम् । विश्वः । पूरुः । मदति । हर्षमाणः ।
   पट्ऽभिः । गृध्यन्तम् । मेधऽयुम् । न । शूरम् । रथऽतुरम् । वातम्ऽइव । ध्रजन्तम् ॥

   yám ǀ sīm ǀ ánu ǀ pravátā-iva ǀ drávantam ǀ víśvaḥ ǀ pūrúḥ ǀ mádati ǀ hárṣamāṇaḥ ǀ
   paṭ-bhíḥ ǀ gṛ́dhyantam ǀ medha-yúm ǀ ná ǀ śū́ram ǀ ratha-túram ǀ vā́tam-iva ǀ dhrájantam ǁ

   yam ǀ sīm ǀ anu ǀ pravatā-iva ǀ dravantam ǀ viśvaḥ ǀ pūruḥ ǀ madati ǀ harṣamāṇaḥ ǀ
   paṭ-bhiḥ ǀ gṛdhyantam ǀ medha-yum ǀ na ǀ śūram ǀ ratha-turam ǀ vātam-iva ǀ dhrajantam ǁ

   4.38.3 Aṣṭaka 3.7.11.3Anuvāka 4.4.51Interpretations

4. Ṛk 4

   यः स्मा॑रुंधा॒नो गध्या॑ स॒मत्सु॒ सनु॑तर॒श्चर॑ति॒ गोषु॒ गच्छ॑न् ।
   आ॒विर्ऋ॑जीको वि॒दथा॑ नि॒चिक्य॑त्ति॒रो अ॑र॒तिं पर्याप॑ आ॒योः ॥

   यः स्मारुन्धानो गध्या समत्सु सनुतरश् चरति गोषु गच्छन् |
   आविरृजीको विदथा निचिक्यत् तिरो अरतिम् पर्य् आप आयोः ||

   yáḥ smārundhānó gádhyā samátsu sánutaraścárati góṣu gácchan ǀ
   āvírṛjīko vidáthā nicíkyattiró aratím páryā́pa āyóḥ ǁ

   yaḥ smārundhāno gadhyā samatsu sanutaraś carati goṣu gacchan |
   āvirṛjīko vidathā nicikyat tiro aratim pary āpa āyoḥ ||

   यः । स्म॒ । आ॒ऽरु॒न्धा॒नः । गध्या॑ । स॒मत्ऽसु॑ । सनु॑ऽतरः । चर॑ति । गोषु॑ । गच्छ॑न् ।
   आ॒विःऽऋ॑जीकः । वि॒दथा॑ । नि॒ऽचिक्य॑त् । ति॒रः । अ॒र॒तिम् । परि॑ । आपः॑ । आ॒योः ॥

   यः । स्म । आऽरुन्धानः । गध्या । समत्ऽसु । सनुऽतरः । चरति । गोषु । गच्छन् ।
   आविःऽऋजीकः । विदथा । निऽचिक्यत् । तिरः । अरतिम् । परि । आपः । आयोः ॥

   yáḥ ǀ sma ǀ ā-rundhānáḥ ǀ gádhyā ǀ samát-su ǀ sánu-taraḥ ǀ cárati ǀ góṣu ǀ gácchan ǀ
   āvíḥ-ṛjīkaḥ ǀ vidáthā ǀ ni-cíkyat ǀ tiráḥ ǀ aratím ǀ pári ǀ ā́paḥ ǀ āyóḥ ǁ

   yaḥ ǀ sma ǀ ā-rundhānaḥ ǀ gadhyā ǀ samat-su ǀ sanu-taraḥ ǀ carati ǀ goṣu ǀ gacchan ǀ
   āviḥ-ṛjīkaḥ ǀ vidathā ǀ ni-cikyat ǀ tiraḥ ǀ aratim ǀ pari ǀ āpaḥ ǀ āyoḥ ǁ

   4.38.4 Aṣṭaka 3.7.11.4Anuvāka 4.4.52Interpretations

5. Ṛk 5

   उ॒त स्मै॑नं वस्त्र॒मथिं॒ न ता॒युमनु॑ क्रोशंति क्षि॒तयो॒ भरे॑षु ।
   नी॒चाय॑मानं॒ जसु॑रिं॒ न श्ये॒नं श्रव॒श्चाच्छा॑ पशु॒मच्च॑ यू॒थं ॥

   उत स्मैनं वस्त्रमथिं न तायुम् अनु क्रोशन्ति क्षितयो भरेषु |
   नीचायमानं जसुरिं न श्येनं श्रवश् चाच्छा पशुमच् च यूथम् ||

   utá smainam vastramáthim ná tāyúmánu krośanti kṣitáyo bháreṣu ǀ
   nīcā́yamānam jásurim ná śyenám śrávaścā́cchā paśumácca yūthám ǁ

   uta smainaṃ vastramathiṃ na tāyum anu krośanti kṣitayo bhareṣu |
   nīcāyamānaṃ jasuriṃ na śyenaṃ śravaś cācchā paśumac ca yūtham ||

   उ॒त । स्म॒ । ए॒न॒म् । व॒स्त्र॒ऽमथि॑म् । न । ता॒युम् । अनु॑ । क्रो॒श॒न्ति॒ । क्षि॒तयः॑ । भरे॑षु ।
   नी॒चा । अय॑मानम् । जसु॑रिम् । न । श्ये॒नम् । श्रवः॑ । च॒ । अच्छ॑ । प॒शु॒ऽमत् । च॒ । यू॒थम् ॥

   उत । स्म । एनम् । वस्त्रऽमथिम् । न । तायुम् । अनु । क्रोशन्ति । क्षितयः । भरेषु ।
   नीचा । अयमानम् । जसुरिम् । न । श्येनम् । श्रवः । च । अच्छ । पशुऽमत् । च । यूथम् ॥

   utá ǀ sma ǀ enam ǀ vastra-máthim ǀ ná ǀ tāyúm ǀ ánu ǀ krośanti ǀ kṣitáyaḥ ǀ bháreṣu ǀ
   nīcā́ ǀ áyamānam ǀ jásurim ǀ ná ǀ śyenám ǀ śrávaḥ ǀ ca ǀ áccha ǀ paśu-mát ǀ ca ǀ yūthám ǁ

   uta ǀ sma ǀ enam ǀ vastra-mathim ǀ na ǀ tāyum ǀ anu ǀ krośanti ǀ kṣitayaḥ ǀ bhareṣu ǀ
   nīcā ǀ ayamānam ǀ jasurim ǀ na ǀ śyenam ǀ śravaḥ ǀ ca ǀ accha ǀ paśu-mat ǀ ca ǀ yūtham ǁ

   4.38.5 Aṣṭaka 3.7.11.5Anuvāka 4.4.53Interpretations

6. Ṛk 6

   उ॒त स्मा॑सु प्रथ॒मः स॑रि॒ष्यन्नि वे॑वेति॒ श्रेणि॑भी॒ रथा॑नां ।
   स्रजं॑ कृण्वा॒नो जन्यो॒ न शुभ्वा॑ रे॒णुं रेरि॑हत्कि॒रणं॑ दद॒श्वान् ॥

   उत स्मासु प्रथमः सरिष्यन् नि वेवेति श्रेणिभी रथानाम् |
   स्रजं कृण्वानो जन्यो न शुभ्वा रेणुं रेरिहत् किरणं ददश्वान् ||

   utá smāsu prathamáḥ sariṣyánní veveti śréṇibhī ráthānām ǀ
   srájam kṛṇvānó jányo ná śúbhvā reṇúm rérihatkiráṇam dadaśvā́n ǁ

   uta smāsu prathamaḥ sariṣyan ni veveti śreṇibhī rathānām |
   srajaṃ kṛṇvāno janyo na śubhvā reṇuṃ rerihat kiraṇaṃ dadaśvān ||

   उ॒त । स्म॒ । आ॒सु॒ । प्र॒थ॒मः । स॒रि॒ष्यन् । नि । वे॒वे॒ति॒ । श्रेणि॑ऽभिः । रथा॑नाम् ।
   स्रज॑म् । कृ॒ण्वा॒नः । जन्यः॑ । न । शुभ्वा॑ । रे॒णुम् । रेरि॑हत् । कि॒रण॑म् । द॒द॒श्वान् ॥

   उत । स्म । आसु । प्रथमः । सरिष्यन् । नि । वेवेति । श्रेणिऽभिः । रथानाम् ।
   स्रजम् । कृण्वानः । जन्यः । न । शुभ्वा । रेणुम् । रेरिहत् । किरणम् । ददश्वान् ॥

   utá ǀ sma ǀ āsu ǀ prathamáḥ ǀ sariṣyán ǀ ní ǀ veveti ǀ śréṇi-bhiḥ ǀ ráthānām ǀ
   srájam ǀ kṛṇvānáḥ ǀ jányaḥ ǀ ná ǀ śúbhvā ǀ reṇúm ǀ rérihat ǀ kiráṇam ǀ dadaśvā́n ǁ

   uta ǀ sma ǀ āsu ǀ prathamaḥ ǀ sariṣyan ǀ ni ǀ veveti ǀ śreṇi-bhiḥ ǀ rathānām ǀ
   srajam ǀ kṛṇvānaḥ ǀ janyaḥ ǀ na ǀ śubhvā ǀ reṇum ǀ rerihat ǀ kiraṇam ǀ dadaśvān ǁ

   4.38.6 Aṣṭaka 3.7.12.1Anuvāka 4.4.54Interpretations

7. Ṛk 7

   उ॒त स्य वा॒जी सहु॑रिर्ऋ॒तावा॒ शुश्रू॑षमाणस्त॒न्वा॑ सम॒र्ये ।
   तुरं॑ य॒तीषु॑ तु॒रय॑न्नृजि॒प्योऽधि॑ भ्रु॒वोः कि॑रते रे॒णुमृं॒जन् ॥

   उत स्य वाजी सहुरिर् ऋतावा शुश्रूषमाणस् तन्वा समर्ये |
   तुरं यतीषु तुरयन्न् ऋजिप्यो ऽधि भ्रुवोः किरते रेणुम् ऋञ्जन् ||

   utá syá vājī́ sáhurirṛtā́vā śúśrūṣamāṇastanvā́ samaryé ǀ
   túram yatī́ṣu turáyannṛjipyó’dhi bhruvóḥ kirate reṇúmṛñján ǁ

   uta sya vājī sahurir ṛtāvā śuśrūṣamāṇas tanvā samarye |
   turaṃ yatīṣu turayann ṛjipyo 'dhi bhruvoḥ kirate reṇum ṛñjan ||

   उ॒त । स्यः । वा॒जी । सहु॑रिः । ऋ॒तऽवा॑ । शुश्रू॑षमाणः । त॒न्वा॑ । स॒ऽम॒र्ये ।
   तुर॑म् । य॒तीषु॑ । तु॒रय॑न् । ऋ॒जि॒प्यः । अधि॑ । भ्रु॒वोः । कि॒र॒ते॒ । रे॒णुम् । ऋ॒ञ्जन् ॥

   उत । स्यः । वाजी । सहुरिः । ऋतऽवा । शुश्रूषमाणः । तन्वा । सऽमर्ये ।
   तुरम् । यतीषु । तुरयन् । ऋजिप्यः । अधि । भ्रुवोः । किरते । रेणुम् । ऋञ्जन् ॥

   utá ǀ syáḥ ǀ vājī́ ǀ sáhuriḥ ǀ ṛtá-vā ǀ śúśrūṣamāṇaḥ ǀ tanvā́ ǀ sa-maryé ǀ
   túram ǀ yatī́ṣu ǀ turáyan ǀ ṛjipyáḥ ǀ ádhi ǀ bhruvóḥ ǀ kirate ǀ reṇúm ǀ ṛñján ǁ

   uta ǀ syaḥ ǀ vājī ǀ sahuriḥ ǀ ṛta-vā ǀ śuśrūṣamāṇaḥ ǀ tanvā ǀ sa-marye ǀ
   turam ǀ yatīṣu ǀ turayan ǀ ṛjipyaḥ ǀ adhi ǀ bhruvoḥ ǀ kirate ǀ reṇum ǀ ṛñjan ǁ

   4.38.7 Aṣṭaka 3.7.12.2Anuvāka 4.4.55Interpretations

8. Ṛk 8

   उ॒त स्मा॑स्य तन्य॒तोरि॑व॒ द्योर्ऋ॑घाय॒तो अ॑भि॒युजो॑ भयंते ।
   य॒दा स॒हस्र॑म॒भि षी॒मयो॑धीद्दु॒र्वर्तुः॑ स्मा भवति भी॒म ऋं॒जन् ॥

   उत स्मास्य तन्यतोर् इव द्योर् ऋघायतो अभियुजो भयन्ते |
   यदा सहस्रम् अभि षीम् अयोधीद् दुर्वर्तुः स्मा भवति भीम ऋञ्जन् ||

   utá smāsya tanyatóriva dyórṛghāyató abhiyújo bhayante ǀ
   yadā́ sahásramabhí ṣīmáyodhīddurvártuḥ smā bhavati bhīmá ṛñján ǁ

   uta smāsya tanyator iva dyor ṛghāyato abhiyujo bhayante |
   yadā sahasram abhi ṣīm ayodhīd durvartuḥ smā bhavati bhīma ṛñjan ||

   उ॒त । स्म॒ । अ॒स्य॒ । त॒न्य॒तोःऽइ॑व । द्योः । ऋ॒घा॒य॒तः । अ॒भि॒ऽयुजः॑ । भ॒य॒न्ते॒ ।
   य॒दा । स॒हस्र॑म् । अ॒भि । सी॒म् । अयो॑धीत् । दुः॒ऽवर्तुः॑ । स्म॒ । भ॒व॒ति॒ । भी॒मः । ऋ॒ञ्जन् ॥

   उत । स्म । अस्य । तन्यतोःऽइव । द्योः । ऋघायतः । अभिऽयुजः । भयन्ते ।
   यदा । सहस्रम् । अभि । सीम् । अयोधीत् । दुःऽवर्तुः । स्म । भवति । भीमः । ऋञ्जन् ॥

   utá ǀ sma ǀ asya ǀ tanyatóḥ-iva ǀ dyóḥ ǀ ṛghāyatáḥ ǀ abhi-yújaḥ ǀ bhayante ǀ
   yadā́ ǀ sahásram ǀ abhí ǀ sīm ǀ áyodhīt ǀ duḥ-vártuḥ ǀ sma ǀ bhavati ǀ bhīmáḥ ǀ ṛñján ǁ

   uta ǀ sma ǀ asya ǀ tanyatoḥ-iva ǀ dyoḥ ǀ ṛghāyataḥ ǀ abhi-yujaḥ ǀ bhayante ǀ
   yadā ǀ sahasram ǀ abhi ǀ sīm ǀ ayodhīt ǀ duḥ-vartuḥ ǀ sma ǀ bhavati ǀ bhīmaḥ ǀ ṛñjan ǁ

   4.38.8 Aṣṭaka 3.7.12.3Anuvāka 4.4.56Interpretations

9. Ṛk 9

   उ॒त स्मा॑स्य पनयंति॒ जना॑ जू॒तिं कृ॑ष्टि॒प्रो अ॒भिभू॑तिमा॒शोः ।
   उ॒तैन॑माहुः समि॒थे वि॒यंतः॒ परा॑ दधि॒क्रा अ॑सरत्स॒हस्रैः॑ ॥

   उत स्मास्य पनयन्ति जना जूतिं कृष्टिप्रो अभिभूतिम् आशोः |
   उतैनम् आहुः समिथे वियन्तः परा दधिक्रा असरत् सहस्रैः ||

   utá smāsya panayanti jánā jūtím kṛṣṭipró abhíbhūtimāśóḥ ǀ
   utáinamāhuḥ samithé viyántaḥ párā dadhikrā́ asaratsahásraiḥ ǁ

   uta smāsya panayanti janā jūtiṃ kṛṣṭipro abhibhūtim āśoḥ |
   utainam āhuḥ samithe viyantaḥ parā dadhikrā asarat sahasraiḥ ||

   उ॒त । स्म॒ । अ॒स्य॒ । प॒न॒य॒न्ति॒ । जनाः॑ । जू॒तिम् । कृ॒ष्टि॒ऽप्रः । अ॒भिऽभू॑तिम् । आ॒शोः ।
   उ॒त । ए॒न॒म् । आ॒हुः॒ । स॒म्ऽइ॒थे । वि॒ऽयन्तः॑ । परा॑ । द॒धि॒ऽक्राः । अ॒स॒र॒त् । स॒हस्रैः॑ ॥

   उत । स्म । अस्य । पनयन्ति । जनाः । जूतिम् । कृष्टिऽप्रः । अभिऽभूतिम् । आशोः ।
   उत । एनम् । आहुः । सम्ऽइथे । विऽयन्तः । परा । दधिऽक्राः । असरत् । सहस्रैः ॥

   utá ǀ sma ǀ asya ǀ panayanti ǀ jánāḥ ǀ jūtím ǀ kṛṣṭi-práḥ ǀ abhí-bhūtim ǀ āśóḥ ǀ
   utá ǀ enam ǀ āhuḥ ǀ sam-ithé ǀ vi-yántaḥ ǀ párā ǀ dadhi-krā́ḥ ǀ asarat ǀ sahásraiḥ ǁ

   uta ǀ sma ǀ asya ǀ panayanti ǀ janāḥ ǀ jūtim ǀ kṛṣṭi-praḥ ǀ abhi-bhūtim ǀ āśoḥ ǀ
   uta ǀ enam ǀ āhuḥ ǀ sam-ithe ǀ vi-yantaḥ ǀ parā ǀ dadhi-krāḥ ǀ asarat ǀ sahasraiḥ ǁ

   4.38.9 Aṣṭaka 3.7.12.4Anuvāka 4.4.57Interpretations

10. Ṛk 10

    आ द॑धि॒क्राः शव॑सा॒ पंच॑ कृ॒ष्टीः सूर्य॑ इव॒ ज्योति॑षा॒पस्त॑तान ।
    स॒ह॒स्र॒साः श॑त॒सा वा॒ज्यर्वा॑ पृ॒णक्तु॒ मध्वा॒ समि॒मा वचां॑सि ॥

    आ दधिक्राः शवसा पञ्च कृष्टीः सूर्य इव ज्योतिषापस् ततान |
    सहस्रसाः शतसा वाज्य् अर्वा पृणक्तु मध्वा सम् इमा वचांसि ||

    ā́ dadhikrā́ḥ śávasā páñca kṛṣṭī́ḥ sū́rya iva jyótiṣāpástatāna ǀ
    sahasrasā́ḥ śatasā́ vājyárvā pṛṇáktu mádhvā sámimā́ vácāṃsi ǁ

    ā dadhikrāḥ śavasā pañca kṛṣṭīḥ sūrya iva jyotiṣāpas tatāna |
    sahasrasāḥ śatasā vājy arvā pṛṇaktu madhvā sam imā vacāṃsi ||

    आ । द॒धि॒ऽक्राः । शव॑सा । पञ्च॑ । कृ॒ष्टीः । सूर्यः॑ऽइव । ज्योति॑षा । अ॒पः । त॒ता॒न॒ ।
    स॒ह॒स्र॒ऽसाः । श॒त॒ऽसाः । वा॒जी । अर्वा॑ । पृ॒णक्तु॑ । मध्वा॑ । सम् । इ॒मा । वचां॑सि ॥

    आ । दधिऽक्राः । शवसा । पञ्च । कृष्टीः । सूर्यःऽइव । ज्योतिषा । अपः । ततान ।
    सहस्रऽसाः । शतऽसाः । वाजी । अर्वा । पृणक्तु । मध्वा । सम् । इमा । वचांसि ॥

    ā́ ǀ dadhi-krā́ḥ ǀ śávasā ǀ páñca ǀ kṛṣṭī́ḥ ǀ sū́ryaḥ-iva ǀ jyótiṣā ǀ apáḥ ǀ tatāna ǀ
    sahasra-sā́ḥ ǀ śata-sā́ḥ ǀ vājī́ ǀ árvā ǀ pṛṇáktu ǀ mádhvā ǀ sám ǀ imā́ ǀ vácāṃsi ǁ

    ā ǀ dadhi-krāḥ ǀ śavasā ǀ pañca ǀ kṛṣṭīḥ ǀ sūryaḥ-iva ǀ jyotiṣā ǀ apaḥ ǀ tatāna ǀ
    sahasra-sāḥ ǀ śata-sāḥ ǀ vājī ǀ arvā ǀ pṛṇaktu ǀ madhvā ǀ sam ǀ imā ǀ vacāṃsi ǁ

    4.38.10 Aṣṭaka 3.7.12.5Anuvāka 4.4.58Interpretations

Text, recitation and interpretations from the Ṛgveda database of theveda.org.in.