Devatā देवता

1, 2, 4-6: Trasadasyu (आत्मा); 3: Indra, Tvaṣṭṛ, Varuṇa, Trasadasyu (आत्मा); 7-10: Indra, Varuṇa

Ṛṣi ऋषि

Trasadasyu Paurukutsya Sauhotra

Chandas छन्दस्

Triṣṭubh

1. Ṛk 1

   मम॑ द्वि॒ता रा॒ष्ट्रं क्ष॒त्रिय॑स्य वि॒श्वायो॒र्विश्वे॑ अ॒मृता॒ यथा॑ नः ।
   क्रतुं॑ सचंते॒ वरु॑णस्य दे॒वा राजा॑मि कृ॒ष्टेरु॑प॒मस्य॑ व॒व्रेः ॥

   मम द्विता राष्ट्रं क्षत्रियस्य विश्वायोर् विश्वे अमृता यथा नः |
   क्रतुं सचन्ते वरुणस्य देवा राजामि कृष्टेर् उपमस्य वव्रेः ||

   máma dvitā́ rāṣṭrám kṣatríyasya viśvā́yorvíśve amṛ́tā yáthā naḥ ǀ
   krátum sacante váruṇasya devā́ rā́jāmi kṛṣṭérupamásya vavréḥ ǁ

   mama dvitā rāṣṭraṃ kṣatriyasya viśvāyor viśve amṛtā yathā naḥ |
   kratuṃ sacante varuṇasya devā rājāmi kṛṣṭer upamasya vavreḥ ||

   मम॑ । द्वि॒ता । रा॒ष्ट्रम् । क्ष॒त्रिय॑स्य । वि॒श्वऽआ॑योः । विश्वे॑ । अ॒मृताः॑ । यथा॑ । नः॒ ।
   क्रतु॑म् । स॒च॒न्ते॒ । वरु॑णस्य । दे॒वाः । राजा॑मि । कृ॒ष्टेः । उ॒प॒मस्य॑ । व॒व्रेः ॥

   मम । द्विता । राष्ट्रम् । क्षत्रियस्य । विश्वऽआयोः । विश्वे । अमृताः । यथा । नः ।
   क्रतुम् । सचन्ते । वरुणस्य । देवाः । राजामि । कृष्टेः । उपमस्य । वव्रेः ॥

   máma ǀ dvitā́ ǀ rāṣṭrám ǀ kṣatríyasya ǀ viśvá-āyoḥ ǀ víśve ǀ amṛ́tāḥ ǀ yáthā ǀ naḥ ǀ
   krátum ǀ sacante ǀ váruṇasya ǀ devā́ḥ ǀ rā́jāmi ǀ kṛṣṭéḥ ǀ upamásya ǀ vavréḥ ǁ

   mama ǀ dvitā ǀ rāṣṭram ǀ kṣatriyasya ǀ viśva-āyoḥ ǀ viśve ǀ amṛtāḥ ǀ yathā ǀ naḥ ǀ
   kratum ǀ sacante ǀ varuṇasya ǀ devāḥ ǀ rājāmi ǀ kṛṣṭeḥ ǀ upamasya ǀ vavreḥ ǁ

   4.42.1 Aṣṭaka 3.7.17.1Anuvāka 4.4.81Interpretations

2. Ṛk 2

   अ॒हं राजा॒ वरु॑णो॒ मह्यं॒ तान्य॑सु॒र्या॑णि प्रथ॒मा धा॑रयंत ।
   क्रतुं॑ सचंते॒ वरु॑णस्य दे॒वा राजा॑मि कृ॒ष्टेरु॑प॒मस्य॑ व॒व्रेः ॥

   अहं राजा वरुणो मह्यं तान्य् असुर्याणि प्रथमा धारयन्त |
   क्रतुं सचन्ते वरुणस्य देवा राजामि कृष्टेर् उपमस्य वव्रेः ||

   ahám rā́jā váruṇo máhyam tā́nyasuryā́ṇi prathamā́ dhārayanta ǀ
   krátum sacante váruṇasya devā́ rā́jāmi kṛṣṭérupamásya vavréḥ ǁ

   ahaṃ rājā varuṇo mahyaṃ tāny asuryāṇi prathamā dhārayanta |
   kratuṃ sacante varuṇasya devā rājāmi kṛṣṭer upamasya vavreḥ ||

   अ॒हम् । राजा॑ । वरु॑णः । मह्य॑म् । तानि॑ । अ॒सु॒र्या॑णि । प्र॒थ॒मा । धा॒र॒य॒न्त॒ ।
   क्रतु॑म् । स॒च॒न्ते॒ । वरु॑णस्य । दे॒वाः । राजा॑मि । कृ॒ष्टेः । उ॒प॒मस्य॑ । व॒व्रेः ॥

   अहम् । राजा । वरुणः । मह्यम् । तानि । असुर्याणि । प्रथमा । धारयन्त ।
   क्रतुम् । सचन्ते । वरुणस्य । देवाः । राजामि । कृष्टेः । उपमस्य । वव्रेः ॥

   ahám ǀ rā́jā ǀ váruṇaḥ ǀ máhyam ǀ tā́ni ǀ asuryā́ṇi ǀ prathamā́ ǀ dhārayanta ǀ
   krátum ǀ sacante ǀ váruṇasya ǀ devā́ḥ ǀ rā́jāmi ǀ kṛṣṭéḥ ǀ upamásya ǀ vavréḥ ǁ

   aham ǀ rājā ǀ varuṇaḥ ǀ mahyam ǀ tāni ǀ asuryāṇi ǀ prathamā ǀ dhārayanta ǀ
   kratum ǀ sacante ǀ varuṇasya ǀ devāḥ ǀ rājāmi ǀ kṛṣṭeḥ ǀ upamasya ǀ vavreḥ ǁ

   4.42.2 Aṣṭaka 3.7.17.2Anuvāka 4.4.82Interpretations

3. Ṛk 3

   अ॒हमिंद्रो॒ वरु॑ण॒स्ते म॑हि॒त्वोर्वी ग॑भी॒रे रज॑सी सु॒मेके॑ ।
   त्वष्टे॑व॒ विश्वा॒ भुव॑नानि वि॒द्वान्त्समै॑रयं॒ रोद॑सी धा॒रयं॑ च ॥

   अहम् इन्द्रो वरुणस् ते महित्वोर्वी गभीरे रजसी सुमेके |
   त्वष्टेव विश्वा भुवनानि विद्वान् सम् ऐरयं रोदसी धारयं च ||

   ahámíndro váruṇasté mahitvórvī́ gabhīré rájasī suméke ǀ
   tváṣṭeva víśvā bhúvanāni vidvā́ntsámairayam ródasī dhāráyam ca ǁ

   aham indro varuṇas te mahitvorvī gabhīre rajasī sumeke |
   tvaṣṭeva viśvā bhuvanāni vidvān sam airayaṃ rodasī dhārayaṃ ca ||

   अ॒हम् । इन्द्रः॑ । वरु॑णः । ते इति॑ । म॒हि॒ऽत्वा । उ॒र्वी इति॑ । ग॒भी॒रे इति॑ । रज॑सी॒ इति॑ । सु॒मेके॒ इति॑ सु॒ऽमेके॑ ।
   त्वष्टा॑ऽइव । विश्वा॑ । भुव॑नानि । वि॒द्वान् । सम् । ऐ॒र॒य॒म् । रोद॑सी॒ इति॑ । धा॒रय॑म् । च॒ ॥

   अहम् । इन्द्रः । वरुणः । ते इति । महिऽत्वा । उर्वी इति । गभीरे इति । रजसी इति । सुमेके इति सुऽमेके ।
   त्वष्टाऽइव । विश्वा । भुवनानि । विद्वान् । सम् । ऐरयम् । रोदसी इति । धारयम् । च ॥

   ahám ǀ índraḥ ǀ váruṇaḥ ǀ té íti ǀ mahi-tvā́ ǀ urvī́ íti ǀ gabhīré íti ǀ rájasī íti ǀ suméke íti su-méke ǀ
   tváṣṭā-iva ǀ víśvā ǀ bhúvanāni ǀ vidvā́n ǀ sám ǀ airayam ǀ ródasī íti ǀ dhāráyam ǀ ca ǁ

   aham ǀ indraḥ ǀ varuṇaḥ ǀ te iti ǀ mahi-tvā ǀ urvī iti ǀ gabhīre iti ǀ rajasī iti ǀ sumeke iti su-meke ǀ
   tvaṣṭā-iva ǀ viśvā ǀ bhuvanāni ǀ vidvān ǀ sam ǀ airayam ǀ rodasī iti ǀ dhārayam ǀ ca ǁ

   4.42.3 Aṣṭaka 3.7.17.3Anuvāka 4.4.83Interpretations

4. Ṛk 4

   अ॒हम॒पो अ॑पिन्वमु॒क्षमा॑णा धा॒रयं॒ दिवं॒ सद॑न ऋ॒तस्य॑ ।
   ऋ॒तेन॑ पु॒त्रो अदि॑तेर्ऋ॒तावो॒त त्रि॒धातु॑ प्रथय॒द्वि भूम॑ ॥

   अहम् अपो अपिन्वम् उक्षमाणा धारयं दिवं सदन ऋतस्य |
   ऋतेन पुत्रो अदितेर् ऋतावोत त्रिधातु प्रथयद् वि भूम ||

   ahámapó apinvamukṣámāṇā dhāráyam dívam sádana ṛtásya ǀ
   ṛténa putró áditerṛtā́votá tridhā́tu prathayadví bhū́ma ǁ

   aham apo apinvam ukṣamāṇā dhārayaṃ divaṃ sadana ṛtasya |
   ṛtena putro aditer ṛtāvota tridhātu prathayad vi bhūma ||

   अ॒हम् । अ॒पः । अ॒पि॒न्व॒म् । उ॒क्षमा॑णाः । धा॒रय॑म् । दिव॑म् । सद॑ने । ऋ॒तस्य॑ ।
   ऋ॒तेन॑ । पु॒त्रः । अदि॑तेः । ऋ॒तऽवा॑ । उ॒त । त्रि॒ऽधातु॑ । प्र॒थ॒य॒त् । वि । भूम॑ ॥

   अहम् । अपः । अपिन्वम् । उक्षमाणाः । धारयम् । दिवम् । सदने । ऋतस्य ।
   ऋतेन । पुत्रः । अदितेः । ऋतऽवा । उत । त्रिऽधातु । प्रथयत् । वि । भूम ॥

   ahám ǀ apáḥ ǀ apinvam ǀ ukṣámāṇāḥ ǀ dhāráyam ǀ dívam ǀ sádane ǀ ṛtásya ǀ
   ṛténa ǀ putráḥ ǀ áditeḥ ǀ ṛtá-vā ǀ utá ǀ tri-dhā́tu ǀ prathayat ǀ ví ǀ bhū́ma ǁ

   aham ǀ apaḥ ǀ apinvam ǀ ukṣamāṇāḥ ǀ dhārayam ǀ divam ǀ sadane ǀ ṛtasya ǀ
   ṛtena ǀ putraḥ ǀ aditeḥ ǀ ṛta-vā ǀ uta ǀ tri-dhātu ǀ prathayat ǀ vi ǀ bhūma ǁ

   4.42.4 Aṣṭaka 3.7.17.4Anuvāka 4.4.84Interpretations

5. Ṛk 5

   मां नरः॒ स्वश्वा॑ वा॒जयं॑तो॒ मां वृ॒ताः स॒मर॑णे हवंते ।
   कृ॒णोम्या॒जिं म॒घवा॒हमिंद्र॒ इय॑र्मि रे॒णुम॒भिभू॑त्योजाः ॥

   मां नरः स्वश्वा वाजयन्तो मां वृताः समरणे हवन्ते |
   कृणोम्य् आजिम् मघवाहम् इन्द्र इयर्मि रेणुम् अभिभूत्योजाः ||

   mā́m náraḥ sváśvā vājáyanto mā́m vṛtā́ḥ samáraṇe havante ǀ
   kṛṇómyājím maghávāhámíndra íyarmi reṇúmabhíbhūtyojāḥ ǁ

   māṃ naraḥ svaśvā vājayanto māṃ vṛtāḥ samaraṇe havante |
   kṛṇomy ājim maghavāham indra iyarmi reṇum abhibhūtyojāḥ ||

   माम् । नरः॑ । सु॒ऽअश्वाः॑ । वा॒जय॑न्तः । माम् । वृ॒ताः । स॒म्ऽअर॑णे । ह॒व॒न्ते॒ ।
   कृ॒णोमि॑ । आ॒जिम् । म॒घऽवा॑ । अ॒हम् । इन्द्रः॑ । इय॑र्मि । रे॒णुम् । अ॒भिभू॑तिऽओजाः ॥

   माम् । नरः । सुऽअश्वाः । वाजयन्तः । माम् । वृताः । सम्ऽअरणे । हवन्ते ।
   कृणोमि । आजिम् । मघऽवा । अहम् । इन्द्रः । इयर्मि । रेणुम् । अभिभूतिऽओजाः ॥

   mā́m ǀ náraḥ ǀ su-áśvāḥ ǀ vājáyantaḥ ǀ mā́m ǀ vṛtā́ḥ ǀ sam-áraṇe ǀ havante ǀ
   kṛṇómi ǀ ājím ǀ maghá-vā ǀ ahám ǀ índraḥ ǀ íyarmi ǀ reṇúm ǀ abhíbhūti-ojāḥ ǁ

   mām ǀ naraḥ ǀ su-aśvāḥ ǀ vājayantaḥ ǀ mām ǀ vṛtāḥ ǀ sam-araṇe ǀ havante ǀ
   kṛṇomi ǀ ājim ǀ magha-vā ǀ aham ǀ indraḥ ǀ iyarmi ǀ reṇum ǀ abhibhūti-ojāḥ ǁ

   4.42.5 Aṣṭaka 3.7.17.5Anuvāka 4.4.85Interpretations

6. Ṛk 6

   अ॒हं ता विश्वा॑ चकरं॒ नकि॑र्मा॒ दैव्यं॒ सहो॑ वरते॒ अप्र॑तीतं ।
   यन्मा॒ सोमा॑सो म॒मद॒न्यदु॒क्थोभे भ॑येते॒ रज॑सी अपा॒रे ॥

   अहं ता विश्वा चकरं नकिर् मा दैव्यं सहो वरते अप्रतीतम् |
   यन् मा सोमासो ममदन् यद् उक्थोभे भयेते रजसी अपारे ||

   ahám tā́ víśvā cakaram nákirmā dáivyam sáho varate ápratītam ǀ
   yánmā sómāso mamádanyádukthóbhé bhayete rájasī apāré ǁ

   ahaṃ tā viśvā cakaraṃ nakir mā daivyaṃ saho varate apratītam |
   yan mā somāso mamadan yad ukthobhe bhayete rajasī apāre ||

   अ॒हम् । ता । विश्वा॑ । च॒क॒र॒म् । नकिः॑ । मा॒ । दैव्य॑म् । सहः॑ । व॒र॒ते॒ । अप्र॑तिऽइतम् ।
   यत् । मा॒ । सोमा॑सः । म॒मद॑न् । यत् । उ॒क्था । उ॒भे इति॑ । भ॒ये॒ते॒ इति॑ । रज॑सी॒ इति॑ । अ॒पा॒रे इति॑ ॥

   अहम् । ता । विश्वा । चकरम् । नकिः । मा । दैव्यम् । सहः । वरते । अप्रतिऽइतम् ।
   यत् । मा । सोमासः । ममदन् । यत् । उक्था । उभे इति । भयेते इति । रजसी इति । अपारे इति ॥

   ahám ǀ tā́ ǀ víśvā ǀ cakaram ǀ nákiḥ ǀ mā ǀ dáivyam ǀ sáhaḥ ǀ varate ǀ áprati-itam ǀ
   yát ǀ mā ǀ sómāsaḥ ǀ mamádan ǀ yát ǀ ukthā́ ǀ ubhé íti ǀ bhayete íti ǀ rájasī íti ǀ apāré íti ǁ

   aham ǀ tā ǀ viśvā ǀ cakaram ǀ nakiḥ ǀ mā ǀ daivyam ǀ sahaḥ ǀ varate ǀ aprati-itam ǀ
   yat ǀ mā ǀ somāsaḥ ǀ mamadan ǀ yat ǀ ukthā ǀ ubhe iti ǀ bhayete iti ǀ rajasī iti ǀ apāre iti ǁ

   4.42.6 Aṣṭaka 3.7.18.1Anuvāka 4.4.86Interpretations

7. Ṛk 7

   वि॒दुष्टे॒ विश्वा॒ भुव॑नानि॒ तस्य॒ ता प्र ब्र॑वीषि॒ वरु॑णाय वेधः ।
   त्वं वृ॒त्राणि॑ शृण्विषे जघ॒न्वांत्वं वृ॒ताँ अ॑रिणा इंद्र॒ सिंधू॑न् ॥

   विदुष् टे विश्वा भुवनानि तस्य ता प्र ब्रवीषि वरुणाय वेधः |
   त्वं वृत्राणि शृण्विषे जघन्वान् त्वं वृतां अरिणा इन्द्र सिन्धून् ||

   vidúṣṭe víśvā bhúvanāni tásya tā́ prá bravīṣi váruṇāya vedhaḥ ǀ
   tvám vṛtrā́ṇi śṛṇviṣe jaghanvā́ntvám vṛtā́m̐ ariṇā indra síndhūn ǁ

   viduṣ ṭe viśvā bhuvanāni tasya tā pra bravīṣi varuṇāya vedhaḥ |
   tvaṃ vṛtrāṇi śṛṇviṣe jaghanvān tvaṃ vṛtāṃ ariṇā indra sindhūn ||

   वि॒दुः । ते॒ । विश्वा॑ । भुव॑नानि । तस्य॑ । ता । प्र । ब्र॒वी॒षि॒ । वरु॑णाय । वे॒धः॒ ।
   त्वम् । वृ॒त्राणि॑ । शृ॒ण्वि॒षे॒ । ज॒घ॒न्वान् । त्वम् । वृ॒तान् । अ॒रि॒णाः॒ । इ॒न्द्र॒ । सिन्धू॑न् ॥

   विदुः । ते । विश्वा । भुवनानि । तस्य । ता । प्र । ब्रवीषि । वरुणाय । वेधः ।
   त्वम् । वृत्राणि । शृण्विषे । जघन्वान् । त्वम् । वृतान् । अरिणाः । इन्द्र । सिन्धून् ॥

   vidúḥ ǀ te ǀ víśvā ǀ bhúvanāni ǀ tásya ǀ tā́ ǀ prá ǀ bravīṣi ǀ váruṇāya ǀ vedhaḥ ǀ
   tvám ǀ vṛtrā́ṇi ǀ śṛṇviṣe ǀ jaghanvā́n ǀ tvám ǀ vṛtā́n ǀ ariṇāḥ ǀ indra ǀ síndhūn ǁ

   viduḥ ǀ te ǀ viśvā ǀ bhuvanāni ǀ tasya ǀ tā ǀ pra ǀ bravīṣi ǀ varuṇāya ǀ vedhaḥ ǀ
   tvam ǀ vṛtrāṇi ǀ śṛṇviṣe ǀ jaghanvān ǀ tvam ǀ vṛtān ǀ ariṇāḥ ǀ indra ǀ sindhūn ǁ

   4.42.7 Aṣṭaka 3.7.18.2Anuvāka 4.4.87Interpretations

8. Ṛk 8

   अ॒स्माक॒मत्र॑ पि॒तर॒स्त आ॑सन्त्स॒प्त ऋष॑यो दौर्ग॒हे ब॒ध्यमा॑ने ।
   त आय॑जंत त्र॒सद॑स्युमस्या॒ इंद्रं॒ न वृ॑त्र॒तुर॑मर्धदे॒वं ॥

   अस्माकम् अत्र पितरस् त आसन् सप्त ऋषयो दौर्गहे बध्यमाने |
   त आयजन्त त्रसदस्युम् अस्या इन्द्रं न वृत्रतुरम् अर्धदेवम् ||

   asmā́kamátra pitárastá āsantsaptá ṛ́ṣayo daurgahé badhyámāne ǀ
   tá ā́yajanta trasádasyumasyā índram ná vṛtratúramardhadevám ǁ

   asmākam atra pitaras ta āsan sapta ṛṣayo daurgahe badhyamāne |
   ta āyajanta trasadasyum asyā indraṃ na vṛtraturam ardhadevam ||

   अ॒स्माक॑म् । अत्र॑ । पि॒तरः॑ । ते । आ॒स॒न् । स॒प्त । ऋष॑यः । दौः॒ऽग॒हे । ब॒ध्यमा॑ने ।
   ते । आ । अ॒य॒ज॒न्त॒ । त्र॒सद॑स्युम् । अ॒स्याः॒ । इन्द्र॑म् । न । वृ॒त्र॒ऽतुर॑म् । अ॒र्ध॒ऽदे॒वम् ॥

   अस्माकम् । अत्र । पितरः । ते । आसन् । सप्त । ऋषयः । दौःऽगहे । बध्यमाने ।
   ते । आ । अयजन्त । त्रसदस्युम् । अस्याः । इन्द्रम् । न । वृत्रऽतुरम् । अर्धऽदेवम् ॥

   asmā́kam ǀ átra ǀ pitáraḥ ǀ té ǀ āsan ǀ saptá ǀ ṛ́ṣayaḥ ǀ dauḥ-gahé ǀ badhyámāne ǀ
   té ǀ ā́ ǀ ayajanta ǀ trasádasyum ǀ asyāḥ ǀ índram ǀ ná ǀ vṛtra-túram ǀ ardha-devám ǁ

   asmākam ǀ atra ǀ pitaraḥ ǀ te ǀ āsan ǀ sapta ǀ ṛṣayaḥ ǀ dauḥ-gahe ǀ badhyamāne ǀ
   te ǀ ā ǀ ayajanta ǀ trasadasyum ǀ asyāḥ ǀ indram ǀ na ǀ vṛtra-turam ǀ ardha-devam ǁ

   4.42.8 Aṣṭaka 3.7.18.3Anuvāka 4.4.88Interpretations

9. Ṛk 9

   पु॒रु॒कुत्सा॑नी॒ हि वा॒मदा॑शद्ध॒व्येभि॑रिंद्रावरुणा॒ नमो॑भिः ।
   अथा॒ राजा॑नं त्र॒सद॑स्युमस्या वृत्र॒हणं॑ ददथुरर्धदे॒वं ॥

   पुरुकुत्सानी हि वाम् अदाशद् धव्येभिर् इन्द्रावरुणा नमोभिः |
   अथा राजानं त्रसदस्युम् अस्या वृत्रहणं ददथुर् अर्धदेवम् ||

   purukútsānī hí vāmádāśaddhavyébhirindrāvaruṇā námobhiḥ ǀ
   áthā rā́jānam trasádasyumasyā vṛtraháṇam dadathurardhadevám ǁ

   purukutsānī hi vām adāśad dhavyebhir indrāvaruṇā namobhiḥ |
   athā rājānaṃ trasadasyum asyā vṛtrahaṇaṃ dadathur ardhadevam ||

   पु॒रु॒ऽकुत्सा॑नी । हि । वा॒म् । अदा॑शत् । ह॒व्येभिः॑ । इ॒न्द्रा॒व॒रु॒णा॒ । नमः॑ऽभिः ।
   अथ॑ । राजा॑नम् । त्र॒सद॑स्युम् । अ॒स्याः॒ । वृ॒त्र॒ऽहन॑म् । द॒द॒थुः॒ । अ॒र्ध॒ऽदे॒वम् ॥

   पुरुऽकुत्सानी । हि । वाम् । अदाशत् । हव्येभिः । इन्द्रावरुणा । नमःऽभिः ।
   अथ । राजानम् । त्रसदस्युम् । अस्याः । वृत्रऽहनम् । ददथुः । अर्धऽदेवम् ॥

   puru-kútsānī ǀ hí ǀ vām ǀ ádāśat ǀ havyébhiḥ ǀ indrāvaruṇā ǀ námaḥ-bhiḥ ǀ
   átha ǀ rā́jānam ǀ trasádasyum ǀ asyāḥ ǀ vṛtra-hánam ǀ dadathuḥ ǀ ardha-devám ǁ

   puru-kutsānī ǀ hi ǀ vām ǀ adāśat ǀ havyebhiḥ ǀ indrāvaruṇā ǀ namaḥ-bhiḥ ǀ
   atha ǀ rājānam ǀ trasadasyum ǀ asyāḥ ǀ vṛtra-hanam ǀ dadathuḥ ǀ ardha-devam ǁ

   4.42.9 Aṣṭaka 3.7.18.4Anuvāka 4.4.89Interpretations

10. Ṛk 10

    रा॒या व॒यं स॑स॒वांसो॑ मदेम ह॒व्येन॑ दे॒वा यव॑सेन॒ गावः॑ ।
    तां धे॒नुमिं॑द्रावरुणा यु॒वं नो॑ वि॒श्वाहा॑ धत्त॒मन॑पस्फुरंतीं ॥

    राया वयं ससवांसो मदेम हव्येन देवा यवसेन गावः |
    तां धेनुम् इन्द्रावरुणा युवं नो विश्वाहा धत्तम् अनपस्फुरन्तीम् ||

    rāyā́ vayám sasavā́ṃso madema havyéna devā́ yávasena gā́vaḥ ǀ
    tā́m dhenúmindrāvaruṇā yuvám no viśvā́hā dhattamánapasphurantīm ǁ

    rāyā vayaṃ sasavāṃso madema havyena devā yavasena gāvaḥ |
    tāṃ dhenum indrāvaruṇā yuvaṃ no viśvāhā dhattam anapasphurantīm ||

    रा॒या । व॒यम् । स॒स॒ऽवांसः॑ । म॒दे॒म॒ । ह॒व्येन॑ । दे॒वाः । यव॑सेन । गावः॑ ।
    ताम् । धे॒नुम् । इ॒न्द्रा॒व॒रु॒णा॒ । यु॒वम् । नः॒ । वि॒श्वाहा॑ । ध॒त्त॒म् । अन॑पऽस्फुरन्तीम् ॥

    राया । वयम् । ससऽवांसः । मदेम । हव्येन । देवाः । यवसेन । गावः ।
    ताम् । धेनुम् । इन्द्रावरुणा । युवम् । नः । विश्वाहा । धत्तम् । अनपऽस्फुरन्तीम् ॥

    rāyā́ ǀ vayám ǀ sasa-vā́ṃsaḥ ǀ madema ǀ havyéna ǀ devā́ḥ ǀ yávasena ǀ gā́vaḥ ǀ
    tā́m ǀ dhenúm ǀ indrāvaruṇā ǀ yuvám ǀ naḥ ǀ viśvā́hā ǀ dhattam ǀ ánapa-sphurantīm ǁ

    rāyā ǀ vayam ǀ sasa-vāṃsaḥ ǀ madema ǀ havyena ǀ devāḥ ǀ yavasena ǀ gāvaḥ ǀ
    tām ǀ dhenum ǀ indrāvaruṇā ǀ yuvam ǀ naḥ ǀ viśvāhā ǀ dhattam ǀ anapa-sphurantīm ǁ

    4.42.10 Aṣṭaka 3.7.18.5Anuvāka 4.4.90Interpretations

Text, recitation and interpretations from the Ṛgveda database of theveda.org.in.