Devatā देवता

1-9: Bṛhaspati; 10, 11: Indra, Bṛhaspati

Ṛṣi ऋषि

Vāmadeva Gautama

Chandas छन्दस्

Triṣṭubh, Jagatī

1. Ṛk 1

   यस्त॒स्तंभ॒ सह॑सा॒ वि ज्मो अंता॒न्बृह॒स्पति॑स्त्रिषध॒स्थो रवे॑ण ।
   तं प्र॒त्नास॒ ऋष॑यो॒ दीध्या॑नाः पु॒रो विप्रा॑ दधिरे मं॒द्रजि॑ह्वं ॥

   यस् तस्तम्भ सहसा वि ज्मो अन्तान् बृहस्पतिस् त्रिषधस्थो रवेण |
   तम् प्रत्नास ऋषयो दीध्यानाः पुरो विप्रा दधिरे मन्द्रजिह्वम् ||

   yástastámbha sáhasā ví jmó ántānbṛ́haspátistriṣadhasthó ráveṇa ǀ
   tám pratnā́sa ṛ́ṣayo dī́dhyānāḥ puró víprā dadhire mandrájihvam ǁ

   yas tastambha sahasā vi jmo antān bṛhaspatis triṣadhastho raveṇa |
   tam pratnāsa ṛṣayo dīdhyānāḥ puro viprā dadhire mandrajihvam ||

   यः । त॒स्तम्भ॑ । सह॑सा । वि । ज्मः । अन्ता॑न् । बृह॒स्पतिः॑ । त्रि॒ऽस॒ध॒स्थः । रवे॑ण ।
   तम् । प्र॒त्नासः॑ । ऋष॑यः । दीध्या॑नाः । पु॒रः । विप्राः॑ । द॒धि॒रे॒ । म॒न्द्रऽजि॑ह्वम् ॥

   यः । तस्तम्भ । सहसा । वि । ज्मः । अन्तान् । बृहस्पतिः । त्रिऽसधस्थः । रवेण ।
   तम् । प्रत्नासः । ऋषयः । दीध्यानाः । पुरः । विप्राः । दधिरे । मन्द्रऽजिह्वम् ॥

   yáḥ ǀ tastámbha ǀ sáhasā ǀ ví ǀ jmáḥ ǀ ántān ǀ bṛ́haspátiḥ ǀ tri-sadhastháḥ ǀ ráveṇa ǀ
   tám ǀ pratnā́saḥ ǀ ṛ́ṣayaḥ ǀ dī́dhyānāḥ ǀ puráḥ ǀ víprāḥ ǀ dadhire ǀ mandrá-jihvam ǁ

   yaḥ ǀ tastambha ǀ sahasā ǀ vi ǀ jmaḥ ǀ antān ǀ bṛhaspatiḥ ǀ tri-sadhasthaḥ ǀ raveṇa ǀ
   tam ǀ pratnāsaḥ ǀ ṛṣayaḥ ǀ dīdhyānāḥ ǀ puraḥ ǀ viprāḥ ǀ dadhire ǀ mandra-jihvam ǁ

   4.50.1 Aṣṭaka 3.7.26.1Anuvāka 4.5.23Interpretations

2. Ṛk 2

   धु॒नेत॑यः सुप्रके॒तं मदं॑तो॒ बृह॑स्पते अ॒भि ये न॑स्तत॒स्रे ।
   पृषं॑तं सृ॒प्रमद॑ब्धमू॒र्वं बृह॑स्पते॒ रक्ष॑तादस्य॒ योनिं॑ ॥

   धुनेतयः सुप्रकेतम् मदन्तो बृहस्पते अभि ये नस् ततस्रे |
   पृषन्तं सृप्रम् अदब्धम् ऊर्वम् बृहस्पते रक्षताद् अस्य योनिम् ||

   dhunétayaḥ supraketám mádanto bṛ́haspate abhí yé nastatasré ǀ
   pṛ́ṣantam sṛprámádabdhamūrvám bṛ́haspate rákṣatādasya yónim ǁ

   dhunetayaḥ supraketam madanto bṛhaspate abhi ye nas tatasre |
   pṛṣantaṃ sṛpram adabdham ūrvam bṛhaspate rakṣatād asya yonim ||

   धु॒नऽइ॑तयः । सु॒ऽप्र॒के॒तम् । मद॑न्तः । बृह॑स्पते । अ॒भि । ये । नः॒ । त॒त॒स्रे ।
   पृष॑न्तम् । सृ॒प्रम् । अद॑ब्धम् । ऊ॒र्वम् । बृह॑स्पते । रक्ष॑तात् । अ॒स्य॒ । योनि॑म् ॥

   धुनऽइतयः । सुऽप्रकेतम् । मदन्तः । बृहस्पते । अभि । ये । नः । ततस्रे ।
   पृषन्तम् । सृप्रम् । अदब्धम् । ऊर्वम् । बृहस्पते । रक्षतात् । अस्य । योनिम् ॥

   dhuná-itayaḥ ǀ su-praketám ǀ mádantaḥ ǀ bṛ́haspate ǀ abhí ǀ yé ǀ naḥ ǀ tatasré ǀ
   pṛ́ṣantam ǀ sṛprám ǀ ádabdham ǀ ūrvám ǀ bṛ́haspate ǀ rákṣatāt ǀ asya ǀ yónim ǁ

   dhuna-itayaḥ ǀ su-praketam ǀ madantaḥ ǀ bṛhaspate ǀ abhi ǀ ye ǀ naḥ ǀ tatasre ǀ
   pṛṣantam ǀ sṛpram ǀ adabdham ǀ ūrvam ǀ bṛhaspate ǀ rakṣatāt ǀ asya ǀ yonim ǁ

   4.50.2 Aṣṭaka 3.7.26.2Anuvāka 4.5.24Interpretations

3. Ṛk 3

   बृह॑स्पते॒ या प॑र॒मा प॑रा॒वदत॒ आ त॑ ऋत॒स्पृशो॒ नि षे॑दुः ।
   तुभ्यं॑ खा॒ता अ॑व॒ता अद्रि॑दुग्धा॒ मध्वः॑ श्चोतंत्य॒भितो॑ विर॒प्शं ॥

   बृहस्पते या परमा परावद् अत आ त ऋतस्पृशो नि षेदुः |
   तुभ्यं खाता अवता अद्रिदुग्धा मध्व श्चोतन्त्य् अभितो विरप्शम् ||

   bṛ́haspate yā́ paramā́ parāvádáta ā́ ta ṛtaspṛ́śo ní ṣeduḥ ǀ
   túbhyam khātā́ avatā́ ádridugdhā mádhvaḥ ścotantyabhíto virapśám ǁ

   bṛhaspate yā paramā parāvad ata ā ta ṛtaspṛśo ni ṣeduḥ |
   tubhyaṃ khātā avatā adridugdhā madhva ścotanty abhito virapśam ||

   बृह॑स्पते । या । प॒र॒मा । प॒रा॒ऽवत् । अतः॑ । आ । ते॒ । ऋ॒त॒ऽस्पृशः॑ । नि । से॒दुः॒ ।
   तुभ्य॑म् । खा॒ताः । अ॒व॒ताः । अद्रि॑ऽदुग्धाः । मध्वः॑ । श्चो॒त॒न्ति॒ । अ॒भितः॑ । वि॒ऽर॒प्शम् ॥

   बृहस्पते । या । परमा । पराऽवत् । अतः । आ । ते । ऋतऽस्पृशः । नि । सेदुः ।
   तुभ्यम् । खाताः । अवताः । अद्रिऽदुग्धाः । मध्वः । श्चोतन्ति । अभितः । विऽरप्शम् ॥

   bṛ́haspate ǀ yā́ ǀ paramā́ ǀ parā-vát ǀ átaḥ ǀ ā́ ǀ te ǀ ṛta-spṛ́śaḥ ǀ ní ǀ seduḥ ǀ
   túbhyam ǀ khātā́ḥ ǀ avatā́ḥ ǀ ádri-dugdhāḥ ǀ mádhvaḥ ǀ ścotanti ǀ abhítaḥ ǀ vi-rapśám ǁ

   bṛhaspate ǀ yā ǀ paramā ǀ parā-vat ǀ ataḥ ǀ ā ǀ te ǀ ṛta-spṛśaḥ ǀ ni ǀ seduḥ ǀ
   tubhyam ǀ khātāḥ ǀ avatāḥ ǀ adri-dugdhāḥ ǀ madhvaḥ ǀ ścotanti ǀ abhitaḥ ǀ vi-rapśam ǁ

   4.50.3 Aṣṭaka 3.7.26.3Anuvāka 4.5.25Interpretations

4. Ṛk 4

   बृह॒स्पतिः॑ प्रथ॒मं जाय॑मानो म॒हो ज्योति॑षः पर॒मे व्यो॑मन् ।
   स॒प्तास्य॑स्तुविजा॒तो रवे॑ण॒ वि स॒प्तर॑श्मिरधम॒त्तमां॑सि ॥

   बृहस्पतिः प्रथमं जायमानो महो ज्योतिषः परमे व्योमन् |
   सप्तास्यस् तुविजातो रवेण वि सप्तरश्मिर् अधमत् तमांसि ||

   bṛ́haspátiḥ prathamám jā́yamāno mahó jyótiṣaḥ paramé vyóman ǀ
   saptā́syastuvijātó ráveṇa ví saptáraśmiradhamattámāṃsi ǁ

   bṛhaspatiḥ prathamaṃ jāyamāno maho jyotiṣaḥ parame vyoman |
   saptāsyas tuvijāto raveṇa vi saptaraśmir adhamat tamāṃsi ||

   बृह॒स्पतिः॑ । प्र॒थ॒मम् । जाय॑मानः । म॒हः । ज्योति॑षः । प॒र॒मे । विऽओ॑मन् ।
   स॒प्तऽआ॑स्यः । तु॒वि॒ऽजा॒तः । रवे॑ण । वि । स॒प्तऽर॑श्मिः । अ॒ध॒म॒त् । तमां॑सि ॥

   बृहस्पतिः । प्रथमम् । जायमानः । महः । ज्योतिषः । परमे । विऽओमन् ।
   सप्तऽआस्यः । तुविऽजातः । रवेण । वि । सप्तऽरश्मिः । अधमत् । तमांसि ॥

   bṛ́haspátiḥ ǀ prathamám ǀ jā́yamānaḥ ǀ maháḥ ǀ jyótiṣaḥ ǀ paramé ǀ ví-oman ǀ
   saptá-āsyaḥ ǀ tuvi-jātáḥ ǀ ráveṇa ǀ ví ǀ saptá-raśmiḥ ǀ adhamat ǀ támāṃsi ǁ

   bṛhaspatiḥ ǀ prathamam ǀ jāyamānaḥ ǀ mahaḥ ǀ jyotiṣaḥ ǀ parame ǀ vi-oman ǀ
   sapta-āsyaḥ ǀ tuvi-jātaḥ ǀ raveṇa ǀ vi ǀ sapta-raśmiḥ ǀ adhamat ǀ tamāṃsi ǁ

   4.50.4 Aṣṭaka 3.7.26.4Anuvāka 4.5.26Interpretations

5. Ṛk 5

   स सु॒ष्टुभा॒ स ऋक्व॑ता ग॒णेन॑ व॒लं रु॑रोज फलि॒गं रवे॑ण ।
   बृह॒स्पति॑रु॒स्रिया॑ हव्य॒सूदः॒ कनि॑क्रद॒द्वाव॑शती॒रुदा॑जत् ॥

   स सुष्टुभा स ऋक्वता गणेन वलं रुरोज फलिगं रवेण |
   बृहस्पतिर् उस्रिया हव्यसूदः कनिक्रदद् वावशतीर् उद् आजत् ||

   sá suṣṭúbhā sá ṛ́kvatā gaṇéna valám ruroja phaligám ráveṇa ǀ
   bṛ́haspátirusríyā havyasū́daḥ kánikradadvā́vaśatīrúdājat ǁ

   sa suṣṭubhā sa ṛkvatā gaṇena valaṃ ruroja phaligaṃ raveṇa |
   bṛhaspatir usriyā havyasūdaḥ kanikradad vāvaśatīr ud ājat ||

   सः । सु॒ऽस्तुभा॑ । सः । ऋक्व॑ता । ग॒णेन॑ । व॒लम् । रु॒रो॒ज॒ । फ॒लि॒ऽगम् । रवे॑ण ।
   बृह॒स्पतिः॑ । उ॒स्रियाः॑ । ह॒व्य॒ऽसूदः॑ । कनि॑क्रदत् । वाव॑शतीः । उत् । आ॒ज॒त् ॥

   सः । सुऽस्तुभा । सः । ऋक्वता । गणेन । वलम् । रुरोज । फलिऽगम् । रवेण ।
   बृहस्पतिः । उस्रियाः । हव्यऽसूदः । कनिक्रदत् । वावशतीः । उत् । आजत् ॥

   sáḥ ǀ su-stúbhā ǀ sáḥ ǀ ṛ́kvatā ǀ gaṇéna ǀ valám ǀ ruroja ǀ phali-gám ǀ ráveṇa ǀ
   bṛ́haspátiḥ ǀ usríyāḥ ǀ havya-sū́daḥ ǀ kánikradat ǀ vā́vaśatīḥ ǀ út ǀ ājat ǁ

   saḥ ǀ su-stubhā ǀ saḥ ǀ ṛkvatā ǀ gaṇena ǀ valam ǀ ruroja ǀ phali-gam ǀ raveṇa ǀ
   bṛhaspatiḥ ǀ usriyāḥ ǀ havya-sūdaḥ ǀ kanikradat ǀ vāvaśatīḥ ǀ ut ǀ ājat ǁ

   4.50.5 Aṣṭaka 3.7.26.5Anuvāka 4.5.27Interpretations

6. Ṛk 6

   ए॒वा पि॒त्रे वि॒श्वदे॑वाय॒ वृष्णे॑ य॒ज्ञैर्वि॑धेम॒ नम॑सा ह॒विर्भिः॑ ।
   बृह॑स्पते सुप्र॒जा वी॒रवं॑तो व॒यं स्या॑म॒ पत॑यो रयी॒णां ॥

   एवा पित्रे विश्वदेवाय वृष्णे यज्ञैर् विधेम नमसा हविर्भिः |
   बृहस्पते सुप्रजा वीरवन्तो वयं स्याम पतयो रयीणाम् ||

   evā́ pitré viśvádevāya vṛ́ṣṇe yajñáirvidhema námasā havírbhiḥ ǀ
   bṛ́haspate suprajā́ vīrávanto vayám syāma pátayo rayīṇā́m ǁ

   evā pitre viśvadevāya vṛṣṇe yajñair vidhema namasā havirbhiḥ |
   bṛhaspate suprajā vīravanto vayaṃ syāma patayo rayīṇām ||

   ए॒व । पि॒त्रे । वि॒श्वऽदे॑वाय । वृष्णे॑ । य॒ज्ञैः । वि॒धे॒म॒ । नम॑सा । ह॒विःऽभिः॑ ।
   बृह॑स्पते । सु॒ऽप्र॒जाः । वी॒रऽव॑न्तः । व॒यम् । स्या॒म॒ । पत॑यः । र॒यी॒णाम् ॥

   एव । पित्रे । विश्वऽदेवाय । वृष्णे । यज्ञैः । विधेम । नमसा । हविःऽभिः ।
   बृहस्पते । सुऽप्रजाः । वीरऽवन्तः । वयम् । स्याम । पतयः । रयीणाम् ॥

   evá ǀ pitré ǀ viśvá-devāya ǀ vṛ́ṣṇe ǀ yajñáiḥ ǀ vidhema ǀ námasā ǀ havíḥ-bhiḥ ǀ
   bṛ́haspate ǀ su-prajā́ḥ ǀ vīrá-vantaḥ ǀ vayám ǀ syāma ǀ pátayaḥ ǀ rayīṇā́m ǁ

   eva ǀ pitre ǀ viśva-devāya ǀ vṛṣṇe ǀ yajñaiḥ ǀ vidhema ǀ namasā ǀ haviḥ-bhiḥ ǀ
   bṛhaspate ǀ su-prajāḥ ǀ vīra-vantaḥ ǀ vayam ǀ syāma ǀ patayaḥ ǀ rayīṇām ǁ

   4.50.6 Aṣṭaka 3.7.27.1Anuvāka 4.5.28Interpretations

7. Ṛk 7

   स इद्राजा॒ प्रति॑जन्यानि॒ विश्वा॒ शुष्मे॑ण तस्थाव॒भि वी॒र्ये॑ण ।
   बृह॒स्पतिं॒ यः सुभृ॑तं बि॒भर्ति॑ वल्गू॒यति॒ वंद॑ते पूर्व॒भाजं॑ ॥

   स इद् राजा प्रतिजन्यानि विश्वा शुष्मेण तस्थाव् अभि वीर्येण |
   बृहस्पतिं यः सुभृतम् बिभर्ति वल्गूयति वन्दते पूर्वभाजम् ||

   sá ídrā́jā prátijanyāni víśvā śúṣmeṇa tasthāvabhí vīryéṇa ǀ
   bṛ́haspátim yáḥ súbhṛtam bibhárti valgūyáti vándate pūrvabhā́jam ǁ

   sa id rājā pratijanyāni viśvā śuṣmeṇa tasthāv abhi vīryeṇa |
   bṛhaspatiṃ yaḥ subhṛtam bibharti valgūyati vandate pūrvabhājam ||

   सः । इत् । राजा॑ । प्रति॑ऽजन्यानि । विश्वा॑ । शुष्मे॑ण । त॒स्थौ॒ । अ॒भि । वी॒र्ये॑ण ।
   बृह॒स्पति॑म् । यः । सुऽभृ॑तम् । बि॒भर्ति॑ । व॒ल्गु॒ऽयति॑ । वन्द॑ते । पू॒र्व॒ऽभाज॑म् ॥

   सः । इत् । राजा । प्रतिऽजन्यानि । विश्वा । शुष्मेण । तस्थौ । अभि । वीर्येण ।
   बृहस्पतिम् । यः । सुऽभृतम् । बिभर्ति । वल्गुऽयति । वन्दते । पूर्वऽभाजम् ॥

   sáḥ ǀ ít ǀ rā́jā ǀ práti-janyāni ǀ víśvā ǀ śúṣmeṇa ǀ tasthau ǀ abhí ǀ vīryéṇa ǀ
   bṛ́haspátim ǀ yáḥ ǀ sú-bhṛtam ǀ bibhárti ǀ valgu-yáti ǀ vándate ǀ pūrva-bhā́jam ǁ

   saḥ ǀ it ǀ rājā ǀ prati-janyāni ǀ viśvā ǀ śuṣmeṇa ǀ tasthau ǀ abhi ǀ vīryeṇa ǀ
   bṛhaspatim ǀ yaḥ ǀ su-bhṛtam ǀ bibharti ǀ valgu-yati ǀ vandate ǀ pūrva-bhājam ǁ

   4.50.7 Aṣṭaka 3.7.27.2Anuvāka 4.5.29Interpretations

8. Ṛk 8

   स इत्क्षे॑ति॒ सुधि॑त॒ ओक॑सि॒ स्वे तस्मा॒ इळा॑ पिन्वते विश्व॒दानीं॑ ।
   तस्मै॒ विशः॑ स्व॒यमे॒वा न॑मंते॒ यस्मि॑न्ब्र॒ह्मा राज॑नि॒ पूर्व॒ एति॑ ॥

   स इत् क्षेति सुधित ओकसि स्वे तस्मा इऌआ पिन्वते विश्वदानीम् |
   तस्मै विशः स्वयम् एवा नमन्ते यस्मिन् ब्रह्मा राजनि पूर्व एति ||

   sá ítkṣeti súdhita ókasi své tásmā íḷā pinvate viśvadā́nīm ǀ
   tásmai víśaḥ svayámevā́ namante yásminbrahmā́ rā́jani pū́rva éti ǁ

   sa it kṣeti sudhita okasi sve tasmā iḷā pinvate viśvadānīm |
   tasmai viśaḥ svayam evā namante yasmin brahmā rājani pūrva eti ||

   सः । इत् । क्षे॒ति॒ । सुऽधि॑तः । ओक॑सि । स्वे । तस्मै॑ । इळा॑ । पि॒न्व॒ते॒ । वि॒श्व॒ऽदानी॑म् ।
   तस्मै॑ । विशः॑ । स्व॒यम् । ए॒व । न॒म॒न्ते॒ । यस्मि॑न् । ब्र॒ह्मा । राज॑नि । पूर्वः॑ । एति॑ ॥

   सः । इत् । क्षेति । सुऽधितः । ओकसि । स्वे । तस्मै । इळा । पिन्वते । विश्वऽदानीम् ।
   तस्मै । विशः । स्वयम् । एव । नमन्ते । यस्मिन् । ब्रह्मा । राजनि । पूर्वः । एति ॥

   sáḥ ǀ ít ǀ kṣeti ǀ sú-dhitaḥ ǀ ókasi ǀ své ǀ tásmai ǀ íḷā ǀ pinvate ǀ viśva-dā́nīm ǀ
   tásmai ǀ víśaḥ ǀ svayám ǀ evá ǀ namante ǀ yásmin ǀ brahmā́ ǀ rā́jani ǀ pū́rvaḥ ǀ éti ǁ

   saḥ ǀ it ǀ kṣeti ǀ su-dhitaḥ ǀ okasi ǀ sve ǀ tasmai ǀ iḷā ǀ pinvate ǀ viśva-dānīm ǀ
   tasmai ǀ viśaḥ ǀ svayam ǀ eva ǀ namante ǀ yasmin ǀ brahmā ǀ rājani ǀ pūrvaḥ ǀ eti ǁ

   4.50.8 Aṣṭaka 3.7.27.3Anuvāka 4.5.30Interpretations

9. Ṛk 9

   अप्र॑तीतो जयति॒ सं धना॑नि॒ प्रति॑जन्यान्यु॒त या सज॑न्या ।
   अ॒व॒स्यवे॒ यो वरि॑वः कृ॒णोति॑ ब्र॒ह्मणे॒ राजा॒ तम॑वंति दे॒वाः ॥

   अप्रतीतो जयति सं धनानि प्रतिजन्यान्य् उत या सजन्या |
   अवस्यवे यो वरिवः कृणोति ब्रह्मणे राजा तम् अवन्ति देवाः ||

   ápratīto jayati sám dhánāni prátijanyānyutá yā́ sájanyā ǀ
   avasyáve yó várivaḥ kṛṇóti brahmáṇe rā́jā támavanti devā́ḥ ǁ

   apratīto jayati saṃ dhanāni pratijanyāny uta yā sajanyā |
   avasyave yo varivaḥ kṛṇoti brahmaṇe rājā tam avanti devāḥ ||

   अप्र॑तिऽइतः । ज॒य॒ति॒ । सम् । धना॑नि । प्रति॑ऽजन्यानि । उ॒त । या । सऽज॑न्या ।
   अ॒व॒स्यवे॑ । यः । वरि॑वः । कृ॒णोति॑ । ब्र॒ह्मणे॑ । राजा॑ । तम् । अ॒व॒न्ति॒ । दे॒वाः ॥

   अप्रतिऽइतः । जयति । सम् । धनानि । प्रतिऽजन्यानि । उत । या । सऽजन्या ।
   अवस्यवे । यः । वरिवः । कृणोति । ब्रह्मणे । राजा । तम् । अवन्ति । देवाः ॥

   áprati-itaḥ ǀ jayati ǀ sám ǀ dhánāni ǀ práti-janyāni ǀ utá ǀ yā́ ǀ sá-janyā ǀ
   avasyáve ǀ yáḥ ǀ várivaḥ ǀ kṛṇóti ǀ brahmáṇe ǀ rā́jā ǀ tám ǀ avanti ǀ devā́ḥ ǁ

   aprati-itaḥ ǀ jayati ǀ sam ǀ dhanāni ǀ prati-janyāni ǀ uta ǀ yā ǀ sa-janyā ǀ
   avasyave ǀ yaḥ ǀ varivaḥ ǀ kṛṇoti ǀ brahmaṇe ǀ rājā ǀ tam ǀ avanti ǀ devāḥ ǁ

   4.50.9 Aṣṭaka 3.7.27.4Anuvāka 4.5.31Interpretations

10. Ṛk 10

    इंद्र॑श्च॒ सोमं॑ पिबतं बृहस्पते॒ऽस्मिन्य॒ज्ञे मं॑दसा॒ना वृ॑षण्वसू ।
    आ वां॑ विशं॒त्विंद॑वः स्वा॒भुवो॒ऽस्मे र॒यिं सर्व॑वीरं॒ नि य॑च्छतं ॥

    इन्द्रश् च सोमम् पिबतम् बृहस्पते ऽस्मिन् यज्ञे मन्दसाना वृषण्वसू |
    आ वां विशन्त्व् इन्दवः स्वाभुवो ऽस्मे रयिं सर्ववीरं नि यच्छतम् ||

    índraśca sómam pibatam bṛhaspate’smínyajñé mandasānā́ vṛṣaṇvasū ǀ
    ā́ vām viśantvíndavaḥ svābhúvo’smé rayím sárvavīram ní yacchatam ǁ

    indraś ca somam pibatam bṛhaspate 'smin yajñe mandasānā vṛṣaṇvasū |
    ā vāṃ viśantv indavaḥ svābhuvo 'sme rayiṃ sarvavīraṃ ni yacchatam ||

    इन्द्रः॑ । च॒ । सोम॑म् । पि॒ब॒त॒म् । बृ॒ह॒स्प॒ते॒ । अ॒स्मिन् । य॒ज्ञे । म॒न्द॒सा॒ना । वृ॒ष॒ण्व॒सू॒ इति॑ वृषण्ऽवसू ।
    आ । वा॒म् । वि॒श॒न्तु॒ । इन्द॑वः । सु॒ऽआ॒भुवः॑ । अ॒स्मे इति॑ । र॒यिम् । सर्व॑ऽवीरम् । नि । य॒च्छ॒त॒म् ॥

    इन्द्रः । च । सोमम् । पिबतम् । बृहस्पते । अस्मिन् । यज्ञे । मन्दसाना । वृषण्वसू इति वृषण्ऽवसू ।
    आ । वाम् । विशन्तु । इन्दवः । सुऽआभुवः । अस्मे इति । रयिम् । सर्वऽवीरम् । नि । यच्छतम् ॥

    índraḥ ǀ ca ǀ sómam ǀ pibatam ǀ bṛhaspate ǀ asmín ǀ yajñé ǀ mandasānā́ ǀ vṛṣaṇvasū íti vṛṣaṇ-vasū ǀ
    ā́ ǀ vām ǀ viśantu ǀ índavaḥ ǀ su-ābhúvaḥ ǀ asmé íti ǀ rayím ǀ sárva-vīram ǀ ní ǀ yacchatam ǁ

    indraḥ ǀ ca ǀ somam ǀ pibatam ǀ bṛhaspate ǀ asmin ǀ yajñe ǀ mandasānā ǀ vṛṣaṇvasū iti vṛṣaṇ-vasū ǀ
    ā ǀ vām ǀ viśantu ǀ indavaḥ ǀ su-ābhuvaḥ ǀ asme iti ǀ rayim ǀ sarva-vīram ǀ ni ǀ yacchatam ǁ

    4.50.10 Aṣṭaka 3.7.27.5Anuvāka 4.5.32Interpretations

11. Ṛk 11

    बृह॑स्पत इंद्र॒ वर्ध॑तं नः॒ सचा॒ सा वां॑ सुम॒तिर्भू॑त्व॒स्मे ।
    अ॒वि॒ष्टं धियो॑ जिगृ॒तं पुरं॑धीर्जज॒स्तम॒र्यो व॒नुषा॒मरा॑तीः ॥

    बृहस्पत इन्द्र वर्धतं नः सचा सा वां सुमतिर् भूत्व् अस्मे |
    अविष्टं धियो जिगृतम् पुरन्धीर् जजस्तम् अर्यो वनुषाम् अरातीः ||

    bṛ́haspata indra várdhatam naḥ sácā sā́ vām sumatírbhūtvasmé ǀ
    aviṣṭám dhíyo jigṛtám púraṃdhīrjajastámaryó vanúṣāmárātīḥ ǁ

    bṛhaspata indra vardhataṃ naḥ sacā sā vāṃ sumatir bhūtv asme |
    aviṣṭaṃ dhiyo jigṛtam purandhīr jajastam aryo vanuṣām arātīḥ ||

    बृह॑स्पते । इ॒न्द्र॒ । वर्ध॑तम् । नः॒ । सचा॑ । सा । वा॒म् । सु॒ऽम॒तिः । भू॒तु॒ । अ॒स्मे इति॑ ।
    अ॒वि॒ष्टम् । धियः॑ । जि॒गृ॒तम् । पुर॑म्ऽधीः । ज॒ज॒स्तम् । अ॒र्यः । व॒नुषा॑म् । अरा॑तीः ॥

    बृहस्पते । इन्द्र । वर्धतम् । नः । सचा । सा । वाम् । सुऽमतिः । भूतु । अस्मे इति ।
    अविष्टम् । धियः । जिगृतम् । पुरम्ऽधीः । जजस्तम् । अर्यः । वनुषाम् । अरातीः ॥

    bṛ́haspate ǀ indra ǀ várdhatam ǀ naḥ ǀ sácā ǀ sā́ ǀ vām ǀ su-matíḥ ǀ bhūtu ǀ asmé íti ǀ
    aviṣṭám ǀ dhíyaḥ ǀ jigṛtám ǀ púram-dhīḥ ǀ jajastám ǀ aryáḥ ǀ vanúṣām ǀ árātīḥ ǁ

    bṛhaspate ǀ indra ǀ vardhatam ǀ naḥ ǀ sacā ǀ sā ǀ vām ǀ su-matiḥ ǀ bhūtu ǀ asme iti ǀ
    aviṣṭam ǀ dhiyaḥ ǀ jigṛtam ǀ puram-dhīḥ ǀ jajastam ǀ aryaḥ ǀ vanuṣām ǀ arātīḥ ǁ

    4.50.11 Aṣṭaka 3.7.27.6Anuvāka 4.5.33Interpretations

Text, recitation and interpretations from the Ṛgveda database of theveda.org.in.