Devatā देवता

Indra

Ṛṣi ऋषि

Vāmadeva Gautama

Chandas छन्दस्

Triṣṭubh

1. Ṛk 1

   आ या॒त्विंद्रोऽव॑स॒ उप॑ न इ॒ह स्तु॒तः स॑ध॒माद॑स्तु॒ शूरः॑ ।
   वा॒वृ॒धा॒नस्तवि॑षी॒र्यस्य॑ पू॒र्वीर्द्यौर्न क्ष॒त्रम॒भिभू॑ति॒ पुष्या॑त् ॥

   आ यात्व् इन्द्रो ऽवस उप न इह स्तुतः सधमाद् अस्तु शूरः |
   वावृधानस् तविषीर् यस्य पूर्वीर् द्यौर् न क्षत्रम् अभिभूति पुष्यात् ||

   ā́ yātvíndró’vasa úpa na ihá stutáḥ sadhamā́dastu śū́raḥ ǀ
   vāvṛdhānástáviṣīryásya pūrvī́rdyáurná kṣatrámabhíbhūti púṣyāt ǁ

   ā yātv indro 'vasa upa na iha stutaḥ sadhamād astu śūraḥ |
   vāvṛdhānas taviṣīr yasya pūrvīr dyaur na kṣatram abhibhūti puṣyāt ||

   आ । या॒तु॒ । इन्द्रः॑ । अव॑से । उप॑ । नः॒ । इ॒ह । स्तु॒तः । स॒ध॒ऽमात् । अ॒स्तु॒ । शूरः॑ ।
   व॒वृ॒धा॒नः । तवि॑षीः । यस्य॑ । पू॒र्वीः । द्यौः । न । क्ष॒त्रम् । अ॒भिऽभू॑ति । पुष्या॑त् ॥

   आ । यातु । इन्द्रः । अवसे । उप । नः । इह । स्तुतः । सधऽमात् । अस्तु । शूरः ।
   ववृधानः । तविषीः । यस्य । पूर्वीः । द्यौः । न । क्षत्रम् । अभिऽभूति । पुष्यात् ॥

   ā́ ǀ yātu ǀ índraḥ ǀ ávase ǀ úpa ǀ naḥ ǀ ihá ǀ stutáḥ ǀ sadha-mā́t ǀ astu ǀ śū́raḥ ǀ
   vavṛdhānáḥ ǀ táviṣīḥ ǀ yásya ǀ pūrvī́ḥ ǀ dyáuḥ ǀ ná ǀ kṣatrám ǀ abhí-bhūti ǀ púṣyāt ǁ

   ā ǀ yātu ǀ indraḥ ǀ avase ǀ upa ǀ naḥ ǀ iha ǀ stutaḥ ǀ sadha-māt ǀ astu ǀ śūraḥ ǀ
   vavṛdhānaḥ ǀ taviṣīḥ ǀ yasya ǀ pūrvīḥ ǀ dyauḥ ǀ na ǀ kṣatram ǀ abhi-bhūti ǀ puṣyāt ǁ

   4.21.1 Aṣṭaka 3.6.5.1Anuvāka 4.2.110Interpretations

2. Ṛk 2

   तस्येदि॒ह स्त॑वथ॒ वृष्ण्या॑नि तुविद्यु॒म्नस्य॑ तुवि॒राध॑सो॒ नॄन् ।
   यस्य॒ क्रतु॑र्विद॒थ्यो॒३॒॑ न स॒म्राट् सा॒ह्वाँ तरु॑त्रो अ॒भ्यस्ति॑ कृ॒ष्टीः ॥

   तस्येद् इह स्तवथ वृष्ण्यानि तुविद्युम्नस्य तुविराधसो नॄन् |
   यस्य क्रतुर् विदथ्यो न सम्राट् साह्वान् तरुत्रो अभ्य् अस्ति कृष्टीः ||

   tásyédihá stavatha vṛ́ṣṇyāni tuvidyumnásya tuvirā́dhaso nṝ́n ǀ
   yásya kráturvidathyó ná samrā́ṭ sāhvā́m̐ tárutro abhyásti kṛṣṭī́ḥ ǁ

   tasyed iha stavatha vṛṣṇyāni tuvidyumnasya tuvirādhaso nṝn |
   yasya kratur vidathyo na samrāṭ sāhvān tarutro abhy asti kṛṣṭīḥ ||

   तस्य॑ । इत् । इ॒ह । स्त॒व॒थ॒ । वृष्ण्या॑नि । तु॒वि॒ऽद्यु॒म्नस्य॑ । तु॒वि॒ऽराध॑सः । नॄन् ।
   यस्य॑ । क्रतुः॑ । वि॒द॒थ्यः॑ । न । स॒म्ऽराट् । स॒ह्वान् । तरु॑त्रः । अ॒भि । अस्ति॑ । कृ॒ष्टीः ॥

   तस्य । इत् । इह । स्तवथ । वृष्ण्यानि । तुविऽद्युम्नस्य । तुविऽराधसः । नॄन् ।
   यस्य । क्रतुः । विदथ्यः । न । सम्ऽराट् । सह्वान् । तरुत्रः । अभि । अस्ति । कृष्टीः ॥

   tásya ǀ ít ǀ ihá ǀ stavatha ǀ vṛ́ṣṇyāni ǀ tuvi-dyumnásya ǀ tuvi-rā́dhasaḥ ǀ nṝ́n ǀ
   yásya ǀ krátuḥ ǀ vidathyáḥ ǀ ná ǀ sam-rā́ṭ ǀ sahvā́n ǀ tárutraḥ ǀ abhí ǀ ásti ǀ kṛṣṭī́ḥ ǁ

   tasya ǀ it ǀ iha ǀ stavatha ǀ vṛṣṇyāni ǀ tuvi-dyumnasya ǀ tuvi-rādhasaḥ ǀ nṝn ǀ
   yasya ǀ kratuḥ ǀ vidathyaḥ ǀ na ǀ sam-rāṭ ǀ sahvān ǀ tarutraḥ ǀ abhi ǀ asti ǀ kṛṣṭīḥ ǁ

   4.21.2 Aṣṭaka 3.6.5.2Anuvāka 4.2.111Interpretations

3. Ṛk 3

   आ या॒त्विंद्रो॑ दि॒व आ पृ॑थि॒व्या म॒क्षू स॑मु॒द्रादु॒त वा॒ पुरी॑षात् ।
   स्व॑र्णरा॒दव॑से नो म॒रुत्वा॑न्परा॒वतो॑ वा॒ सद॑नादृ॒तस्य॑ ॥

   आ यात्व् इन्द्रो दिव आ पृथिव्या मक्षू समुद्राद् उत वा पुरीषात् |
   स्वर्णराद् अवसे नो मरुत्वान् परावतो वा सदनाद् ऋतस्य ||

   ā́ yātvíndro divá ā́ pṛthivyā́ makṣū́ samudrā́dutá vā púrīṣāt ǀ
   svárṇarādávase no marútvānparāváto vā sádanādṛtásya ǁ

   ā yātv indro diva ā pṛthivyā makṣū samudrād uta vā purīṣāt |
   svarṇarād avase no marutvān parāvato vā sadanād ṛtasya ||

   आ । या॒तु॒ । इन्द्रः॑ । दि॒वः । आ । पृ॒थि॒व्याः । म॒क्षु । स॒मु॒द्रात् । उ॒त । वा॒ । पुरी॑षात् ।
   स्वः॑ऽनरात् । अव॑से । नः॒ । म॒रुत्वा॑न् । प॒रा॒ऽवतः॑ । वा॒ । सद॑नात् । ऋ॒तस्य॑ ॥

   आ । यातु । इन्द्रः । दिवः । आ । पृथिव्याः । मक्षु । समुद्रात् । उत । वा । पुरीषात् ।
   स्वःऽनरात् । अवसे । नः । मरुत्वान् । पराऽवतः । वा । सदनात् । ऋतस्य ॥

   ā́ ǀ yātu ǀ índraḥ ǀ diváḥ ǀ ā́ ǀ pṛthivyā́ḥ ǀ makṣú ǀ samudrā́t ǀ utá ǀ vā ǀ púrīṣāt ǀ
   sváḥ-narāt ǀ ávase ǀ naḥ ǀ marútvān ǀ parā-vátaḥ ǀ vā ǀ sádanāt ǀ ṛtásya ǁ

   ā ǀ yātu ǀ indraḥ ǀ divaḥ ǀ ā ǀ pṛthivyāḥ ǀ makṣu ǀ samudrāt ǀ uta ǀ vā ǀ purīṣāt ǀ
   svaḥ-narāt ǀ avase ǀ naḥ ǀ marutvān ǀ parā-vataḥ ǀ vā ǀ sadanāt ǀ ṛtasya ǁ

   4.21.3 Aṣṭaka 3.6.5.3Anuvāka 4.2.112Interpretations

4. Ṛk 4

   स्थू॒रस्य॑ रा॒यो बृ॑ह॒तो य ईशे॒ तमु॑ ष्टवाम वि॒दथे॒ष्विंद्रं॑ ।
   यो वा॒युना॒ जय॑ति॒ गोम॑तीषु॒ प्र धृ॑ष्णु॒या नय॑ति॒ वस्यो॒ अच्छ॑ ॥

   स्थूरस्य रायो बृहतो य ईशे तम् उ ष्टवाम विदथेष्व् इन्द्रम् |
   यो वायुना जयति गोमतीषु प्र धृष्णुया नयति वस्यो अच्छ ||

   sthūrásya rāyó bṛható yá ī́śe támu ṣṭavāma vidátheṣvíndram ǀ
   yó vāyúnā jáyati gómatīṣu prá dhṛṣṇuyā́ náyati vásyo áccha ǁ

   sthūrasya rāyo bṛhato ya īśe tam u ṣṭavāma vidatheṣv indram |
   yo vāyunā jayati gomatīṣu pra dhṛṣṇuyā nayati vasyo accha ||

   स्थू॒रस्य॑ । रा॒यः । बृ॒ह॒तः । यः । ईशे॑ । तम् । ऊं॒ इति॑ । स्त॒वा॒म॒ । वि॒दथे॑षु । इन्द्र॑म् ।
   यः । वा॒युना॑ । जय॑ति । गोऽम॑तीषु । प्र । धृ॒ष्णु॒ऽया । नय॑ति । वस्यः॑ । अच्छ॑ ॥

   स्थूरस्य । रायः । बृहतः । यः । ईशे । तम् । ऊं इति । स्तवाम । विदथेषु । इन्द्रम् ।
   यः । वायुना । जयति । गोऽमतीषु । प्र । धृष्णुऽया । नयति । वस्यः । अच्छ ॥

   sthūrásya ǀ rāyáḥ ǀ bṛhatáḥ ǀ yáḥ ǀ ī́śe ǀ tám ǀ ūṃ íti ǀ stavāma ǀ vidátheṣu ǀ índram ǀ
   yáḥ ǀ vāyúnā ǀ jáyati ǀ gó-matīṣu ǀ prá ǀ dhṛṣṇu-yā́ ǀ náyati ǀ vásyaḥ ǀ áccha ǁ

   sthūrasya ǀ rāyaḥ ǀ bṛhataḥ ǀ yaḥ ǀ īśe ǀ tam ǀ ūṃ iti ǀ stavāma ǀ vidatheṣu ǀ indram ǀ
   yaḥ ǀ vāyunā ǀ jayati ǀ go-matīṣu ǀ pra ǀ dhṛṣṇu-yā ǀ nayati ǀ vasyaḥ ǀ accha ǁ

   4.21.4 Aṣṭaka 3.6.5.4Anuvāka 4.2.113Interpretations

5. Ṛk 5

   उप॒ यो नमो॒ नम॑सि स्तभा॒यन्निय॑र्ति॒ वाचं॑ ज॒नय॒न्यज॑ध्यै ।
   ऋं॒ज॒सा॒नः पु॑रु॒वार॑ उ॒क्थैरेंद्रं॑ कृण्वीत॒ सद॑नेषु॒ होता॑ ॥

   उप यो नमो नमसि स्तभायन्न् इयर्ति वाचं जनयन् यजध्यै |
   ऋञ्जसानः पुरुवार उक्थैर् एन्द्रं कृण्वीत सदनेषु होता ||

   úpa yó námo námasi stabhāyánníyarti vā́cam janáyanyájadhyai ǀ
   ṛñjasānáḥ puruvā́ra uktháiréndram kṛṇvīta sádaneṣu hótā ǁ

   upa yo namo namasi stabhāyann iyarti vācaṃ janayan yajadhyai |
   ṛñjasānaḥ puruvāra ukthair endraṃ kṛṇvīta sadaneṣu hotā ||

   उप॑ । यः । नमः॑ । नम॑सि । स्त॒भा॒यन् । इय॑र्ति । वाच॑म् । ज॒नय॑न् । यज॑ध्यै ।
   ऋ॒ञ्ज॒सा॒नः । पु॒रु॒ऽवारः॑ । उ॒क्थैः । आ । इन्द्र॑म् । कृ॒ण्वी॒त॒ । सद॑नेषु । होता॑ ॥

   उप । यः । नमः । नमसि । स्तभायन् । इयर्ति । वाचम् । जनयन् । यजध्यै ।
   ऋञ्जसानः । पुरुऽवारः । उक्थैः । आ । इन्द्रम् । कृण्वीत । सदनेषु । होता ॥

   úpa ǀ yáḥ ǀ námaḥ ǀ námasi ǀ stabhāyán ǀ íyarti ǀ vā́cam ǀ janáyan ǀ yájadhyai ǀ
   ṛñjasānáḥ ǀ puru-vā́raḥ ǀ uktháiḥ ǀ ā́ ǀ índram ǀ kṛṇvīta ǀ sádaneṣu ǀ hótā ǁ

   upa ǀ yaḥ ǀ namaḥ ǀ namasi ǀ stabhāyan ǀ iyarti ǀ vācam ǀ janayan ǀ yajadhyai ǀ
   ṛñjasānaḥ ǀ puru-vāraḥ ǀ ukthaiḥ ǀ ā ǀ indram ǀ kṛṇvīta ǀ sadaneṣu ǀ hotā ǁ

   4.21.5 Aṣṭaka 3.6.5.5Anuvāka 4.2.114Interpretations

6. Ṛk 6

   धि॒षा यदि॑ धिष॒ण्यंतः॑ सर॒ण्यान्त्सदं॑तो॒ अद्रि॑मौशि॒जस्य॒ गोहे॑ ।
   आ दु॒रोषाः॑ पा॒स्त्यस्य॒ होता॒ यो नो॑ म॒हान्त्सं॒वर॑णेषु॒ वह्निः॑ ॥

   धिषा यदि धिषण्यन्तः सरण्यान् सदन्तो अद्रिम् औशिजस्य गोहे |
   आ दुरोषाः पास्त्यस्य होता यो नो महान् संवरणेषु वह्निः ||

   dhiṣā́ yádi dhiṣaṇyántaḥ saraṇyā́ntsádanto ádrimauśijásya góhe ǀ
   ā́ duróṣāḥ pāstyásya hótā yó no mahā́ntsaṃváraṇeṣu váhniḥ ǁ

   dhiṣā yadi dhiṣaṇyantaḥ saraṇyān sadanto adrim auśijasya gohe |
   ā duroṣāḥ pāstyasya hotā yo no mahān saṃvaraṇeṣu vahniḥ ||

   धि॒षा । यदि॑ । धि॒ष॒ण्यन्तः॑ । स॒र॒ण्यान् । सद॑न्तः । अद्रि॑म् । औ॒शि॒जस्य॑ । गोहे॑ ।
   आ । दु॒रोषाः॑ । पा॒स्त्यस्य॑ । होता॑ । यः । नः॒ । म॒हान् । स॒म्ऽवर॑णेषु । वह्निः॑ ॥

   धिषा । यदि । धिषण्यन्तः । सरण्यान् । सदन्तः । अद्रिम् । औशिजस्य । गोहे ।
   आ । दुरोषाः । पास्त्यस्य । होता । यः । नः । महान् । सम्ऽवरणेषु । वह्निः ॥

   dhiṣā́ ǀ yádi ǀ dhiṣaṇyántaḥ ǀ saraṇyā́n ǀ sádantaḥ ǀ ádrim ǀ auśijásya ǀ góhe ǀ
   ā́ ǀ duróṣāḥ ǀ pāstyásya ǀ hótā ǀ yáḥ ǀ naḥ ǀ mahā́n ǀ sam-váraṇeṣu ǀ váhniḥ ǁ

   dhiṣā ǀ yadi ǀ dhiṣaṇyantaḥ ǀ saraṇyān ǀ sadantaḥ ǀ adrim ǀ auśijasya ǀ gohe ǀ
   ā ǀ duroṣāḥ ǀ pāstyasya ǀ hotā ǀ yaḥ ǀ naḥ ǀ mahān ǀ sam-varaṇeṣu ǀ vahniḥ ǁ

   4.21.6 Aṣṭaka 3.6.6.1Anuvāka 4.2.115Interpretations

7. Ṛk 7

   स॒त्रा यदीं॑ भार्व॒रस्य॒ वृष्णः॒ सिष॑क्ति॒ शुष्मः॑ स्तुव॒ते भरा॑य ।
   गुहा॒ यदी॑मौशि॒जस्य॒ गोहे॒ प्र यद्धि॒ये प्राय॑से॒ मदा॑य ॥

   सत्रा यद् ईम् भार्वरस्य वृष्णः सिषक्ति शुष्म स्तुवते भराय |
   गुहा यद् ईम् औशिजस्य गोहे प्र यद् धिये प्रायसे मदाय ||

   satrā́ yádīm bhārvarásya vṛ́ṣṇaḥ síṣakti śúṣmaḥ stuvaté bhárāya ǀ
   gúhā yádīmauśijásya góhe prá yáddhiyé prā́yase mádāya ǁ

   satrā yad īm bhārvarasya vṛṣṇaḥ siṣakti śuṣma stuvate bharāya |
   guhā yad īm auśijasya gohe pra yad dhiye prāyase madāya ||

   स॒त्रा । यत् । ई॒म् । भा॒र्व॒रस्य॑ । वृष्णः॑ । सिस॑क्ति । शुष्मः॑ । स्तु॒व॒ते । भरा॑य ।
   गुहा॑ । यत् । ई॒म् । औ॒शि॒जस्य॑ । गोहे॑ । प्र । यत् । धि॒ये । प्र । अय॑से । मदा॑य ॥

   सत्रा । यत् । ईम् । भार्वरस्य । वृष्णः । सिसक्ति । शुष्मः । स्तुवते । भराय ।
   गुहा । यत् । ईम् । औशिजस्य । गोहे । प्र । यत् । धिये । प्र । अयसे । मदाय ॥

   satrā́ ǀ yát ǀ īm ǀ bhārvarásya ǀ vṛ́ṣṇaḥ ǀ sísakti ǀ śúṣmaḥ ǀ stuvaté ǀ bhárāya ǀ
   gúhā ǀ yát ǀ īm ǀ auśijásya ǀ góhe ǀ prá ǀ yát ǀ dhiyé ǀ prá ǀ áyase ǀ mádāya ǁ

   satrā ǀ yat ǀ īm ǀ bhārvarasya ǀ vṛṣṇaḥ ǀ sisakti ǀ śuṣmaḥ ǀ stuvate ǀ bharāya ǀ
   guhā ǀ yat ǀ īm ǀ auśijasya ǀ gohe ǀ pra ǀ yat ǀ dhiye ǀ pra ǀ ayase ǀ madāya ǁ

   4.21.7 Aṣṭaka 3.6.6.2Anuvāka 4.2.116Interpretations

8. Ṛk 8

   वि यद्वरां॑सि॒ पर्व॑तस्य वृ॒ण्वे पयो॑भिर्जि॒न्वे अ॒पां जवां॑सि ।
   वि॒दद्गौ॒रस्य॑ गव॒यस्य॒ गोहे॒ यदी॒ वाजा॑य सु॒ध्यो॒३॒॑ वहं॑ति ॥

   वि यद् वरांसि पर्वतस्य वृण्वे पयोभिर् जिन्वे अपां जवांसि |
   विदद् गौरस्य गवयस्य गोहे यदी वाजाय सुध्यो वहन्ति ||

   ví yádvárāṃsi párvatasya vṛṇvé páyobhirjinvé apā́m jávāṃsi ǀ
   vidádgaurásya gavayásya góhe yádī vā́jāya sudhyó váhanti ǁ

   vi yad varāṃsi parvatasya vṛṇve payobhir jinve apāṃ javāṃsi |
   vidad gaurasya gavayasya gohe yadī vājāya sudhyo vahanti ||

   वि । यत् । वरां॑सि । पर्व॑तस्य । वृ॒ण्वे । पयः॑ऽभिः । जि॒न्वे । अ॒पाम् । जवां॑सि ।
   वि॒दत् । गौ॒रस्य॑ । ग॒व॒यस्य॑ । गोहे॑ । यदि॑ । वाजा॑य । सु॒ऽध्यः॑ । वह॑न्ति ॥

   वि । यत् । वरांसि । पर्वतस्य । वृण्वे । पयःऽभिः । जिन्वे । अपाम् । जवांसि ।
   विदत् । गौरस्य । गवयस्य । गोहे । यदि । वाजाय । सुऽध्यः । वहन्ति ॥

   ví ǀ yát ǀ várāṃsi ǀ párvatasya ǀ vṛṇvé ǀ páyaḥ-bhiḥ ǀ jinvé ǀ apā́m ǀ jávāṃsi ǀ
   vidát ǀ gaurásya ǀ gavayásya ǀ góhe ǀ yádi ǀ vā́jāya ǀ su-dhyáḥ ǀ váhanti ǁ

   vi ǀ yat ǀ varāṃsi ǀ parvatasya ǀ vṛṇve ǀ payaḥ-bhiḥ ǀ jinve ǀ apām ǀ javāṃsi ǀ
   vidat ǀ gaurasya ǀ gavayasya ǀ gohe ǀ yadi ǀ vājāya ǀ su-dhyaḥ ǀ vahanti ǁ

   4.21.8 Aṣṭaka 3.6.6.3Anuvāka 4.2.117Interpretations

9. Ṛk 9

   भ॒द्रा ते॒ हस्ता॒ सुकृ॑तो॒त पा॒णी प्र॑यं॒तारा॑ स्तुव॒ते राध॑ इंद्र ।
   का ते॒ निष॑त्तिः॒ किमु॒ नो म॑मत्सि॒ किं नोदु॑दु हर्षसे॒ दात॒वा उ॑ ॥

   भद्रा ते हस्ता सुकृतोत पाणी प्रयन्तारा स्तुवते राध इन्द्र |
   का ते निषत्तिः किम् उ नो ममत्सि किं नोद्-उद् उ हर्षसे दातवा उ ||

   bhadrā́ te hástā súkṛtotá pāṇī́ prayantā́rā stuvaté rā́dha indra ǀ
   kā́ te níṣattiḥ kímu nó mamatsi kím nódudu harṣase dā́tavā́ u ǁ

   bhadrā te hastā sukṛtota pāṇī prayantārā stuvate rādha indra |
   kā te niṣattiḥ kim u no mamatsi kiṃ nod-ud u harṣase dātavā u ||

   भ॒द्रा । ते॒ । हस्ता॑ । सुऽकृ॑ता । उ॒त । पा॒णी इति॑ । प्र॒ऽय॒न्तारा॑ । स्तु॒व॒ते । राधः॑ । इ॒न्द्र॒ ।
   का । ते॒ । निऽस॑त्तिः । किम् । ऊं॒ इति॑ । नः॒ । म॒म॒त्सि॒ । किम् । न । उत्ऽउ॑त् । ऊं॒ इति॑ । ह॒र्ष॒से॒ । दात॒वै । ऊं॒ इति॑ ॥

   भद्रा । ते । हस्ता । सुऽकृता । उत । पाणी इति । प्रऽयन्तारा । स्तुवते । राधः । इन्द्र ।
   का । ते । निऽसत्तिः । किम् । ऊं इति । नः । ममत्सि । किम् । न । उत्ऽउत् । ऊं इति । हर्षसे । दातवै । ऊं इति ॥

   bhadrā́ ǀ te ǀ hástā ǀ sú-kṛtā ǀ utá ǀ pāṇī́ íti ǀ pra-yantā́rā ǀ stuvaté ǀ rā́dhaḥ ǀ indra ǀ
   kā́ ǀ te ǀ ní-sattiḥ ǀ kím ǀ ūṃ íti ǀ naḥ ǀ mamatsi ǀ kím ǀ ná ǀ út-ut ǀ ūṃ íti ǀ harṣase ǀ dā́tavái ǀ ūṃ íti ǁ

   bhadrā ǀ te ǀ hastā ǀ su-kṛtā ǀ uta ǀ pāṇī iti ǀ pra-yantārā ǀ stuvate ǀ rādhaḥ ǀ indra ǀ
   kā ǀ te ǀ ni-sattiḥ ǀ kim ǀ ūṃ iti ǀ naḥ ǀ mamatsi ǀ kim ǀ na ǀ ut-ut ǀ ūṃ iti ǀ harṣase ǀ dātavai ǀ ūṃ iti ǁ

   4.21.9 Aṣṭaka 3.6.6.4Anuvāka 4.2.118Interpretations

10. Ṛk 10

    ए॒वा वस्व॒ इंद्रः॑ स॒त्यः स॒म्राड्ढंता॑ वृ॒त्रं वरि॑वः पू॒रवे॑ कः ।
    पुरु॑ष्टुत॒ क्रत्वा॑ नः शग्धि रा॒यो भ॑क्षी॒य तेऽव॑सो॒ दैव्य॑स्य ॥

    एवा वस्व इन्द्रः सत्यः सम्राड् ढन्ता वृत्रं वरिवः पूरवे कः |
    पुरुष्टुत क्रत्वा नः शग्धि रायो भक्षीय ते ऽवसो दैव्यस्य ||

    evā́ vásva índraḥ satyáḥ samrā́ḍḍhántā vṛtrám várivaḥ pūráve kaḥ ǀ
    púruṣṭuta krátvā naḥ śagdhi rāyó bhakṣīyá té’vaso dáivyasya ǁ

    evā vasva indraḥ satyaḥ samrāḍ ḍhantā vṛtraṃ varivaḥ pūrave kaḥ |
    puruṣṭuta kratvā naḥ śagdhi rāyo bhakṣīya te 'vaso daivyasya ||

    ए॒व । वस्वः॑ । इन्द्रः॑ । स॒त्यः । स॒म्ऽराट् । हन्ता॑ । वृ॒त्रम् । वरि॑वः । पू॒रवे॑ । क॒रिति॑ कः ।
    पुरु॑ऽस्तुत । क्रत्वा॑ । नः॒ । श॒ग्धि॒ । रा॒यः । भ॒क्षी॒य । ते॒ । अव॑सः । दैव्य॑स्य ॥

    एव । वस्वः । इन्द्रः । सत्यः । सम्ऽराट् । हन्ता । वृत्रम् । वरिवः । पूरवे । करिति कः ।
    पुरुऽस्तुत । क्रत्वा । नः । शग्धि । रायः । भक्षीय । ते । अवसः । दैव्यस्य ॥

    evá ǀ vásvaḥ ǀ índraḥ ǀ satyáḥ ǀ sam-rā́ṭ ǀ hántā ǀ vṛtrám ǀ várivaḥ ǀ pūráve ǀ karíti kaḥ ǀ
    púru-stuta ǀ krátvā ǀ naḥ ǀ śagdhi ǀ rāyáḥ ǀ bhakṣīyá ǀ te ǀ ávasaḥ ǀ dáivyasya ǁ

    eva ǀ vasvaḥ ǀ indraḥ ǀ satyaḥ ǀ sam-rāṭ ǀ hantā ǀ vṛtram ǀ varivaḥ ǀ pūrave ǀ kariti kaḥ ǀ
    puru-stuta ǀ kratvā ǀ naḥ ǀ śagdhi ǀ rāyaḥ ǀ bhakṣīya ǀ te ǀ avasaḥ ǀ daivyasya ǁ

    4.21.10 Aṣṭaka 3.6.6.5Anuvāka 4.2.119Interpretations

11. Ṛk 11

    नू ष्टु॒त इं॑द्र॒ नू गृ॑णा॒न इषं॑ जरि॒त्रे न॒द्यो॒३॒॑ न पी॑पेः ।
    अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्यः॑ सदा॒साः ॥

    नू ष्टुत इन्द्र नू गृणान इषं जरित्रे नद्यो न पीपेः |
    अकारि ते हरिवो ब्रह्म नव्यं धिया स्याम रथ्यः सदासाः ||

    nū́ ṣṭutá indra nū́ gṛṇāná íṣam jaritré nadyó ná pīpeḥ ǀ
    ákāri te harivo bráhma návyam dhiyā́ syāma rathyáḥ sadāsā́ḥ ǁ

    nū ṣṭuta indra nū gṛṇāna iṣaṃ jaritre nadyo na pīpeḥ |
    akāri te harivo brahma navyaṃ dhiyā syāma rathyaḥ sadāsāḥ ||

    नु । स्तु॒तः । इ॒न्द्र॒ । नु । गृ॒णा॒नः । इष॑म् । ज॒रि॒त्रे । न॒द्यः॑ । न । पी॒पे॒रिति॑ पीपेः ।
    अका॑रि । ते॒ । ह॒रि॒ऽवः॒ । ब्रह्म॑ । नव्य॑म् । धि॒या । स्या॒म॒ । र॒थ्यः॑ । स॒दा॒ऽसाः ॥

    नु । स्तुतः । इन्द्र । नु । गृणानः । इषम् । जरित्रे । नद्यः । न । पीपेरिति पीपेः ।
    अकारि । ते । हरिऽवः । ब्रह्म । नव्यम् । धिया । स्याम । रथ्यः । सदाऽसाः ॥

    nú ǀ stutáḥ ǀ indra ǀ nú ǀ gṛṇānáḥ ǀ íṣam ǀ jaritré ǀ nadyáḥ ǀ ná ǀ pīperíti pīpeḥ ǀ
    ákāri ǀ te ǀ hari-vaḥ ǀ bráhma ǀ návyam ǀ dhiyā́ ǀ syāma ǀ rathyáḥ ǀ sadā-sā́ḥ ǁ

    nu ǀ stutaḥ ǀ indra ǀ nu ǀ gṛṇānaḥ ǀ iṣam ǀ jaritre ǀ nadyaḥ ǀ na ǀ pīperiti pīpeḥ ǀ
    akāri ǀ te ǀ hari-vaḥ ǀ brahma ǀ navyam ǀ dhiyā ǀ syāma ǀ rathyaḥ ǀ sadā-sāḥ ǁ

    4.21.11 Aṣṭaka 3.6.6.6Anuvāka 4.2.120Interpretations

Text, recitation and interpretations from the Ṛgveda database of theveda.org.in.