Devatā देवता

Indra

Ṛṣi ऋषि

Vāmadeva Gautama

Chandas छन्दस्

Triṣṭubh

1. Ṛk 1

   को अ॒द्य नर्यो॑ दे॒वका॑म उ॒शन्निंद्र॑स्य स॒ख्यं जु॑जोष ।
   को वा॑ म॒हेऽव॑से॒ पार्या॑य॒ समि॑द्धे अ॒ग्नौ सु॒तसो॑म ईट्टे ॥

   को अद्य नर्यो देवकाम उशन्न् इन्द्रस्य सख्यं जुजोष |
   को वा महे ऽवसे पार्याय समिद्धे अग्नौ सुतसोम ईट्टे ||

   kó adyá náryo devákāma uśánníndrasya sakhyám jujoṣa ǀ
   kó vā mahé’vase pā́ryāya sámiddhe agnáu sutásoma īṭṭe ǁ

   ko adya naryo devakāma uśann indrasya sakhyaṃ jujoṣa |
   ko vā mahe 'vase pāryāya samiddhe agnau sutasoma īṭṭe ||

   कः । अ॒द्य । नर्यः॑ । दे॒वऽका॑मः । उ॒शन् । इन्द्र॑स्य । स॒ख्यम् । जु॒जो॒ष॒ ।
   कः । वा॒ । म॒हे । अव॑से । पार्या॑य । सम्ऽइ॑द्धे । अ॒ग्नौ । सु॒तऽसो॑मः । ई॒ट्टे॒ ॥

   कः । अद्य । नर्यः । देवऽकामः । उशन् । इन्द्रस्य । सख्यम् । जुजोष ।
   कः । वा । महे । अवसे । पार्याय । सम्ऽइद्धे । अग्नौ । सुतऽसोमः । ईट्टे ॥

   káḥ ǀ adyá ǀ náryaḥ ǀ devá-kāmaḥ ǀ uśán ǀ índrasya ǀ sakhyám ǀ jujoṣa ǀ
   káḥ ǀ vā ǀ mahé ǀ ávase ǀ pā́ryāya ǀ sám-iddhe ǀ agnáu ǀ sutá-somaḥ ǀ īṭṭe ǁ

   kaḥ ǀ adya ǀ naryaḥ ǀ deva-kāmaḥ ǀ uśan ǀ indrasya ǀ sakhyam ǀ jujoṣa ǀ
   kaḥ ǀ vā ǀ mahe ǀ avase ǀ pāryāya ǀ sam-iddhe ǀ agnau ǀ suta-somaḥ ǀ īṭṭe ǁ

   4.25.1 Aṣṭaka 3.6.13.1Anuvāka 4.3.34Interpretations

2. Ṛk 2

   को ना॑नाम॒ वच॑सा सो॒म्याय॑ मना॒युर्वा॑ भवति॒ वस्त॑ उ॒स्राः ।
   क इंद्र॑स्य॒ युज्यं॒ कः स॑खि॒त्वं को भ्रा॒त्रं व॑ष्टि क॒वये॒ क ऊ॒ती ॥

   को नानाम वचसा सोम्याय मनायुर् वा भवति वस्त उस्राः |
   क इन्द्रस्य युज्यं कः सखित्वं को भ्रात्रं वष्टि कवये क ऊती ||

   kó nānāma vácasā somyā́ya manāyúrvā bhavati vásta usrā́ḥ ǀ
   ká índrasya yújyam káḥ sakhitvám kó bhrātrám vaṣṭi kaváye ká ūtī́ ǁ

   ko nānāma vacasā somyāya manāyur vā bhavati vasta usrāḥ |
   ka indrasya yujyaṃ kaḥ sakhitvaṃ ko bhrātraṃ vaṣṭi kavaye ka ūtī ||

   कः । न॒ना॒म॒ । वच॑सा । सो॒म्याय॑ । म॒ना॒युः । वा॒ । भ॒व॒ति॒ । वस्ते॑ । उ॒स्राः ।
   कः । इन्द्र॑स्य । युज्य॑म् । कः । स॒खि॒ऽत्वम् । कः । भ्रा॒त्रम् । व॒ष्टि॒ । क॒वये॑ । कः । ऊ॒ती ॥

   कः । ननाम । वचसा । सोम्याय । मनायुः । वा । भवति । वस्ते । उस्राः ।
   कः । इन्द्रस्य । युज्यम् । कः । सखिऽत्वम् । कः । भ्रात्रम् । वष्टि । कवये । कः । ऊती ॥

   káḥ ǀ nanāma ǀ vácasā ǀ somyā́ya ǀ manāyúḥ ǀ vā ǀ bhavati ǀ váste ǀ usrā́ḥ ǀ
   káḥ ǀ índrasya ǀ yújyam ǀ káḥ ǀ sakhi-tvám ǀ káḥ ǀ bhrātrám ǀ vaṣṭi ǀ kaváye ǀ káḥ ǀ ūtī́ ǁ

   kaḥ ǀ nanāma ǀ vacasā ǀ somyāya ǀ manāyuḥ ǀ vā ǀ bhavati ǀ vaste ǀ usrāḥ ǀ
   kaḥ ǀ indrasya ǀ yujyam ǀ kaḥ ǀ sakhi-tvam ǀ kaḥ ǀ bhrātram ǀ vaṣṭi ǀ kavaye ǀ kaḥ ǀ ūtī ǁ

   4.25.2 Aṣṭaka 3.6.13.2Anuvāka 4.3.35Interpretations

3. Ṛk 3

   को दे॒वाना॒मवो॑ अ॒द्या वृ॑णीते॒ क आ॑दि॒त्याँ अदि॑तिं॒ ज्योति॑रीट्टे ।
   कस्या॒श्विना॒विंद्रो॑ अ॒ग्निः सु॒तस्यां॒शोः पि॑बंति॒ मन॒सावि॑वेनं ॥

   को देवानाम् अवो अद्या वृणीते क आदित्यां अदितिं ज्योतिर् ईट्टे |
   कस्याश्विनाव् इन्द्रो अग्निः सुतस्यांशोः पिबन्ति मनसाविवेनम् ||

   kó devā́nāmávo adyā́ vṛṇīte ká ādityā́m̐ áditim jyótirīṭṭe ǀ
   kásyāśvínāvíndro agníḥ sutásyāṃśóḥ pibanti mánasā́vivenam ǁ

   ko devānām avo adyā vṛṇīte ka ādityāṃ aditiṃ jyotir īṭṭe |
   kasyāśvināv indro agniḥ sutasyāṃśoḥ pibanti manasāvivenam ||

   कः । दे॒वाना॑म् । अवः॑ । अ॒द्य । वृ॒णी॒ते । कः । आ॒दि॒त्यान् । अदि॑तिम् । ज्योतिः॑ । ई॒ट्टे॒ ।
   कस्य॑ । अ॒श्विनौ॑ । इन्द्रः॑ । अ॒ग्निः । सु॒तस्य॑ । अं॒शोः । पि॒ब॒न्ति॒ । मन॑सा । अवि॑ऽवेनम् ॥

   कः । देवानाम् । अवः । अद्य । वृणीते । कः । आदित्यान् । अदितिम् । ज्योतिः । ईट्टे ।
   कस्य । अश्विनौ । इन्द्रः । अग्निः । सुतस्य । अंशोः । पिबन्ति । मनसा । अविऽवेनम् ॥

   káḥ ǀ devā́nām ǀ ávaḥ ǀ adyá ǀ vṛṇīté ǀ káḥ ǀ ādityā́n ǀ áditim ǀ jyótiḥ ǀ īṭṭe ǀ
   kásya ǀ aśvínau ǀ índraḥ ǀ agníḥ ǀ sutásya ǀ aṃśóḥ ǀ pibanti ǀ mánasā ǀ ávi-venam ǁ

   kaḥ ǀ devānām ǀ avaḥ ǀ adya ǀ vṛṇīte ǀ kaḥ ǀ ādityān ǀ aditim ǀ jyotiḥ ǀ īṭṭe ǀ
   kasya ǀ aśvinau ǀ indraḥ ǀ agniḥ ǀ sutasya ǀ aṃśoḥ ǀ pibanti ǀ manasā ǀ avi-venam ǁ

   4.25.3 Aṣṭaka 3.6.13.3Anuvāka 4.3.36Interpretations

4. Ṛk 4

   तस्मा॑ अ॒ग्निर्भार॑तः॒ शर्म॑ यंस॒ज्ज्योक्प॑श्या॒त्सूर्य॑मु॒च्चरं॑तं ।
   य इंद्रा॑य सु॒नवा॒मेत्याह॒ नरे॒ नर्या॑य॒ नृत॑माय नृ॒णां ॥

   तस्मा अग्निर् भारतः शर्म यंसज् ज्योक् पश्यात् सूर्यम् उच्चरन्तम् |
   य इन्द्राय सुनवामेत्य् आह नरे नर्याय नृतमाय नृणाम् ||

   tásmā agnírbhā́rataḥ śárma yaṃsajjyókpaśyātsū́ryamuccárantam ǀ
   yá índrāya sunávāmétyā́ha náre náryāya nṛ́tamāya nṛṇā́m ǁ

   tasmā agnir bhārataḥ śarma yaṃsaj jyok paśyāt sūryam uccarantam |
   ya indrāya sunavāmety āha nare naryāya nṛtamāya nṛṇām ||

   तस्मै॑ । अ॒ग्निः । भार॑तः । शर्म॑ । यं॒स॒त् । ज्योक् । प॒श्या॒त् । सूर्य॑म् । उ॒त्ऽचर॑न्तम् ।
   यः । इन्द्रा॑य । सु॒नवा॑म । इति॑ । आह॑ । नरे॑ । नर्या॑य । नृऽत॑माय । नृ॒णाम् ॥

   तस्मै । अग्निः । भारतः । शर्म । यंसत् । ज्योक् । पश्यात् । सूर्यम् । उत्ऽचरन्तम् ।
   यः । इन्द्राय । सुनवाम । इति । आह । नरे । नर्याय । नृऽतमाय । नृणाम् ॥

   tásmai ǀ agníḥ ǀ bhā́rataḥ ǀ śárma ǀ yaṃsat ǀ jyók ǀ paśyāt ǀ sū́ryam ǀ ut-cárantam ǀ
   yáḥ ǀ índrāya ǀ sunávāma ǀ íti ǀ ā́ha ǀ náre ǀ náryāya ǀ nṛ́-tamāya ǀ nṛṇā́m ǁ

   tasmai ǀ agniḥ ǀ bhārataḥ ǀ śarma ǀ yaṃsat ǀ jyok ǀ paśyāt ǀ sūryam ǀ ut-carantam ǀ
   yaḥ ǀ indrāya ǀ sunavāma ǀ iti ǀ āha ǀ nare ǀ naryāya ǀ nṛ-tamāya ǀ nṛṇām ǁ

   4.25.4 Aṣṭaka 3.6.13.4Anuvāka 4.3.37Interpretations

5. Ṛk 5

   न तं जि॑नंति ब॒हवो॒ न द॒भ्रा उ॒र्व॑स्मा॒ अदि॑तिः॒ शर्म॑ यंसत् ।
   प्रि॒यः सु॒कृत्प्रि॒य इंद्रे॑ मना॒युः प्रि॒यः सु॑प्रा॒वीः प्रि॒यो अ॑स्य सो॒मी ॥

   न तं जिनन्ति बहवो न दभ्रा उर्व् अस्मा अदितिः शर्म यंसत् |
   प्रियः सुकृत् प्रिय इन्द्रे मनायुः प्रियः सुप्रावीः प्रियो अस्य सोमी ||

   ná tám jinanti bahávo ná dabhrā́ urvásmā áditiḥ śárma yaṃsat ǀ
   priyáḥ sukṛ́tpriyá índre manāyúḥ priyáḥ suprāvī́ḥ priyó asya somī́ ǁ

   na taṃ jinanti bahavo na dabhrā urv asmā aditiḥ śarma yaṃsat |
   priyaḥ sukṛt priya indre manāyuḥ priyaḥ suprāvīḥ priyo asya somī ||

   न । तम् । जि॒न॒न्ति॒ । ब॒हवः॑ । न । द॒भ्राः । उ॒रु । अ॒स्मै॒ । अदि॑तिः । शर्म॑ । यं॒स॒त् ।
   प्रि॒यः । सु॒ऽकृत् । प्रि॒यः । इन्द्रे॑ । म॒ना॒युः । प्रि॒यः । सु॒प्र॒ऽअ॒वीः । प्रि॒यः । अ॒स्य॒ । सो॒मी ॥

   न । तम् । जिनन्ति । बहवः । न । दभ्राः । उरु । अस्मै । अदितिः । शर्म । यंसत् ।
   प्रियः । सुऽकृत् । प्रियः । इन्द्रे । मनायुः । प्रियः । सुप्रऽअवीः । प्रियः । अस्य । सोमी ॥

   ná ǀ tám ǀ jinanti ǀ bahávaḥ ǀ ná ǀ dabhrā́ḥ ǀ urú ǀ asmai ǀ áditiḥ ǀ śárma ǀ yaṃsat ǀ
   priyáḥ ǀ su-kṛ́t ǀ priyáḥ ǀ índre ǀ manāyúḥ ǀ priyáḥ ǀ supra-avī́ḥ ǀ priyáḥ ǀ asya ǀ somī́ ǁ

   na ǀ tam ǀ jinanti ǀ bahavaḥ ǀ na ǀ dabhrāḥ ǀ uru ǀ asmai ǀ aditiḥ ǀ śarma ǀ yaṃsat ǀ
   priyaḥ ǀ su-kṛt ǀ priyaḥ ǀ indre ǀ manāyuḥ ǀ priyaḥ ǀ supra-avīḥ ǀ priyaḥ ǀ asya ǀ somī ǁ

   4.25.5 Aṣṭaka 3.6.13.5Anuvāka 4.3.38Interpretations

6. Ṛk 6

   सु॒प्रा॒व्यः॑ प्राशु॒षाळे॒ष वी॒रः सुष्वेः॑ प॒क्तिं कृ॑णुते॒ केव॒लेंद्रः॑ ।
   नासु॑ष्वेरा॒पिर्न सखा॒ न जा॒मिर्दु॑ष्प्रा॒व्यो॑ऽवहं॒तेदवा॑चः ॥

   सुप्राव्यः प्राशुषाऌ एष वीरः सुष्वेः पक्तिं कृणुते केवलेन्द्रः |
   नासुष्वेर् आपिर् न सखा न जामिर् दुष्प्राव्यो ऽवहन्तेद् अवाचः ||

   suprāvyáḥ prāśuṣā́ḷeṣá vīráḥ súṣveḥ paktím kṛṇute kévaléndraḥ ǀ
   nā́suṣverāpírná sákhā ná jāmírduṣprāvyó’vahantédávācaḥ ǁ

   suprāvyaḥ prāśuṣāḷ eṣa vīraḥ suṣveḥ paktiṃ kṛṇute kevalendraḥ |
   nāsuṣver āpir na sakhā na jāmir duṣprāvyo 'vahanted avācaḥ ||

   सु॒प्र॒ऽअ॒व्यः॑ । प्रा॒शु॒षाट् । ए॒षः । वी॒रः । सुस्वेः॑ । प॒क्तिम् । कृ॒णु॒ते॒ । केव॑ला । इन्द्रः॑ ।
   न । असु॑स्वेः । आ॒पिः । न । सखा॑ । न । जा॒मिः । दुः॒प्र॒ऽअ॒व्यः॑ । अ॒व॒ऽह॒न्ता । इत् । अवा॑चः ॥

   सुप्रऽअव्यः । प्राशुषाट् । एषः । वीरः । सुस्वेः । पक्तिम् । कृणुते । केवला । इन्द्रः ।
   न । असुस्वेः । आपिः । न । सखा । न । जामिः । दुःप्रऽअव्यः । अवऽहन्ता । इत् । अवाचः ॥

   supra-avyáḥ ǀ prāśuṣā́ṭ ǀ eṣáḥ ǀ vīráḥ ǀ súsveḥ ǀ paktím ǀ kṛṇute ǀ kévalā ǀ índraḥ ǀ
   ná ǀ ásusveḥ ǀ āpíḥ ǀ ná ǀ sákhā ǀ ná ǀ jāmíḥ ǀ duḥpra-avyáḥ ǀ ava-hantā́ ǀ ít ǀ ávācaḥ ǁ

   supra-avyaḥ ǀ prāśuṣāṭ ǀ eṣaḥ ǀ vīraḥ ǀ susveḥ ǀ paktim ǀ kṛṇute ǀ kevalā ǀ indraḥ ǀ
   na ǀ asusveḥ ǀ āpiḥ ǀ na ǀ sakhā ǀ na ǀ jāmiḥ ǀ duḥpra-avyaḥ ǀ ava-hantā ǀ it ǀ avācaḥ ǁ

   4.25.6 Aṣṭaka 3.6.14.1Anuvāka 4.3.39Interpretations

7. Ṛk 7

   न रे॒वता॑ प॒णिना॑ स॒ख्यमिंद्रोऽसु॑न्वता सुत॒पाः सं गृ॑णीते ।
   आस्य॒ वेदः॑ खि॒दति॒ हंति॑ न॒ग्नं वि सुष्व॑ये प॒क्तये॒ केव॑लो भूत् ॥

   न रेवता पणिना सख्यम् इन्द्रो ऽसुन्वता सुतपाः सं गृणीते |
   आस्य वेदः खिदति हन्ति नग्नं वि सुष्वये पक्तये केवलो भूत् ||

   ná revátā paṇínā sakhyámíndró’sunvatā sutapā́ḥ sám gṛṇīte ǀ
   ā́sya védaḥ khidáti hánti nagnám ví súṣvaye paktáye kévalo bhūt ǁ

   na revatā paṇinā sakhyam indro 'sunvatā sutapāḥ saṃ gṛṇīte |
   āsya vedaḥ khidati hanti nagnaṃ vi suṣvaye paktaye kevalo bhūt ||

   न । रे॒वता॑ । प॒णिना॑ । स॒ख्यम् । इन्द्रः॑ । असु॑न्वता । सु॒त॒ऽपाः । सम् । गृ॒णी॒ते॒ ।
   आ । अ॒स्य॒ । वेदः॑ । खि॒दति॑ । हन्ति॑ । न॒ग्नम् । वि । सुस्व॑ये । प॒क्तये॑ । केव॑लः । भू॒त् ॥

   न । रेवता । पणिना । सख्यम् । इन्द्रः । असुन्वता । सुतऽपाः । सम् । गृणीते ।
   आ । अस्य । वेदः । खिदति । हन्ति । नग्नम् । वि । सुस्वये । पक्तये । केवलः । भूत् ॥

   ná ǀ revátā ǀ paṇínā ǀ sakhyám ǀ índraḥ ǀ ásunvatā ǀ suta-pā́ḥ ǀ sám ǀ gṛṇīte ǀ
   ā́ ǀ asya ǀ védaḥ ǀ khidáti ǀ hánti ǀ nagnám ǀ ví ǀ súsvaye ǀ paktáye ǀ kévalaḥ ǀ bhūt ǁ

   na ǀ revatā ǀ paṇinā ǀ sakhyam ǀ indraḥ ǀ asunvatā ǀ suta-pāḥ ǀ sam ǀ gṛṇīte ǀ
   ā ǀ asya ǀ vedaḥ ǀ khidati ǀ hanti ǀ nagnam ǀ vi ǀ susvaye ǀ paktaye ǀ kevalaḥ ǀ bhūt ǁ

   4.25.7 Aṣṭaka 3.6.14.2Anuvāka 4.3.40Interpretations

8. Ṛk 8

   इंद्रं॒ परेऽव॑रे मध्य॒मास॒ इंद्रं॒ यांतोऽव॑सितास॒ इंद्रं॑ ।
   इंद्रं॑ क्षि॒यंत॑ उ॒त युध्य॑माना॒ इंद्रं॒ नरो॑ वाज॒यंतो॑ हवंते ॥

   इन्द्रम् परे ऽवरे मध्यमास इन्द्रं यान्तो ऽवसितास इन्द्रम् |
   इन्द्रं क्षियन्त उत युध्यमाना इन्द्रं नरो वाजयन्तो हवन्ते ||

   índram páré’vare madhyamā́sa índram yā́ntó’vasitāsa índram ǀ
   índram kṣiyánta utá yúdhyamānā índram náro vājayánto havante ǁ

   indram pare 'vare madhyamāsa indraṃ yānto 'vasitāsa indram |
   indraṃ kṣiyanta uta yudhyamānā indraṃ naro vājayanto havante ||

   इन्द्र॑म् । परे॑ । अव॑रे । म॒ध्य॒मासः॑ । इन्द्र॑म् । यान्तः॑ । अव॑ऽसितासः । इन्द्र॑म् ।
   इन्द्र॑म् । क्षि॒यन्तः॑ । उ॒त । युध्य॑मानाः । इन्द्र॑म् । नरः॑ । वा॒ज॒यन्तः॑ । ह॒व॒न्ते॒ ॥

   इन्द्रम् । परे । अवरे । मध्यमासः । इन्द्रम् । यान्तः । अवऽसितासः । इन्द्रम् ।
   इन्द्रम् । क्षियन्तः । उत । युध्यमानाः । इन्द्रम् । नरः । वाजयन्तः । हवन्ते ॥

   índram ǀ páre ǀ ávare ǀ madhyamā́saḥ ǀ índram ǀ yā́ntaḥ ǀ áva-sitāsaḥ ǀ índram ǀ
   índram ǀ kṣiyántaḥ ǀ utá ǀ yúdhyamānāḥ ǀ índram ǀ náraḥ ǀ vājayántaḥ ǀ havante ǁ

   indram ǀ pare ǀ avare ǀ madhyamāsaḥ ǀ indram ǀ yāntaḥ ǀ ava-sitāsaḥ ǀ indram ǀ
   indram ǀ kṣiyantaḥ ǀ uta ǀ yudhyamānāḥ ǀ indram ǀ naraḥ ǀ vājayantaḥ ǀ havante ǁ

   4.25.8 Aṣṭaka 3.6.14.3Anuvāka 4.3.41Interpretations

Text, recitation and interpretations from the Ṛgveda database of theveda.org.in.