Devatā देवता

Indra

Ṛṣi ऋषि

Vāmadeva Gautama

Chandas छन्दस्

Triṣṭubh, Anuṣṭubh

1. Ṛk 1

   का सु॑ष्टु॒तिः शव॑सः सू॒नुमिंद्र॑मर्वाची॒नं राध॑स॒ आ व॑वर्तत् ।
   द॒दिर्हि वी॒रो गृ॑ण॒ते वसू॑नि॒ स गोप॑तिर्नि॒ष्षिधां॑ नो जनासः ॥

   का सुष्टुतिः शवसः सूनुम् इन्द्रम् अर्वाचीनं राधस आ ववर्तत् |
   ददिर् हि वीरो गृणते वसूनि स गोपतिर् निष्षिधां नो जनासः ||

   kā́ suṣṭutíḥ śávasaḥ sūnúmíndramarvācīnám rā́dhasa ā́ vavartat ǀ
   dadírhí vīró gṛṇaté vásūni sá gópatirniṣṣídhām no janāsaḥ ǁ

   kā suṣṭutiḥ śavasaḥ sūnum indram arvācīnaṃ rādhasa ā vavartat |
   dadir hi vīro gṛṇate vasūni sa gopatir niṣṣidhāṃ no janāsaḥ ||

   का । सु॒ऽस्तु॒तिः । शव॑सः । सू॒नुम् । इन्द्र॑म् । अ॒र्वा॒ची॒नम् । राध॑से । आ । व॒व॒र्त॒त् ।
   द॒दिः । हि । वी॒रः । गृ॒ण॒ते । वसू॑नि । सः । गोऽप॑तिः । निः॒ऽसिधा॑म् । नः॒ । ज॒ना॒सः॒ ॥

   का । सुऽस्तुतिः । शवसः । सूनुम् । इन्द्रम् । अर्वाचीनम् । राधसे । आ । ववर्तत् ।
   ददिः । हि । वीरः । गृणते । वसूनि । सः । गोऽपतिः । निःऽसिधाम् । नः । जनासः ॥

   kā́ ǀ su-stutíḥ ǀ śávasaḥ ǀ sūnúm ǀ índram ǀ arvācīnám ǀ rā́dhase ǀ ā́ ǀ vavartat ǀ
   dadíḥ ǀ hí ǀ vīráḥ ǀ gṛṇaté ǀ vásūni ǀ sáḥ ǀ gó-patiḥ ǀ niḥ-sídhām ǀ naḥ ǀ janāsaḥ ǁ

   kā ǀ su-stutiḥ ǀ śavasaḥ ǀ sūnum ǀ indram ǀ arvācīnam ǀ rādhase ǀ ā ǀ vavartat ǀ
   dadiḥ ǀ hi ǀ vīraḥ ǀ gṛṇate ǀ vasūni ǀ saḥ ǀ go-patiḥ ǀ niḥ-sidhām ǀ naḥ ǀ janāsaḥ ǁ

   4.24.1 Aṣṭaka 3.6.11.1Anuvāka 4.3.23Interpretations

2. Ṛk 2

   स वृ॑त्र॒हत्ये॒ हव्यः॒ स ईड्यः॒ स सुष्टु॑त॒ इंद्रः॑ स॒त्यरा॑धाः ।
   स याम॒न्ना म॒घवा॒ मर्त्या॑य ब्रह्मण्य॒ते सुष्व॑ये॒ वरि॑वो धात् ॥

   स वृत्रहत्ये हव्यः स ईड्यः स सुष्टुत इन्द्रः सत्यराधाः |
   स यामन्न् आ मघवा मर्त्याय ब्रह्मण्यते सुष्वये वरिवो धात् ||

   sá vṛtrahátye hávyaḥ sá ī́ḍyaḥ sá súṣṭuta índraḥ satyárādhāḥ ǀ
   sá yā́mannā́ maghávā mártyāya brahmaṇyaté súṣvaye várivo dhāt ǁ

   sa vṛtrahatye havyaḥ sa īḍyaḥ sa suṣṭuta indraḥ satyarādhāḥ |
   sa yāmann ā maghavā martyāya brahmaṇyate suṣvaye varivo dhāt ||

   सः । वृ॒त्र॒ऽहत्ये॑ । हव्यः॑ । सः । ईड्यः॑ । सः । सुऽस्तु॑तः । इन्द्रः॑ । स॒त्यऽरा॑धाः ।
   सः । याम॑न् । आ । म॒घऽवा॑ । मर्त्या॑य । ब्र॒ह्म॒ण्य॒ते । सुस्व॑ये । वरि॑वः । धा॒त् ॥

   सः । वृत्रऽहत्ये । हव्यः । सः । ईड्यः । सः । सुऽस्तुतः । इन्द्रः । सत्यऽराधाः ।
   सः । यामन् । आ । मघऽवा । मर्त्याय । ब्रह्मण्यते । सुस्वये । वरिवः । धात् ॥

   sáḥ ǀ vṛtra-hátye ǀ hávyaḥ ǀ sáḥ ǀ ī́ḍyaḥ ǀ sáḥ ǀ sú-stutaḥ ǀ índraḥ ǀ satyá-rādhāḥ ǀ
   sáḥ ǀ yā́man ǀ ā́ ǀ maghá-vā ǀ mártyāya ǀ brahmaṇyaté ǀ súsvaye ǀ várivaḥ ǀ dhāt ǁ

   saḥ ǀ vṛtra-hatye ǀ havyaḥ ǀ saḥ ǀ īḍyaḥ ǀ saḥ ǀ su-stutaḥ ǀ indraḥ ǀ satya-rādhāḥ ǀ
   saḥ ǀ yāman ǀ ā ǀ magha-vā ǀ martyāya ǀ brahmaṇyate ǀ susvaye ǀ varivaḥ ǀ dhāt ǁ

   4.24.2 Aṣṭaka 3.6.11.2Anuvāka 4.3.24Interpretations

3. Ṛk 3

   तमिन्नरो॒ वि ह्व॑यंते समी॒के रि॑रि॒क्वांस॑स्त॒न्वः॑ कृण्वत॒ त्रां ।
   मि॒थो यत्त्या॒गमु॒भया॑सो॒ अग्म॒न्नर॑स्तो॒कस्य॒ तन॑यस्य सा॒तौ ॥

   तम् इन् नरो वि ह्वयन्ते समीके रिरिक्वांसस् तन्वः कृण्वत त्राम् |
   मिथो यत् त्यागम् उभयासो अग्मन् नरस् तोकस्य तनयस्य सातौ ||

   támínnáro ví hvayante samīké ririkvā́ṃsastanváḥ kṛṇvata trā́m ǀ
   mithó yáttyāgámubháyāso ágmannárastokásya tánayasya sātáu ǁ

   tam in naro vi hvayante samīke ririkvāṃsas tanvaḥ kṛṇvata trām |
   mitho yat tyāgam ubhayāso agman naras tokasya tanayasya sātau ||

   तम् । इत् । नरः॑ । वि । ह्व॒य॒न्ते॒ । स॒म्ऽई॒के । रि॒रि॒क्वांसः॑ । त॒न्वः॑ । कृ॒ण्व॒त॒ । त्राम् ।
   मि॒थः । यत् । त्या॒गम् । उ॒भया॑सः । अग्म॑न् । नरः॑ । तो॒कस्य॑ । तन॑यस्य । सा॒तौ ॥

   तम् । इत् । नरः । वि । ह्वयन्ते । सम्ऽईके । रिरिक्वांसः । तन्वः । कृण्वत । त्राम् ।
   मिथः । यत् । त्यागम् । उभयासः । अग्मन् । नरः । तोकस्य । तनयस्य । सातौ ॥

   tám ǀ ít ǀ náraḥ ǀ ví ǀ hvayante ǀ sam-īké ǀ ririkvā́ṃsaḥ ǀ tanváḥ ǀ kṛṇvata ǀ trā́m ǀ
   mitháḥ ǀ yát ǀ tyāgám ǀ ubháyāsaḥ ǀ ágman ǀ náraḥ ǀ tokásya ǀ tánayasya ǀ sātáu ǁ

   tam ǀ it ǀ naraḥ ǀ vi ǀ hvayante ǀ sam-īke ǀ ririkvāṃsaḥ ǀ tanvaḥ ǀ kṛṇvata ǀ trām ǀ
   mithaḥ ǀ yat ǀ tyāgam ǀ ubhayāsaḥ ǀ agman ǀ naraḥ ǀ tokasya ǀ tanayasya ǀ sātau ǁ

   4.24.3 Aṣṭaka 3.6.11.3Anuvāka 4.3.25Interpretations

4. Ṛk 4

   क्र॒तू॒यंति॑ क्षि॒तयो॒ योग॑ उग्राशुषा॒णासो॑ मि॒थो अर्ण॑सातौ ।
   सं यद्विशोऽव॑वृत्रंत यु॒ध्मा आदिन्नेम॑ इंद्रयंते अ॒भीके॑ ॥

   क्रतूयन्ति क्षितयो योग उग्राशुषाणासो मिथो अर्णसातौ |
   सं यद् विशो ऽववृत्रन्त युध्मा आद् इन् नेम इन्द्रयन्ते अभीके ||

   kratūyánti kṣitáyo yóga ugrāśuṣāṇā́so mithó árṇasātau ǀ
   sám yádvíśó’vavṛtranta yudhmā́ ā́dínnéma indrayante abhī́ke ǁ

   kratūyanti kṣitayo yoga ugrāśuṣāṇāso mitho arṇasātau |
   saṃ yad viśo 'vavṛtranta yudhmā ād in nema indrayante abhīke ||

   क्र॒तु॒ऽयन्ति॑ । क्षि॒तयः॑ । योगे॑ । उ॒ग्र॒ । आ॒शु॒षा॒णासः॑ । मि॒थः । अर्ण॑ऽसातौ ।
   सम् । यत् । विशः॑ । अव॑वृत्रन्त । यु॒ध्माः । आत् । इत् । नेमे॑ । इ॒न्द्र॒य॒न्ते॒ । अ॒भीके॑ ॥

   क्रतुऽयन्ति । क्षितयः । योगे । उग्र । आशुषाणासः । मिथः । अर्णऽसातौ ।
   सम् । यत् । विशः । अववृत्रन्त । युध्माः । आत् । इत् । नेमे । इन्द्रयन्ते । अभीके ॥

   kratu-yánti ǀ kṣitáyaḥ ǀ yóge ǀ ugra ǀ āśuṣāṇā́saḥ ǀ mitháḥ ǀ árṇa-sātau ǀ
   sám ǀ yát ǀ víśaḥ ǀ ávavṛtranta ǀ yudhmā́ḥ ǀ ā́t ǀ ít ǀ néme ǀ indrayante ǀ abhī́ke ǁ

   kratu-yanti ǀ kṣitayaḥ ǀ yoge ǀ ugra ǀ āśuṣāṇāsaḥ ǀ mithaḥ ǀ arṇa-sātau ǀ
   sam ǀ yat ǀ viśaḥ ǀ avavṛtranta ǀ yudhmāḥ ǀ āt ǀ it ǀ neme ǀ indrayante ǀ abhīke ǁ

   4.24.4 Aṣṭaka 3.6.11.4Anuvāka 4.3.26Interpretations

5. Ṛk 5

   आदिद्ध॒ नेम॑ इंद्रि॒यं य॑जंत॒ आदित्प॒क्तिः पु॑रो॒ळाशं॑ रिरिच्यात् ।
   आदित्सोमो॒ वि प॑पृच्या॒दसु॑ष्वी॒नादिज्जु॑जोष वृष॒भं यज॑ध्यै ॥

   आद् इद् ध नेम इन्द्रियं यजन्त आद् इत् पक्तिः पुरोऌआशं रिरिच्यात् |
   आद् इत् सोमो वि पपृच्याद् असुष्वीन् आद् इज् जुजोष वृषभं यजध्यै ||

   ā́díddha néma indriyám yajanta ā́dítpaktíḥ puroḷā́śam riricyāt ǀ
   ā́dítsómo ví papṛcyādásuṣvīnā́díjjujoṣa vṛṣabhám yájadhyai ǁ

   ād id dha nema indriyaṃ yajanta ād it paktiḥ puroḷāśaṃ riricyāt |
   ād it somo vi papṛcyād asuṣvīn ād ij jujoṣa vṛṣabhaṃ yajadhyai ||

   आत् । इत् । ह॒ । नेमे॑ । इ॒न्द्रि॒यम् । य॒ज॒न्ते॒ । आत् । इत् । प॒क्तिः । पु॒रो॒ळाश॑म् । रि॒रि॒च्या॒त् ।
   आत् । इत् । सोमः॑ । वि । प॒पृ॒च्या॒त् । असु॑स्वीन् । आत् । इत् । जु॒जो॒ष॒ । वृ॒ष॒भम् । यज॑ध्यै ॥

   आत् । इत् । ह । नेमे । इन्द्रियम् । यजन्ते । आत् । इत् । पक्तिः । पुरोळाशम् । रिरिच्यात् ।
   आत् । इत् । सोमः । वि । पपृच्यात् । असुस्वीन् । आत् । इत् । जुजोष । वृषभम् । यजध्यै ॥

   ā́t ǀ ít ǀ ha ǀ néme ǀ indriyám ǀ yajante ǀ ā́t ǀ ít ǀ paktíḥ ǀ puroḷā́śam ǀ riricyāt ǀ
   ā́t ǀ ít ǀ sómaḥ ǀ ví ǀ papṛcyāt ǀ ásusvīn ǀ ā́t ǀ ít ǀ jujoṣa ǀ vṛṣabhám ǀ yájadhyai ǁ

   āt ǀ it ǀ ha ǀ neme ǀ indriyam ǀ yajante ǀ āt ǀ it ǀ paktiḥ ǀ puroḷāśam ǀ riricyāt ǀ
   āt ǀ it ǀ somaḥ ǀ vi ǀ papṛcyāt ǀ asusvīn ǀ āt ǀ it ǀ jujoṣa ǀ vṛṣabham ǀ yajadhyai ǁ

   4.24.5 Aṣṭaka 3.6.11.5Anuvāka 4.3.27Interpretations

6. Ṛk 6

   कृ॒णोत्य॑स्मै॒ वरि॑वो॒ य इ॒त्थेंद्रा॑य॒ सोम॑मुश॒ते सु॒नोति॑ ।
   स॒ध्री॒चीने॑न॒ मन॒सावि॑वेनं॒तमित्सखा॑यं कृणुते स॒मत्सु॑ ॥

   कृणोत्य् अस्मै वरिवो य इत्थेन्द्राय सोमम् उशते सुनोति |
   सध्रीचीनेन मनसाविवेनन् तम् इत् सखायं कृणुते समत्सु ||

   kṛṇótyasmai várivo yá itthéndrāya sómamuśaté sunóti ǀ
   sadhrīcī́nena mánasā́vivenantámítsákhāyam kṛṇute samátsu ǁ

   kṛṇoty asmai varivo ya itthendrāya somam uśate sunoti |
   sadhrīcīnena manasāvivenan tam it sakhāyaṃ kṛṇute samatsu ||

   कृ॒णोति॑ । अ॒स्मै॒ । वरि॑वः । यः । इ॒त्था । इन्द्रा॑य । सोम॑म् । उ॒श॒ते । सु॒नोति॑ ।
   स॒ध्री॒चीने॑न । मन॑सा । अवि॑ऽवेनन् । तम् । इत् । सखा॑यम् । कृ॒णु॒ते॒ । स॒मत्ऽसु॑ ॥

   कृणोति । अस्मै । वरिवः । यः । इत्था । इन्द्राय । सोमम् । उशते । सुनोति ।
   सध्रीचीनेन । मनसा । अविऽवेनन् । तम् । इत् । सखायम् । कृणुते । समत्ऽसु ॥

   kṛṇóti ǀ asmai ǀ várivaḥ ǀ yáḥ ǀ itthā́ ǀ índrāya ǀ sómam ǀ uśaté ǀ sunóti ǀ
   sadhrīcī́nena ǀ mánasā ǀ ávi-venan ǀ tám ǀ ít ǀ sákhāyam ǀ kṛṇute ǀ samát-su ǁ

   kṛṇoti ǀ asmai ǀ varivaḥ ǀ yaḥ ǀ itthā ǀ indrāya ǀ somam ǀ uśate ǀ sunoti ǀ
   sadhrīcīnena ǀ manasā ǀ avi-venan ǀ tam ǀ it ǀ sakhāyam ǀ kṛṇute ǀ samat-su ǁ

   4.24.6 Aṣṭaka 3.6.12.1Anuvāka 4.3.28Interpretations

7. Ṛk 7

   य इंद्रा॑य सु॒नव॒त्सोम॑म॒द्य पचा॑त्प॒क्तीरु॒त भृ॒ज्जाति॑ धा॒नाः ।
   प्रति॑ मना॒योरु॒चथा॑नि॒ हर्यं॒तस्मिं॑दध॒द्वृष॑णं॒ शुष्म॒मिंद्रः॑ ॥

   य इन्द्राय सुनवत् सोमम् अद्य पचात् पक्तीर् उत भृज्जाति धानाः |
   प्रति मनायोर् उचथानि हर्यन् तस्मिन् दधद् वृषणं शुष्मम् इन्द्रः ||

   yá índrāya sunávatsómamadyá pácātpaktī́rutá bhṛjjā́ti dhānā́ḥ ǀ
   práti manāyórucáthāni háryantásmindadhadvṛ́ṣaṇam śúṣmamíndraḥ ǁ

   ya indrāya sunavat somam adya pacāt paktīr uta bhṛjjāti dhānāḥ |
   prati manāyor ucathāni haryan tasmin dadhad vṛṣaṇaṃ śuṣmam indraḥ ||

   यः । इन्द्रा॑य । सु॒नव॑त् । सोम॑म् । अ॒द्य । पचा॑त् । प॒क्तीः । उ॒त । भृ॒ज्जाति॑ । धा॒नाः ।
   प्रति॑ । म॒ना॒योः । उ॒चथा॑नि । हर्य॑न् । तस्मि॑न् । द॒ध॒त् । वृष॑णम् । शुष्म॑म् । इन्द्रः॑ ॥

   यः । इन्द्राय । सुनवत् । सोमम् । अद्य । पचात् । पक्तीः । उत । भृज्जाति । धानाः ।
   प्रति । मनायोः । उचथानि । हर्यन् । तस्मिन् । दधत् । वृषणम् । शुष्मम् । इन्द्रः ॥

   yáḥ ǀ índrāya ǀ sunávat ǀ sómam ǀ adyá ǀ pácāt ǀ paktī́ḥ ǀ utá ǀ bhṛjjā́ti ǀ dhānā́ḥ ǀ
   práti ǀ manāyóḥ ǀ ucáthāni ǀ háryan ǀ tásmin ǀ dadhat ǀ vṛ́ṣaṇam ǀ śúṣmam ǀ índraḥ ǁ

   yaḥ ǀ indrāya ǀ sunavat ǀ somam ǀ adya ǀ pacāt ǀ paktīḥ ǀ uta ǀ bhṛjjāti ǀ dhānāḥ ǀ
   prati ǀ manāyoḥ ǀ ucathāni ǀ haryan ǀ tasmin ǀ dadhat ǀ vṛṣaṇam ǀ śuṣmam ǀ indraḥ ǁ

   4.24.7 Aṣṭaka 3.6.12.2Anuvāka 4.3.29Interpretations

8. Ṛk 8

   य॒दा स॑म॒र्यं व्यचे॒दृघा॑वा दी॒र्घं यदा॒जिम॒भ्यख्य॑द॒र्यः ।
   अचि॑क्रद॒द्वृष॑णं॒ पत्न्यच्छा॑ दुरो॒ण आ निशि॑तं सोम॒सुद्भिः॑ ॥

   यदा समर्यं व्य् अचेद् ऋघावा दीर्घं यद् आजिम् अभ्य् अख्यद् अर्यः |
   अचिक्रदद् वृषणम् पत्न्य् अच्छा दुरोण आ निशितं सोमसुद्भिः ||

   yadā́ samaryám vyácedṛ́ghāvā dīrghám yádājímabhyákhyadaryáḥ ǀ
   ácikradadvṛ́ṣaṇam pátnyácchā duroṇá ā́ níśitam somasúdbhiḥ ǁ

   yadā samaryaṃ vy aced ṛghāvā dīrghaṃ yad ājim abhy akhyad aryaḥ |
   acikradad vṛṣaṇam patny acchā duroṇa ā niśitaṃ somasudbhiḥ ||

   य॒दा । स॒ऽम॒र्यम् । वि । अचे॑त् । ऋघा॑वा । दी॒र्घम् । यत् । आ॒जिम् । अ॒भि । अख्य॑त् । अ॒र्यः ।
   अचि॑क्रदत् । वृष॑णम् । पत्नी॑ । अच्छ॑ । दु॒रो॒णे । आ । निऽशि॑तम् । सो॒म॒सुत्ऽभिः॑ ॥

   यदा । सऽमर्यम् । वि । अचेत् । ऋघावा । दीर्घम् । यत् । आजिम् । अभि । अख्यत् । अर्यः ।
   अचिक्रदत् । वृषणम् । पत्नी । अच्छ । दुरोणे । आ । निऽशितम् । सोमसुत्ऽभिः ॥

   yadā́ ǀ sa-maryám ǀ ví ǀ ácet ǀ ṛ́ghāvā ǀ dīrghám ǀ yát ǀ ājím ǀ abhí ǀ ákhyat ǀ aryáḥ ǀ
   ácikradat ǀ vṛ́ṣaṇam ǀ pátnī ǀ áccha ǀ duroṇé ǀ ā́ ǀ ní-śitam ǀ somasút-bhiḥ ǁ

   yadā ǀ sa-maryam ǀ vi ǀ acet ǀ ṛghāvā ǀ dīrgham ǀ yat ǀ ājim ǀ abhi ǀ akhyat ǀ aryaḥ ǀ
   acikradat ǀ vṛṣaṇam ǀ patnī ǀ accha ǀ duroṇe ǀ ā ǀ ni-śitam ǀ somasut-bhiḥ ǁ

   4.24.8 Aṣṭaka 3.6.12.3Anuvāka 4.3.30Interpretations

9. Ṛk 9

   भूय॑सा व॒स्नम॑चर॒त्कनी॒योऽवि॑क्रीतो अकानिषं॒ पुन॒र्यन् ।
   स भूय॑सा॒ कनी॑यो॒ नारि॑रेचीद्दी॒ना दक्षा॒ वि दु॑हंति॒ प्र वा॒णं ॥

   भूयसा वस्नम् अचरत् कनीयो ऽविक्रीतो अकानिषम् पुनर् यन् |
   स भूयसा कनीयो नारिरेचीद् दीना दक्षा वि दुहन्ति प्र वाणम् ||

   bhū́yasā vasnámacaratkánīyó’vikrīto akāniṣam púnaryán ǀ
   sá bhū́yasā kánīyo nā́rirecīddīnā́ dákṣā ví duhanti prá vāṇám ǁ

   bhūyasā vasnam acarat kanīyo 'vikrīto akāniṣam punar yan |
   sa bhūyasā kanīyo nārirecīd dīnā dakṣā vi duhanti pra vāṇam ||

   भूय॑सा । व॒स्नम् । अ॒च॒र॒त् । कनी॑यः । अवि॑ऽक्रीतः । अ॒का॒नि॒ष॒म् । पुनः॑ । यन् ।
   सः । भूय॑सा । कनी॑यः । न । अ॒रि॒रे॒ची॒त् । दी॒नाः । दक्षाः॑ । वि । दु॒ह॒न्ति॒ । प्र । वा॒णम् ॥

   भूयसा । वस्नम् । अचरत् । कनीयः । अविऽक्रीतः । अकानिषम् । पुनः । यन् ।
   सः । भूयसा । कनीयः । न । अरिरेचीत् । दीनाः । दक्षाः । वि । दुहन्ति । प्र । वाणम् ॥

   bhū́yasā ǀ vasnám ǀ acarat ǀ kánīyaḥ ǀ ávi-krītaḥ ǀ akāniṣam ǀ púnaḥ ǀ yán ǀ
   sáḥ ǀ bhū́yasā ǀ kánīyaḥ ǀ ná ǀ arirecīt ǀ dīnā́ḥ ǀ dákṣāḥ ǀ ví ǀ duhanti ǀ prá ǀ vāṇám ǁ

   bhūyasā ǀ vasnam ǀ acarat ǀ kanīyaḥ ǀ avi-krītaḥ ǀ akāniṣam ǀ punaḥ ǀ yan ǀ
   saḥ ǀ bhūyasā ǀ kanīyaḥ ǀ na ǀ arirecīt ǀ dīnāḥ ǀ dakṣāḥ ǀ vi ǀ duhanti ǀ pra ǀ vāṇam ǁ

   4.24.9 Aṣṭaka 3.6.12.4Anuvāka 4.3.31Interpretations

10. Ṛk 10

    क इ॒मं द॒शभि॒र्ममेंद्रं॑ क्रीणाति धे॒नुभिः॑ ।
    य॒दा वृ॒त्राणि॒ जंघ॑न॒दथै॑नं मे॒ पुन॑र्ददत् ॥

    क इमं दशभिर् ममेन्द्रं क्रीणाति धेनुभिः |
    यदा वृत्राणि जङ्घनद् अथैनम् मे पुनर् ददत् ||

    ká imám daśábhirmáméndram krīṇāti dhenúbhiḥ ǀ
    yadā́ vṛtrā́ṇi jáṅghanadáthainam me púnardadat ǁ

    ka imaṃ daśabhir mamendraṃ krīṇāti dhenubhiḥ |
    yadā vṛtrāṇi jaṅghanad athainam me punar dadat ||

    कः । इ॒मम् । द॒शऽभिः॑ । मम॑ । इन्द्र॑म् । क्री॒णा॒ति॒ । धे॒नुऽभिः॑ ।
    य॒दा । वृ॒त्राणि॑ । जङ्घ॑नत् । अथ॑ । ए॒न॒म् । मे॒ । पुनः॑ । द॒द॒त् ॥

    कः । इमम् । दशऽभिः । मम । इन्द्रम् । क्रीणाति । धेनुऽभिः ।
    यदा । वृत्राणि । जङ्घनत् । अथ । एनम् । मे । पुनः । ददत् ॥

    káḥ ǀ imám ǀ daśá-bhiḥ ǀ máma ǀ índram ǀ krīṇāti ǀ dhenú-bhiḥ ǀ
    yadā́ ǀ vṛtrā́ṇi ǀ jáṅghanat ǀ átha ǀ enam ǀ me ǀ púnaḥ ǀ dadat ǁ

    kaḥ ǀ imam ǀ daśa-bhiḥ ǀ mama ǀ indram ǀ krīṇāti ǀ dhenu-bhiḥ ǀ
    yadā ǀ vṛtrāṇi ǀ jaṅghanat ǀ atha ǀ enam ǀ me ǀ punaḥ ǀ dadat ǁ

    4.24.10 Aṣṭaka 3.6.12.5Anuvāka 4.3.32Interpretations

11. Ṛk 11

    नू ष्टु॒त इं॑द्र॒ नू गृ॑णा॒न इषं॑ जरि॒त्रे न॒द्यो॒३॒॑ न पी॑पेः ।
    अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्यः॑ सदा॒साः ॥

    नू ष्टुत इन्द्र नू गृणान इषं जरित्रे नद्यो न पीपेः |
    अकारि ते हरिवो ब्रह्म नव्यं धिया स्याम रथ्यः सदासाः ||

    nū́ ṣṭutá indra nū́ gṛṇāná íṣam jaritré nadyó ná pīpeḥ ǀ
    ákāri te harivo bráhma návyam dhiyā́ syāma rathyáḥ sadāsā́ḥ ǁ

    nū ṣṭuta indra nū gṛṇāna iṣaṃ jaritre nadyo na pīpeḥ |
    akāri te harivo brahma navyaṃ dhiyā syāma rathyaḥ sadāsāḥ ||

    नु । स्तु॒तः । इ॒न्द्र॒ । नु । गृ॒णा॒नः । इष॑म् । ज॒रि॒त्रे । न॒द्यः॑ । न । पी॒पे॒रिति॑ पीपेः ।
    अका॑रि । ते॒ । ह॒रि॒ऽवः॒ । ब्रह्म॑ । नव्य॑म् । धि॒या । स्या॒म॒ । र॒थ्यः॑ । स॒दा॒ऽसाः ॥

    नु । स्तुतः । इन्द्र । नु । गृणानः । इषम् । जरित्रे । नद्यः । न । पीपेरिति पीपेः ।
    अकारि । ते । हरिऽवः । ब्रह्म । नव्यम् । धिया । स्याम । रथ्यः । सदाऽसाः ॥

    nú ǀ stutáḥ ǀ indra ǀ nú ǀ gṛṇānáḥ ǀ íṣam ǀ jaritré ǀ nadyáḥ ǀ ná ǀ pīperíti pīpeḥ ǀ
    ákāri ǀ te ǀ hari-vaḥ ǀ bráhma ǀ návyam ǀ dhiyā́ ǀ syāma ǀ rathyáḥ ǀ sadā-sā́ḥ ǁ

    nu ǀ stutaḥ ǀ indra ǀ nu ǀ gṛṇānaḥ ǀ iṣam ǀ jaritre ǀ nadyaḥ ǀ na ǀ pīperiti pīpeḥ ǀ
    akāri ǀ te ǀ hari-vaḥ ǀ brahma ǀ navyam ǀ dhiyā ǀ syāma ǀ rathyaḥ ǀ sadā-sāḥ ǁ

    4.24.11 Aṣṭaka 3.6.12.6Anuvāka 4.3.33Interpretations

Text, recitation and interpretations from the Ṛgveda database of theveda.org.in.