अथाग्निः ॥ (१।१)

षोडशाङ्गुलं तावदन्तरं मण्डलसप्तकं कुर्यात् ॥ (२।१)

ततः प्राङ्मुखस्य प्रसारितभुजद्वयस्य सप्ताश्वत्थपत्राणि करयोर् दद्यात् ॥ (३।१)

तानि च करद्वयसहितानि सूत्रेण वेष्टयेत् ॥ (४।१)

ततस् तत्राग्निवर्णं लोहपिण्डं पञ्चाशत्पलिकं समं न्यसेत् ॥ (५।१)

तम् आदाय नातिद्रुतं नातिविलम्बितं मण्डलेषु पादन्यासं कुर्वन् व्रजेत् ॥ (६।१)

ततः सप्तमं मण्डलम् अतीत्य भूमौ लोहपिण्डं जह्यात् ॥ (७।१)

यो हस्तयोः क्वचिद् दग्धस् तम् अशुद्धं विनिर्दिशेत् । (८।१)

न दग्धः सर्वथा यस् तु स विशुद्धो भवेन् नरः ॥ (८।२)

भयाद् वा पातयेद् यस् तु दग्धो वा न विभाव्यते । (९।१)

पुनस् तं हारयेल्लोहं समयस्याविशोधनात् ॥ (९।२)

करौ विमृदितव्रीहेस् तस्यादावेव लक्षयेत् । (१०।१)

अभिमन्त्र्यास्य करयोर् लोहपिण्डं ततो न्यसेत् ॥ (१०।२)

त्वम् अग्ने सर्वभूतानाम् अन्तश् चरसि साक्षिवत् । (११।१)

त्वम् एवाग्ने विजानीषे न विदुर् यानि मानवाः ॥ (११।२)

व्यवहाराभिशस्तो ऽयं मानुषः शुद्धिम् इच्छति । (१२।१)

तद् एनं संशयाद् अस्माद् धर्मतस् त्रातुम् अर्हसि ॥ (१२।२)