अथ कृच्छ्राणि भवन्ति ॥ (१।१)

त्र्यहं नाश्नीयात् ॥ (२।१)

प्रत्यहं च त्रिषवणं स्नानम् आचरेत् ॥ (३।१)

त्रिः प्रतिस्नानम् अप्सु मज्जनम् ॥ (४।१)

मग्नस् त्रिर् अघमर्षणं जपेत् ॥ (५।१)

दिवा स्थितस् तिष्ठेत् ॥ (६।१)

रात्राव् आसीनः ॥ (७।१)

कर्मणो ऽन्ते पयस्विनीं दद्यात् ॥ (८।१)

इत्य् अघमर्षणम् ॥ (९।१)

त्र्यहं सायं त्र्यहं प्रातस् त्र्यहम् अयाचितम् अश्नीयात् । (१०।१)

एष प्राजापत्यः ॥ (१०।२)

त्र्यहम् उष्णाः पिबेद् अपस् त्र्यहम् उष्णं घृतं त्र्यहम् उष्णं पयस् त्र्यहं च नाश्नीयाद् एष तप्तकृच्छ्रः ॥ (११।१)

एतैर् एव शीतैः शीतकृच्छ्रः ॥ (१२।१)

कृच्छ्रातिकृच्छ्रः पयसा दिवसैकविंशतिक्षपणम् ॥ (१३।१)

उदकसक्तूनां मासाभ्यवहारेणोदककृच्छ्रः ॥ (१४।१)

बिसाभ्यवहारेण मूलकृच्छ्रः ॥ (१५।१)

बिल्वाभ्यवहारेण श्रीफलकृच्छ्रः ॥ (१६।१)

पद्माक्षैर् वा ॥ (१७।१)

निराहारस्य द्वादशाहेन पराकः ॥ (१८।१)

गोमूत्रं गोमयं क्षीरं दधि सर्पिः कुशोदकान्य् एकदिवसम् अश्नीयात् । (१९।१)

द्वितीयम् उपवसेत् । (१९।२)

एतत् सांतपनम् ॥ (१९।३)

गोमूत्रादिभिः प्रत्यहम् अभ्यस्तैर् महासांतपनम् ॥ (२०।१)

त्र्यहाभ्यस्तैश् चातिसांतपनम् ॥ (२१।१)

पिण्याकाचामतक्रोदकसक्तूनाम् उपवासान्तरितो ऽभ्यवहारस् तुलापुरुषः ॥ (२२।१)

कुशपलाशोदुम्बरपद्मशङ्खपुष्पीवटब्राह्मीसुवर्चलापत्रैः क्वथितस्याम्भसः प्रत्येकं पानेन पर्णकृच्छ्रः ॥ (२३।१)

कृच्छ्राण्य् एतानि सर्वाणि कुर्वीत कृतवापनः । (२४।१)

नित्यं त्रिषवणस्नायी अधःशायी जितेन्द्रियः ॥ (२४।२)

स्त्रीशूद्रपतितानां च वर्जयेच् चातिभाषणम् । (२५।१)

पवित्राणि जपेन् नित्यं जुहुयाच् चैव शक्तितः ॥ (२५।२)