सर्वदानाधिकम् अभयप्रदानम् ॥ (१।१)

तत्प्रदानेनाभीप्सितं लोकम् आप्नोति ॥ (२।१)

भूमिदानेन च ॥ (३।१)

गोचर्ममात्राम् अपि भुवं प्रदाय सर्वपापेभ्यः पूतो भवति ॥ (४।१)

गोप्रदानेन स्वर्गलोकम् आप्नोति ॥ (५।१)

दशधेनुप्रदो गोलोकान् ॥ (६।१)

शतधेनुप्रदो ब्रह्मलोकान् ॥ (७।१)

सुवर्णशृङ्गीं रौप्यखुरां मुक्तालाङ्गूलां कांस्योपदोहां वस्त्रोत्तरीयां दत्त्वा धेनुरोमसंख्यानि वर्षाणि स्वर्गलोकम् आप्नोति ॥ (८।१)

विशेषतः कपिलाम् ॥ (९।१)

दान्तं धुरंधरं दत्त्वा दशधेनुप्रदो भवति ॥ (१०।१)

अश्वदः सूर्यसालोक्यम् आप्नोति ॥ (११।१)

वासोदश्चन्द्रसालोक्यम् ॥ (१२।१)

सुवर्णदानेनाग्निसालोक्यम् ॥ (१३।१)

रूप्यदानेन रूपम् ॥ (१४।१)

तैजसानां पात्राणां प्रदानेन पात्रीभवति सर्वकामानाम् ॥ (१५।१)

घृतमधुतैलप्रदानेनारोग्यम् ॥ (१६।१)

औषधप्रदानेन ॥ (१७।१)

लवणदानेन च लावण्यम् ॥ (१८।१)

धान्यप्रदानेन तृप्तिम् ॥ (१९।१)

सस्यप्रदानेन च ॥ (२०।१)

अन्नदः सर्वम् ॥ (२१।१)

धान्यप्रदानेन सौभाग्यम् ॥ (२२।१)

तिलप्रदः प्रजाम् इष्टाम् ॥ (२३।१)

इन्धनप्रदानेन दीप्ताग्निर् भवति ॥ (२४।१)

संग्रामे च सर्वजयम् आप्नोति ॥ (२५।१)

आसनप्रदानेन स्थानम् ॥ (२६।१)

शय्याप्रदानेन भार्याम् ॥ (२७।१)

उपानत्प्रदानेनाश्वतरीयुक्तं रथम् ॥ (२८।१)

छत्रप्रदानेन स्वर्गम् ॥ (२९।१)

तालवृन्तचामरप्रदानेनाध्वसुखित्वम् ॥ (३०।१)

वास्तुप्रदानेन नगराधिपत्यम् ॥ (३१।१)

यद् यद् इष्टतमं लोके यच्चास्ति दयितं गृहे । (३२।१)

तत् तद् गुणवते देयं तद् एवाक्षयम् इच्छता ॥ (३२।२)